Chapter 3

teṣāmajñalipadmāni pragṛhītāni sarvaśaḥ |
pratigṛhyābravīd rājā tebhyaḥ priyahitaṃ vacaḥ || 1 ||
[Analyze grammar]

aho'smi paramaprītaḥ prabhāvaścātulo mama |
yanme jyeṣṭhaṃ priyaṃ putraṃ yauvarājyasthamicchatha || 2 ||
[Analyze grammar]

iti pratyarcya tān rājā brāhmaṇānidamabravīt |
vasiṣṭhaṃ vāmadevaṃ ca teṣāmevopaśṛṇvatām || 3 ||
[Analyze grammar]

caitraḥ śrīmānayaṃ māsaḥ puṇyaḥ puṣpitakānanaḥ |
yauvarājyāya rāmasya sarvamevopakalpyatām || 4 ||
[Analyze grammar]

kṛtamityeva cābrūtāmabhigamya jagatpatim |
yathoktavacanaṃ prītau harṣayuktau dvijarṣabhau || 5 ||
[Analyze grammar]

tataḥ sumantraṃ dyutimān rājā vacanamabravīt |
rāmaḥ kṛtātmā bhavatā śīghramānīyatāmiti || 6 ||
[Analyze grammar]

sa tatheti pratijñāya sumantro rājaśāsanāt |
rāmaṃ tatrānayāṃ cakre rathena rathināṃ varam || 7 ||
[Analyze grammar]

atha tatra samāsīnāstadā daśarathaṃ nṛpam |
prācyodīcyāḥ pratīcyāśca dākṣiṇātyāśca bhūmipāḥ || 8 ||
[Analyze grammar]

mlecchāścāryāśca ye cānye vanaśailāntavāsinaḥ |
upāsāṃ cakrire sarve taṃ devā iva vāsavam || 9 ||
[Analyze grammar]

teṣāṃ madhye sa rājarṣirmarutāmiva vāsavaḥ |
prāsādastho rathagataṃ dadarśāyāntamātmajam || 10 ||
[Analyze grammar]

gandharvarājapratimaṃ loke vikhyātapauruṣam |
dīrghabāhuṃ mahāsattvaṃ mattamātaṅgagāminam || 11 ||
[Analyze grammar]

candrakāntānanaṃ rāmamatīva priyadarśanam |
rūpaudāryaguṇaiḥ puṃsāṃ dṛṣṭicittāpahāriṇam || 12 ||
[Analyze grammar]

gharmābhitaptāḥ parjanyaṃ hlādayantamiva prajāḥ |
na tatarpa samāyāntaṃ paśyamāno narādhipaḥ || 13 ||
[Analyze grammar]

avatārya sumantrastaṃ rāghavaṃ syandanottamāt |
pituḥ samīpaṃ gacchantaṃ prāñjaliḥ pṛṣṭhato'nvagāt || 14 ||
[Analyze grammar]

sa taṃ kailāsaśṛṅgābhaṃ prāsādaṃ narapuṃgavaḥ |
āruroha nṛpaṃ draṣṭuṃ saha sūtena rāghavaḥ || 15 ||
[Analyze grammar]

sa prāñjalirabhipretya praṇataḥ piturantike |
nāma svaṃ śrāvayan rāmo vavande caraṇau pituḥ || 16 ||
[Analyze grammar]

taṃ dṛṣṭvā praṇataṃ pārśve kṛtāñjalipuṭaṃ nṛpaḥ |
gṛhyāñjalau samākṛṣya sasvaje priyamātmajam || 17 ||
[Analyze grammar]

tasmai cābhyudyataṃ śrīmānmaṇikāñcanabhūṣitam |
dideśa rājā ruciraṃ rāmāya paramāsanam || 18 ||
[Analyze grammar]

tadāsanavaraṃ prāpya vyadīpayata rāghavaḥ |
svayeva prabhayā merumudaye vimalo raviḥ || 19 ||
[Analyze grammar]

tena vibhrājitā tatra sā sabhābhivyarocata |
vimalagrahanakṣatrā śāradī dyaurivendunā || 20 ||
[Analyze grammar]

taṃ paśyamāno nṛpatistutoṣa priyamātmajam |
alaṃkṛtamivātmānamādarśatalasaṃsthitam || 21 ||
[Analyze grammar]

sa taṃ sasmitamābhāṣya putraṃ putravatāṃ varaḥ |
uvācedaṃ vaco rājā devendramiva kaśyapaḥ || 22 ||
[Analyze grammar]

jyeṣṭhāyāmasi me patnyāṃ sadṛśyāṃ sadṛśaḥ sutaḥ |
utpannastvaṃ guṇaśreṣṭho mama rāmātmajaḥ priyaḥ || 23 ||
[Analyze grammar]

tvayā yataḥ prajāścemāḥ svaguṇairanurañjitāḥ |
tasmāttvaṃ puṣyayogena yauvarājyamavāpnuhi || 24 ||
[Analyze grammar]

kāmatastvaṃ prakṛtyaiva vinīto guṇavānasi |
guṇavatyapi tu snehāt putra vakṣyāmi te hitam || 25 ||
[Analyze grammar]

bhūyo vinayamāsthāya bhava nityaṃ jitendriyaḥ |
kāmakrodhasamutthāni tyajethā vyasanāni ca || 26 ||
[Analyze grammar]

parokṣayā vartamāno vṛttyā pratyakṣayā tathā |
amātyaprabhṛtīḥ sarvāḥ prakṛtīścānurañjaya || 27 ||
[Analyze grammar]

tuṣṭānuraktaprakṛtiryaḥ pālayati medinīm |
tasya nandanti mitrāṇi labdhvāmṛtamivāmarāḥ |
tasmāt putra tvamātmānaṃ niyamyaiva samācara || 28 ||
[Analyze grammar]

tacchrutvā suhṛdastasya rāmasya priyakāriṇaḥ |
tvaritāḥ śīghramabhyetya kausalyāyai nyavedayan || 29 ||
[Analyze grammar]

sā hiraṇyaṃ ca gāścaiva ratnāni vividhāni ca |
vyādideśa priyākhyebhyaḥ kausalyā pramadottamā || 30 ||
[Analyze grammar]

athābhivādya rājānaṃ rathamāruhya rāghavaḥ |
yayau svaṃ dyutimadveśma janaughaiḥ pratipūjitaḥ || 31 ||
[Analyze grammar]

te cāpi paurā nṛpatervacastacchrutvā tadā lābhamiveṣṭamāpya |
narendramāmantya gṛhāṇi gatvā devān samānarcuratīva hṛṣṭāḥ || 32 ||
[Analyze grammar]