Chapter 1

tapaḥsvādhyāyanirataṃ tapasvī vāgvidāṃ varam |
nāradaṃ paripapraccha vālmīkirmunipuṃgavam || 1 ||
[Analyze grammar]

ko nvasmin sāmprataṃ loke guṇavān kaśca vīryavān |
dharmajñaśca kṛtajñaśca satyavākyo dṛḍhavrataḥ || 2 ||
[Analyze grammar]

cāritreṇa ca ko yuktaḥ sarvabhūteṣu ko hitaḥ |
vidvān kaḥ kaḥ samarthaśca kaścaikapriyadarśanaḥ || 3 ||
[Analyze grammar]

ātmavān ko jitakrodho dyutimān ko'nasūyakaḥ |
kasya bibhyati devāśca jātaroṣasya saṃyuge || 4 ||
[Analyze grammar]

etadicchāmyahaṃ śrotuṃ paraṃ kautūhalaṃ hi me |
maharṣe tvaṃ samartho'si jñātumevaṃvidhaṃ naram || 5 ||
[Analyze grammar]

śrutvā caitattrilokajño vālmīkernārado vacaḥ |
śrūyatāmiti cāmantrya prahṛṣṭo vākyamabravīt || 6 ||
[Analyze grammar]

bahavo durlabhāścaiva ye tvayā kīrtitā guṇāḥ |
mune vakṣyāmyahaṃ buddhvā tairyuktaḥ śrūyatāṃ naraḥ || 7 ||
[Analyze grammar]

ikṣvākuvaṃśaprabhavo rāmo nāma janaiḥ śrutaḥ |
niyatātmā mahāvīryo dyutimāndhṛtimān vaśī || 8 ||
[Analyze grammar]

buddhimānnītimān vāgmī śrīmāñ śatrunibarhaṇaḥ |
vipulāṃso mahābāhuḥ kambugrīvo mahāhanuḥ || 9 ||
[Analyze grammar]

mahorasko maheṣvāso gūḍhajatrurariṃdamaḥ |
ājānubāhuḥ suśirāḥ sulalāṭaḥ suvikramaḥ || 10 ||
[Analyze grammar]

samaḥ samavibhaktāṅgaḥ snigdhavarṇaḥ pratāpavān |
pīnavakṣā viśālākṣo lakṣmīvāñ śubhalakṣaṇaḥ || 11 ||
[Analyze grammar]

dharmajñaḥ satyasaṃdhaśca prajānāṃ ca hite rataḥ |
yaśasvī jñānasaṃpannaḥ śucirvaśyaḥ samādhimān || 12 ||
[Analyze grammar]

rakṣitā jīvalokasya dharmasya parirakṣitā |
vedavedāṅgatattvajño dhanurvede ca niṣṭhitaḥ || 13 ||
[Analyze grammar]

sarvaśāstrārthatattvajña smṛtimānpratibhānavān |
sarvalokapriyaḥ sādhuradīnātmā vicakṣaṇaḥ || 14 ||
[Analyze grammar]

sarvadābhigataḥ sadbhiḥ samudra iva sindhubhiḥ |
āryaḥ sarvasamaścaiva sadaikapriyadarśanaḥ || 15 ||
[Analyze grammar]

sa ca sarvaguṇopetaḥ kausalyānandavardhanaḥ |
samudra iva gāmbhīrye dhairyeṇa himavāniva || 16 ||
[Analyze grammar]

viṣṇunā sadṛśo vīrye somavat priyadarśanaḥ |
kālāgnisadṛśaḥ krodhe kṣamayā pṛthivīsamaḥ || 17 ||
[Analyze grammar]

dhanadena samastyāge satye dharma ivāparaḥ |
tamevaṃguṇasaṃpannaṃ rāmaṃ satyaparākramam || 18 ||
[Analyze grammar]

jyeṣṭhaṃ śreṣṭhaguṇairyuktaṃ priyaṃ daśarathaḥ sutam |
yauvarājyena saṃyoktumaicchat prītyā mahīpatiḥ || 19 ||
[Analyze grammar]

tasyābhiṣekasaṃbhārāndṛṣṭvā bhāryātha kaikayī |
pūrvaṃ dattavarā devī varamenamayācata |
vivāsanaṃ ca rāmasya bharatasyābhiṣecanam || 20 ||
[Analyze grammar]

