Chapter 4

gateṣvatha nṛpo bhūyaḥ paureṣu saha mantribhiḥ |
mantrayitvā tataścakre niścayajñaḥ sa niścayam || 1 ||
[Analyze grammar]

śva eva puṣyo bhavitā śvo'bhiṣecyeta me sutaḥ |
rāmo rājīvatāmrākṣo yauvarājya iti prabhuḥ || 2 ||
[Analyze grammar]

athāntargṛhamāviśya rājā daśarathastadā |
sūtamājñāpayāmāsa rāmaṃ punarihānaya || 3 ||
[Analyze grammar]

pratigṛhya sa tadvākyaṃ sūtaḥ punarupāyayau |
rāmasya bhavanaṃ śīghraṃ rāmamānayituṃ punaḥ || 4 ||
[Analyze grammar]

dvāḥsthairāveditaṃ tasya rāmāyāgamanaṃ punaḥ |
śrutvaiva cāpi rāmastaṃ prāptaṃ śaṅkānvito'bhavat || 5 ||
[Analyze grammar]

praveśya cainaṃ tvaritaṃ rāmo vacanamabravīt |
yadāgamanakṛtyaṃ te bhūyastadbrūhyaśeṣataḥ || 6 ||
[Analyze grammar]

tamuvāca tataḥ sūto rājā tvāṃ draṣṭumicchati |
śrutvā pramāṇamatra tvaṃ gamanāyetarāya vā || 7 ||
[Analyze grammar]

iti sūtavacaḥ śrutvā rāmo'tha tvarayānvitaḥ |
prayayau rājabhavanaṃ punardraṣṭuṃ nareśvaram || 8 ||
[Analyze grammar]

taṃ śrutvā samanuprāptaṃ rāmaṃ daśaratho nṛpaḥ |
praveśayāmāsa gṛhaṃ vivikṣuḥ priyamuttamam || 9 ||
[Analyze grammar]

praviśanneva ca śrīmān rāghavo bhavanaṃ pituḥ |
dadarśa pitaraṃ dūrāt praṇipatya kṛtāñjaliḥ || 10 ||
[Analyze grammar]

praṇamantaṃ samutthāpya taṃ pariṣvajya bhūmipaḥ |
pradiśya cāsmai ruciramāsanaṃ punarabravīt || 11 ||
[Analyze grammar]

rāma vṛddho'smi dīrghāyurbhuktā bhogā mayepsitāḥ |
annavadbhiḥ kratuśataistatheṣṭaṃ bhūridakṣiṇaiḥ || 12 ||
[Analyze grammar]

jātamiṣṭamapatyaṃ me tvamadyānupamaṃ bhuvi |
dattamiṣṭamadhītaṃ ca mayā puruṣasattama || 13 ||
[Analyze grammar]

anubhūtāni ceṣṭāni mayā vīra sukhāni ca |
devarṣi pitṛviprāṇāmanṛṇo'smi tathātmanaḥ || 14 ||
[Analyze grammar]

na kiṃ cinmama kartavyaṃ tavānyatrābhiṣecanāt |
ato yattvāmahaṃ brūyāṃ tanme tvaṃ kartumarhasi || 15 ||
[Analyze grammar]

adya prakṛtayaḥ sarvāstvāmicchanti narādhipam |
atastvāṃ yuvarājānamabhiṣekṣyāmi putraka || 16 ||
[Analyze grammar]

api cādyāśubhān rāma svapnānpaśyāmi dāruṇān |
sanirghātā maholkāśca patantīha mahāsvanāḥ || 17 ||
[Analyze grammar]

avaṣṭabdhaṃ ca me rāma nakṣatraṃ dāruṇairgrahaiḥ |
āvedayanti daivajñāḥ sūryāṅgārakarāhubhiḥ || 18 ||
[Analyze grammar]

prāyeṇa hi nimittānāmīdṛśānāṃ samudbhave |
rājā vā mṛtyumāpnoti ghorāṃ vāpadamṛcchati || 19 ||
[Analyze grammar]

tad yāvadeva me ceto na vimuhyati rāghava |
tāvadevābhiṣiñcasva calā hi prāṇināṃ matiḥ || 20 ||
[Analyze grammar]

adya candro'bhyupagataḥ puṣyāt pūrvaṃ punarvasum |
śvaḥ puṣya yogaṃ niyataṃ vakṣyante daivacintakāḥ || 21 ||
[Analyze grammar]

tatra puṣye'bhiṣiñcasva manastvarayatīva mām |
śvastvāhamabhiṣekṣyāmi yauvarājye paraṃtapa || 22 ||
[Analyze grammar]

