Chapter 41

kāladharmaṃ gate rāma sagare prakṛtījanāḥ |
rājānaṃ rocayāmāsuraṃśumantaṃ sudhārmikam || 1 ||
[Analyze grammar]

sa rājā sumahānāsīdaṃśumān raghunandana |
tasya putro mahānāsīddilīpa iti viśrutaḥ || 2 ||
[Analyze grammar]

tasmin rājyaṃ samāveśya dilīpe raghunandana |
himavacchikhare ramye tapastepe sudāruṇam || 3 ||
[Analyze grammar]

dvātriṃśacca sahasrāṇi varṣāṇi sumahāyaśāḥ |
tapovanagato rājā svargaṃ lebhe tapodhanaḥ || 4 ||
[Analyze grammar]

dilīpastu mahātejāḥ śrutvā paitāmahaṃ vadham |
duḥkhopahatayā buddhyā niścayaṃ nādhyagacchata || 5 ||
[Analyze grammar]

kathaṃ gaṅgāvataraṇaṃ kathaṃ teṣāṃ jalakriyā |
tārayeyaṃ kathaṃ caitāniti cintā paro'bhavat || 6 ||
[Analyze grammar]

tasya cintayato nityaṃ dharmeṇa viditātmanaḥ |
putro bhagīratho nāma jajñe paramadhārmikaḥ || 7 ||
[Analyze grammar]

dilīpastu mahātejā yajñairbahubhiriṣṭavān |
triṃśadvarṣasahasrāṇi rājā rājyamakārayat || 8 ||
[Analyze grammar]

agatvā niścayaṃ rājā teṣāmuddharaṇaṃ prati |
vyādhinā naraśārdūla kāladharmamupeyivān || 9 ||
[Analyze grammar]

indralokaṃ gato rājā svārjitenaiva karmaṇā |
rājye bhagīrathaṃ putramabhiṣicya nararṣabhaḥ || 10 ||
[Analyze grammar]

bhagīrathastu rājarṣirdhārmiko raghunandana |
anapatyo mahātejāḥ prajākāmaḥ sa cāprajaḥ || 11 ||
[Analyze grammar]

sa tapo dīrghamātiṣṭhadgokarṇe raghunandana |
ūrdhvabāhuḥ pañcatapā māsāhāro jitendriyaḥ || 12 ||
[Analyze grammar]

tasya varṣasahasrāṇi ghore tapasi tiṣṭhataḥ |
suprīto bhagavānbrahmā prajānāṃ patirīśvaraḥ || 13 ||
[Analyze grammar]

tataḥ suragaṇaiḥ sārdhamupāgamya pitāmahaḥ |
bhagīrathaṃ mahātmānaṃ tapyamānamathābravīt || 14 ||
[Analyze grammar]

bhagīratha mahābhāga prītaste'haṃ janeśvara |
tapasā ca sutaptena varaṃ varaya suvrata || 15 ||
[Analyze grammar]

tamuvāca mahātejāḥ sarvalokapitāmaham |
bhagīratho mahābhāgaḥ kṛtāñjaliravasthitaḥ || 16 ||
[Analyze grammar]

yadi me bhagavānprīto yadyasti tapasaḥ phalam |
sagarasyātmajāḥ sarve mattaḥ salilamāpnuyuḥ || 17 ||
[Analyze grammar]

gaṅgāyāḥ salilaklinne bhasmanyeṣāṃ mahātmanām |
svargaṃ gaccheyuratyantaṃ sarve me prapitāmahāḥ || 18 ||
[Analyze grammar]

deyā ca saṃtatirdeva nāvasīdet kulaṃ ca naḥ |
ikṣvākūṇāṃ kule deva eṣa me'stu varaḥ paraḥ || 19 ||
[Analyze grammar]

uktavākyaṃ tu rājānaṃ sarvalokapitāmahaḥ |
pratyuvāca śubhāṃ vāṇīṃ madhurāṃ madhurākṣarām || 20 ||
[Analyze grammar]

manoratho mahāneṣa bhagīratha mahāratha |
evaṃ bhavatu bhadraṃ te ikṣvākukulavardhana || 21 ||
[Analyze grammar]

iyaṃ haimavatī gaṅgā jyeṣṭhā himavataḥ sutā |
tāṃ vai dhārayituṃ rājan harastatra niyujyatām || 22 ||
[Analyze grammar]

gaṅgāyāḥ patanaṃ rājanpṛthivī na sahiṣyate |
tāṃ vai dhārayituṃ vīra nānyaṃ paśyāmi śūlinaḥ || 23 ||
[Analyze grammar]

tamevamuktvā rājānaṃ gaṅgāṃ cābhāṣya lokakṛt |
jagāma tridivaṃ devaḥ saha sarvairmarudgaṇaiḥ || 24 ||
[Analyze grammar]