Chapter 34

rāmasya tu vacaḥ śrutvā muniveṣadharaṃ ca tam |
samīkṣya saha bhāryābhī rājā vigatacetanaḥ || 1 ||
[Analyze grammar]

nainaṃ duḥkhena saṃtaptaḥ pratyavaikṣata rāghavam |
na cainamabhisaṃprekṣya pratyabhāṣata durmanāḥ || 2 ||
[Analyze grammar]

sa muhūrtamivāsaṃjño duḥkhitaśca mahīpatiḥ |
vilalāpa mahābāhū rāmamevānucintayan || 3 ||
[Analyze grammar]

manye khalu mayā pūrvaṃ vivatsā bahavaḥ kṛtāḥ |
prāṇino hiṃsitā vāpi tasmādidamupasthitam || 4 ||
[Analyze grammar]

na tvevānāgate kāle dehāccyavati jīvitam |
kaikeyyā kliśyamānasya mṛtyurmama na vidyate || 5 ||
[Analyze grammar]

yo'haṃ pāvakasaṃkāśaṃ paśyāmi purataḥ sthitam |
vihāya vasane sūkṣme tāpasācchādamātmajam || 6 ||
[Analyze grammar]

ekasyāḥ khalu kaikeyyāḥ kṛte'yaṃ kliśyate janaḥ |
svārthe prayatamānāyāḥ saṃśritya nikṛtiṃ tvimām || 7 ||
[Analyze grammar]

evamuktvā tu vacanaṃ bāṣpeṇa pihitekṣṇaha |
rāmeti sakṛdevoktvā vyāhartuṃ na śaśāka ha || 8 ||
[Analyze grammar]

saṃjñāṃ tu pratilabhyaiva muhūrtāt sa mahīpatiḥ |
netrābhyāmaśrupūrṇābhyāṃ sumantramidamabravīt || 9 ||
[Analyze grammar]

aupavāhyaṃ rathaṃ yuktvā tvamāyāhi hayottamaiḥ |
prāpayainaṃ mahābhāgamito janapadāt param || 10 ||
[Analyze grammar]

evaṃ manye guṇavatāṃ guṇānāṃ phalamucyate |
pitrā mātrā ca yat sādhurvīro nirvāsyate vanam || 11 ||
[Analyze grammar]

rājño vacanamājñāya sumantraḥ śīghravikramaḥ |
yojayitvāyayau tatra rathamaśvairalaṃkṛtam || 12 ||
[Analyze grammar]

taṃ rathaṃ rājaputrāya sūtaḥ kanakabhūṣitam |
ācacakṣe'ñjaliṃ kṛtvā yuktaṃ paramavājibhiḥ || 13 ||
[Analyze grammar]

rājā satvaramāhūya vyāpṛtaṃ vittasaṃcaye |
uvāca deśakālajño niścitaṃ sarvataḥ śuci || 14 ||
[Analyze grammar]

vāsāṃsi ca mahārhāṇi bhūṣaṇāni varāṇi ca |
varṣāṇyetāni saṃkhyāya vaidehyāḥ kṣipramānaya || 15 ||
[Analyze grammar]

narendreṇaivamuktastu gatvā kośagṛhaṃ tataḥ |
prāyacchat sarvamāhṛtya sītāyai kṣiprameva tat || 16 ||
[Analyze grammar]

sā sujātā sujātāni vaidehī prasthitā vanam |
bhūṣayāmāsa gātrāṇi tairvicitrairvibhūṣaṇaiḥ || 17 ||
[Analyze grammar]

vyarājayata vaidehī veśma tat suvibhūṣitā |
udyato'ṃśumataḥ kāle khaṃ prabheva vivasvataḥ || 18 ||
[Analyze grammar]

tāṃ bhujābhyāṃ pariṣvajya śvaśrūrvacanamabravīt |
anācarantīṃ kṛpaṇaṃ mūdhnyupāghrāya maithilīm || 19 ||
[Analyze grammar]

asatyaḥ sarvaloke'smin satataṃ satkṛtāḥ priyaiḥ |
bhartāraṃ nānumanyante vinipātagataṃ striyaḥ || 20 ||
[Analyze grammar]

sa tvayā nāvamantavyaḥ putraḥ pravrājito mama |
tava daivatamastveṣa nirdhanaḥ sadhano'pi vā || 21 ||
[Analyze grammar]

vijñāya vacanaṃ sītā tasyā dharmārthasaṃhitam |
kṛtāñjaliruvācedaṃ śvaśrūmabhimukhe sthitā || 22 ||
[Analyze grammar]

kariṣye sarvamevāhamāryā yadanuśāsti mām |
abhijñāsmi yathā bharturvartitavyaṃ śrutaṃ ca me || 23 ||
[Analyze grammar]

na māmasajjanenāryā samānayitumarhati |
dharmādvicalituṃ nāhamalaṃ candrādiva prabhā || 24 ||
[Analyze grammar]

nātantrī vādyate vīṇā nācakro vartate rathaḥ |
nāpatiḥ sukhamedhate yā syādapi śatātmajā || 25 ||
[Analyze grammar]

mitaṃ dadāti hi pitā mitaṃ mātā mitaṃ sutaḥ |
amitasya hi dātāraṃ bhartāraṃ kā na pūjayet || 26 ||
[Analyze grammar]

sāhamevaṃgatā śreṣṭhā śrutadharmaparāvarā |
ārye kimavamanyeyaṃ strīṇāṃ bhartā hi daivatam || 27 ||
[Analyze grammar]

sītāyā vacanaṃ śrutvā kausalyā hṛdayaṃgamam |
śuddhasattvā mumocāśru sahasā duḥkhaharṣajam || 28 ||
[Analyze grammar]

tāṃ prāñjalirabhikramya mātṛmadhye'tisatkṛtām |
rāmaḥ paramadharmajño mātaraṃ vākyamabravīt || 29 ||
[Analyze grammar]

amba mā duḥkhitā bhūstvaṃ paśya tvaṃ pitaraṃ mama |
kṣayo hi vanavāsasya kṣiprameva bhaviṣyati || 30 ||
[Analyze grammar]

suptāyāste gamiṣyanti navavarṣāṇi pañca ca |
sā samagramiha prāptaṃ māṃ drakṣyasi suhṛdvṛtam || 31 ||
[Analyze grammar]

etāvadabhinītārthamuktvā sa jananīṃ vacaḥ |
trayaḥ śataśatārdhā hi dadarśāvekṣya mātaraḥ || 32 ||
[Analyze grammar]

tāścāpi sa tathaivārtā mātṝrdaśarathātmajaḥ |
dharmayuktamidaṃ vākyaṃ nijagāda kṛtāñjaliḥ || 33 ||
[Analyze grammar]

saṃvāsāt paruṣaṃ kiṃ cidajñānādvāpi yat kṛtam |
tanme samanujānīta sarvāścāmantrayāmi vaḥ || 34 ||
[Analyze grammar]

jajñe'tha tāsāṃ saṃnādaḥ krauñcīnāmiva niḥsvanaḥ |
mānavendrasya bhāryāṇāmevaṃ vadati rāghave || 35 ||
[Analyze grammar]

murajapaṇavameghaghoṣavaddaśarathaveśma babhūva yat purā |
vilapita paridevanākulaṃ vyasanagataṃ tadabhūt suduḥkhitam || 36 ||
[Analyze grammar]