Chapter 59

tapobalahatān kṛtvā vāsiṣṭhān samahodayān |
ṛṣimadhye mahātejā viśvāmitro'bhyabhāṣata || 1 ||
[Analyze grammar]

ayamikṣvākudāyādastriśaṅkuriti viśrutaḥ |
dharmiṣṭhaśca vadānyaśca māṃ caiva śaraṇaṃ gataḥ |
svenānena śarīreṇa devalokajigīṣayā || 2 ||
[Analyze grammar]

yathāyaṃ svaśarīreṇa devalokaṃ gamiṣyati |
tathā pravartyatāṃ yajño bhavadbhiśca mayā saha || 3 ||
[Analyze grammar]

viśvāmitravacaḥ śrutvā sarva eva maharṣayaḥ |
ūcuḥ sametya sahitā dharmajñā dharmasaṃhitam || 4 ||
[Analyze grammar]

ayaṃ kuśikadāyādo muniḥ paramakopanaḥ |
yadāha vacanaṃ samyagetat kāryaṃ na saṃśayaḥ || 5 ||
[Analyze grammar]

agnikalpo hi bhagavāñ śāpaṃ dāsyati roṣitaḥ |
tasmāt pravartyatāṃ yajñaḥ saśarīro yathā divam |
gacchedikṣvākudāyādo viśvāmitrasya tejasā || 6 ||
[Analyze grammar]

tataḥ pravartyatāṃ yajñaḥ sarve samadhitiṣṭhate || 7 ||
[Analyze grammar]

evamuktvā maharṣayaḥ saṃjahrustāḥ kriyāstadā |
yājakāśca mahātejā viśvāmitro'bhavat kratau || 8 ||
[Analyze grammar]

ṛtvijaścānupūrvyeṇa mantravanmantrakovidāḥ |
cakruḥ sarvāṇi karmāṇi yathākalpaṃ yathāvidhi || 9 ||
[Analyze grammar]

tataḥ kālena mahatā viśvāmitro mahātapāḥ |
cakārāvāhanaṃ tatra bhāgārthaṃ sarvadevatāḥ || 10 ||
[Analyze grammar]

nāhyāgamaṃstadāhūtā bhāgārthaṃ sarvadevatāḥ |
tataḥ krodhasamāviṣṭo viśvamitro mahāmuniḥ || 11 ||
[Analyze grammar]

sruvamudyamya sakrodhastriśaṅkumidamabravīt |
paśya me tapaso vīryaṃ svārjitasya nareśvara || 12 ||
[Analyze grammar]

eṣa tvāṃ svaśarīreṇa nayāmi svargamojasā |
duṣprāpaṃ svaśarīreṇa divaṃ gaccha narādhipa || 13 ||
[Analyze grammar]

svārjitaṃ kiṃ cidapyasti mayā hi tapasaḥ phalam |
rājaṃstvaṃ tejasā tasya saśarīro divaṃ vraja || 14 ||
[Analyze grammar]

uktavākye munau tasmin saśarīro nareśvaraḥ |
divaṃ jagāma kākutstha munīnāṃ paśyatāṃ tadā || 15 ||
[Analyze grammar]

devalokagataṃ dṛṣṭvā triśaṅkuṃ pākaśāsanaḥ |
saha sarvaiḥ suragaṇairidaṃ vacanamabravīt || 16 ||
[Analyze grammar]

triśaṅko gaccha bhūyastvaṃ nāsi svargakṛtālayaḥ |
guruśāpahato mūḍha pata bhūmimavākśirāḥ || 17 ||
[Analyze grammar]

evamukto mahendreṇa triśaṅkurapatat punaḥ |
vikrośamānastrāhīti viśvāmitraṃ tapodhanam || 18 ||
[Analyze grammar]

tacchrutvā vacanaṃ tasya krośamānasya kauśikaḥ |
roṣamāhārayattīvraṃ tiṣṭha tiṣṭheti cābravīt || 19 ||
[Analyze grammar]

ṛṣimadhye sa tejasvī prajāpatirivāparaḥ |
sṛjandakṣiṇamārgasthān saptarṣīnaparānpunaḥ || 20 ||
[Analyze grammar]

nakṣatramālāmaparāmasṛjat krodhamūrchitaḥ |
dakṣiṇāṃ diśamāsthāya munimadhye mahāyaśāḥ || 21 ||
[Analyze grammar]

sṛṣṭvā nakṣatravaṃśaṃ ca krodhena kaluṣīkṛtaḥ |
anyamindraṃ kariṣyāmi loko vā syādanindrakaḥ |
daivatānyapi sa krodhāt sraṣṭuṃ samupacakrame || 22 ||
[Analyze grammar]

tataḥ paramasaṃbhrāntāḥ sarṣisaṃghāḥ surarṣabhāḥ |
viśvāmitraṃ mahātmānamūcuḥ sānunayaṃ vacaḥ || 23 ||
[Analyze grammar]

ayaṃ rājā mahābhāga guruśāpaparikṣataḥ |
saśarīro divaṃ yātuṃ nārhatyeva tapodhana || 24 ||
[Analyze grammar]

teṣāṃ tadvacanaṃ śrutvā devānāṃ munipuṃgavaḥ |
abravīt sumahadvākyaṃ kauśikaḥ sarvadevatāḥ || 25 ||
[Analyze grammar]

saśarīrasya bhadraṃ vastriśaṅkorasya bhūpateḥ |
ārohaṇaṃ pratijñāya nānṛtaṃ kartumutsahe || 26 ||
[Analyze grammar]

sargo'stu saśarīrasya triśaṅkorasya śāśvataḥ |
nakṣatrāṇi ca sarvāṇi māmakāni dhruvāṇyatha || 27 ||
[Analyze grammar]

yāval lokā dhariṣyanti tiṣṭhantvetāni sarvaśaḥ |
matkṛtāni surāḥ sarve tadanujñātumarhatha || 28 ||
[Analyze grammar]

evamuktāḥ surāḥ sarve pratyūcurmunipuṃgavam || 29 ||
[Analyze grammar]

evaṃ bhavatu bhadraṃ te tiṣṭhantvetāni sarvaśaḥ |
gagane tānyanekāni vaiśvānarapathādbahiḥ || 30 ||
[Analyze grammar]

nakṣatrāṇi muniśreṣṭha teṣu jyotiḥṣu jājvalan |
avākśirāstriśaṅkuśca tiṣṭhatvamarasaṃnibhaḥ || 31 ||
[Analyze grammar]

viśvāmitrastu dharmātmā sarvadevairabhiṣṭutaḥ |
ṛṣibhiśca mahātejā bāḍhamityāha devatāḥ || 32 ||
[Analyze grammar]

tato devā mahātmāno munayaśca tapodhanāḥ |
jagmuryathāgataṃ sarve yajñasyānte narottama || 33 ||
[Analyze grammar]