Chapter 31

sa rāmapreṣitaḥ kṣipraṃ saṃtāpakaluṣendriyaḥ |
praviśya nṛpatiṃ sūto niḥśvasantaṃ dadarśa ha || 1 ||
[Analyze grammar]

ālokya tu mahāprājñaḥ paramākula cetasaṃ |
rāmamevānuśocantaṃ sūtaḥ prāñjalirāsadat || 2 ||
[Analyze grammar]

ayaṃ sa puruṣavyāghra dvāri tiṣṭhati te sutaḥ |
brāhmaṇebhyo dhanaṃ dattvā sarvaṃ caivopajīvinām || 3 ||
[Analyze grammar]

sa tvā paśyatu bhadraṃ te rāmaḥ satyaparākramaḥ |
sarvān suhṛda āpṛcchya tvāmidānīṃ didṛkṣate || 4 ||
[Analyze grammar]

gamiṣyati mahāraṇyaṃ taṃ paśya jagatīpate |
vṛtaṃ rājaguṇaiḥ sarvairādityamiva raśmibhiḥ || 5 ||
[Analyze grammar]

sa satyavādī dharmātmā gāmbhīryāt sāgaropamaḥ |
ākāśa iva niṣpaṅko narendraḥ pratyuvāca tam || 6 ||
[Analyze grammar]

sumantrānaya me dārānye ke cidiha māmakāḥ |
dāraiḥ parivṛtaḥ sarvairdraṣṭumicchāmi rāghavam || 7 ||
[Analyze grammar]

so'ntaḥpuramatītyaiva striyastā vākyamabravīt |
āryo hvayati vo rājā gamyatāṃ tatra māciram || 8 ||
[Analyze grammar]

evamuktāḥ striyaḥ sarvāḥ sumantreṇa nṛpājñayā |
pracakramustadbhavanaṃ bharturājñāya śāsanam || 9 ||
[Analyze grammar]

ardhasaptaśatāstāstu pramadāstāmralocanāḥ |
kausalyāṃ parivāryātha śanairjagmurdhṛtavratāḥ || 10 ||
[Analyze grammar]

āgateṣu ca dāreṣu samavekṣya mahīpatiḥ |
uvāca rājā taṃ sūtaṃ sumantrānaya me sutam || 11 ||
[Analyze grammar]

sa sūto rāmamādāya lakṣmaṇaṃ maithilīṃ tadā |
jagāmābhimukhastūrṇaṃ sakāśaṃ jagatīpateḥ || 12 ||
[Analyze grammar]

sa rājā putramāyāntaṃ dṛṣṭvā dūrāt kṛtāñjalim |
utpapātāsanāttūrṇamārtaḥ strījanasaṃvṛtaḥ || 13 ||
[Analyze grammar]

so'bhidudrāva vegena rāmaṃ dṛṣṭvā viśāṃ patiḥ |
tamasaṃprāpya duḥkhārtaḥ papāta bhuvi mūrchitaḥ || 14 ||
[Analyze grammar]

taṃ rāmo'bhyapātat kṣipraṃ lakṣmaṇaśca mahārathaḥ |
visaṃjñamiva duḥkhena saśokaṃ nṛpatiṃ tadā || 15 ||
[Analyze grammar]

strīsahasraninādaśca saṃjajñe rājaveśmani |
hāhā rāmeti sahasā bhūṣaṇadhvanimūrchitaḥ || 16 ||
[Analyze grammar]

taṃ pariṣvajya bāhubhyāṃ tāv ubhau rāmalakṣmaṇau |
paryaṅke sītayā sārdhaṃ rudantaḥ samaveśayan || 17 ||
[Analyze grammar]

atha rāmo muhūrtena labdhasaṃjñaṃ mahīpatim |
uvāca prāñjalirbhūtvā śokārṇavapariplutam || 18 ||
[Analyze grammar]