sa satyavacanād rājā dharmapāśena saṃyataḥ |
vivāsayāmāsa sutaṃ rāmaṃ daśarathaḥ priyam || 21 ||
[Analyze grammar]

sa jagāma vanaṃ vīraḥ pratijñāmanupālayan |
piturvacananirdeśāt kaikeyyāḥ priyakāraṇāt || 22 ||
[Analyze grammar]

taṃ vrajantaṃ priyo bhrātā lakṣmaṇo'nujagāma ha |
snehādvinayasaṃpannaḥ sumitrānandavardhanaḥ || 23 ||
[Analyze grammar]

sarvalakṣaṇasaṃpannā nārīṇāmuttamā vadhūḥ |
sītāpyanugatā rāmaṃ śaśinaṃ rohiṇī yathā || 24 ||
[Analyze grammar]

paurairanugato dūraṃ pitrā daśarathena ca |
śṛṅgaverapure sūtaṃ gaṅgākūle vyasarjayat || 25 ||
[Analyze grammar]

te vanena vanaṃ gatvā nadīstīrtvā bahūdakāḥ |
citrakūṭamanuprāpya bharadvājasya śāsanāt || 26 ||
[Analyze grammar]

ramyamāvasathaṃ kṛtvā ramamāṇā vane trayaḥ |
devagandharvasaṃkāśāstatra te nyavasan sukham || 27 ||
[Analyze grammar]

citrakūṭaṃ gate rāme putraśokāturastadā |
rājā daśarathaḥ svargaṃ jagāma vilapan sutam || 28 ||
[Analyze grammar]

mṛte tu tasminbharato vasiṣṭhapramukhairdvijaiḥ |
niyujyamāno rājyāya naicchad rājyaṃ mahābalaḥ |
sa jagāma vanaṃ vīro rāmapādaprasādakaḥ || 29 ||
[Analyze grammar]

pāduke cāsya rājyāya nyāsaṃ dattvā punaḥ punaḥ |
nivartayāmāsa tato bharataṃ bharatāgrajaḥ || 30 ||
[Analyze grammar]

sa kāmamanavāpyaiva rāmapādāv upaspṛśan |
nandigrāme'karod rājyaṃ rāmāgamanakāṅkṣayā || 31 ||
[Analyze grammar]

rāmastu punarālakṣya nāgarasya janasya ca |
tatrāgamanamekāgre daṇḍakānpraviveśa ha || 32 ||
[Analyze grammar]

virādhaṃ rākṣasaṃ hatvā śarabhaṅgaṃ dadarśa ha |
sutīkṣṇaṃ cāpyagastyaṃ ca agastya bhrātaraṃ tathā || 33 ||
[Analyze grammar]

agastyavacanāccaiva jagrāhaindraṃ śarāsanam |
khaḍgaṃ ca paramaprītastūṇī cākṣayasāyakau || 34 ||
[Analyze grammar]

vasatastasya rāmasya vane vanacaraiḥ saha |
ṛṣayo'bhyāgaman sarve vadhāyāsurarakṣasām || 35 ||
[Analyze grammar]

tena tatraiva vasatā janasthānanivāsinī |
virūpitā śūrpaṇakhā rākṣasī kāmarūpiṇī || 36 ||
[Analyze grammar]

tataḥ śūrpaṇakhāvākyādudyuktān sarvarākṣasān |
kharaṃ triśirasaṃ caiva dūṣaṇaṃ caiva rākṣasaṃ || 37 ||
[Analyze grammar]

nijaghāna raṇe rāmasteṣāṃ caiva padānugān |
rakṣasāṃ nihatānyāsan sahasrāṇi caturdaśa || 38 ||
[Analyze grammar]

tato jñātivadhaṃ śrutvā rāvaṇaḥ krodhamūrchitaḥ |
sahāyaṃ varayāmāsa mārīcaṃ nāma rākṣasaṃ || 39 ||
[Analyze grammar]

vāryamāṇaḥ subahuśo mārīcena sa rāvaṇaḥ |
na virodho balavatā kṣamo rāvaṇa tena te || 40 ||
[Analyze grammar]

