Chapter 12

punaḥ prāpte vasante tu pūrṇaḥ saṃvatsaro'bhavat |
abhivādya vasiṣṭhaṃ ca nyāyataḥ pratipūjya ca || 1 ||
[Analyze grammar]

abravīt praśritaṃ vākyaṃ prasavārthaṃ dvijottamam |
yajño me kriyatāṃ vipra yathoktaṃ munipuṃgava || 2 ||
[Analyze grammar]

yathā na vighnaḥ kriyate yajñāṅgeṣu vidhīyatām |
bhavān snigdhaḥ suhṛnmahyaṃ guruśca paramo mahān || 3 ||
[Analyze grammar]

voḍhavyo bhavatā caiva bhāro yajñasya codyataḥ |
tatheti ca sa rājānamabravīddvijasattamaḥ || 4 ||
[Analyze grammar]

kariṣye sarvamevaitadbhavatā yat samarthitam |
tato'bravīddvijān vṛddhānyajñakarmasu niṣṭhitān || 5 ||
[Analyze grammar]

sthāpatye niṣṭhitāṃścaiva vṛddhānparamadhārmikān |
karmāntikāñ śilpakārān vardhakīn khanakānapi || 6 ||
[Analyze grammar]

gaṇakāñ śilpinaścaiva tathaiva naṭanartakān |
tathā śucīñ śāstravidaḥ puruṣān subahuśrutān || 7 ||
[Analyze grammar]

yajñakarma samīhantāṃ bhavanto rājaśāsanāt |
iṣṭakā bahusāhasrī śīghramānīyatāmiti || 8 ||
[Analyze grammar]

aupakāryāḥ kriyantāṃ ca rājñāṃ bahuguṇānvitāḥ |
brāhmaṇāvasathāścaiva kartavyāḥ śataśaḥ śubhāḥ || 9 ||
[Analyze grammar]

bhakṣyānnapānairbahubhiḥ samupetāḥ suniṣṭhitāḥ |
tathā paurajanasyāpi kartavyā bahuvistarāḥ || 10 ||
[Analyze grammar]

āvāsā bahubhakṣyā vai sarvakāmairupasthitāḥ |
tathā jānapadasyāpi janasya bahuśobhanam || 11 ||
[Analyze grammar]

dātavyamannaṃ vidhivat satkṛtya na tu līlayā |
sarve varṇā yathā pūjāṃ prāpnuvanti susatkṛtāḥ || 12 ||
[Analyze grammar]

na cāvajñā prayoktavyā kāmakrodhavaśādapi |
yajñakarmasu ye'vyagrāḥ puruṣāḥ śilpinastathā || 13 ||
[Analyze grammar]

teṣāmapi viśeṣeṇa pūjā kāryā yathākramam |
yathā sarvaṃ suvihitaṃ na kiṃ cit parihīyate || 14 ||
[Analyze grammar]

tathā bhavantaḥ kurvantu prītisnigdhena cetasā |
tataḥ sarve samāgamya vasiṣṭhamidamabruvan || 15 ||
[Analyze grammar]

yathoktaṃ tat kariṣyāmo na kiṃ cit parihāsyate |
tataḥ sumantramāhūya vasiṣṭho vākyamabravīt || 16 ||
[Analyze grammar]

nimantrayasya nṛpatīnpṛthivyāṃ ye ca dhārmikāḥ |
brāhmaṇān kṣatriyān vaiśyāñ śūdrāṃścaiva sahasraśaḥ || 17 ||
[Analyze grammar]

samānayasva satkṛtya sarvadeśeṣu mānavān |
mithilādhipatiṃ śūraṃ janakaṃ satyavikramam || 18 ||
[Analyze grammar]

niṣṭhitaṃ sarvaśāstreṣu tathā vedeṣu niṣṭhitam |
tamānaya mahābhāgaṃ svayameva susatkṛtam |
pūrvasaṃbandhinaṃ jñātvā tataḥ pūrvaṃ bravīmi te || 19 ||
[Analyze grammar]

tathā kāśipatiṃ snigdhaṃ satataṃ priyavādinam |
sadvṛttaṃ devasaṃkāśaṃ svayamevānayasva ha || 20 ||
[Analyze grammar]

tathā kekayarājānaṃ vṛddhaṃ paramadhārmikam |
śvaśuraṃ rājasiṃhasya saputraṃ tamihānaya || 21 ||
[Analyze grammar]

aṅgeśvaraṃ mahābhāgaṃ lomapādaṃ susatkṛtam |
vayasyaṃ rājasiṃhasya tamānaya yaśasvinam || 22 ||
[Analyze grammar]

prācīnān sindhusauvīrān saurāṣṭhreyāṃśca pārthivān |
dākṣiṇātyānnarendrāṃśca samastānānayasva ha || 23 ||
[Analyze grammar]

santi snigdhāśca ye cānye rājānaḥ pṛthivītale |
tānānaya yathākṣipraṃ sānugān sahabāndhavān || 24 ||
[Analyze grammar]

vasiṣṭhavākyaṃ tacchrutvā sumantrastvaritastadā |
vyādiśat puruṣāṃstatra rājñāmānayane śubhān || 25 ||
[Analyze grammar]

svayameva hi dharmātmā prayayau muniśāsanāt |
sumantrastvarito bhūtvā samānetuṃ mahīkṣitaḥ || 26 ||
[Analyze grammar]

te ca karmāntikāḥ sarve vasiṣṭhāya ca dhīmate |
sarvaṃ nivedayanti sma yajñe yadupakalpitam || 27 ||
[Analyze grammar]

tataḥ prīto dvijaśreṣṭhastān sarvānpunarabravīt |
avajñayā na dātavyaṃ kasya cil līlayāpi vā |
avajñayā kṛtaṃ hanyāddātāraṃ nātra saṃśayaḥ || 28 ||
[Analyze grammar]

tataḥ kaiścidahorātrairupayātā mahīkṣitaḥ |
bahūni ratnānyādāya rājño daśarathasya ha || 29 ||
[Analyze grammar]

tato vasiṣṭhaḥ suprīto rājānamidamabravīt |
upayātā naravyāghra rājānastava śāsanāt || 30 ||
[Analyze grammar]

mayāpi satkṛtāḥ sarve yathārhaṃ rājasattamāḥ |
yajñiyaṃ ca kṛtaṃ rājanpuruṣaiḥ susamāhitaiḥ || 31 ||
[Analyze grammar]

niryātu ca bhavānyaṣṭuṃ yajñāyatanamantikāt |
sarvakāmairupahṛtairupetaṃ vai samantataḥ || 32 ||
[Analyze grammar]

tathā vasiṣṭhavacanādṛśyaśṛṅgasya cobhayoḥ |
śubhe divasa nakṣatre niryāto jagatīpatiḥ || 33 ||
[Analyze grammar]

tato vasiṣṭhapramukhāḥ sarva eva dvijottamāḥ |
ṛśyaśṛṅgaṃ puraskṛtya yajñakarmārabhaṃstadā || 34 ||
[Analyze grammar]