āpṛcche tvāṃ mahārāja sarveṣāmīśvaro'si naḥ |
prasthitaṃ daṇḍakāraṇyaṃ paśya tvaṃ kuśalena mām || 19 ||
[Analyze grammar]

lakṣmaṇaṃ cānujānīhi sītā cānveti māṃ vanam |
kāraṇairbahubhistathyairvāryamāṇau na cecchataḥ || 20 ||
[Analyze grammar]

anujānīhi sarvānnaḥ śokamutsṛjya mānada |
lakṣmaṇaṃ māṃ ca sītāṃ ca prajāpatiriva prajāḥ || 21 ||
[Analyze grammar]

pratīkṣamāṇamavyagramanujñāṃ jagatīpateḥ |
uvāca rarjā saṃprekṣya vanavāsāya rāghavam || 22 ||
[Analyze grammar]

ahaṃ rāghava kaikeyyā varadānena mohitaḥ |
ayodhyāyāstvamevādya bhava rājā nigṛhya mām || 23 ||
[Analyze grammar]

evamukto nṛpatinā rāmo dharmabhṛtāṃ varaḥ |
pratyuvācāñjaliṃ kṛtvā pitaraṃ vākyakovidaḥ || 24 ||
[Analyze grammar]

bhavān varṣasahasrāya pṛthivyā nṛpate patiḥ |
ahaṃ tvaraṇye vatsyāmi na me kāryaṃ tvayānṛtam || 25 ||
[Analyze grammar]

śreyase vṛddhaye tāta punarāgamanāya ca |
gacchasvāriṣṭamavyagraḥ panthānamakutobhayam || 26 ||
[Analyze grammar]

adya tvidānīṃ rajanīṃ putra mā gaccha sarvathā |
mātaraṃ māṃ ca saṃpaśyan vasemāmadya śarvarīm |
tarpitaḥ sarvakāmaistvaṃ śvaḥkāle sādhayiṣyasi || 27 ||
[Analyze grammar]

atha rāmastathā śrutvā piturārtasya bhāṣitam |
lakṣmaṇena saha bhrātrā dīno vacanamabravīt || 28 ||
[Analyze grammar]

prāpsyāmi yānadya guṇān ko me śvastānpradāsyati |
apakramaṇamevātaḥ sarvakāmairahaṃ vṛṇe || 29 ||
[Analyze grammar]

iyaṃ sarāṣṭrā sajanā dhanadhānyasamākulā |
mayā visṛṣṭā vasudhā bharatāya pradīyatām || 30 ||
[Analyze grammar]

apagacchatu te duḥkhaṃ mā bhūrbāṣpapariplutaḥ |
na hi kṣubhyati durdharṣaḥ samudraḥ saritāṃ patiḥ || 31 ||
[Analyze grammar]

naivāhaṃ rājyamicchāmi na sukhaṃ na ca maithilīm |
tvāmahaṃ satyamicchāmi nānṛtaṃ puruṣarṣabha || 32 ||
[Analyze grammar]

puraṃ ca rāṣṭraṃ ca mahī ca kevalā mayā nisṛṣṭā bharatāya dīyatām |
ahaṃ nideśaṃ bhavato'nupālayan vanaṃ gamiṣyāmi cirāya sevitum || 33 ||
[Analyze grammar]

mayā nisṛṣṭāṃ bharato mahīmimāṃ saśailakhaṇḍāṃ sapurāṃ sakānanām |
śivāṃ susīmāmanuśāstu kevalaṃ tvayā yaduktaṃ nṛpate yathāstu tat || 34 ||
[Analyze grammar]

na me tathā pārthiva dhīyate mano mahatsu kāmeṣu na cātmanaḥ priye |
yathā nideśe tava śiṣṭasaṃmate vyapaitu duḥkhaṃ tava matkṛte'nagha || 35 ||
[Analyze grammar]

tadadya naivānagha rājyamavyayaṃ na sarvakāmānna sukhaṃ na maithilīm |
na jīvitaṃ tvāmanṛtena yojayan vṛṇīya satyaṃ vratamastu te tathā || 36 ||
[Analyze grammar]

phalāni mūlāni ca bhakṣayan vane girīṃśca paśyan saritaḥ sarāṃsi ca |
vanaṃ praviśyaiva vicitrapādapaṃ sukhī bhaviṣyāmi tavāstu nirvṛtiḥ || 37 ||
[Analyze grammar]