Chapter 40

anuraktā mahātmānaṃ rāmaṃ satyaparakramam |
anujagmuḥ prayāntaṃ taṃ vanavāsāya mānavāḥ || 1 ||
[Analyze grammar]

nivartite'pi ca balāt suhṛdvarge ca rājini |
naiva te saṃnyavartanta rāmasyānugatā ratham || 2 ||
[Analyze grammar]

ayodhyānilayānāṃ hi puruṣāṇāṃ mahāyaśāḥ |
babhūva guṇasaṃpannaḥ pūrṇacandra iva priyaḥ || 3 ||
[Analyze grammar]

sa yācyamānaḥ kākutsthaḥ svābhiḥ prakṛtibhistadā |
kurvāṇaḥ pitaraṃ satyaṃ vanamevānvapadyata || 4 ||
[Analyze grammar]

avekṣamāṇaḥ sasnehaṃ cakṣuṣā prapibanniva |
uvāca rāmaḥ snehena tāḥ prajāḥ svāḥ prajā iva || 5 ||
[Analyze grammar]

yā prītirbahumānaśca mayyayodhyānivāsinām |
matpriyārthaṃ viśeṣeṇa bharate sā niveśyatām || 6 ||
[Analyze grammar]

sa hi kalyāṇa cāritraḥ kaikeyyānandavardhanaḥ |
kariṣyati yathāvadvaḥ priyāṇi ca hitāni ca || 7 ||
[Analyze grammar]

jñānavṛddho vayobālo mṛdurvīryaguṇānvitaḥ |
anurūpaḥ sa vo bhartā bhaviṣyati bhayāpahaḥ || 8 ||
[Analyze grammar]

sa hi rājaguṇairyukto yuvarājaḥ samīkṣitaḥ |
api cāpi mayā śiṣṭaiḥ kāryaṃ vo bhartṛśāsanam || 9 ||
[Analyze grammar]

na ca tapyed yathā cāsau vanavāsaṃ gate mayi |
mahārājastathā kāryo mama priyacikīrṣayā || 10 ||
[Analyze grammar]

yathā yathā dāśarathirdharmamevāsthito'bhavat |
tathā tathā prakṛtayo rāmaṃ patimakāmayan || 11 ||
[Analyze grammar]

bāṣpeṇa pihitaṃ dīnaṃ rāmaḥ saumitriṇā saha |
cakarṣeva guṇairbaddhvā janaṃ punarivāsanam || 12 ||
[Analyze grammar]

te dvijāstrividhaṃ vṛddhā jñānena vayasaujasā |
vayaḥprakampaśiraso dūrādūcuridaṃ vacaḥ || 13 ||
[Analyze grammar]

vahanto javanā rāmaṃ bho bho jātyāsturaṃgamāḥ |
nivartadhvaṃ na gantavyaṃ hitā bhavata bhartari |
upavāhyastu vo bhartā nāpavāhyaḥ purādvanam || 14 ||
[Analyze grammar]

evamārtapralāpāṃstān vṛddhānpralapato dvijān |
avekṣya sahasā rāmo rathādavatatāra ha || 15 ||
[Analyze grammar]

padbhyāmeva jagāmātha sasītaḥ sahalakṣmaṇaḥ |
saṃnikṛṣṭapadanyāso rāmo vanaparāyaṇaḥ || 16 ||
[Analyze grammar]

dvijātīṃstu padātīṃstān rāmaścāritravatsalaḥ |
na śaśāka ghṛṇācakṣuḥ parimoktuṃ rathena saḥ || 17 ||
[Analyze grammar]

gacchantameva taṃ dṛṣṭvā rāmaṃ saṃbhrāntamānasāḥ |
ūcuḥ paramasaṃtaptā rāmaṃ vākyamidaṃ dvijāḥ || 18 ||
[Analyze grammar]

brāhmaṇyaṃ kṛtsnametattvāṃ brahmaṇyamanugacchati |
dvijaskandhādhirūḍhāstvāmagnayo'pyanuyāntyamī || 19 ||
[Analyze grammar]

vājapeyasamutthāni chatrāṇyetāni paśya naḥ |
pṛṣṭhato'nuprayātāni haṃsāniva jalātyaye || 20 ||
[Analyze grammar]

anavāptātapatrasya raśmisaṃtāpitasya te |
ebhiśchāyāṃ kariṣyāmaḥ svaiśchatrairvājapeyikaiḥ || 21 ||
[Analyze grammar]

yā hi naḥ satataṃ buddhirvedamantrānusāriṇī |
tvatkṛte sā kṛtā vatsa vanavāsānusāriṇī || 22 ||
[Analyze grammar]

hṛdayeṣvavatiṣṭhante vedā ye naḥ paraṃ dhanam |
vatsyantyapi gṛheṣveva dārāścāritrarakṣitāḥ || 23 ||
[Analyze grammar]

na punarniścayaḥ kāryastvadgatau sukṛtā matiḥ |
tvayi dharmavyapekṣe tu kiṃ syāddharmamavekṣitum || 24 ||
[Analyze grammar]

yācito no nivartasva haṃsaśuklaśiroruhaiḥ |
śirobhirnibhṛtācāra mahīpatanapāṃśulaiḥ || 25 ||
[Analyze grammar]

bahūnāṃ vitatā yajñā dvijānāṃ ya ihāgatāḥ |
teṣāṃ samāptirāyattā tava vatsa nivartane || 26 ||
[Analyze grammar]

bhaktimanti hi bhūtāni jaṃgamājaṃgamāni ca |
yācamāneṣu teṣu tvaṃ bhaktiṃ bhakteṣu darśaya || 27 ||
[Analyze grammar]

anugaṃtumaśaktāstvāṃ mūlairuddhṛtavegibhiḥ |
unnatā vāyuvegena vikrośantīva pādapāḥ || 28 ||
[Analyze grammar]

niśceṣṭāhārasaṃcārā vṛkṣaikasthānaviṣṭhitāḥ |
pakṣiṇo'pi prayācante sarvabhūtānukampinam || 29 ||
[Analyze grammar]

evaṃ vikrośatāṃ teṣāṃ dvijātīnāṃ nivartane |
dadṛśe tamasā tatra vārayantīva rāghavam || 30 ||
[Analyze grammar]