tasmāttvayādya vratinā niśeyaṃ niyatātmanā |
saha vadhvopavastavyā darbhaprastaraśāyinā || 23 ||
[Analyze grammar]

suhṛdaścāpramattāstvāṃ rakṣantvadya samantataḥ |
bhavanti bahuvighnāni kāryāṇyevaṃvidhāni hi || 24 ||
[Analyze grammar]

viproṣitaśca bharato yāvadeva purāditaḥ |
tāvadevābhiṣekaste prāptakālo mato mama || 25 ||
[Analyze grammar]

kāmaṃ khalu satāṃ vṛtte bhrātā te bharataḥ sthitaḥ |
jyeṣṭhānuvartī dharmātmā sānukrośo jitendriyaḥ || 26 ||
[Analyze grammar]

kiṃ tu cittaṃ manuṣyāṇāmanityamiti me matiḥ |
satāṃ ca dharmanityānāṃ kṛtaśobhi ca rāghava || 27 ||
[Analyze grammar]

ityuktaḥ so'bhyanujñātaḥ śvobhāvinyabhiṣecane |
vrajeti rāmaḥ pitaramabhivādyābhyayādgṛham || 28 ||
[Analyze grammar]

praviśya cātmano veśma rājñoddiṣṭe'bhiṣecane |
tasmin kṣaṇe vinirgatya māturantaḥpuraṃ yayau || 29 ||
[Analyze grammar]

tatra tāṃ pravaṇāmeva mātaraṃ kṣaumavāsinīm |
vāgyatāṃ devatāgāre dadarśa yācatīṃ śriyam || 30 ||
[Analyze grammar]

prāgeva cāgatā tatra sumitrā lakṣmaṇastathā |
sītā cānāyitā śrutvā priyaṃ rāmābhiṣecanam || 31 ||
[Analyze grammar]

tasmin kāle hi kausalyā tasthāvāmīlitekṣaṇā |
sumitrayānvāsyamānā sītayā lakṣmaṇena ca || 32 ||
[Analyze grammar]

śrutvā puṣyeṇa putrasya yauvarājyābhiṣecanam |
prāṇāyāmena puruṣaṃ dhyāyamānā janārdanam || 33 ||
[Analyze grammar]

tathā saniyamāmeva so'bhigamyābhivādya ca |
uvāca vacanaṃ rāmo harṣayaṃstāmidaṃ tadā || 34 ||
[Analyze grammar]

amba pitrā niyukto'smi prajāpālanakarmaṇi |
bhavitā śvo'bhiṣeko me yathā me śāsanaṃ pituḥ || 35 ||
[Analyze grammar]

sītayāpyupavastavyā rajanīyaṃ mayā saha |
evamṛtvigupādhyāyaiḥ saha māmuktavānpitā || 36 ||
[Analyze grammar]

yāni yānyatra yogyāni śvobhāvinyabhiṣecane |
tāni me maṅgalānyadya vaidehyāścaiva kāraya || 37 ||
[Analyze grammar]

etacchrutvā tu kausalyā cirakālābhikāṅkṣitam |
harṣabāṣpakalaṃ vākyamidaṃ rāmamabhāṣata || 38 ||
[Analyze grammar]

vatsa rāma ciraṃ jīva hatāste paripanthinaḥ |
jñātīnme tvaṃ śriyā yuktaḥ sumitrāyāśca nandaya || 39 ||
[Analyze grammar]

kalyāṇe bata nakṣatre mayi jāto'si putraka |
yena tvayā daśaratho guṇairārādhitaḥ pitā || 40 ||
[Analyze grammar]

amoghaṃ bata me kṣāntaṃ puruṣe puṣkarekṣaṇe |
yeyamikṣvākurājyaśrīḥ putra tvāṃ saṃśrayiṣyati || 41 ||
[Analyze grammar]

ityevamukto mātredaṃ rāmo bhāratamabravīt |
prāñjaliṃ prahvamāsīnamabhivīkṣya smayanniva || 42 ||
[Analyze grammar]

lakṣmaṇemāṃ mayā sārdhaṃ praśādhi tvaṃ vasuṃdharām |
dvitīyaṃ me'ntarātmānaṃ tvāmiyaṃ śrīrupasthitā || 43 ||
[Analyze grammar]

saumitre bhuṅkṣva bhogāṃstvamiṣṭān rājyaphalāni ca |
jīvitaṃ ca hi rājyaṃ ca tvadarthamabhikāmaye || 44 ||
[Analyze grammar]

ityuktvā lakṣmaṇaṃ rāmo mātarāvabhivādya ca |
abhyanujñāpya sītāṃ ca jagāma svaṃ niveśanam || 45 ||
[Analyze grammar]