anādṛtya tu tadvākyaṃ rāvaṇaḥ kālacoditaḥ |
jagāma sahamārīcastasyāśramapadaṃ tadā || 41 ||
[Analyze grammar]

tena māyāvinā dūramapavāhya nṛpātmajau |
jahāra bhāryāṃ rāmasya gṛdhraṃ hatvā jaṭāyuṣam || 42 ||
[Analyze grammar]

gṛdhraṃ ca nihataṃ dṛṣṭvā hṛtāṃ śrutvā ca maithilīm |
rāghavaḥ śokasaṃtapto vilalāpākulendriyaḥ || 43 ||
[Analyze grammar]

tatastenaiva śokena gṛdhraṃ dagdhvā jaṭāyuṣam |
mārgamāṇo vane sītāṃ rākṣasaṃ saṃdadarśa ha || 44 ||
[Analyze grammar]

kabandhaṃ nāma rūpeṇa vikṛtaṃ ghoradarśanam |
taṃ nihatya mahābāhurdadāha svargataśca saḥ || 45 ||
[Analyze grammar]

sa cāsya kathayāmāsa śabarīṃ dharmacāriṇīm |
śramaṇīṃ dharmanipuṇāmabhigaccheti rāghava |
so'bhyagacchanmahātejāḥ śabarīṃ śatrusūdanaḥ || 46 ||
[Analyze grammar]

śabaryā pūjitaḥ samyag rāmo daśarathātmajaḥ |
pampātīre hanumatā saṃgato vānareṇa ha || 47 ||
[Analyze grammar]

hanumadvacanāccaiva sugrīveṇa samāgataḥ |
sugrīvāya ca tat sarvaṃ śaṃsad rāmo mahābalaḥ || 48 ||
[Analyze grammar]

tato vānararājena vairānukathanaṃ prati |
rāmāyāveditaṃ sarvaṃ praṇayādduḥkhitena ca |
vālinaśca balaṃ tatra kathayāmāsa vānaraḥ || 49 ||
[Analyze grammar]

pratijñātaṃ ca rāmeṇa tadā vālivadhaṃ prati |
sugrīvaḥ śaṅkitaścāsīnnityaṃ vīryeṇa rāghave || 50 ||
[Analyze grammar]

rāghavaḥ pratyayārthaṃ tu dundubheḥ kāyamuttamam |
pādāṅguṣṭhena cikṣepa saṃpūrṇaṃ daśayojanam || 51 ||
[Analyze grammar]

bibheda ca punaḥ sālān saptaikena maheṣuṇā |
giriṃ rasātalaṃ caiva janayanpratyayaṃ tadā || 52 ||
[Analyze grammar]

tataḥ prītamanāstena viśvastaḥ sa mahākapiḥ |
kiṣkindhāṃ rāmasahito jagāma ca guhāṃ tadā || 53 ||
[Analyze grammar]

tato'garjaddharivaraḥ sugrīvo hemapiṅgalaḥ |
tena nādena mahatā nirjagāma harīśvaraḥ || 54 ||
[Analyze grammar]

tataḥ sugrīvavacanāddhatvā vālinamāhave |
sugrīvameva tad rājye rāghavaḥ pratyapādayat || 55 ||
[Analyze grammar]

sa ca sarvān samānīya vānarān vānararṣabhaḥ |
diśaḥ prasthāpayāmāsa didṛkṣurjanakātmajām || 56 ||
[Analyze grammar]

tato gṛdhrasya vacanāt saṃpāterhanumānbalī |
śatayojanavistīrṇaṃ pupluve lavaṇārṇavam || 57 ||
[Analyze grammar]

tatra laṅkāṃ samāsādya purīṃ rāvaṇapālitām |
dadarśa sītāṃ dhyāyantīmaśokavanikāṃ gatām || 58 ||
[Analyze grammar]

nivedayitvābhijñānaṃ pravṛttiṃ ca nivedya ca |
samāśvāsya ca vaidehīṃ mardayāmāsa toraṇam || 59 ||
[Analyze grammar]

pañca senāgragān hatvā sapta mantrisutānapi |
śūramakṣaṃ ca niṣpiṣya grahaṇaṃ samupāgamat || 60 ||
[Analyze grammar]

