Chapter 62

pūrṇe varṣasahasre tu vratasnātaṃ mahāmunim |
abhyāgacchan surāḥ sarve tapaḥphalacikīrṣavaḥ || 1 ||
[Analyze grammar]

abravīt sumahātejā brahmā suruciraṃ vacaḥ |
ṛṣistvamasi bhadraṃ te svārjitaiḥ karmabhiḥ śubhaiḥ || 2 ||
[Analyze grammar]

tamevamuktvā deveśastridivaṃ punarabhyagāt |
viśvāmitro mahātejā bhūyastepe mahattapaḥ || 3 ||
[Analyze grammar]

tataḥ kālena mahatā menakā paramāpsarāḥ |
puṣkareṣu naraśreṣṭha snātuṃ samupacakrame || 4 ||
[Analyze grammar]

tāṃ dadarśa mahātejā menakāṃ kuśikātmajaḥ |
rūpeṇāpratimāṃ tatra vidyutaṃ jalade yathā || 5 ||
[Analyze grammar]

dṛṣṭvā kandarpavaśago munistāmidamabravīt |
apsaraḥ svāgataṃ te'stu vasa ceha mamāśrame |
anugṛhṇīṣva bhadraṃ te madanena sumohitam || 6 ||
[Analyze grammar]

ityuktā sā varārohā tatrāvāsamathākarot |
tapaso hi mahāvighno viśvāmitramupāgataḥ || 7 ||
[Analyze grammar]

tasyāṃ vasantyāṃ varṣāṇi pañca pañca ca rāghava |
viśvāmitrāśrame saumya sukhena vyaticakramuḥ || 8 ||
[Analyze grammar]

atha kāle gate tasmin viśvāmitro mahāmuniḥ |
savrīḍa iva saṃvṛttaścintāśokaparāyaṇaḥ || 9 ||
[Analyze grammar]

buddhirmuneḥ samutpannā sāmarṣā raghunandana |
sarvaṃ surāṇāṃ karmaitattapo'paharaṇaṃ mahat || 10 ||
[Analyze grammar]

ahorātrāpadeśena gatāḥ saṃvatsarā daśa |
kāmamohābhibhūtasya vighno'yaṃ pratyupasthitaḥ || 11 ||
[Analyze grammar]

viniḥśvasanmunivaraḥ paścāttāpena duḥkhitaḥ || 12 ||
[Analyze grammar]

bhītāmapsarasaṃ dṛṣṭvā vepantīṃ prāñjaliṃ sthitām |
menakāṃ madhurairvākyairvisṛjya kuśikātmajaḥ |
uttaraṃ parvataṃ rāma viśvāmitro jagāma ha || 13 ||
[Analyze grammar]

sa kṛtvā naiṣṭhikīṃ buddhiṃ jetukāmo mahāyaśāḥ |
kauśikītīramāsādya tapastepe sudāruṇam || 14 ||
[Analyze grammar]

tasya varṣasahasraṃ tu ghoraṃ tapa upāsataḥ |
uttare parvate rāma devatānāmabhūdbhayam || 15 ||
[Analyze grammar]

amantrayan samāgamya sarve sarṣigaṇāḥ surāḥ |
maharṣiśabdaṃ labhatāṃ sādhvayaṃ kuśikātmajaḥ || 16 ||
[Analyze grammar]

devatānāṃ vacaḥ śrutvā sarvalokapitāmahaḥ |
abravīnmadhuraṃ vākyaṃ viśvāmitraṃ tapodhanam || 17 ||
[Analyze grammar]

maharṣe svāgataṃ vatsa tapasogreṇa toṣitaḥ |
mahattvamṛṣimukhyatvaṃ dadāmi tava kauśika || 18 ||
[Analyze grammar]

brahmaṇaḥ sa vacaḥ śrutvā viśvāmitrastapodhanaḥ |
prāñjaliḥ praṇato bhūtvā pratyuvāca pitāmaham || 19 ||
[Analyze grammar]

brahmarṣi śabdamatulaṃ svārjitaiḥ karmabhiḥ śubhaiḥ |
yadi me bhagavānāha tato'haṃ vijitendriyaḥ || 20 ||
[Analyze grammar]

tamuvāca tato brahmā na tāvattvaṃ jitendriyaḥ |
yatasva muniśārdūla ityuktvā tridivaṃ gataḥ || 21 ||
[Analyze grammar]

viprasthiteṣu deveṣu viśvāmitro mahāmuniḥ |
ūrdhvabāhurnirālambo vāyubhakṣastapaścaran || 22 ||
[Analyze grammar]

dharme pañcatapā bhūtvā varṣāsvākāśasaṃśrayaḥ |
śiśire salilasthāyī rātryahāni tapodhanaḥ || 23 ||
[Analyze grammar]

evaṃ varṣasahasraṃ hi tapo ghoramupāgamat || 24 ||
[Analyze grammar]

tasmin saṃtapyamāne tu viśvāmitre mahāmunau |
saṃbhramaḥ sumahānāsīt surāṇāṃ vāsavasya ca || 25 ||
[Analyze grammar]

rambhāmapsarasaṃ śakraḥ saha sarvairmarudgaṇaiḥ |
uvācātmahitaṃ vākyamahitaṃ kauśikasya ca || 26 ||
[Analyze grammar]