Chapter 17

nirvṛtte tu kratau tasmin hayamedhe mahātmanaḥ |
pratigṛhya surā bhāgānpratijagmuryathāgatam || 1 ||
[Analyze grammar]

samāptadīkṣāniyamaḥ patnīgaṇasamanvitaḥ |
praviveśa purīṃ rājā sabhṛtyabalavāhanaḥ || 2 ||
[Analyze grammar]

yathārhaṃ pūjitāstena rājñā vai pṛthivīśvarāḥ |
muditāḥ prayayurdeśānpraṇamya munipuṃgavam || 3 ||
[Analyze grammar]

gateṣu pṛthivīśeṣu rājā daśarathaḥ punaḥ |
praviveśa purīṃ śrīmānpuraskṛtya dvijottamān || 4 ||
[Analyze grammar]

śāntayā prayayau sārdhamṛśyaśṛṅgaḥ supūjitaḥ |
anvīyamāno rājñātha sānuyātreṇa dhīmatā || 5 ||
[Analyze grammar]

kausalyājanayad rāmaṃ divyalakṣaṇasaṃyutam |
viṣṇorardhaṃ mahābhāgaṃ putramikṣvākunandanam || 6 ||
[Analyze grammar]

kausalyā śuśubhe tena putreṇāmitatejasā |
yathā vareṇa devānāmaditirvajrapāṇinā || 7 ||
[Analyze grammar]

bharato nāma kaikeyyāṃ jajñe satyaparākramaḥ |
sākṣādviṣṇoścaturbhāgaḥ sarvaiḥ samudito guṇaiḥ || 8 ||
[Analyze grammar]

atha lakṣmaṇaśatrughnau sumitrājanayat sutau |
vīrau sarvāstrakuśalau viṣṇorardhasamanvitau || 9 ||
[Analyze grammar]

rājñaḥ putrā mahātmānaścatvāro jajñire pṛthak |
guṇavanto'nurūpāśca rucyā proṣṭhapadopamāḥ || 10 ||
[Analyze grammar]

atītyaikādaśāhaṃ tu nāma karma tathākarot |
jyeṣṭhaṃ rāmaṃ mahātmānaṃ bharataṃ kaikayīsutam || 11 ||
[Analyze grammar]

saumitriṃ lakṣmaṇamiti śatrughnamaparaṃ tathā |
vasiṣṭhaḥ paramaprīto nāmāni kṛtavāṃstadā |
teṣāṃ janmakriyādīni sarvakarmāṇyakārayat || 12 ||
[Analyze grammar]

teṣāṃ keturiva jyeṣṭho rāmo ratikaraḥ pituḥ |
babhūva bhūyo bhūtānāṃ svayambhūriva saṃmataḥ || 13 ||
[Analyze grammar]

sarve vedavidaḥ śūrāḥ sarve lokahite ratāḥ |
sarve jñānopasaṃpannāḥ sarve samuditā guṇaiḥ || 14 ||
[Analyze grammar]

teṣāmapi mahātejā rāmaḥ satyaparākramaḥ |
bālyāt prabhṛti susnigdho lakṣmaṇo lakṣmivardhanaḥ || 15 ||
[Analyze grammar]

rāmasya lokarāmasya bhrāturjyeṣṭhasya nityaśaḥ |
sarvapriyakarastasya rāmasyāpi śarīrataḥ || 16 ||
[Analyze grammar]

lakṣmaṇo lakṣmisaṃpanno bahiḥprāṇa ivāparaḥ |
na ca tena vinā nidrāṃ labhate puruṣottamaḥ |
mṛṣṭamannamupānītamaśnāti na hi taṃ vinā || 17 ||
[Analyze grammar]

yadā hi hayamārūḍho mṛgayāṃ yāti rāghavaḥ |
tadainaṃ pṛṣṭhato'bhyeti sadhanuḥ paripālayan || 18 ||
[Analyze grammar]

bharatasyāpi śatrughno lakṣmaṇāvarajo hi saḥ |
prāṇaiḥ priyataro nityaṃ tasya cāsīttathā priyaḥ || 19 ||
[Analyze grammar]

sa caturbhirmahābhāgaiḥ putrairdaśarathaḥ priyaiḥ |
babhūva paramaprīto devairiva pitāmahaḥ || 20 ||
[Analyze grammar]

