Chapter 9

evamuktā tu kaikeyī krodhena jvalitānanā |
dīrghamuṣṇaṃ viniḥśvasya mantharāmidamabravīt || 1 ||
[Analyze grammar]

adya rāmamitaḥ kṣipraṃ vanaṃ prasthāpayāmyaham |
yauvarājyena bharataṃ kṣipramevābhiṣecaye || 2 ||
[Analyze grammar]

idaṃ tvidānīṃ saṃpaśya kenopāyena manthare |
bharataḥ prāpnuyād rājyaṃ na tu rāmaḥ kathaṃ cana || 3 ||
[Analyze grammar]

evamuktā tayā devyā mantharā pāpadarśinī |
rāmārthamupahiṃsantī kaikeyīmidamabravīt || 4 ||
[Analyze grammar]

hantedānīṃ pravakṣyāmi kaikeyi śrūyatāṃ ca me |
yathā te bharato rājyaṃ putraḥ prāpsyati kevalam || 5 ||
[Analyze grammar]

śrutvaivaṃ vacanaṃ tasyā mantharāyāstu kaikayī |
kiṃ cidutthāya śayanāt svāstīrṇādidamabravīt || 6 ||
[Analyze grammar]

kathaya tvaṃ mamopāyaṃ kenopāyena manthare |
bharataḥ prāpnuyād rājyaṃ na tu rāmaḥ kathaṃ cana || 7 ||
[Analyze grammar]

evamuktā tayā devyā mantharā pāpadarśinī |
rāmārthamupahiṃsantī kubjā vacanamabravīt || 8 ||
[Analyze grammar]

tava devāsure yuddhe saha rājarṣibhiḥ patiḥ |
agacchattvāmupādāya devarājasya sāhyakṛt || 9 ||
[Analyze grammar]

diśamāsthāya kaikeyi dakṣiṇāṃ daṇḍakānprati |
vaijayantamiti khyātaṃ puraṃ yatra timidhvajaḥ || 10 ||
[Analyze grammar]

sa śambara iti khyātaḥ śatamāyo mahāsuraḥ |
dadau śakrasya saṃgrāmaṃ devasaṃghairanirjitaḥ || 11 ||
[Analyze grammar]

tasminmahati saṃgrāme rājā daśarathastadā |
apavāhya tvayā devi saṃgrāmānnaṣṭacetanaḥ || 12 ||
[Analyze grammar]

tatrāpi vikṣataḥ śastraiḥ patiste rakṣitastvayā |
tuṣṭena tena dattau te dvau varau śubhadarśane || 13 ||
[Analyze grammar]

sa tvayoktaḥ patirdevi yadeccheyaṃ tadā varau |
gṛhṇīyāmiti tattena tathetyuktaṃ mahātmanā |
anabhijñā hyahaṃ devi tvayaiva kathitaṃ purā || 14 ||
[Analyze grammar]

tau varau yāca bhartāraṃ bharatasyābhiṣecanam |
pravrājanaṃ ca rāmasya tvaṃ varṣāṇi caturdaśa || 15 ||
[Analyze grammar]

krodhāgāraṃ praviśyādya kruddhevāśvapateḥ sute |
śeṣvānantarhitāyāṃ tvaṃ bhūmau malinavāsinī |
mā smainaṃ pratyudīkṣethā mā cainamabhibhāṣathāḥ || 16 ||
[Analyze grammar]

dayitā tvaṃ sadā bharturatra me nāsti saṃśayaḥ |
tvatkṛte ca mahārājo viśedapi hutāśanam || 17 ||
[Analyze grammar]

na tvāṃ krodhayituṃ śakto na kruddhāṃ pratyudīkṣitum |
tava priyārthaṃ rājā hi prāṇānapi parityajet || 18 ||
[Analyze grammar]

na hyatikramituṃ śaktastava vākyaṃ mahīpatiḥ |
mandasvabhāve budhyasva saubhāgyabalamātmanaḥ || 19 ||
[Analyze grammar]

maṇimuktāsuvarṇāni ratnāni vividhāni ca |
dadyāddaśaratho rājā mā sma teṣu manaḥ kṛthāḥ || 20 ||
[Analyze grammar]

yau tau devāsure yuddhe varau daśaratho'dadāt |
tau smāraya mahābhāge so'rtho mā tvāmatikramet || 21 ||
[Analyze grammar]

yadā tu te varaṃ dadyāt svayamutthāpya rāghavaḥ |
vyavasthāpya mahārājaṃ tvamimaṃ vṛṇuyā varam || 22 ||
[Analyze grammar]

rāmaṃ pravrājayāraṇye nava varṣāṇi pañca ca |
bharataḥ kriyatāṃ rājā pṛthivyāṃ pārthivarṣabhaḥ || 23 ||
[Analyze grammar]

