Book 35 - pañcatriṃśamāhnikam

atha śrītantrāloke pañcatriṃśamāhnikam |
athocyate samastānāṃ śāstrāṇāmiha melanam |
iha tāvatsama sto'yaṃ vyavahāraḥ purātanaḥ || 1 ||
[Analyze grammar]

prasiddhimanusandhāya saiva cāgama ucyate |
anvayavyatirekau hi prasiddherupajīvakau || 2 ||
[Analyze grammar]

svāyattatve tayorvyaktipūge kiṃ syāttayorgatiḥ |
pratyakṣamapi netrātmadīpārthādiviśeṣajam || 3 ||
[Analyze grammar]

apekṣate tatra mūle prasiddhiṃ tāṃ tathātmikām |
abhitaḥsaṃvṛte jāta ekākī kṣudhitaḥ śiśuḥ || 4 ||
[Analyze grammar]

kiṃ karotu kimādattāṃ kena paśyatu kiṃ vrajet |
nanu vastuśatākīrṇe sthāne'pyasya yadeva hi || 5 ||
[Analyze grammar]

paśyato jighrato vāpi spṛśataḥ saṃprasīdati |
cetastadevādāya drāk so'nvayavyatirekabhāk || 6 ||
[Analyze grammar]

hanta cetaḥprasādo'pi yo'sāvarthaviśeṣagaḥ |
so'pi prāgvāsanārūpavimarśaparikalpitaḥ || 7 ||
[Analyze grammar]

na pratyakṣānumānādibāhyamānaprasādajaḥ |
prāgvāsanopajīvyetat pratibhāmātrameva na || 8 ||
[Analyze grammar]

na mṛdabhyavahārecchā puṃso bālasya jāyate |
prāgvāsanopajīvī cedvimarśaḥ sā ca vāsanā || 9 ||
[Analyze grammar]

prācyā cedāgatā seyaṃ prasiddhiḥ paurvakālikī |
naca cetaḥprasattyaiva sarvo vyavahṛtikramaḥ || 10 ||
[Analyze grammar]

mūlaṃ prasiddhistanmānaṃ sarvatraiveti gṛhyatām |
pūrvapūrvopajīvitvamārgaṇe sā kvacitsvayam || 11 ||
[Analyze grammar]

sarvajñarūpe hyekasminniḥśaṅkaṃ bhāsata purā |
vyavahāro hi naikatra samastaḥ ko'pi mātari || 12 ||
[Analyze grammar]

tenāsarvajñapūrvatvamātreṇaiṣā na siddhyati |
bahusarvajñapūrvatve na mānaṃ cāsti kiṃcana || 13 ||
[Analyze grammar]

bhogāpavargataddhetuprasiddhiśataśobhitaḥ |
tadvimarśasvabhāvo'sau bhairavaḥ parameśvaraḥ || 14 ||
[Analyze grammar]

tataścāṃśāṃśikāyogātsā prasiddhiḥ paramparām |
śāstraṃ vāśritya vitatā lokānsaṃvyavahārayet || 15 ||
[Analyze grammar]

tayaivāśaiśavātsarve vyavahāradharājuṣaḥ |
santaḥ samupajīvanti śaivamevādyamāgamam || 16 ||
[Analyze grammar]

apūrṇāstu pare tena na mokṣaphalabhāginaḥ |
upajīvanti yāvattu tāvattatphalabhāginaḥ || 17 ||
[Analyze grammar]

bālyāpāye'pi yadbhoktumannameṣa pravartate |
tatprasiddhyaiva nādhyakṣānnānumānādasambhavāt || 18 ||
[Analyze grammar]

naca kāpyatra doṣāśāśaṅkāyāśca nivṛttitaḥ |
prasiddhiścāvigānotthā pratītiḥ śabdanātmikā || 19 ||
[Analyze grammar]

mātuḥ svabhāvo yattasyāṃ śaṅkate naiṣa jātucit |
svakṛtatvavaśādeva sarvavitsa hi śaṅkaraḥ || 20 ||
[Analyze grammar]

yāvattu śivatā nāsya tāvatsvātmānusāriṇīm |
tāvatīmeva tāmeṣa prasiddhiṃ nābhiśaṅkate || 21 ||
[Analyze grammar]

anyasyāmabhiśaṅkī syādbhūyastāṃ bahu manyate |
evaṃ bhāviśivatvo'mūṃ prasiddhiṃ manyate dhruvam || 22 ||
[Analyze grammar]

