Chapter 19

tacchrutvā rājaśārdūla viśvāmitrasya bhāṣitam |
muhūrtamiva niḥsaṃjñaḥ saṃjñāvānidamabravīt || 1 ||
[Analyze grammar]

ūnaṣoḍaśavarṣo me rāmo rājīvalocanaḥ |
na yuddhayogyatāmasya paśyāmi saha rākṣasaiḥ || 2 ||
[Analyze grammar]

iyamakṣauhiṇī pūrṇā yasyāhaṃ patirīśvaraḥ |
anayā saṃvṛto gatvā yodhāhaṃ tairniśācaraiḥ || 3 ||
[Analyze grammar]

ime śūrāśca vikrāntā bhṛtyā me'straviśāradāḥ |
yogyā rakṣogaṇairyoddhuṃ na rāmaṃ netumarhasi || 4 ||
[Analyze grammar]

ahameva dhanuṣpāṇirgoptā samaramūrdhani |
yāvat prāṇāndhariṣyāmi tāvad yotsye niśācaraiḥ || 5 ||
[Analyze grammar]

nirvighnā vratacaryā sā bhaviṣyati surakṣitā |
ahaṃ tatra gamiṣyāmi na rāma netumarhasi || 6 ||
[Analyze grammar]

bālo hyakṛtavidyaśca na ca vetti balābalam |
na cāstrabalasaṃyukto na ca yuddhaviśāradaḥ |
na cāsau rakṣasāṃ yogyaḥ kūṭayuddhā hi te dhruvam || 7 ||
[Analyze grammar]

viprayukto hi rāmeṇa muhūrtamapi notsahe |
jīvituṃ muniśārdūla na rāmaṃ netumarhasi || 8 ||
[Analyze grammar]

yadi vā rāghavaṃ brahmannetumicchasi suvrata |
caturaṅgasamāyuktaṃ mayā saha ca taṃ naya || 9 ||
[Analyze grammar]

ṣaṣṭirvarṣasahasrāṇi jātasya mama kauśika |
duḥkhenotpāditaścāyaṃ na rāmaṃ netumarhasi || 10 ||
[Analyze grammar]

caturṇāmātmajānāṃ hi prītiḥ paramikā mama |
jyeṣṭhaṃ dharmapradhānaṃ ca na rāmaṃ netumarhasi || 11 ||
[Analyze grammar]

kiṃ vīryā rākṣasāste ca kasya putrāśca ke ca te |
kathaṃ pramāṇāḥ ke caitān rakṣanti munipuṃgava || 12 ||
[Analyze grammar]

kathaṃ ca pratikartavyaṃ teṣāṃ rāmeṇa rakṣasām |
māmakairvā balairbrahmanmayā vā kūṭayodhinām || 13 ||
[Analyze grammar]

sarvaṃ me śaṃsa bhagavan kathaṃ teṣāṃ mayā raṇe |
sthātavyaṃ duṣṭabhāvānāṃ vīryotsiktā hi rākṣasāḥ || 14 ||
[Analyze grammar]

tasya tadvacanaṃ śrutvā viśvāmitro'bhyabhāṣata |
paulastyavaṃśaprabhavo rāvaṇo nāma rākṣasaḥ || 15 ||
[Analyze grammar]

sa brahmaṇā dattavarastrailokyaṃ bādhate bhṛśam |
mahābalo mahāvīryo rākṣasairbahubhirvṛtaḥ || 16 ||
[Analyze grammar]

śrūyate hi mahāvīryo rāvaṇo rākṣasādhipaḥ |
sākṣādvaiśravaṇabhrātā putro viśravaso muneḥ || 17 ||
[Analyze grammar]

yadā svayaṃ na yajñasya vighnakartā mahābalaḥ |
tena saṃcoditau tau tu rākṣasau sumahā balau |
mārīcaśca subāhuśca yajñavighnaṃ kariṣyataḥ || 18 ||
[Analyze grammar]

ityukto muninā tena rājovāca muniṃ tadā |
na hi śakto'smi saṃgrāme sthātuṃ tasya durātmanaḥ || 19 ||
[Analyze grammar]

sa tvaṃ prasādaṃ dharmajña kuruṣva mama putrake |
devadānavagandharvā yakṣāḥ pataga pannagāḥ || 20 ||
[Analyze grammar]

na śaktā rāvaṇaṃ soḍhuṃ kiṃ punarmānavā yudhi |
sa hi vīryavatāṃ vīryamādatte yudhi rākṣasaḥ || 21 ||
[Analyze grammar]

tena cāhaṃ na śakto'smi saṃyoddhuṃ tasya vā balaiḥ |
sabalo vā muniśreṣṭha sahito vā mamātmajaiḥ || 22 ||
[Analyze grammar]

kathamapyamaraprakhyaṃ saṃgrāmāṇāmakovidam |
bālaṃ me tanayaṃ brahmannaiva dāsyāmi putrakam || 23 ||
[Analyze grammar]

atha kālopamau yuddhe sutau sundopasundayoḥ |
yajñavighnakarau tau te naiva dāsyāmi putrakam || 24 ||
[Analyze grammar]

mārīcaśca subāhuśca vīryavantau suśikṣitau |
tayoranyatareṇāhaṃ yoddhā syāṃ sasuhṛdgaṇaḥ || 25 ||
[Analyze grammar]