Chapter 22

sāpanīya tamāyāsamupaspṛśya jalaṃ śuci |
cakāra mātā rāmasya maṅgalāni manasvinī || 1 ||
[Analyze grammar]

svasti sādhyāśca viśve ca marutaśca maharṣayaḥ |
svasti dhātā vidhātā ca svasti pūṣā bhago'ryamā || 2 ||
[Analyze grammar]

ṛtavaścaiva pakṣāśca māsāḥ saṃvatsarāḥ kṣapāḥ |
dināni ca muhūrtāśca svasti kurvantu te sadā || 3 ||
[Analyze grammar]

smṛtirdhṛtiśca dharmaśca pāntu tvāṃ putra sarvataḥ |
skandaśca bhagavāndevaḥ somaśca sabṛhaspatiḥ || 4 ||
[Analyze grammar]

saptarṣayo nāradaśca te tvāṃ rakṣantu sarvataḥ |
nakṣatrāṇi ca sarvāṇi grahāśca sahadevatāḥ |
mahāvanāni carato muniveṣasya dhīmataḥ || 5 ||
[Analyze grammar]

plavagā vṛścikā daṃśā maśakāścaiva kānane |
sarīsṛpāśca kīṭāśca mā bhūvan gahane tava || 6 ||
[Analyze grammar]

mahādvipāśca siṃhāśca vyāghrā ṛkṣāśca daṃṣṭriṇaḥ |
mahiṣāḥ śṛṅgiṇo raudrā na te druhyantu putraka || 7 ||
[Analyze grammar]

nṛmāṃsabhojanā raudrā ye cānye sattvajātayaḥ |
mā ca tvāṃ hiṃsiṣuḥ putra mayā saṃpūjitāstviha || 8 ||
[Analyze grammar]

āgamāste śivāḥ santu sidhyantu ca parākramāḥ |
sarvasaṃpattayo rāma svastimān gaccha putraka || 9 ||
[Analyze grammar]

svasti te'stvāntarikṣebhyaḥ pārthivebhyaḥ punaḥ punaḥ |
sarvebhyaścaiva devebhyo ye ca te paripanthinaḥ || 10 ||
[Analyze grammar]

sarvalokaprabhurbrahmā bhūtabhartā tatharṣayaḥ |
ye ca śeṣāḥ surāste tvāṃ rakṣantu vanavāsinam || 11 ||
[Analyze grammar]

iti mālyaiḥ suragaṇān gandhaiścāpi yaśasvinī |
stutibhiścānurūpābhirānarcāyatalocanā || 12 ||
[Analyze grammar]

yanmaṅgalaṃ sahasrākṣe sarvadevanamaskṛte |
vṛtranāśe samabhavattatte bhavatu maṅgalam || 13 ||
[Analyze grammar]

yanmaṅgalaṃ suparṇasya vinatākalpayat purā |
amṛtaṃ prārthayānasya tatte bhavatu maṅgalam || 14 ||
[Analyze grammar]

oṣadhīṃ cāpi siddhārthāṃ viśalyakaraṇīṃ śubhām |
cakāra rakṣāṃ kausalyā mantrairabhijajāpa ca || 15 ||
[Analyze grammar]

ānamya mūrdhni cāghrāya pariṣvajya yaśasvinī |
avadat putra siddhārtho gaccha rāma yathāsukham || 16 ||
[Analyze grammar]

arogaṃ sarvasiddhārthamayodhyāṃ punarāgatam |
paśyāmi tvāṃ sukhaṃ vatsa susthitaṃ rājaveśmani || 17 ||
[Analyze grammar]

mayārcitā devagaṇāḥ śivādayo maharṣayo bhūtamahāsuroragāḥ |
abhiprayātasya vanaṃ cirāya te hitāni kāṅkṣantu diśaśca rāghava || 18 ||
[Analyze grammar]

itīva cāśrupratipūrṇalocanā samāpya ca svastyayanaṃ yathāvidhi |
pradakṣiṇaṃ caiva cakāra rāghavaṃ punaḥ punaścāpi nipīḍya sasvaje || 19 ||
[Analyze grammar]

tathā tu devyā sa kṛtapradakṣiṇo nipīḍya mātuścaraṇau punaḥ punaḥ |
jagāma sītānilayaṃ mahāyaśāḥ sa rāghavaḥ prajvalitaḥ svayā śriyā || 20 ||
[Analyze grammar]