Chapter 16

sa dadarśāsane rāmo niṣaṇṇaṃ pitaraṃ śubhe |
kaikeyīsahitaṃ dīnaṃ mukhena pariśuṣyatā || 1 ||
[Analyze grammar]

sa pituścaraṇau pūrvamabhivādya vinītavat |
tato vavande caraṇau kaikeyyāḥ susamāhitaḥ || 2 ||
[Analyze grammar]

rāmetyuktvā ca vacanaṃ vāṣpaparyākulekṣaṇaḥ |
śaśāka nṛpatirdīno nekṣituṃ nābhibhāṣitum || 3 ||
[Analyze grammar]

tadapūrvaṃ narapaterdṛṣṭvā rūpaṃ bhayāvaham |
rāmo'pi bhayamāpannaḥ padā spṛṣṭveva pannagam || 4 ||
[Analyze grammar]

indriyairaprahṛṣṭaistaṃ śokasaṃtāpakarśitam |
niḥśvasantaṃ mahārājaṃ vyathitākulacetasaṃ || 5 ||
[Analyze grammar]

ūrmi mālinamakṣobhyaṃ kṣubhyantamiva sāgaram |
upaplutamivādityamuktānṛtamṛṣiṃ yathā || 6 ||
[Analyze grammar]

acintyakalpaṃ hi pitustaṃ śokamupadhārayan |
babhūva saṃrabdhataraḥ samudra iva parvaṇi || 7 ||
[Analyze grammar]

cintayāmāsa ca tadā rāmaḥ pitṛhite rataḥ |
kiṃsvidadyaiva nṛpatirna māṃ pratyabhinandati || 8 ||
[Analyze grammar]

anyadā māṃ pitā dṛṣṭvā kupito'pi prasīdati |
tasya māmadya saṃprekṣya kimāyāsaḥ pravartate || 9 ||
[Analyze grammar]

sa dīna iva śokārto viṣaṇṇavadanadyutiḥ |
kaikeyīmabhivādyaiva rāmo vacanamabravīt || 10 ||
[Analyze grammar]

kaccinmayā nāparāddhamajñānād yena me pitā |
kupitastanmamācakṣva tvaṃ caivainaṃ prasādaya || 11 ||
[Analyze grammar]

vivarṇavadano dīno na hi māmabhibhāṣate |
śārīro mānaso vāpi kaccidenaṃ na bādhate |
saṃtāpo vābhitāpo vā durlabhaṃ hi sadā sukham || 12 ||
[Analyze grammar]

kaccinna kiṃ cidbharate kumāre priyadarśane |
śatrughne vā mahāsattve mātṝṇāṃ vā mamāśubham || 13 ||
[Analyze grammar]

atoṣayanmahārājamakurvan vā piturvacaḥ |
muhūrtamapi neccheyaṃ jīvituṃ kupite nṛpe || 14 ||
[Analyze grammar]

yatomūlaṃ naraḥ paśyet prādurbhāvamihātmanaḥ |
kathaṃ tasminna varteta pratyakṣe sati daivate || 15 ||
[Analyze grammar]

kaccitte paruṣaṃ kiṃ cidabhimānāt pitā mama |
ukto bhavatyā kopena yatrāsya lulitaṃ manaḥ || 16 ||
[Analyze grammar]

etadācakṣva me devi tattvena paripṛcchataḥ |
kiṃnimittamapūrvo'yaṃ vikāro manujādhipe || 17 ||
[Analyze grammar]

ahaṃ hi vacanād rājñaḥ pateyamapi pāvake |
bhakṣayeyaṃ viṣaṃ tīkṣṇaṃ majjeyamapi cārṇave |
niyukto guruṇā pitrā nṛpeṇa ca hitena ca || 18 ||
[Analyze grammar]

tadbrūhi vacanaṃ devi rājño yadabhikāṅkṣitam |
kariṣye pratijāne ca rāmo dvirnābhibhāṣate || 19 ||
[Analyze grammar]

tamārjavasamāyuktamanāryā satyavādinam |
uvāca rāmaṃ kaikeyī vacanaṃ bhṛśadāruṇam || 20 ||
[Analyze grammar]

