Chapter 2

nāradasya tu tadvākyaṃ śrutvā vākyaviśāradaḥ |
pūjayāmāsa dharmātmā sahaśiṣyo mahāmuniḥ || 1 ||
[Analyze grammar]

yathāvat pūjitastena devarṣirnāradastadā |
āpṛṣṭvaivābhyanujñātaḥ sa jagāma vihāyasaṃ || 2 ||
[Analyze grammar]

sa muhūrtaṃ gate tasmindevalokaṃ munistadā |
jagāma tamasātīraṃ jāhnavyāstvavidūrataḥ || 3 ||
[Analyze grammar]

sa tu tīraṃ samāsādya tamasāyā mahāmuniḥ |
śiṣyamāha sthitaṃ pārśve dṛṣṭvā tīrthamakardamam || 4 ||
[Analyze grammar]

akardamamidaṃ tīrthaṃ bharadvāja niśāmaya |
ramaṇīyaṃ prasannāmbu sanmanuṣyamano yathā || 5 ||
[Analyze grammar]

nyasyatāṃ kalaśastāta dīyatāṃ valkalaṃ mama |
idamevāvagāhiṣye tamasātīrthamuttamam || 6 ||
[Analyze grammar]

evamukto bharadvājo vālmīkena mahātmanā |
prāyacchata munestasya valkalaṃ niyato guroḥ || 7 ||
[Analyze grammar]

sa śiṣyahastādādāya valkalaṃ niyatendriyaḥ |
vicacāra ha paśyaṃstat sarvato vipulaṃ vanam || 8 ||
[Analyze grammar]

tasyābhyāśe tu mithunaṃ carantamanapāyinam |
dadarśa bhagavāṃstatra krauñcayoścārunisvanam || 9 ||
[Analyze grammar]

tasmāttu mithunādekaṃ pumāṃsaṃ pāpaniścayaḥ |
jaghāna vairanilayo niṣādastasya paśyataḥ || 10 ||
[Analyze grammar]

taṃ śoṇitaparītāṅgaṃ veṣṭamānaṃ mahītale |
bhāryā tu nihataṃ dṛṣṭvā rurāva karuṇāṃ giram || 11 ||
[Analyze grammar]

tathā tu taṃ dvijaṃ dṛṣṭvā niṣādena nipātitam |
ṛṣerdharmātmanastasya kāruṇyaṃ samapadyata || 12 ||
[Analyze grammar]

tataḥ karuṇaveditvādadharmo'yamiti dvijaḥ |
niśāmya rudatīṃ krauñcīmidaṃ vacanamabravīt || 13 ||
[Analyze grammar]

mā niṣāda pratiṣṭhāṃ tvamagamaḥ śāśvatīḥ samāḥ |
yat krauñcamithunādekamavadhīḥ kāmamohitam || 14 ||
[Analyze grammar]

tasyaivaṃ bruvataścintā babhūva hṛdi vīkṣataḥ |
śokārtenāsya śakuneḥ kimidaṃ vyāhṛtaṃ mayā || 15 ||
[Analyze grammar]

cintayan sa mahāprājñaścakāra matimānmatim |
śiṣyaṃ caivābravīdvākyamidaṃ sa munipuṃgavaḥ || 16 ||
[Analyze grammar]

pādabaddho'kṣarasamastantrīlayasamanvitaḥ |
śokārtasya pravṛtto me śloko bhavatu nānyathā || 17 ||
[Analyze grammar]

śiṣyastu tasya bruvato munervākyamanuttamam |
pratijagrāha saṃhṛṣṭastasya tuṣṭo'bhavadguruḥ || 18 ||
[Analyze grammar]

so'bhiṣekaṃ tataḥ kṛtvā tīrthe tasminyathāvidhi |
tameva cintayannarthamupāvartata vai muniḥ || 19 ||
[Analyze grammar]

bharadvājastataḥ śiṣyo vinītaḥ śrutavān guroḥ |
kalaśaṃ pūrṇamādāya pṛṣṭhato'nujagāma ha || 20 ||
[Analyze grammar]

sa praviśyāśramapadaṃ śiṣyeṇa saha dharmavit |
upaviṣṭaḥ kathāścānyāścakāra dhyānamāsthitaḥ || 21 ||
[Analyze grammar]

