Chapter 10

ājñāpya tu mahārājo rāghavasyābhiṣecanam |
priyārhāṃ priyamākhyātuṃ viveśāntaḥpuraṃ vaśī || 1 ||
[Analyze grammar]

tāṃ tatra patitāṃ bhūmau śayānāmatathocitām |
pratapta iva duḥkhena so'paśyajjagatīpatiḥ || 2 ||
[Analyze grammar]

sa vṛddhastaruṇīṃ bhāryāṃ prāṇebhyo'pi garīyasīm |
apāpaḥ pāpasaṃkalpāṃ dadarśa dharaṇītale || 3 ||
[Analyze grammar]

kareṇumiva digdhena viddhāṃ mṛgayuṇā vane |
mahāgaja ivāraṇye snehāt parimamarśa tām || 4 ||
[Analyze grammar]

parimṛśya ca pāṇibhyāmabhisaṃtrastacetanaḥ |
kāmī kamalapatrākṣīmuvāca vanitāmidam || 5 ||
[Analyze grammar]

na te'hamabhijānāmi krodhamātmani saṃśritam |
devi kenābhiyuktāsi kena vāsi vimānitā || 6 ||
[Analyze grammar]

yadidaṃ mama duḥkhāya śeṣe kalyāṇi pāṃsuṣu |
bhūmau śeṣe kimarthaṃ tvaṃ mayi kalyāṇa cetasi |
bhūtopahatacitteva mama cittapramāthinī || 7 ||
[Analyze grammar]

santi me kuśalā vaidyā abhituṣṭāśca sarvaśaḥ |
sukhitāṃ tvāṃ kariṣyanti vyādhimācakṣva bhāmini || 8 ||
[Analyze grammar]

kasya vā te priyaṃ kāryaṃ kena vā vipriyaṃ kṛtam |
kaḥ priyaṃ labhatāmadya ko vā sumahadapriyam || 9 ||
[Analyze grammar]

avadhyo vadhyatāṃ ko vā vadhyaḥ ko vā vimucyatām |
daridraḥ ko bhavatvāḍhyo dravyavān vāpyakiṃcanaḥ || 10 ||
[Analyze grammar]

ahaṃ caiva madīyāśca sarve tava vaśānugāḥ |
na te kaṃ cidabhiprāyaṃ vyāhantumahamutsahe || 11 ||
[Analyze grammar]

ātmano jīvitenāpi brūhi yanmanasecchasi |
yāvadāvartate cakraṃ tāvatī me vasuṃdharā || 12 ||
[Analyze grammar]

tathoktā sā samāśvastā vaktukāmā tadapriyam |
paripīḍayituṃ bhūyo bhartāramupacakrame || 13 ||
[Analyze grammar]

nāsmi viprakṛtā deva kena cinna vimānitā |
abhiprāyastu me kaścittamicchāmi tvayā kṛtam || 14 ||
[Analyze grammar]

pratijñāṃ pratijānīṣva yadi tvaṃ kartumicchasi |
atha tadvyāhariṣyāmi yadabhiprārthitaṃ mayā || 15 ||
[Analyze grammar]

evamuktastayā rājā priyayā strīvaśaṃ gataḥ |
tāmuvāca mahātejāḥ kaikeyīmīṣadutsmitaḥ || 16 ||
[Analyze grammar]

avalipte na jānāsi tvattaḥ priyataro mama |
manujo manujavyāghrād rāmādanyo na vidyate || 17 ||
[Analyze grammar]

bhadre hṛdayamapyetadanumṛśśyoddharasva me |
etat samīkṣya kaikeyi brūhi yat sādhu manyase || 18 ||
[Analyze grammar]

balamātmani paśyantī na māṃ śaṅkitumarhasi |
kariṣyāmi tava prītiṃ sukṛtenāpi te śape || 19 ||
[Analyze grammar]

tena vākyena saṃhṛṣṭā tamabhiprāyamātmanaḥ |
vyājahāra mahāghoramabhyāgatamivāntakam || 20 ||
[Analyze grammar]

yathākrameṇa śapasi varaṃ mama dadāsi ca |
tacchṛṇvantu trayastriṃśaddevāḥ sendrapurogamāḥ || 21 ||
[Analyze grammar]

