Chapter 17

rāmastu bhṛśamāyasto niḥśvasanniva kuñjaraḥ |
jagāma sahito bhrātrā māturantaḥpuraṃ vaśī || 1 ||
[Analyze grammar]

so'paśyat puruṣaṃ tatra vṛddhaṃ paramapūjitam |
upaviṣṭaṃ gṛhadvāri tiṣṭhataścāparānbahūn || 2 ||
[Analyze grammar]

praviśya prathamāṃ kakṣyāṃ dvitīyāyāṃ dadarśa saḥ |
brāhmaṇān vedasaṃpannān vṛddhān rājñābhisatkṛtān || 3 ||
[Analyze grammar]

praṇamya rāmastān vṛddhāṃstṛtīyāyāṃ dadarśa saḥ |
striyo vṛddhāśca bālāśca dvārarakṣaṇatatparāḥ || 4 ||
[Analyze grammar]

vardhayitvā prahṛṣṭāstāḥ praviśya ca gṛhaṃ striyaḥ |
nyavedayanta tvaritā rāma mātuḥ priyaṃ tadā || 5 ||
[Analyze grammar]

kausalyāpi tadā devī rātriṃ sthitvā samāhitā |
prabhāte tvakarot pūjāṃ viṣṇoḥ putrahitaiṣiṇī || 6 ||
[Analyze grammar]

sā kṣaumavasanā hṛṣṭā nityaṃ vrataparāyaṇā |
agniṃ juhoti sma tadā mantravat kṛtamaṅgalā || 7 ||
[Analyze grammar]

praviśya ca tadā rāmo māturantaḥpuraṃ śubham |
dadarśa mātaraṃ tatra hāvayantīṃ hutāśanam || 8 ||
[Analyze grammar]

sā cirasyātmajaṃ dṛṣṭvā mātṛnandanamāgatam |
abhicakrāma saṃhṛṣṭā kiśoraṃ vaḍavā yathā || 9 ||
[Analyze grammar]

tamuvāca durādharṣaṃ rāghavaṃ sutamātmanaḥ |
kausalyā putravātsalyādidaṃ priyahitaṃ vacaḥ || 10 ||
[Analyze grammar]

vṛddhānāṃ dharmaśīlānāṃ rājarṣīṇāṃ mahātmanām |
prāpnuhyāyuśca kīrtiṃ ca dharmaṃ copahitaṃ kule || 11 ||
[Analyze grammar]

satyapratijñaṃ pitaraṃ rājānaṃ paśya rāghava |
adyaiva hi tvāṃ dharmātmā yauvarājye'bhiṣekṣyati || 12 ||
[Analyze grammar]

mātaraṃ rāghavaḥ kiṃ cit prasāryāñjalimabravīt |
sa svabhāvavinītaśca gauravācca tadānataḥ || 13 ||
[Analyze grammar]

devi nūnaṃ na jānīṣe mahadbhayamupasthitam |
idaṃ tava ca duḥkhāya vaidehyā lakṣmaṇasya ca || 14 ||
[Analyze grammar]

caturdaśa hi varṣāṇi vatsyāmi vijane vane |
madhumūlaphalairjīvan hitvā munivadāmiṣam || 15 ||
[Analyze grammar]

bharatāya mahārājo yauvarājyaṃ prayacchati |
māṃ punardaṇḍakāraṇyaṃ vivāsayati tāpasaṃ || 16 ||
[Analyze grammar]

tāmaduḥkhocitāṃ dṛṣṭvā patitāṃ kadalīmiva |
rāmastūtthāpayāmāsa mātaraṃ gatacetasaṃ || 17 ||
[Analyze grammar]

upāvṛtyotthitāṃ dīnāṃ vaḍavāmiva vāhitām |
pāṃśuguṇṭhitasarvāgnīṃ vimamarśa ca pāṇinā || 18 ||
[Analyze grammar]

sā rāghavamupāsīnamasukhārtā sukhocitā |
uvāca puruṣavyāghramupaśṛṇvati lakṣmaṇe || 19 ||
[Analyze grammar]

yadi putra na jāyethā mama śokāya rāghava |
na sma duḥkhamato bhūyaḥ paśyeyamahamaprajā || 20 ||
[Analyze grammar]

eka eva hi vandhyāyāḥ śoko bhavati mānavaḥ |
aprajāsmīti saṃtāpo na hyanyaḥ putra vidyate || 21 ||
[Analyze grammar]

na dṛṣṭapūrvaṃ kalyāṇaṃ sukhaṃ vā patipauruṣe |
api putre vipaśyeyamiti rāmāsthitaṃ mayā || 22 ||
[Analyze grammar]

sā bahūnyamanojñāni vākyāni hṛdayacchidām |
ahaṃ śroṣye sapatnīnāmavarāṇāṃ varā satī |
ato duḥkhataraṃ kiṃ nu pramadānāṃ bhaviṣyati || 23 ||
[Analyze grammar]

tvayi saṃnihite'pyevamahamāsaṃ nirākṛtā |
kiṃ punaḥ proṣite tāta dhruvaṃ maraṇameva me || 24 ||
[Analyze grammar]

yo hi māṃ sevate kaścidatha vāpyanuvartate |
kaikeyyāḥ putramanvīkṣya sa jano nābhibhāṣate || 25 ||
[Analyze grammar]

daśa sapta ca varṣāṇi tava jātasya rāghava |
atītāni prakāṅkṣantyā mayā duḥkhaparikṣayam || 26 ||
[Analyze grammar]

upavāsaiśca yogaiśca bahubhiśca pariśramaiḥ |
duḥkhaṃ saṃvardhito moghaṃ tvaṃ hi durgatayā mayā || 27 ||
[Analyze grammar]

sthiraṃ tu hṛdayaṃ manye mamedaṃ yanna dīryate |
prāvṛṣīva mahānadyāḥ spṛṣṭaṃ kūlaṃ navāmbhasā || 28 ||
[Analyze grammar]

mamaiva nūnaṃ maraṇaṃ na vidyate na cāvakāśo'sti yamakṣaye mama |
yadantako'dyaiva na māṃ jihīrṣati prasahya siṃho rudatīṃ mṛgīmiva || 29 ||
[Analyze grammar]

sthiraṃ hi nūnaṃ hṛdayaṃ mamāyasaṃ na bhidyate yadbhuvi nāvadīryate |
anena duḥkhena ca dehamarpitaṃ dhruvaṃ hyakāle maraṇaṃ na vidyate || 30 ||
[Analyze grammar]

idaṃ tu duḥkhaṃ yadanarthakāni me vratāni dānāni ca saṃyamāśca hi |
tapaśca taptaṃ yadapatyakāraṇāt suniṣphalaṃ bījamivoptamūṣare || 31 ||
[Analyze grammar]

yadi hyakāle maraṇaṃ svayecchayā labheta kaścidguru duḥkha karśitaḥ |
gatāhamadyaiva pareta saṃsadaṃ vinā tvayā dhenurivātmajena vai || 32 ||
[Analyze grammar]

bhṛśamasukhamamarṣitā tadā bahu vilalāpa samīkṣya rāghavam |
vyasanamupaniśāmya sā mahat sutamiva baddhamavekṣya kiṃnarī || 33 ||
[Analyze grammar]