Tantraloka [sanskrit text]

by Jun Takashima | 2020 | 46,255 words

The Sanskrit text of the Tantraloka of Abhinavagupta including grammatical analysis, English glossary and comparative print editions. The Tantraloka (“light on Tantra”) was written by Abhinavagupta in the 10th century in Kashmir and represents a major Encyclopedic work in Shaivism dealing with many core aspects and terminology.

Book 28 - aṣṭāviṃśamāhnikam

atha śrītantrāloke aṣṭāviṃśamāhnikam |
iti nityavidhiḥ prokto naimittikamathocyate || 1 ||
[Analyze grammar]

niyataṃ bhāvi yannityaṃ tadityasminvidhau sthite |
mukhyatvaṃ tanmayībhūtiḥ sarvaṃ naimittikaṃ tataḥ || 2 ||
[Analyze grammar]

dinādikalpanotthe tu naiyatye sarvanityatā |
dinamāsarkṣavarṣādinaiyatyāducyate tadā || 3 ||
[Analyze grammar]

aśaṅkitavyāvaśyantāsattākaṃ jātucidbhavam |
pramātraniyataṃ prāhurnaimittikamidaṃ budhāḥ || 4 ||
[Analyze grammar]

sandhyādi parvasaṃpūjā pavitrakamidaṃ sadā |
nityaṃ niyatarūpatvātsarvasmin śāsanāśrite || 5 ||
[Analyze grammar]

jñānaśāstragurubhrātṛtadvargaprāptayastathā |
tajjanmasaṃskriyābhedāḥ svajanmotsavasaṃgatiḥ || 6 ||
[Analyze grammar]

śrāddhaṃ vipatpratīkāraḥ pramodo'dbhutadarśanam |
yoginīmelakaḥ svāṃśasantānādyaiśca melanam || 7 ||
[Analyze grammar]

śāstravyākhyāpurāmadhyāvasānāni kramodayaḥ |
devatādarśanaṃ svāpnamājñā samayaniṣkṛtiḥ || 8 ||
[Analyze grammar]

iti naimittikaṃ śrīmattantrasāre nirūpitam |
trayoviṃśatibhedena viśeṣārcānibandhanam || 9 ||
[Analyze grammar]

tatra parvavidhiṃ brūmo dvidhā parva kulākulam |
kulāṣṭakakṛtaṃ pūrvaṃ proktaṃ śrīyogasaṃcare || 10 ||
[Analyze grammar]

abdhīndu munirityetanmāheśyā brahmasantateḥ |
pratipatpañcadaśyau dve kaumāryā rasavahniyuk || 11 ||
[Analyze grammar]

abdhirakṣīndu vaiṣṇavyā aindryāstvastraṃ trayodaśī |
vārāhyā randhrarudrau dve caṇḍyā vasvakṣiyugmakam || 12 ||
[Analyze grammar]

dve dve tithī tu sarvāsāṃ yogeśyā daśamī punaḥ |
tasyā apyaṣṭamī yasmāddvitithiḥ sā prakīrtitā || 13 ||
[Analyze grammar]

anyāścākulaparvāpi vaiparītyena lakṣitam |
kulaparveti tadbrūmo yathoktaṃ bhairave kule || 14 ||
[Analyze grammar]

haiḍare trikasadbhāve trikakālīkulādike |
yo'yaṃ prāṇāśritaḥ pūrvaṃ kālaḥ proktaḥ suvistarāt || 15 ||
[Analyze grammar]

sa cakrabhedasaṃcāre kāṃcit sūte svasaṃvidam |
svasaṃvitpūrṇatālābhasamayaḥ parva bhaṇyate || 16 ||
[Analyze grammar]

parva pūraṇa ityeva yadvā pṝ pūraṇārthakaḥ |
parvaśabdo niruktaśca parva tatpūraṇāditi || 17 ||
[Analyze grammar]

haiḍare'tra ca śabdo'yaṃ dvidhā nāntetaraḥ śrutaḥ |
taccakracāraniṣṇātā ye kecit pūrṇasaṃvidaḥ || 18 ||
[Analyze grammar]