candrādityau nabhaścaiva grahā rātryahanī diśaḥ |
jagacca pṛthivī caiva sagandharvā sarākṣasā || 22 ||
[Analyze grammar]

niśācarāṇi bhūtāni gṛheṣu gṛhadevatāḥ |
yāni cānyāni bhūtāni jānīyurbhāṣitaṃ tava || 23 ||
[Analyze grammar]

satyasaṃdho mahātejā dharmajñaḥ susamāhitaḥ |
varaṃ mama dadātyeṣa tanme śṛṇvantu devatāḥ || 24 ||
[Analyze grammar]

iti devī maheṣvāsaṃ parigṛhyābhiśasya ca |
tataḥ paramuvācedaṃ varadaṃ kāmamohitam || 25 ||
[Analyze grammar]

varau yau me tvayā deva tadā dattau mahīpate |
tau tāvadahamadyaiva vakṣyāmi śṛṇu me vacaḥ || 26 ||
[Analyze grammar]

abhiṣeka samārambho rāghavasyopakalpitaḥ |
anenaivābhiṣekeṇa bharato me'bhiṣicyatām || 27 ||
[Analyze grammar]

nava pañca ca varṣāṇi daṇḍakāraṇyamāśritaḥ |
cīrājinajaṭādhārī rāmo bhavatu tāpasaḥ || 28 ||
[Analyze grammar]

bharato bhajatāmadya yauvarājyamakaṇṭakam |
adya caiva hi paśyeyaṃ prayāntaṃ rāghavaṃ vane || 29 ||
[Analyze grammar]

tataḥ śrutvā mahārājaḥ kaikeyyā dāruṇaṃ vacaḥ |
vyathito viklavaścaiva vyāghrīṃ dṛṣṭvā yathā mṛgaḥ || 30 ||
[Analyze grammar]

asaṃvṛtāyāmāsīno jagatyāṃ dīrghamucchvasan |
aho dhigiti sāmarṣo vācamuktvā narādhipaḥ |
mohamāpedivānbhūyaḥ śokopahatacetanaḥ || 31 ||
[Analyze grammar]

cireṇa tu nṛpaḥ saṃjñāṃ pratilabhya suduḥkhitaḥ |
kaikeyīmabravīt kruddhaḥ pradahanniva cakṣuṣā || 32 ||
[Analyze grammar]

nṛśaṃse duṣṭacāritre kulasyāsya vināśini |
kiṃ kṛtaṃ tava rāmeṇa pāpe pāpaṃ mayāpi vā || 33 ||
[Analyze grammar]

sadā te jananī tulyāṃ vṛttiṃ vahati rāghavaḥ |
tasyaiva tvamanarthāya kiṃnimittamihodyatā || 34 ||
[Analyze grammar]

tvaṃ mayātmavināśāya bhavanaṃ svaṃ praveśitā |
avijñānānnṛpasutā vyālī tīkṣṇaviṣā yathā || 35 ||
[Analyze grammar]

jīvaloko yadā sarvo rāmasyeha guṇastavam |
aparādhaṃ kamuddiśya tyakṣyāmīṣṭamahaṃ sutam || 36 ||
[Analyze grammar]

kausalyāṃ vā sumitrāṃ vā tyajeyamapi vā śriyam |
jīvitaṃ vātmano rāmaṃ na tveva pitṛvatsalam || 37 ||
[Analyze grammar]

parā bhavati me prītirdṛṣṭvā tanayamagrajam |
apaśyatastu me rāmaṃ naṣṭā bhavati cetanā || 38 ||
[Analyze grammar]

tiṣṭhel loko vinā sūryaṃ sasyaṃ vā salilaṃ vinā |
na tu rāmaṃ vinā dehe tiṣṭhettu mama jīvitam || 39 ||
[Analyze grammar]

tadalaṃ tyajyatāmeṣa niścayaḥ pāpaniścaye |
api te caraṇau mūrdhnā spṛśāmyeṣa prasīda me || 40 ||
[Analyze grammar]

sa bhūmipālo vilapannanāthavat striyā gṛhīto dṛhaye'timātratā |
papāta devyāścaraṇau prasāritāv ubhāvasaṃspṛśya yathāturastathā || 41 ||
[Analyze grammar]