te yadā jñānasaṃpannāḥ sarve samuditā guṇaiḥ |
hrīmantaḥ kīrtimantaśca sarvajñā dīrghadarśinaḥ || 21 ||
[Analyze grammar]

atha rājā daśarathasteṣāṃ dārakriyāṃ prati |
cintayāmāsa dharmātmā sopādhyāyaḥ sabāndhavaḥ || 22 ||
[Analyze grammar]

tasya cintayamānasya mantrimadhye mahātmanaḥ |
abhyāgacchanmahātejo viśvāmitro mahāmuniḥ || 23 ||
[Analyze grammar]

sa rājño darśanākāṅkṣī dvārādhyakṣānuvāca ha |
śīghramākhyāta māṃ prāptaṃ kauśikaṃ gādhinaḥ sutam || 24 ||
[Analyze grammar]

tacchrutvā vacanaṃ tasya rājaveśma pradudruvuḥ |
saṃbhrāntamanasaḥ sarve tena vākyena coditāḥ || 25 ||
[Analyze grammar]

te gatvā rājabhavanaṃ viśvāmitramṛṣiṃ tadā |
prāptamāvedayāmāsurnṛpāyekṣvākave tadā || 26 ||
[Analyze grammar]

teṣāṃ tadvacanaṃ śrutvā sapurodhāḥ samāhitaḥ |
pratyujjagāma saṃhṛṣṭo brahmāṇamiva vāsavaḥ || 27 ||
[Analyze grammar]

sa dṛṣṭvā jvalitaṃ dīptyā tāpasaṃ saṃśitavratam |
prahṛṣṭavadano rājā tato'rghyamupahārayat || 28 ||
[Analyze grammar]

sa rājñaḥ pratigṛhyārghyaṃ śāstradṛṣṭtena karmaṇā |
kuśalaṃ cāvyayaṃ caiva paryapṛcchannarādhipam || 29 ||
[Analyze grammar]

vasiṣṭhaṃ ca samāgamya kuśalaṃ munipuṃgavaḥ |
ṛṣīṃśca tānyathā nyāyaṃ mahābhāgānuvāca ha || 30 ||
[Analyze grammar]

te sarve hṛṣṭamanasastasya rājño niveśanam |
viviśuḥ pūjitāstatra niṣeduśca yathārthataḥ || 31 ||
[Analyze grammar]

atha hṛṣṭamanā rājā viśvāmitraṃ mahāmunim |
uvāca paramodāro hṛṣṭastamabhipūjayan || 32 ||
[Analyze grammar]

yathāmṛtasya saṃprāptiryathā varṣamanūdake |
yathā sadṛśadāreṣu putrajanmāprajasya ca |
pranaṣṭasya yathā lābho yathā harṣo mahodaye |
tathaivāgamanaṃ manye svāgataṃ te mahāmune || 33 ||
[Analyze grammar]

kaṃ ca te paramaṃ kāmaṃ karomi kimu harṣitaḥ |
pātrabhūto'si me vipra diṣṭyā prāpto'si dhārmika |
adya me saphalaṃ janma jīvitaṃ ca sujīvitam || 34 ||
[Analyze grammar]

pūrvaṃ rājarṣiśabdena tapasā dyotitaprabhaḥ |
brahmarṣitvamanuprāptaḥ pūjyo'si bahudhā mayā || 35 ||
[Analyze grammar]

tadadbhutamidaṃ vipra pavitraṃ paramaṃ mama |
śubhakṣetragataścāhaṃ tava saṃdarśanāt prabho || 36 ||
[Analyze grammar]

brūhi yat prārthitaṃ tubhyaṃ kāryamāgamanaṃ prati |
icchāmyanugṛhīto'haṃ tvadarthaparivṛddhaye || 37 ||
[Analyze grammar]

kāryasya na vimarśaṃ ca gantumarhasi kauśika |
kartā cāhamaśeṣeṇa daivataṃ hi bhavānmama || 38 ||
[Analyze grammar]

iti hṛdayasukhaṃ niśamya vākyaṃ śrutisukhamātmavatā vinītamuktam |
prathitaguṇayaśā guṇairviśiṣṭaḥ parama ṛṣiḥ paramaṃ jagāma harṣam || 39 ||
[Analyze grammar]