tanmelakasamāyuktāste tatpūjāparāḥ sadā |
yo'pyatanmaya eṣo'pi tatkāle svakramārcanāt || 19 ||
[Analyze grammar]

tadyoginīsiddhasaṅghamelakāt tanmayībhavet |
yathā prekṣaṇake tattaddraṣṭṛsaṃvidabheditām || 20 ||
[Analyze grammar]

kramoditāṃ sadya eva labhate tatpraveśanāt |
yogābhyāsakramopāttāṃ tathā pūrṇāṃ svasaṃvidam || 21 ||
[Analyze grammar]

labhante sadya evaitatsaṃvidaikyapraveśanāt |
tatkālaṃ cāpi saṃvitteḥ pūrṇatvāt kāmadogdhṛtā || 22 ||
[Analyze grammar]

tena tattatphalaṃ tatra kāle saṃpūjayācirāt |
yathā ciropāttadhanaḥ kurvannutsavamādarāt || 23 ||
[Analyze grammar]

atithiṃ so'nugṛhṇāti tatkālābhijñamāgatam |
tathā suphalasaṃsiddhyai yoginīsiddhanāyakāḥ || 24 ||
[Analyze grammar]

yatnavanto'pi tatkālābhijñaṃ tamanugṛhṇate |
uktaṃ ca tatra teneha kule sāmānyatetyalam || 25 ||
[Analyze grammar]

yasya yaddhṛdaye devi vartate daiśikājñayā |
mantro yogaḥ kramaścaiva pūjanāt siddhido bhavet || 26 ||
[Analyze grammar]

kulācāreṇa deveśi pūjyaṃ siddhivimuktaye |
ye parvasveṣu deveśi tarpaṇaṃ tu viśeṣataḥ || 27 ||
[Analyze grammar]

gurūṇāṃ devatānāṃ ca na kurvanti pramādataḥ |
durācārā hi te duṣṭāḥ paśutulyā varānane || 28 ||
[Analyze grammar]

abhāvānnityapūjāyā avaśyaṃ hyeṣu pūjayet |
aṭanaṃ jñānaśaktyādilābhārthaṃ yatprakīrtitam || 29 ||
[Analyze grammar]

śaktiyāgaśca yaḥ prokto vaśyākarṣaṇamāraṇam |
tatsarvaṃ parvadivaseṣvayatnenaiva siddhyati || 30 ||
[Analyze grammar]

tatsāmānyaviśeṣābhyāṃ ṣoḍhā parva nirūpitam |
māsasyādyaṃ pañcamaṃ ca śrīdinaṃ paribhāṣyate || 31 ||
[Analyze grammar]

utkṛṣṭatvāt parvadinaṃ śrīpūrvatvena bhāṣyate |
samayo hyeṣa yadguptaṃ tannānupapadaṃ vadet || 32 ||
[Analyze grammar]

turyāṣṭamānyabhuvanacaramāṇi dvayorapi |
pakṣayoriha sāmānyasāmānyaṃ parva kīrtitam || 33 ||
[Analyze grammar]

yadeteṣu dineṣveva bhaviṣyadgrahabhātmakaḥ |
ubhayātmā viśeṣaḥ syāttatsāmānyaviśeṣatā || 34 ||
[Analyze grammar]

sā caikādaśadhaikasminnekasminvibhunoditā |
sajātīyā tu sotkṛṣṭetyevaṃ śambhurnyarūpayat || 35 ||
[Analyze grammar]

kṛṣṇayugaṃ vahnisitaṃ śrutikṛṣṇaṃ vahnisitamiti pakṣāḥ |
arkendujīvacandrā budhayugmendvarkakaviguruvidhu syāt || 36 ||
[Analyze grammar]

paraphalguścaitramaghe tiṣyaḥ prākphalgukarṇaśatabhiṣajaḥ |
mūlaprājāpatye viśākhikā śravaṇasaṃjñayā bhāni || 37 ||
[Analyze grammar]

randhre tithyarkapare vasurandhre śaśivṛṣāṅkarasarandhrayugam |
prathamaniśāmadhyaniśe madhyāhnaśarā dinodayo madhyadinam || 38 ||
[Analyze grammar]

