Chapter 23

abhivādya tu kausalyāṃ rāmaḥ saṃprasthito vanam |
kṛtasvastyayano mātrā dharmiṣṭhe vartmani sthitaḥ || 1 ||
[Analyze grammar]

virājayan rājasuto rājamārgaṃ narairvṛtam |
hṛdayānyāmamantheva janasya guṇavattayā || 2 ||
[Analyze grammar]

vaidehī cāpi tat sarvaṃ na śuśrāva tapasvinī |
tadeva hṛdi tasyāśca yauvarājyābhiṣecanam || 3 ||
[Analyze grammar]

devakāryaṃ sma sā kṛtvā kṛtajñā hṛṣṭacetanā |
abhijñā rājadharmāṇāṃ rājaputraṃ pratīkṣate || 4 ||
[Analyze grammar]

praviveśātha rāmastu svaveśma suvibhūṣitam |
prahṛṣṭajanasaṃpūrṇaṃ hriyā kiṃ cidavāṅmukhaḥ || 5 ||
[Analyze grammar]

atha sītā samutpatya vepamānā ca taṃ patim |
apaśyacchokasaṃtaptaṃ cintāvyākulilendriyam || 6 ||
[Analyze grammar]

vivarṇavadanaṃ dṛṣṭvā taṃ prasvinnamamarṣaṇam |
āha duḥkhābhisaṃtaptā kimidānīmidaṃ prabho || 7 ||
[Analyze grammar]

adya bārhaspataḥ śrīmānyuktaḥ puṣyo na rāghava |
procyate brāhmaṇaiḥ prājñaiḥ kena tvamasi durmanāḥ || 8 ||
[Analyze grammar]

na te śataśalākena jalaphenanibhena ca |
āvṛtaṃ vadanaṃ valgu chatreṇābhivirājate || 9 ||
[Analyze grammar]

vyajanābhyāṃ ca mukhyābhyāṃ śatapatranibhekṣaṇam |
candrahaṃsaprakāśābhyāṃ vījyate na tavānanam || 10 ||
[Analyze grammar]

vāgmino bandinaścāpi prahṛṣṭāstvaṃ nararṣabha |
stuvanto nādya dṛśyante maṅgalaiḥ sūtamāgadhāḥ || 11 ||
[Analyze grammar]

na te kṣaudraṃ ca dadhi ca brāhmaṇā vedapāragāḥ |
mūrdhni mūrdhāvasiktasya dadhati sma vidhānataḥ || 12 ||
[Analyze grammar]

na tvāṃ prakṛtayaḥ sarvā śreṇīmukhyāśca bhūṣitāḥ |
anuvrajitumicchanti paurajāpapadāstathā || 13 ||
[Analyze grammar]

caturbhirvegasaṃpannairhayaiḥ kāñcanabhūṣaṇaiḥ |
mukhyaḥ puṣyaratho yuktaḥ kiṃ na gacchati te'grataḥ || 14 ||
[Analyze grammar]

na hastī cāgrataḥ śrīmāṃstava lakṣaṇapūjitaḥ |
prayāṇe lakṣyate vīra kṛṣṇameghagiri prabhaḥ || 15 ||
[Analyze grammar]

na ca kāñcanacitraṃ te paśyāmi priyadarśana |
bhadrāsanaṃ puraskṛtya yāntaṃ vīrapuraḥsaram || 16 ||
[Analyze grammar]

abhiṣeko yadā sajjaḥ kimidānīmidaṃ tava |
apūrvo mukhavarṇaśca na praharṣaśca lakṣyate || 17 ||
[Analyze grammar]

itīva vilapantīṃ tāṃ provāca raghunandanaḥ |
sīte tatrabhavāṃstāta pravrājayati māṃ vanam || 18 ||
[Analyze grammar]

kule mahati saṃbhūte dharmajñe dharmacāriṇi |
śṛṇu jānaki yenedaṃ krameṇābhyāgataṃ mama || 19 ||
[Analyze grammar]

rājñā satyapratijñena pitrā daśarathena me |
kaikeyyai prītamanasā purā dattau mahāvarau || 20 ||
[Analyze grammar]

tayādya mama sajje'sminnabhiṣeke nṛpodyate |
pracoditaḥ sa samayo dharmeṇa pratinirjitaḥ || 21 ||
[Analyze grammar]

caturdaśa hi varṣāṇi vastavyaṃ daṇḍake mayā |
pitrā me bharataścāpi yauvarājye niyojitaḥ |
so'haṃ tvāmāgato draṣṭuṃ prasthito vijanaṃ vanam || 22 ||
[Analyze grammar]

bharatasya samīpe te nāhaṃ kathyaḥ kadā cana |
ṛddhiyuktā hi puruṣā na sahante parastavam |
tasmānna te guṇāḥ kathyā bharatasyāgrato mama || 23 ||
[Analyze grammar]

nāpi tvaṃ tena bhartavyā viśeṣeṇa kadā cana |
anukūlatayā śakyaṃ samīpe tasya vartitum || 24 ||
[Analyze grammar]

ahaṃ cāpi pratijñāṃ tāṃ guroḥ samanupālayan |
vanamadyaiva yāsyāmi sthirā bhava manasvini || 25 ||
[Analyze grammar]

yāte ca mayi kalyāṇi vanaṃ muniniṣevitam |
vratopavāsaratayā bhavitavyaṃ tvayānaghe || 26 ||
[Analyze grammar]

kālyamutthāya devānāṃ kṛtvā pūjāṃ yathāvidhi |
vanditavyo daśarathaḥ pitā mama nareśvaraḥ || 27 ||
[Analyze grammar]

mātā ca mama kausalyā vṛddhā saṃtāpakarśitā |
dharmamevāgrataḥ kṛtvā tvattaḥ saṃmānamarhati || 28 ||
[Analyze grammar]

vanditavyāśca te nityaṃ yāḥ śeṣā mama mātaraḥ |
snehapraṇayasaṃbhogaiḥ samā hi mama mātaraḥ || 29 ||
[Analyze grammar]

bhrātṛputrasamau cāpi draṣṭavyau ca viśeṣataḥ |
tvayā lakṣmaṇaśatrughnau prāṇaiḥ priyatarau mama || 30 ||
[Analyze grammar]

vipriyaṃ na ca kartavyaṃ bharatasya kadā cana |
sa hi rājā prabhuścaiva deśasya ca kulasya ca || 31 ||
[Analyze grammar]

ārādhitā hi śīlena prayatnaiścopasevitāḥ |
rājānaḥ saṃprasīdanti prakupyanti viparyaye || 32 ||
[Analyze grammar]

aurasānapi putrān hi tyajantyahitakāriṇaḥ |
samarthān saṃpragṛhṇanti janānapi narādhipāḥ || 33 ||
[Analyze grammar]

ahaṃ gamiṣyāmi mahāvanaṃ priye tvayā hi vastavyamihaiva bhāmini |
yathā vyalīkaṃ kuruṣe na kasya cittathā tvayā kāryamidaṃ vaco mama || 34 ||
[Analyze grammar]