purā devāsure yuddhe pitrā te mama rāghava |
rakṣitena varau dattau saśalyena mahāraṇe || 21 ||
[Analyze grammar]

tatra me yācito rājā bharatasyābhiṣecanam |
gamanaṃ daṇḍakāraṇye tava cādyaiva rāghava || 22 ||
[Analyze grammar]

yadi satyapratijñaṃ tvaṃ pitaraṃ kartumicchasi |
ātmānaṃ ca narareṣṭha mama vākyamidaṃ śṛṇu || 23 ||
[Analyze grammar]

sa nideśe pitustiṣṭha yathā tena pratiśrutam |
tvayāraṇyaṃ praveṣṭavyaṃ nava varṣāṇi pañca ca || 24 ||
[Analyze grammar]

sapta sapta ca varṣāṇi daṇḍakāraṇyamāśritaḥ |
abhiṣekamimaṃ tyaktvā jaṭācīradharo vasa || 25 ||
[Analyze grammar]

bharataḥ kosalapure praśāstu vasudhāmimām |
nānāratnasamākīrṇāṃ savājirathakuñjarām || 26 ||
[Analyze grammar]

tadapriyamamitraghno vacanaṃ maraṇopamam |
śrutvā na vivyathe rāmaḥ kaikeyīṃ cedamabravīt || 27 ||
[Analyze grammar]

evamastu gamiṣyāmi vanaṃ vastumahaṃ tvataḥ |
jaṭācīradharo rājñaḥ pratijñāmanupālayan || 28 ||
[Analyze grammar]

idaṃ tu jñātumicchāmi kimarthaṃ māṃ mahīpatiḥ |
nābhinandati durdharṣo yathāpuramariṃdamaḥ || 29 ||
[Analyze grammar]

manyurna ca tvayā kāryo devi brūhi tavāgrataḥ |
yāsyāmi bhava suprītā vanaṃ cīrajaṭādharaḥ || 30 ||
[Analyze grammar]

hitena guruṇā pitrā kṛtajñena nṛpeṇa ca |
niyujyamāno viśrabdhaṃ kiṃ na kuryādahaṃ priyam || 31 ||
[Analyze grammar]

alīkaṃ mānasaṃ tvekaṃ hṛdayaṃ dahatīva me |
svayaṃ yannāha māṃ rājā bharatasyābhiṣecanam || 32 ||
[Analyze grammar]

ahaṃ hi sītāṃ rājyaṃ ca prāṇāniṣṭāndhanāni ca |
hṛṣṭo bhrātre svayaṃ dadyāṃ bharatāyāpracoditaḥ || 33 ||
[Analyze grammar]

kiṃ punarmanujendreṇa svayaṃ pitrā pracoditaḥ |
tava ca priyakāmārthaṃ pratijñāmanupālayan || 34 ||
[Analyze grammar]

tadāśvāsaya hīmaṃ tvaṃ kiṃ nvidaṃ yanmahīpatiḥ |
vasudhāsaktanayano mandamaśrūṇi muñcati || 35 ||
[Analyze grammar]

gacchantu caivānayituṃ dūtāḥ śīghrajavairhayaiḥ |
bharataṃ mātulakulādadyaiva nṛpaśāsanāt || 36 ||
[Analyze grammar]

daṇḍakāraṇyameṣo'hamito gacchāmi satvaraḥ |
avicārya piturvākyaṃ samāvastuṃ caturdaśa || 37 ||
[Analyze grammar]

sā hṛṣṭā tasya tadvākyaṃ śrutvā rāmasya kaikayī |
prasthānaṃ śraddadhānā hi tvarayāmāsa rāghavam || 38 ||
[Analyze grammar]

evaṃ bhavatu yāsyanti dūtāḥ śīghrajavairhayaiḥ |
bharataṃ mātulakulādupāvartayituṃ narāḥ || 39 ||
[Analyze grammar]

tava tvahaṃ kṣamaṃ manye notsukasya vilambanam |
rāma tasmāditaḥ śīghraṃ vanaṃ tvaṃ gantumarhasi || 40 ||
[Analyze grammar]

vrīḍānvitaḥ svayaṃ yacca nṛpastvāṃ nābhibhāṣate |
naitat kiṃ cinnaraśreṣṭha manyureṣo'panīyatām || 41 ||
[Analyze grammar]

