Chapter 25

munervacanamaklībaṃ śrutvā naravarātmajaḥ |
rāghavaḥ prāñjalirbhūtvā pratyuvāca dṛḍhavrataḥ || 1 ||
[Analyze grammar]

piturvacananirdeśāt piturvacanagauravāt |
vacanaṃ kauśikasyeti kartavyamaviśaṅkayā || 2 ||
[Analyze grammar]

anuśiṣṭo'smyayodhyāyāṃ gurumadhye mahātmanā |
pitrā daśarathenāhaṃ nāvajñeyaṃ ca tadvacaḥ || 3 ||
[Analyze grammar]

so'haṃ piturvacaḥ śrutvā śāsanādbrahma vādinaḥ |
kariṣyāmi na saṃdehastāṭakāvadhamuttamam || 4 ||
[Analyze grammar]

gobrāhmaṇahitārthāya deśasyāsya sukhāya ca |
tava caivāprameyasya vacanaṃ kartumudyataḥ || 5 ||
[Analyze grammar]

evamuktvā dhanurmadhye baddhvā muṣṭimariṃdamaḥ |
jyāśabdamakarottīvraṃ diśaḥ śabdena pūrayan || 6 ||
[Analyze grammar]

tena śabdena vitrastāstāṭakā vanavāsinaḥ |
tāṭakā ca susaṃkruddhā tena śabdena mohitā || 7 ||
[Analyze grammar]

taṃ śabdamabhinidhyāya rākṣasī krodhamūrchitā |
śrutvā cābhyadravadvegād yataḥ śabdo viniḥsṛtaḥ || 8 ||
[Analyze grammar]

tāṃ dṛṣṭvā rāghavaḥ kruddhāṃ vikṛtāṃ vikṛtānanām |
pramāṇenātivṛddhāṃ ca lakṣmaṇaṃ so'bhyabhāṣata || 9 ||
[Analyze grammar]

paśya lakṣmaṇa yakṣiṇyā bhairavaṃ dāruṇaṃ vapuḥ |
bhidyerandarśanādasyā bhīrūṇāṃ hṛdayāni ca || 10 ||
[Analyze grammar]

enāṃ paśya durādharṣāṃ māyā balasamanvitām |
vinivṛttāṃ karomyadya hṛtakarṇāgranāsikām || 11 ||
[Analyze grammar]

na hyenāmutsahe hantuṃ strīsvabhāvena rakṣitām |
vīryaṃ cāsyā gatiṃ cāpi haniṣyāmīti me matiḥ || 12 ||
[Analyze grammar]

evaṃ bruvāṇe rāme tu tāṭakā krodhamūrchitā |
udyamya bāhū garjantī rāmamevābhyadhāvata || 13 ||
[Analyze grammar]

tāmāpatantīṃ vegena vikrāntāmaśanīmiva |
śareṇorasi vivyādha sā papāta mamāra ca || 14 ||
[Analyze grammar]

tāṃ hatāṃ bhīmasaṃkāśāṃ dṛṣṭvā surapatistadā |
sādhu sādhviti kākutsthaṃ surāśca samapūjayan || 15 ||
[Analyze grammar]

uvāca paramaprītaḥ sahasrākṣaḥ puraṃdaraḥ |
surāśca sarve saṃhṛṣṭā viśvāmitramathābruvan || 16 ||
[Analyze grammar]

mune kauśike bhadraṃ te sendrāḥ sarve marudgaṇāḥ |
toṣitāḥ karmaṇānena snehaṃ darśaya rāghave || 17 ||
[Analyze grammar]

prajāpater kṛśāśvasya putrān satyaparākramān |
tapobalabhṛtānbrahman rāghavāya nivedaya || 18 ||
[Analyze grammar]

pātrabhūtaśca te brahmaṃstavānugamane dhṛtaḥ |
kartavyaṃ ca mahat karma surāṇāṃ rājasūnunā || 19 ||
[Analyze grammar]

evamuktvā surāḥ sarve hṛṣṭā jagmuryathāgatam |
viśvāmitraṃ pūjayitvā tataḥ saṃdhyā pravartate || 20 ||
[Analyze grammar]

tato munivaraḥ prītistāṭakā vadhatoṣitaḥ |
mūrdhni rāmamupāghrāya idaṃ vacanamabravīt || 21 ||
[Analyze grammar]

ihādya rajanīṃ rāma vasema śubhadarśana |
śvaḥ prabhāte gamiṣyāmastadāśramapadaṃ mama || 22 ||
[Analyze grammar]