evaṃ pravrājitaścaiva rāmo'rāmo bhaviṣyati |
bharataśca hatāmitrastava rājā bhaviṣyati || 24 ||
[Analyze grammar]

yena kālena rāmaśca vanāt pratyāgamiṣyati |
tena kālena putraste kṛtamūlo bhaviṣyati |
saṃgṛhītamanuṣyaśca suhṛdbhiḥ sārdhamātmavān || 25 ||
[Analyze grammar]

prāptakālaṃ tu te manye rājānaṃ vītasādhvasā |
rāmābhiṣekasaṃkalpānnigṛhya vinivartaya || 26 ||
[Analyze grammar]

anarthamartharūpeṇa grāhitā sā tatastayā |
hṛṣṭā pratītā kaikeyī mantharāmidamabravīt || 27 ||
[Analyze grammar]

kubje tvāṃ nābhijānāmi śreṣṭhāṃ śreṣṭhābhidhāyinīm |
pṛthivyāmasi kubjānāmuttamā buddhiniścaye || 28 ||
[Analyze grammar]

tvameva tu mamārtheṣu nityayuktā hitaiṣiṇī |
nāhaṃ samavabudhyeyaṃ kubje rājñaścikīrṣitam || 29 ||
[Analyze grammar]

santi duḥsaṃsthitāḥ kubjā vakrāḥ paramapāpikāḥ |
tvaṃ padmamiva vātena saṃnatā priyadarśanā || 30 ||
[Analyze grammar]

uraste'bhiniviṣṭaṃ vai yāvat skandhāt samunnatam |
adhastāccodaraṃ śāntaṃ sunābhamiva lajjitam || 31 ||
[Analyze grammar]

jaghanaṃ tava nirghuṣṭaṃ raśanādāmaśobhitam |
jaṅghe bhṛśamupanyaste pādau cāpyāyatāv ubhau || 32 ||
[Analyze grammar]

tvamāyatābhyāṃ sakthibhyāṃ manthare kṣaumavāsini |
agrato mama gacchantī rājahaṃsīva rājase || 33 ||
[Analyze grammar]

tavedaṃ sthagu yaddīrghaṃ rathaghoṇamivāyatam |
matayaḥ kṣatravidyāśca māyāścātra vasanti te || 34 ||
[Analyze grammar]

atra te pratimokṣyāmi mālāṃ kubje hiraṇmayīm |
abhiṣikte ca bharate rāghave ca vanaṃ gate || 35 ||
[Analyze grammar]

jātyena ca suvarṇena suniṣṭaptena sundari |
labdhārthā ca pratītā ca lepayiṣyāmi te sthagu || 36 ||
[Analyze grammar]

mukhe ca tilakaṃ citraṃ jātarūpamayaṃ śubham |
kārayiṣyāmi te kubje śubhānyābharaṇāni ca || 37 ||
[Analyze grammar]

paridhāya śubhe vastre devadeva cariṣyasi |
candramāhvayamānena mukhenāpratimānanā |
gamiṣyasi gatiṃ mukhyāṃ garvayantī dviṣajjanam || 38 ||
[Analyze grammar]

tavāpi kubjāḥ kubjāyāḥ sarvābharaṇabhūṣitāḥ |
pādau paricariṣyanti yathaiva tvaṃ sadā mama || 39 ||
[Analyze grammar]

iti praśasyamānā sā kaikeyīmidamabravīt |
śayānāṃ śayane śubhre vedyāmagniśikhāmiva || 40 ||
[Analyze grammar]

gatodake setubandho na kalyāṇi vidhīyate |
uttiṣṭha kuru kalyāṇaṃ rājānamanudarśaya || 41 ||
[Analyze grammar]

tathā protsāhitā devī gatvā mantharayā saha |
krodhāgāraṃ viśālākṣī saubhāgyamadagarvitā || 42 ||
[Analyze grammar]

anekaśatasāhasraṃ muktāhāraṃ varāṅganā |
avamucya varārhāṇi śubhānyābharaṇāni ca || 43 ||
[Analyze grammar]

tato hemopamā tatra kubjā vākyaṃ vaśaṃ gatā |
saṃviśya bhūmau kaikeyī mantharāmidamabravīt || 44 ||
[Analyze grammar]

iha vā māṃ mṛtāṃ kubje nṛpāyāvedayiṣyasi |
vanaṃ tu rāghave prāpte bharataḥ prāpsyati kṣitim || 45 ||
[Analyze grammar]

athaitaduktvā vacanaṃ sudāruṇaṃ nidhāya sarvābharaṇāni bhāminī |
asaṃvṛtāmāstaraṇena medinīṃ tadādhiśiśye patiteva kinnarī || 46 ||
[Analyze grammar]

udīrṇasaṃrambhatamovṛtānanā tathāvamuktottamamālyabhūṣaṇā |
narendrapatnī vimanā babhūva sā tamovṛtā dyauriva magnatārakā || 47 ||
[Analyze grammar]