astreṇonmuhamātmānaṃ jñātvā paitāmahādvarāt |
marṣayan rākṣasān vīro yantriṇastānyadṛcchayā || 61 ||
[Analyze grammar]

tato dagdhvā purīṃ laṅkāmṛte sītāṃ ca maithilīm |
rāmāya priyamākhyātuṃ punarāyānmahākapiḥ || 62 ||
[Analyze grammar]

so'bhigamya mahātmānaṃ kṛtvā rāmaṃ pradakṣiṇam |
nyavedayadameyātmā dṛṣṭā sīteti tattvataḥ || 63 ||
[Analyze grammar]

tataḥ sugrīvasahito gatvā tīraṃ mahodadheḥ |
samudraṃ kṣobhayāmāsa śarairādityasaṃnibhaiḥ || 64 ||
[Analyze grammar]

darśayāmāsa cātmānaṃ samudraḥ saritāṃ patiḥ |
samudravacanāccaiva nalaṃ setumakārayat || 65 ||
[Analyze grammar]

tena gatvā purīṃ laṅkāṃ hatvā rāvaṇamāhave |
abhyaṣiñcat sa laṅkāyāṃ rākṣasendraṃ vibhīṣaṇam || 66 ||
[Analyze grammar]

karmaṇā tena mahatā trailokyaṃ sacarācaram |
sadevarṣigaṇaṃ tuṣṭaṃ rāghavasya mahātmanaḥ || 67 ||
[Analyze grammar]

tathā paramasaṃtuṣṭaiḥ pūjitaḥ sarvadaivataiḥ |
kṛtakṛtyastadā rāmo vijvaraḥ pramumoda ha || 68 ||
[Analyze grammar]

devatābhyo varānprāpya samutthāpya ca vānarān |
puṣpakaṃ tat samāruhya nandigrāmaṃ yayau tadā || 69 ||
[Analyze grammar]

nandigrāme jaṭāṃ hitvā bhrātṛbhiḥ sahito'naghaḥ |
rāmaḥ sītāmanuprāpya rājyaṃ punaravāptavān || 70 ||
[Analyze grammar]

prahṛṣṭamudito lokastuṣṭaḥ puṣṭaḥ sudhārmikaḥ |
nirāyamo arogaśca durbhikṣabhayavarjitaḥ || 71 ||
[Analyze grammar]

na putramaraṇaṃ ke ciddrakṣyanti puruṣāḥ kva cit |
nāryaścāvidhavā nityaṃ bhaviṣyanti pativratāḥ || 72 ||
[Analyze grammar]

na vātajaṃ bhayaṃ kiṃ cinnāpsu majjanti jantavaḥ |
na cāgrijaṃ bhayaṃ kiṃ cid yathā kṛtayuge tathā || 73 ||
[Analyze grammar]

aśvamedhaśatairiṣṭvā tathā bahusuvarṇakaiḥ |
gavāṃ koṭyayutaṃ dattvā vidvadbhyo vidhipūrvakam || 74 ||
[Analyze grammar]

rājavaṃśāñ śataguṇān sthāpayiṣyati rāghavaḥ |
cāturvarṇyaṃ ca loke'smin sve sve dharme niyokṣyati || 75 ||
[Analyze grammar]

daśavarṣasahasrāṇi daśavarṣaśatāni ca |
rāmo rājyamupāsitvā brahmalokaṃ gamiṣyati || 76 ||
[Analyze grammar]

idaṃ pavitraṃ pāpaghnaṃ puṇyaṃ vedaiśca saṃmitam |
yaḥ paṭhed rāmacaritaṃ sarvapāpaiḥ pramucyate || 77 ||
[Analyze grammar]

etadākhyānamāyuṣyaṃ paṭhan rāmāyaṇaṃ naraḥ |
saputrapautraḥ sagaṇaḥ pretya svarge mahīyate || 78 ||
[Analyze grammar]

paṭhandvijo vāgṛṣabhatvamīyāt syāt kṣatriyo bhūmipatitvamīyāt |
vaṇigjanaḥ paṇyaphalatvamīyājjanaśca śūdro'pi mahattvamīyāt || 79 ||
[Analyze grammar]