Chapter 38

viśvāmitravacaḥ śrutvā kathānte raghunandana |
uvāca paramaprīto muniṃ dīptamivānalam || 1 ||
[Analyze grammar]

śrotumichāmi bhadraṃ te vistareṇa kathāmimām |
pūrvako me kathaṃ brahmanyajñaṃ vai samupāharat || 2 ||
[Analyze grammar]

viśvāmitrastu kākutsthamuvāca prahasanniva |
śrūyatāṃ vistaro rāma sagarasya mahātmanaḥ || 3 ||
[Analyze grammar]

śaṃkaraśvaśuro nāma himavānacalottamaḥ |
vindhyaparvatamāsādya nirīkṣete parasparam || 4 ||
[Analyze grammar]

tayormadhye pravṛtto'bhūd yajñaḥ sa puruṣottama |
sa hi deśo naravyāghra praśasto yajñakarmaṇi || 5 ||
[Analyze grammar]

tasyāśvacaryāṃ kākutstha dṛḍhadhanvā mahārathaḥ |
aṃśumānakarottāta sagarasya mate sthitaḥ || 6 ||
[Analyze grammar]

tasya parvaṇi taṃ yajñaṃ yajamānasya vāsavaḥ |
rākṣasīṃ tanumāsthāya yajñiyāśvamapāharat || 7 ||
[Analyze grammar]

hriyamāṇe tu kākutstha tasminnaśve mahātmanaḥ |
upādhyāya gaṇāḥ sarve yajamānamathābruvan || 8 ||
[Analyze grammar]

ayaṃ parvaṇi vegena yajñiyāśvo'panīyate |
hartāraṃ jahi kākutstha hayaścaivopanīyatām || 9 ||
[Analyze grammar]

yajñacchidraṃ bhavatyetat sarveṣāmaśivāya naḥ |
tattathā kriyatāṃ rājanyathāchidraḥ kraturbhavet || 10 ||
[Analyze grammar]

upādhyāya vacaḥ śrutvā tasmin sadasi pārthivaḥ |
ṣaṣṭiṃ putrasahasrāṇi vākyametaduvāca ha || 11 ||
[Analyze grammar]

gatiṃ putrā na paśyāmi rakṣasāṃ puruṣarṣabhāḥ |
mantrapūtairmahābhāgairāsthito hi mahākratuḥ || 12 ||
[Analyze grammar]

tadgacchata vicinvadhvaṃ putrakā bhadramastu vaḥ |
samudramālinīṃ sarvāṃ pṛthivīmanugacchata || 13 ||
[Analyze grammar]

ekaikaṃ yojanaṃ putrā vistāramabhigacchata || 14 ||
[Analyze grammar]

yāvatturagasaṃdarśastāvat khanata medinīm |
tameva hayahartāraṃ mārgamāṇā mamājñayā || 15 ||
[Analyze grammar]

dīkṣitaḥ pautrasahitaḥ sopādhyāyagaṇo hyaham |
iha sthāsyāmi bhadraṃ vo yāvatturagadarśanam || 16 ||
[Analyze grammar]

ityuktvā hṛṣṭamanaso rājaputrā mahābalāḥ |
jagmurmahītalaṃ rāma piturvacanayantritāḥ || 17 ||
[Analyze grammar]

yojanāyāmavistāramekaiko dharaṇītalam |
bibhiduḥ puruṣavyāghra vajrasparśasamairbhujaiḥ || 18 ||
[Analyze grammar]

śūlairaśanikalpaiśca halaiścāpi sudāruṇaiḥ |
bhidyamānā vasumatī nanāda raghunandana || 19 ||
[Analyze grammar]

nāgānāṃ vadhyamānānāmasurāṇāṃ ca rāghava |
rākṣasānāṃ ca durdharṣaḥ sattvānāṃ ninado'bhavat || 20 ||
[Analyze grammar]

yojanānāṃ sahasrāṇi ṣaṣṭiṃ tu raghunandana |
bibhidurdharaṇīṃ vīrā rasātalamanuttamam || 21 ||
[Analyze grammar]

evaṃ parvatasaṃbādhaṃ jambūdvīpaṃ nṛpātmajāḥ |
khananto nṛpaśārdūla sarvataḥ paricakramuḥ || 22 ||
[Analyze grammar]

tato devāḥ sagandharvāḥ sāsurāḥ sahapannagāḥ |
saṃbhrāntamanasaḥ sarve pitāmahamupāgaman || 23 ||
[Analyze grammar]

te prasādya mahātmānaṃ viṣaṇṇavadanāstadā |
ūcuḥ paramasaṃtrastāḥ pitāmahamidaṃ vacaḥ || 24 ||
[Analyze grammar]

bhagavanpṛthivī sarvā khanyate sagarātmajaiḥ |
bahavaśca mahātmāno vadhyante jalacāriṇaḥ || 25 ||
[Analyze grammar]

ayaṃ yajñahano'smākamanenāśvo'panīyate |
iti te sarvabhūtāni nighnanti sagarātmajaḥ || 26 ||
[Analyze grammar]