Chapter 18

tathā tu vilapantīṃ tāṃ kausalyāṃ rāmamātaram |
uvāca lakṣmaṇo dīnastat kālasadṛśaṃ vacaḥ || 1 ||
[Analyze grammar]

na rocate mamāpyetadārye yad rāghavo vanam |
tyaktvā rājyaśriyaṃ gacchet striyā vākyavaśaṃ gataḥ || 2 ||
[Analyze grammar]

viparītaśca vṛddhaśca viṣayaiśca pradharṣitaḥ |
nṛpaḥ kimiva na brūyāccodyamānaḥ samanmathaḥ || 3 ||
[Analyze grammar]

nāsyāparādhaṃ paśyāmi nāpi doṣaṃ tathā vidham |
yena nirvāsyate rāṣṭrādvanavāsāya rāghavaḥ || 4 ||
[Analyze grammar]

na taṃ paśyāmyahaṃ loke parokṣamapi yo naraḥ |
amitro'pi nirasto'pi yo'sya doṣamudāharet || 5 ||
[Analyze grammar]

devakalpamṛjuṃ dāntaṃ ripūṇāmapi vatsalam |
avekṣamāṇaḥ ko dharmaṃ tyajet putramakāraṇāt || 6 ||
[Analyze grammar]

tadidaṃ vacanaṃ rājñaḥ punarbālyamupeyuṣaḥ |
putraḥ ko hṛdaye kuryād rājavṛttamanusmaran || 7 ||
[Analyze grammar]

yāvadeva na jānāti kaścidarthamimaṃ naraḥ |
tāvadeva mayā sārdhamātmasthaṃ kuru śāsanam || 8 ||
[Analyze grammar]

mayā pārśve sadhanuṣā tava guptasya rāghava |
kaḥ samartho'dhikaṃ kartuṃ kṛtāntasyeva tiṣṭhataḥ || 9 ||
[Analyze grammar]

nirmanuṣyāmimāṃ sarvāmayodhyāṃ manujarṣabha |
kariṣyāmi śaraistīkṣṇairyadi sthāsyati vipriye || 10 ||
[Analyze grammar]

bharatasyātha pakṣyo vā yo vāsya hitamicchati |
sarvānetān vadhiṣyāmi mṛdurhi paribhūyate || 11 ||
[Analyze grammar]

tvayā caiva mayā caiva kṛtvā vairamanuttamam |
kasya śaktiḥ śriyaṃ dātuṃ bharatāyāriśāsana || 12 ||
[Analyze grammar]

anurakto'smi bhāvena bhrātaraṃ devi tattvataḥ |
satyena dhanuṣā caiva datteneṣṭena te śape || 13 ||
[Analyze grammar]

dīptamagnimaraṇyaṃ vā yadi rāmaḥ pravekṣyate |
praviṣṭaṃ tatra māṃ devi tvaṃ pūrvamavadhāraya || 14 ||
[Analyze grammar]

harāmi vīryādduḥkhaṃ te tamaḥ sūrya ivoditaḥ |
devī paśyatu me vīryaṃ rāghavaścaiva paśyatu || 15 ||
[Analyze grammar]

etattu vacanaṃ śrutvā lakṣmaṇasya mahātmanaḥ |
uvāca rāmaṃ kausalyā rudantī śokalālasā || 16 ||
[Analyze grammar]

bhrātuste vadataḥ putra lakṣmaṇasya śrutaṃ tvayā |
yadatrānantaraṃ tattvaṃ kuruṣva yadi rocate || 17 ||
[Analyze grammar]

na cādharmyaṃ vacaḥ śrutvā sapatnyā mama bhāṣitam |
vihāya śokasaṃtaptāṃ gantumarhasi māmitaḥ || 18 ||
[Analyze grammar]

dharmajña yadi dharmiṣṭho dharmaṃ caritumicchasi |
śuśrūṣa māmihasthastvaṃ cara dharmamanuttamam || 19 ||
[Analyze grammar]