ājagāma tato brahmā lokakartā svayaṃ prabhuḥ |
caturmukho mahātejā draṣṭuṃ taṃ munipuṃgavam || 22 ||
[Analyze grammar]

vālmīkiratha taṃ dṛṣṭvā sahasotthāya vāg yataḥ |
prāñjaliḥ prayato bhūtvā tasthau paramavismitaḥ || 23 ||
[Analyze grammar]

pūjayāmāsa taṃ devaṃ pādyārghyāsanavandanaiḥ |
praṇamya vidhivaccainaṃ pṛṣṭvānāmayamavyayam || 24 ||
[Analyze grammar]

athopaviśya bhagavānāsane paramārcite |
vālmīkaye maharṣaye saṃdideśāsanaṃ tataḥ || 25 ||
[Analyze grammar]

upaviṣṭe tadā tasmin sākṣāl lokapitāmahe |
tadgatenaiva manasā vālmīkirdhyānamāsthitaḥ || 26 ||
[Analyze grammar]

pāpātmanā kṛtaṃ kaṣṭaṃ vairagrahaṇabuddhinā |
yastādṛśaṃ cāruravaṃ krauñcaṃ hanyādakāraṇāt || 27 ||
[Analyze grammar]

śocanneva muhuḥ krauñcīmupaślokamimaṃ punaḥ |
jagāvantargatamanā bhūtvā śokaparāyaṇaḥ || 28 ||
[Analyze grammar]

tamuvāca tato brahmā prahasanmunipuṃgavam |
śloka eva tvayā baddho nātra kāryā vicāraṇā || 29 ||
[Analyze grammar]

macchandādeva te brahmanpravṛtteyaṃ sarasvatī |
rāmasya caritaṃ sarvaṃ kuru tvamṛṣisattama || 30 ||
[Analyze grammar]

dharmātmano guṇavato loke rāmasya dhīmataḥ |
vṛttaṃ kathaya dhīrasya yathā te nāradācchrutam || 31 ||
[Analyze grammar]

rahasyaṃ ca prakāśaṃ ca yadvṛttaṃ tasya dhīmataḥ |
rāmasya saha saumitre rākṣasānāṃ ca sarvaśaḥ || 32 ||
[Analyze grammar]

vaidehyāścaiva yadvṛttaṃ prakāśaṃ yadi vā rahaḥ |
taccāpyaviditaṃ sarvaṃ viditaṃ te bhaviṣyati || 33 ||
[Analyze grammar]

na te vāganṛtā kāvye kā cidatra bhaviṣyati |
kuru rāmakathāṃ puṇyāṃ ślokabaddhāṃ manoramām || 34 ||
[Analyze grammar]

yāvat sthāsyanti girayaḥ saritaśca mahītale |
tāvad rāmāyaṇakathā lokeṣu pracariṣyati || 35 ||
[Analyze grammar]

yāvad rāmasya ca kathā tvatkṛtā pracariṣyati |
tāvadūrdhvamadhaśca tvaṃ mallokeṣu nivatsyasi || 36 ||
[Analyze grammar]

ityuktvā bhagavānbrahmā tatraivāntaradhīyata |
tataḥ saśiṣyo vālmīkirmunirvismayamāyayau || 37 ||
[Analyze grammar]

tasya śiṣyāstataḥ sarve jaguḥ ślokamimaṃ punaḥ |
muhurmuhuḥ prīyamāṇāḥ prāhuśca bhṛśavismitāḥ || 38 ||
[Analyze grammar]

samākṣaraiścaturbhiryaḥ pādairgīto maharṣiṇā |
so'nuvyāharaṇādbhūyaḥ śokaḥ ślokatvamāgataḥ || 39 ||
[Analyze grammar]

tasya buddhiriyaṃ jātā vālmīkerbhāvitātmanaḥ |
kṛtsnaṃ rāmāyaṇaṃ kāvyamīdṛśaiḥ karavāṇyaham || 40 ||
[Analyze grammar]

udāravṛttārthapadairmanoramaistadāsya rāmasya cakāra kīrtimān |
samākṣaraiḥ ślokaśatairyaśasvino yaśaskaraṃ kāvyamudāradhīrmuniḥ || 41 ||
[Analyze grammar]