eka evāgamaścāyaṃ vibhunā sarvadarśinā |
darśito yaḥ pravṛtte ca nivṛtte ca pathi sthitaḥ || 23 ||
[Analyze grammar]

dharmārthakāmamokṣeṣu pūrṇāpūrṇādibhedataḥ |
vicitreṣu phaleṣveka upāyaḥ śāmbhavāgamaḥ || 24 ||
[Analyze grammar]

tasminviṣayavaiviktyādvicitraphaladāyini |
citropāyopadeśo'pi na virodhāvaho bhavet || 25 ||
[Analyze grammar]

laukikaṃ vaidikaṃ sāṅkhyaṃ yogādi pāñcarātrakam |
bauddhārhatanyāyaśāstraṃ padārthakramatantraṇam || 26 ||
[Analyze grammar]

siddhāntatantraśāktādi sarvaṃ brahmodbhavaṃ yataḥ |
śrīsvacchandādiṣu proktaṃ sadyojātādibhedataḥ || 27 ||
[Analyze grammar]

yathaikatrāpi vedādau tattadāśramagāminaḥ |
saṃskārāntaramatrāpi tathā liṅgoddhṛtādikam || 28 ||
[Analyze grammar]

yathāca tatra pūrvasminnāśrame nottarāśramāt |
phalameti tathā pāñcarātrādau na śivātmatām || 29 ||
[Analyze grammar]

eka evāgamastasmāttatra laukikaśāstrataḥ |
prabhṛtyāvaiṣṇavādbauddhācchaivātsarvaṃ hi niṣṭhitam || 30 ||
[Analyze grammar]

tasya yattat paraṃ prāpyaṃ dhāma tat trikaśabditam |
sarvāvibhedānucchedāt tadeva kulamucyate || 31 ||
[Analyze grammar]

yathordhvādharatābhāksu dehāṅgeṣu vibhediṣu |
ekaṃ prāṇitamevaṃ syāt trikaṃ sarveṣu śāstrataḥ || 32 ||
[Analyze grammar]

śrīmatkālīkule coktaṃ pañcasrotovivarjitam |
daśāṣṭādaśabhedasya sārametatprakīrtitam || 33 ||
[Analyze grammar]

puṣpe gandhastile tailaṃ dehe jīvo jale'mṛtam |
yathā tathaiva śāstrāṇāṃ kulamantaḥ pratiṣṭhitam || 34 ||
[Analyze grammar]

tadeka evāgamo'yaṃ citraścitre'dhikāriṇi |
tathaiva sā prasiddhirhi svayūthyaparayūthyagā || 35 ||
[Analyze grammar]

sāṃkhyaṃ yogaṃ pāñcarātraṃ vedāṃścaiva na nindayet |
yataḥ śivodbhavāḥ sarva iti svacchandaśāsane || 36 ||
[Analyze grammar]

ekasmādāgamāccaite khaṇḍakhaṇḍā vyapoddhṛtāḥ |
loke syurāgamāstaiśca jano bhrāmyati mohitaḥ || 37 ||
[Analyze grammar]

anekāgamapakṣe'pi vācyā viṣayabheditā |
avaśyamūrdhvādharatāsthityā prāmāṇyasiddhaye || 38 ||
[Analyze grammar]

anyathā naiva kasyāpi prāmāṇyaṃ siddhyati dhruvam |
nityatvamavisaṃvāda iti no mānakāraṇam || 39 ||
[Analyze grammar]

asminnaṃśe'pyamuṣyaiva prāmāṇyaṃ syāttathoditeḥ |
anyathāvyākṛtau kḷptāvasatyatve prarocane || 40 ||
[Analyze grammar]

atiprasaṅga sarvasyāpyāgamasyāpabādhakaḥ |
avaśyopetya ityasminmāna āgamanāmani || 41 ||
[Analyze grammar]

avaśyopetyamevaitacchāstraniṣṭhānirūpaṇam |
pradhāne'ṅge kṛto yatnaḥ phalavānvastuto yataḥ || 42 ||
[Analyze grammar]

ato'smin yatnavān ko'pi bhavecchaṃbhupracoditaḥ |
tatra tatra ca śāstreṣu nyarūpyata maheśinā || 43 ||
[Analyze grammar]

etāvatyadhikārī yaḥ sa durlabha iti sphuṭam |
itthaṃ śrīśambhunāthena mamoktaṃ śāstramelanam || 44 ||
[Analyze grammar]