yāvattvaṃ na vanaṃ yātaḥ purādasmādabhitvaran |
pitā tāvanna te rāma snāsyate bhokṣyate'pi vā || 42 ||
[Analyze grammar]

dhikkaṣṭamiti niḥśvasya rājā śokapariplutaḥ |
mūrchito nyapatattasminparyaṅke hemabhūṣite || 43 ||
[Analyze grammar]

rāmo'pyutthāpya rājānaṃ kaikeyyābhipracoditaḥ |
kaśayevāhato vājī vanaṃ gantuṃ kṛtatvaraḥ || 44 ||
[Analyze grammar]

tadapriyamanāryāyā vacanaṃ dāruṇodaram |
śrutvā gatavyatho rāmaḥ kaikeyīṃ vākyamabravīt || 45 ||
[Analyze grammar]

nāhamarthaparo devi lokamāvastumutsahe |
viddhi māmṛṣibhistulyaṃ kevalaṃ dharmamāsthitam || 46 ||
[Analyze grammar]

yadatrabhavataḥ kiṃ cicchakyaṃ kartuṃ priyaṃ mayā |
prāṇānapi parityajya sarvathā kṛtameva tat || 47 ||
[Analyze grammar]

na hyato dharmacaraṇaṃ kiṃ cidasti mahattaram |
yathā pitari śuśrūṣā tasya vā vacanakriyā || 48 ||
[Analyze grammar]

anukto'pyatrabhavatā bhavatyā vacanādaham |
vane vatsyāmi vijane varṣāṇīha caturdaśa || 49 ||
[Analyze grammar]

na nūnaṃ mayi kaikeyi kiṃ cidāśaṃsase guṇam |
yad rājānamavocastvaṃ mameśvaratarā satī || 50 ||
[Analyze grammar]

yāvanmātaramāpṛcche sītāṃ cānunayāmyaham |
tato'dyaiva gamiṣyāmi daṇḍakānāṃ mahadvanam || 51 ||
[Analyze grammar]

bharataḥ pālayed rājyaṃ śuśrūṣecca pituryathā |
tathā bhavatyā kartavyaṃ sa hi dharmaḥ sanātanaḥ || 52 ||
[Analyze grammar]

sa rāmasya vacaḥ śrutvā bhṛśaṃ duḥkhahataḥ pitā |
śokādaśaknuvanbāṣpaṃ praruroda mahāsvanam || 53 ||
[Analyze grammar]

vanditvā caraṇau rāmo visaṃjñasya pitustadā |
kaikeyyāścāpyanāryāyā niṣpapāta mahādyutiḥ || 54 ||
[Analyze grammar]

sa rāmaḥ pitaraṃ kṛtvā kaikeyīṃ ca pradakṣiṇam |
niṣkramyāntaḥpurāttasmāt svaṃ dadarśa suhṛjjanam || 55 ||
[Analyze grammar]

taṃ bāṣpaparipūrṇākṣaḥ pṛṣṭhato'nujagāma ha |
lakṣmaṇaḥ paramakruddhaḥ sumitrānandavardhanaḥ || 56 ||
[Analyze grammar]

ābhiṣecanikaṃ bhāṇḍaṃ kṛtvā rāmaḥ pradakṣiṇam |
śanairjagāma sāpekṣo dṛṣṭiṃ tatrāvicālayan || 57 ||
[Analyze grammar]

na cāsya mahatīṃ lakṣmīṃ rājyanāśo'pakarṣati |
lokakāntasya kāntatvaṃ śītaraśmeriva kṣapā || 58 ||
[Analyze grammar]

na vanaṃ gantukāmasya tyajataśca vasuṃdharām |
sarvalokātigasyeva lakṣyate cittavikriyā || 59 ||
[Analyze grammar]

dhārayanmanasā duḥkhamindriyāṇi nigṛhya ca |
praviveśātmavān veśma māturapriyaśaṃsivān || 60 ||
[Analyze grammar]

praviśya veśmātibhṛśaṃ mudānvitaṃ samīkṣya tāṃ cārthavipattimāgatām |
na caiva rāmo'tra jagāma vikriyāṃ suhṛjjanasyātmavipattiśaṅkayā || 61 ||
[Analyze grammar]