śuśrūṣurjananīṃ putra svagṛhe niyato vasan |
pareṇa tapasā yuktaḥ kāśyapastridivaṃ gataḥ || 20 ||
[Analyze grammar]

yathaiva rājā pūjyaste gauraveṇa tathā hyaham |
tvāṃ nāhamanujānāmi na gantavyamito vanam || 21 ||
[Analyze grammar]

tvadviyogānna me kāryaṃ jīvitena sukhena vā |
tvayā saha mama śreyastṛṇānāmapi bhakṣaṇam || 22 ||
[Analyze grammar]

yadi tvaṃ yāsyasi vanaṃ tyaktvā māṃ śokalālasām |
ahaṃ prāyamihāsiṣye na hi śakṣyāmi jīvitum || 23 ||
[Analyze grammar]

tatastvaṃ prāpsyase putra nirayaṃ lokaviśrutam |
brahmahatyāmivādharmāt samudraḥ saritāṃ patiḥ || 24 ||
[Analyze grammar]

vilapantīṃ tathā dīnāṃ kausalyāṃ jananīṃ tataḥ |
uvāca rāmo dharmātmā vacanaṃ dharmasaṃhitam || 25 ||
[Analyze grammar]

nāsti śaktiḥ piturvākyaṃ samatikramituṃ mama |
prasādaye tvāṃ śirasā gantumicchāmyahaṃ vanam || 26 ||
[Analyze grammar]

ṛṣiṇā ca piturvākyaṃ kurvatā vratacāriṇā |
gaurhatā jānatā dharmaṃ kaṇḍunāpi vipaścitā || 27 ||
[Analyze grammar]

asmākaṃ ca kule pūrvaṃ sagarasyājñayā pituḥ |
khanadbhiḥ sāgarairbhūtimavāptaḥ sumahān vadhaḥ || 28 ||
[Analyze grammar]

jāmadagnyena rāmeṇa reṇukā jananī svayam |
kṛttā paraśunāraṇye piturvacanakāriṇā || 29 ||
[Analyze grammar]

na khalvetanmayaikena kriyate pitṛśāsanam |
pūrvairayamabhipreto gato mārgo'nugamyate || 30 ||
[Analyze grammar]

tadetattu mayā kāryaṃ kriyate bhuvi nānyathā |
piturhi vacanaṃ kurvanna kaścinnāma hīyate || 31 ||
[Analyze grammar]

tāmevamuktvā jananīṃ lakṣmaṇaṃ punarabravīt |
tava lakṣmaṇa jānāmi mayi snehamanuttamam |
abhiprāyamavijñāya satyasya ca śamasya ca || 32 ||
[Analyze grammar]

dharmo hi paramo loke dharme satyaṃ pratiṣṭhitam |
dharmasaṃśritametacca piturvacanamuttamam || 33 ||
[Analyze grammar]

saṃśrutya ca piturvākyaṃ māturvā brāhmaṇasya vā |
na kartavyaṃ vṛthā vīra dharmamāśritya tiṣṭhatā || 34 ||
[Analyze grammar]

so'haṃ na śakṣyāmi piturniyogamativartitum |
piturhi vacanādvīra kaikeyyāhaṃ pracoditaḥ || 35 ||
[Analyze grammar]

tadenāṃ visṛjānāryāṃ kṣatradharmāśritāṃ matim |
dharmamāśraya mā taikṣṇyaṃ madbuddhiranugamyatām || 36 ||
[Analyze grammar]

tamevamuktvā sauhārdādbhrātaraṃ lakṣmaṇāgrajaḥ |
uvāca bhūyaḥ kausalyāṃ prāñjaliḥ śirasānataḥ || 37 ||
[Analyze grammar]

anumanyasva māṃ devi gamiṣyantamito vanam |
śāpitāsi mama prāṇaiḥ kuru svastyayanāni me |
tīrṇapratijñaśca vanāt punareṣyāmyahaṃ purīm || 38 ||
[Analyze grammar]

yaśo hyahaṃ kevalarājyakāraṇānna pṛṣṭhataḥ kartumalaṃ mahodayam |
adīrghakāle na tu devi jīvite vṛṇe'varāmadya mahīmadharmataḥ || 39 ||
[Analyze grammar]

prasādayannaravṛṣabhaḥ sa mātaraṃ parākramājjigamiṣureva daṇḍakān |
athānujaṃ bhṛśamanuśāsya darśanaṃ cakāra tāṃ hṛdi jananīṃ pradakṣiṇam || 40 ||
[Analyze grammar]