Chapter 32

tataḥ sumantramaikṣvākaḥ pīḍito'tra pratijñayā |
sabāṣpamatiniḥśvasya jagādedaṃ punaḥ punaḥ || 1 ||
[Analyze grammar]

sūta ratnasusaṃpūrṇā caturvidhabalā camūḥ |
rāgavasyānuyātrārthaṃ kṣipraṃ pratividhīyatām || 2 ||
[Analyze grammar]

rūpājīvā ca śālinyo vaṇijaśca mahādhanāḥ |
śobhayantu kumārasya vāhinīṃ suprasāritāḥ || 3 ||
[Analyze grammar]

ye cainamupajīvanti ramate yaiśca vīryataḥ |
teṣāṃ bahuvidhaṃ dattvā tānapyatra niyojaya || 4 ||
[Analyze grammar]

nighnanmṛgān kuñjarāṃśca pibaṃścāraṇyakaṃ madhu |
nadīśca vividhāḥ paśyanna rājyaṃ saṃsmariṣyati || 5 ||
[Analyze grammar]

dhānyakośaśca yaḥ kaściddhanakośaśca māmakaḥ |
tau rāmamanugacchetāṃ vasantaṃ nirjane vane || 6 ||
[Analyze grammar]

yajanpuṇyeṣu deśeṣu visṛjaṃścāptadakṣiṇāḥ |
ṛṣibhiśca samāgamya pravatsyati sukhaṃ vane || 7 ||
[Analyze grammar]

bharataśca mahābāhurayodhyāṃ pālayiṣyati |
sarvakāmaiḥ punaḥ śrīmān rāmaḥ saṃsādhyatāmiti || 8 ||
[Analyze grammar]

evaṃ bruvati kākutsthe kaikeyyā bhayamāgatam |
mukhaṃ cāpyagamācchoṣaṃ svaraścāpi nyarudhyata || 9 ||
[Analyze grammar]

sā viṣaṇṇā ca saṃtrastā kaikeyī vākyamabravīt |
rājyaṃ gatajanaṃ sādho pītamaṇḍāṃ surāmiva |
nirāsvādyatamaṃ śūnyaṃ bharato nābhipatsyate || 10 ||
[Analyze grammar]

kaikeyyāṃ muktalajjāyāṃ vadantyāmatidāruṇam |
rājā daśaratho vākyamuvācāyatalocanām |
vahantaṃ kiṃ tudasi māṃ niyujya dhuri māhite || 11 ||
[Analyze grammar]

kaikeyī dviguṇaṃ kruddhā rājānamidamabravīt |
tavaiva vaṃśe sagaro jyeṣṭhaṃ putramupārudhat |
asamañja iti khyātaṃ tathāyaṃ gantumarhati || 12 ||
[Analyze grammar]

evamukto dhigityeva rājā daśaratho'bravīt |
vrīḍitaśca janaḥ sarvaḥ sā ca tannāvabudhyata || 13 ||
[Analyze grammar]

tatra vṛddho mahāmātraḥ siddhārtho nāma nāmataḥ |
śucirbahumato rājñaḥ kaikeyīmidamabravīt || 14 ||
[Analyze grammar]

asamañjo gṛhītvā tu krīḍitaḥ pathi dārakān |
sarayvāḥ prakṣipannapsu ramate tena durmatiḥ || 15 ||
[Analyze grammar]

taṃ dṛṣṭvā nāgaraḥ sarve kruddhā rājānamabruvan |
asamañjaṃ vṛṣīṇvaikamasmān vā rāṣṭravardhana || 16 ||
[Analyze grammar]

tānuvāca tato rājā kiṃnimittamidaṃ bhayam |
tāścāpi rājñā saṃpṛṣṭā vākyaṃ prakṛtayo'bruvan || 17 ||
[Analyze grammar]

krīḍitastveṣa naḥ putrānbālānudbhrāntacetanaḥ |
sarayvāṃ prakṣipanmaurkhyādatulāṃ prītimaśnute || 18 ||
[Analyze grammar]

sa tāsāṃ vacanaṃ śrutvā prakṛtīnāṃ narādhipa |
taṃ tatyājāhitaṃ putraṃ tāsāṃ priyacikīrṣayā || 19 ||
[Analyze grammar]

ityevamatyajad rājā sagaro vai sudhārmikaḥ |
rāmaḥ kimakarot pāpaṃ yenaivamuparudhyate || 20 ||
[Analyze grammar]

śrutvā tu siddhārthavaco rājā śrāntatarasvanaḥ |
śokopahatayā vācā kaikeyīmidamabravīt || 21 ||
[Analyze grammar]

anuvrajiṣyāmyahamadya rāmaṃ rājyaṃ parityajya sukhaṃ dhanaṃ ca |
sahaiva rājñā bharatena ca tvaṃ yathā sukhaṃ bhuṅkṣva cirāya rājyam || 22 ||
[Analyze grammar]