Chapter 39

devatānāṃ vacaḥ śrutvā bhagavān vai pitāmahaḥ |
pratyuvāca susaṃtrastān kṛtāntabalamohitān || 1 ||
[Analyze grammar]

yasyeyaṃ vasudhā kṛtsnā vāsudevasya dhīmataḥ |
kāpilaṃ rūpamāsthāya dhārayatyaniśaṃ dharām || 2 ||
[Analyze grammar]

pṛthivyāścāpi nirbhedo dṛṣṭa eva sanātanaḥ |
sagarasya ca putrāṇāṃ vināśo'dīrghajīvinām || 3 ||
[Analyze grammar]

pitāmahavacaḥ śrutvā trayastriṃśadariṃdamaḥ |
devāḥ paramasaṃhṛṣṭāḥ punarjagmuryathāgatam || 4 ||
[Analyze grammar]

sagarasya ca putrāṇāṃ prādurāsīnmahātmanām |
pṛthivyāṃ bhidyamānāyāṃ nirghātasamanisvanaḥ || 5 ||
[Analyze grammar]

tato bhittvā mahīṃ sarvāṃ kṛtvā cāpi pradakṣiṇam |
sahitāḥ sagarāḥ sarve pitaraṃ vākyamabruvan || 6 ||
[Analyze grammar]

parikrāntā mahī sarvā sattvavantaśca sūditāḥ |
devadānavarakṣāṃsi piśācoragakiṃnarāḥ || 7 ||
[Analyze grammar]

na ca paśyāmahe'śvaṃ tamaśvahartārameva ca |
kiṃ kariṣyāma bhadraṃ te buddhiratra vicāryatām || 8 ||
[Analyze grammar]

teṣāṃ tadvacanaṃ śrutvā putrāṇāṃ rājasattamaḥ |
samanyurabravīdvākyaṃ sagaro raghunandana || 9 ||
[Analyze grammar]

bhūyaḥ khanata bhadraṃ vo nirbhidya vasudhātalam |
aśvahartāramāsādya kṛtārthāśca nivartatha || 10 ||
[Analyze grammar]

piturvacanamāsthāya sagarasya mahātmanaḥ |
ṣaṣṭiḥ putrasahasrāṇi rasātalamabhidravan || 11 ||
[Analyze grammar]

khanyamāne tatastasmindadṛśuḥ parvatopamam |
diśāgajaṃ virūpākṣaṃ dhārayantaṃ mahītalam || 12 ||
[Analyze grammar]

saparvatavanāṃ kṛtsnāṃ pṛthivīṃ raghunandana |
śirasā dhārayāmāsa virūpākṣo mahāgajaḥ || 13 ||
[Analyze grammar]

yadā parvaṇi kākutstha viśramārthaṃ mahāgajaḥ |
khedāccālayate śīrṣaṃ bhūmikampastadhā bhavet || 14 ||
[Analyze grammar]

taṃ te pradakṣiṇaṃ kṛtvā diśāpālaṃ mahāgajam |
mānayanto hi te rāma jagmurbhittvā rasātalam || 15 ||
[Analyze grammar]

tataḥ pūrvāṃ diśaṃ bhittvā dakṣiṇāṃ bibhiduḥ punaḥ |
dakṣiṇasyāmapi diśi dadṛśuste mahāgajam || 16 ||
[Analyze grammar]

mahāpadmaṃ mahātmānaṃ sumahāparvatopamam |
śirasā dhārayantaṃ te vismayaṃ jagmuruttamam || 17 ||
[Analyze grammar]

tataḥ pradakṣiṇaṃ kṛtvā sagarasya mahātmanaḥ |
ṣaṣṭiḥ putrasahasrāṇi paścimāṃ bibhidurdiśam || 18 ||
[Analyze grammar]

paścimāyāmapi diśi mahāntamacalopamam |
diśāgajaṃ saumanasaṃ dadṛśuste mahābalāḥ || 19 ||
[Analyze grammar]

taṃ te pradakṣiṇaṃ kṛtvā pṛṣṭvā cāpi nirāmayam |
khanantaḥ samupakrāntā diśaṃ somavatīṃ tadā || 20 ||
[Analyze grammar]

uttarasyāṃ raghuśreṣṭha dadṛśurhimapāṇḍuram |
bhadraṃ bhadreṇa vapuṣā dhārayantaṃ mahīmimām || 21 ||
[Analyze grammar]

samālabhya tataḥ sarve kṛtvā cainaṃ pradakṣiṇam |
ṣaṣṭiḥ putrasahasrāṇi bibhidurvasudhātalam || 22 ||
[Analyze grammar]

tataḥ prāguttarāṃ gatvā sāgarāḥ prathitāṃ diśam |
roṣādabhyakhanan sarve pṛthivīṃ sagarātmajāḥ || 23 ||
[Analyze grammar]

dadṛśuḥ kapilaṃ tatra vāsudevaṃ sanātanam |
hayaṃ ca tasya devasya carantamavidūrataḥ || 24 ||
[Analyze grammar]

te taṃ yajñahanaṃ jñātvā krodhaparyākulekṣaṇāḥ |
abhyadhāvanta saṃkruddhāstiṣṭha tiṣṭheti cābruvan || 25 ||
[Analyze grammar]

asmākaṃ tvaṃ hi turagaṃ yajñiyaṃ hṛtavānasi |
durmedhastvaṃ hi saṃprāptān viddhi naḥ sagarātmajān || 26 ||
[Analyze grammar]

śrutvā tadvacanaṃ teṣāṃ kapilo raghunandana |
roṣeṇa mahatāviṣṭo huṃkāramakarottadā || 27 ||
[Analyze grammar]

tatastenāprameyena kapilena mahātmanā |
bhasmarāśīkṛtāḥ sarve kākutstha sagarātmajāḥ || 28 ||
[Analyze grammar]