Chapter 74

rāma dāśarathe vīra vīryaṃ te śrūyate'dhutam |
dhanuṣo bhedanaṃ caiva nikhilena mayā śrutam || 1 ||
[Analyze grammar]

tadadbhutamacintyaṃ ca bhedanaṃ dhanuṣastvayā |
tacchrutvāhamanuprāpto dhanurgṛhyāparaṃ śubham || 2 ||
[Analyze grammar]

tadidaṃ ghorasaṃkāśaṃ jāmadagnyaṃ mahaddhanuḥ |
pūrayasva śareṇaiva svabalaṃ darśayasva ca || 3 ||
[Analyze grammar]

tadahaṃ te balaṃ dṛṣṭvā dhanuṣo'sya prapūraṇe |
dvandvayuddhaṃ pradāsyāmi vīryaślāghyamidaṃ tava || 4 ||
[Analyze grammar]

tasya tadvacanaṃ śrutvā rājā daśarathastadā |
viṣaṇṇavadano dīnaḥ prāñjalirvākyamabravīt || 5 ||
[Analyze grammar]

kṣatraroṣāt praśāntastvaṃ brāhmaṇasya mahāyaśāḥ |
bālānāṃ mama putrāṇāmabhayaṃ dātumarhasi || 6 ||
[Analyze grammar]

bhārgavāṇāṃ kule jātaḥ svādhyāyavrataśālinām |
sahasrākṣe pratijñāya śastraṃ nikṣiptavānasi || 7 ||
[Analyze grammar]

sa tvaṃ dharmaparo bhūtvā kāśyapāya vasuṃdharām |
dattvā vanamupāgamya mahendrakṛtaketanaḥ || 8 ||
[Analyze grammar]

mama sarvavināśāya saṃprāptastvaṃ mahāmune |
na caikasmin hate rāme sarve jīvāmahe vayam || 9 ||
[Analyze grammar]

bruvatyevaṃ daśarathe jāmadagnyaḥ pratāpavān |
anādṛtyaiva tadvākyaṃ rāmamevābhyabhāṣata || 10 ||
[Analyze grammar]

ime dve dhanuṣī śreṣṭhe divye lokābhiviśrute |
dṛḍhe balavatī mukhye sukṛte viśvakarmaṇā || 11 ||
[Analyze grammar]

atisṛṣṭaṃ surairekaṃ tryambakāya yuyutsave |
tripuraghnaṃ naraśreṣṭha bhagnaṃ kākutstha yattvayā || 12 ||
[Analyze grammar]

idaṃ dvitīyaṃ durdharṣaṃ viṣṇordattaṃ surottamaiḥ |
samānasāraṃ kākutstha raudreṇa dhanuṣā tvidam || 13 ||
[Analyze grammar]

tadā tu devatāḥ sarvāḥ pṛcchanti sma pitāmaham |
śitikaṇṭhasya viṣṇośca balābalanirīkṣayā || 14 ||
[Analyze grammar]

abhiprāyaṃ tu vijñāya devatānāṃ pitāmahaḥ |
virodhaṃ janayāmāsa tayoḥ satyavatāṃ varaḥ || 15 ||
[Analyze grammar]

virodhe ca mahad yuddhamabhavad romaharṣaṇam |
śitikaṇṭhasya viṣṇośca parasparajayaiṣiṇoḥ || 16 ||
[Analyze grammar]

tadā tajjṛmbhitaṃ śaivaṃ dhanurbhīmaparākramam |
huṃkāreṇa mahādevaḥ stambhito'tha trilocanaḥ || 17 ||
[Analyze grammar]

devaistadā samāgamya sarṣisaṃghaiḥ sacāraṇaiḥ |
yācitau praśamaṃ tatra jagmatustau surottamau || 18 ||
[Analyze grammar]

jṛmbhitaṃ taddhanurdṛṣṭvā śaivaṃ viṣṇuparākramaiḥ |
adhikaṃ menire viṣṇuṃ devāḥ sarṣigaṇāstadā || 19 ||
[Analyze grammar]

dhanū rudrastu saṃkruddho videheṣu mahāyaśāḥ |
devarātasya rājarṣerdadau haste sasāyakam || 20 ||
[Analyze grammar]

idaṃ ca viṣṇavaṃ rāma dhanuḥ parapuraṃjayam |
ṛcīke bhārgave prādādviṣṇuḥ sa nyāsamuttamam || 21 ||
[Analyze grammar]

ṛcīkastu mahātejāḥ putrasyāpratikarmaṇaḥ |
piturmama dadau divyaṃ jamadagnermahātmanaḥ || 22 ||
[Analyze grammar]

nyastaśastre pitari me tapobalasamanvite |
arjuno vidadhe mṛtyuṃ prākṛtāṃ buddhimāsthitaḥ || 23 ||
[Analyze grammar]

vadhamapratirūpaṃ tu pituḥ śrutvā sudāruṇam |
kṣatramutsādayaṃ roṣājjātaṃ jātamanekaśaḥ || 24 ||
[Analyze grammar]

pṛthivīṃ cākhilāṃ prāpya kāśyapāya mahātmane |
yajñasyānte tadā rāma dakṣiṇāṃ puṇyakarmaṇe || 25 ||
[Analyze grammar]

dattvā mahendranilayastapobalasamanvitaḥ |
śrutavāndhanuṣo bhedaṃ tato'haṃ drutamāgataḥ || 26 ||
[Analyze grammar]

tadidaṃ vaiṣṇavaṃ rāma pitṛpaitāmahaṃ mahat |
kṣatradharmaṃ puraskṛtya gṛhṇīṣva dhanuruttamam || 27 ||
[Analyze grammar]

yojayasva dhanuḥ śreṣṭhe śaraṃ parapuraṃjayam |
yadi śaknoṣi kākutstha dvandvaṃ dāsyāmi te tataḥ || 28 ||
[Analyze grammar]