Chapter 23

tataḥ prabhāte vimale kṛtāhnikamariṃdamau |
viśvāmitraṃ puraskṛtya nadyāstīramupāgatau || 1 ||
[Analyze grammar]

te ca sarve mahātmāno munayaḥ saṃśitavratāḥ |
upasthāpya śubhāṃ nāvaṃ viśvāmitramathābruvan || 2 ||
[Analyze grammar]

ārohatu bhavānnāvaṃ rājaputrapuraskṛtaḥ |
ariṣṭaṃ gaccha panthānaṃ mā bhūt kālasya paryayaḥ || 3 ||
[Analyze grammar]

viśvāmitrastathetyuktvā tānṛṣīnabhipūjya ca |
tatāra sahitastābhyāṃ saritaṃ sāgaraṃ gamām || 4 ||
[Analyze grammar]

atha rāmaḥ sarinmadhye papraccha munipuṅgavam |
vāriṇo bhidyamānasya kimayaṃ tumulo dhvaniḥ || 5 ||
[Analyze grammar]

rāghavasya vacaḥ śrutvā kautūhala samanvitam |
kathayāmāsa dharmātmā tasya śabdasya niścayam || 6 ||
[Analyze grammar]

kailāsaparvate rāma manasā nirmitaṃ saraḥ |
brahmaṇā naraśārdūla tenedaṃ mānasaṃ saraḥ || 7 ||
[Analyze grammar]

tasmāt susrāva sarasaḥ sāyodhyāmupagūhate |
saraḥpravṛttā sarayūḥ puṇyā brahmasaraścyutā || 8 ||
[Analyze grammar]

tasyāyamatulaḥ śabdo jāhnavīmabhivartate |
vārisaṃkṣobhajo rāma praṇāmaṃ niyataḥ kuru || 9 ||
[Analyze grammar]

tābhyāṃ tu tāv ubhau kṛtvā praṇāmamatidhārmikau |
tīraṃ dakṣiṇamāsādya jagmaturlaghuvikramau || 10 ||
[Analyze grammar]

sa vanaṃ ghorasaṃkāśaṃ dṛṣṭvā nṛpavarātmajaḥ |
aviprahatamaikṣvākaḥ papraccha munipuṃgavam || 11 ||
[Analyze grammar]

aho vanamidaṃ durgaṃ jhillikāgaṇanāditam |
bhairavaiḥ śvāpadaiḥ kīrṇaṃ śakuntairdāruṇārutaiḥ || 12 ||
[Analyze grammar]

nānāprakāraiḥ śakunairvāśyadbhirbhairavasvanaiḥ |
siṃhavyāghravarāhaiśca vāraṇaiścāpi śobhitam || 13 ||
[Analyze grammar]

dhavāśvakarṇakakubhairbilvatindukapāṭalaiḥ |
saṃkīrṇaṃ badarībhiśca kiṃ nvidaṃ dāruṇaṃ vanam || 14 ||
[Analyze grammar]

tamuvāca mahātejā viśvāmitro mahāmuniḥ |
śrūyatāṃ vatsa kākutstha yasyaitaddāruṇaṃ vanam || 15 ||
[Analyze grammar]

etau janapadau sphītau pūrvamāstāṃ narottama |
maladāśca karūṣāśca devanirmāṇa nirmitau || 16 ||
[Analyze grammar]

purā vṛtravadhe rāma malena samabhiplutam |
kṣudhā caiva sahasrākṣaṃ brahmahatyā yadāviśat || 17 ||
[Analyze grammar]

tamindraṃ snāpayandevā ṛṣayaśca tapodhanāḥ |
kalaśaiḥ snāpayāmāsurmalaṃ cāsya pramocayan || 18 ||
[Analyze grammar]

iha bhūmyāṃ malaṃ dattvā dattvā kāruṣameva ca |
śarīrajaṃ mahendrasya tato harṣaṃ prapedire || 19 ||
[Analyze grammar]

nirmalo niṣkarūṣaśca śucirindro yadābhavat |
dadau deśasya suprīto varaṃ prabhuranuttamam || 20 ||
[Analyze grammar]

imau janapadau sthītau khyātiṃ loke gamiṣyataḥ |
maladāśca karūṣāśca mamāṅgamaladhāriṇau || 21 ||
[Analyze grammar]

sādhu sādhviti taṃ devāḥ pākaśāsanamabruvan |
deśasya pūjāṃ tāṃ dṛṣṭvā kṛtāṃ śakreṇa dhīmatā || 22 ||
[Analyze grammar]

etau janapadau sthītau dīrghakālamariṃdama |
maladāśca karūṣāśca muditau dhanadhānyataḥ || 23 ||
[Analyze grammar]

kasya cittvatha kālasya yakṣī vai kāmarūpiṇī |
balaṃ nāgasahasrasya dhārayantī tadā hyabhūt || 24 ||
[Analyze grammar]

tāṭakā nāma bhadraṃ te bhāryā sundasya dhīmataḥ |
mārīco rākṣasaḥ putro yasyāḥ śakraparākramaḥ || 25 ||
[Analyze grammar]

imau janapadau nityaṃ vināśayati rāghava |
maladāṃśca karūṣāṃśca tāṭakā duṣṭacāriṇī || 26 ||
[Analyze grammar]

seyaṃ panthānamāvārya vasatyatyardhayojane |
ata eva ca gantavyaṃ tāṭakāyā vanaṃ yataḥ || 27 ||
[Analyze grammar]

svabāhubalamāśritya jahīmāṃ duṣṭacāriṇīm |
manniyogādimaṃ deśaṃ kuru niṣkaṇṭakaṃ punaḥ || 28 ||
[Analyze grammar]

na hi kaścidimaṃ deśaṃ śakrotyāgantumīdṛśam |
yakṣiṇyā ghorayā rāma utsāditamasahyayā || 29 ||
[Analyze grammar]

etatte sarvamākhyātaṃ yathaitaddaruṇaṃ vanam |
yakṣyā cotsāditaṃ sarvamadyāpi na nivartate || 30 ||
[Analyze grammar]