prathamaniśeti ca samayo mārgaśiraḥprabhṛtimāseṣu |
kanyāntyajātha veśyā rāgavatī tattvavedinī dūtī || 39 ||
[Analyze grammar]

vyāsasamāsāt kramaśaḥ pūjyāścakre'nuyāgākhye |
sarvatra ca parvadine kuryādanuyāgacakramatiśayataḥ || 40 ||
[Analyze grammar]

guptāguptavidhānādiyāgacaryākrameṇa sampūrṇam |
anuyāgaḥ kila mukhyaḥ sarvasminneva karmaviniyoge || 41 ||
[Analyze grammar]

anuyāgakālalābhe tasmātprayateta tatparamaḥ |
bhagrahasamayaviśeṣo nāśvayuje ko'pi tena tadvarjam || 42 ||
[Analyze grammar]

velābhagrahakalanā kathitaikādaśasu māseṣu |
phālgunamāse śuklaṃ yatproktaṃ dvādaśīdinaṃ parva || 43 ||
[Analyze grammar]

agratithivedhayogo mukhyatamo'sau viśeṣo'tra |
divasaniśe kila kṛtvā tribhāgaśaḥ prathamamadhyamāparavibhāgaḥ || 44 ||
[Analyze grammar]

pūjākālastatra tribhāgite mukhyatamaḥ kālaḥ |
yadi saṃghaṭeta velā mukhyatamā bhagrahau tathā cakram || 45 ||
[Analyze grammar]

tadyāga ādiyāgastatkāmyaṃ pūjayaiva parvasu siddhyet |
dinavelābhagrahakalpanena tatrāpi saumyaraudratvam || 46 ||
[Analyze grammar]

jñātvā sādhakamukhyastattatkāryaṃ tadā tadā kuryāt |
ukto yo'rcākālastaṃ cedullaṅghya bhagrahatithiḥ syāt || 47 ||
[Analyze grammar]

tamanādṛtya viśeṣaṃ pradhānayetsāmayamiti kecit |
neti tvasmadguravo viśeṣarūpā hi tithiriha na velā || 48 ||
[Analyze grammar]

saṃvedyarūpaśaśadharabhāgaḥ saṃvedakārkakaranikaraiḥ |
yāvānyāvati pūrṇaḥ sā hi tithirbhagrahaiḥ sphuṭībhavati || 49 ||
[Analyze grammar]

tasmānmukhyātra tithiḥ sā ca viśeṣyā graharkṣayogena |
velātra na pradhānaṃ yuktaṃ caitattathāhi parameśaḥ || 50 ||
[Analyze grammar]

śrītrikabhairavakulaśāstreṣūce na parvadivaseṣu |
velāyogaṃ kaṃcana tithibhagrahayogato hyanyam || 51 ||
[Analyze grammar]

tithistu pūjyā pradhānarūpatvāt |
śvetābhāve kṛṣṇacchāgālambhaṃ hi kathayanti || 52 ||
[Analyze grammar]

yatpunarūrmiprabhṛtini śāstre veloditāpi tatkāmyam |
mukhyatayoddiśya vidhiṃ tathāca tatra pauṣaparvadine || 53 ||
[Analyze grammar]

kṛtvārcanamardhaniśi dhyātvā japtvā bahirgatasya yathā |
ādeśaḥ phalati tathā māghe cakrādvacaḥ phalati || 54 ||
[Analyze grammar]

acirādabhīṣṭasiddhiḥ pañcasu maitrī dhanaṃ ca melāpaḥ |
cakrasthāne krodhāt pāṣāṇasphoṭanena ripunāśaḥ || 55 ||
[Analyze grammar]

siddhādeśaprāptirmārgāntaṃ kathyate vibhunā |
bhagrahayogābhāve velāṃ tu titheravaśyamīkṣeta || 56 ||
[Analyze grammar]

sā hi tathā sphuṭarūpā titheḥ svabhāvodayaṃ dadyāt |
bhagrahatithivelāṃśānuyāyi sarvāṅgasundaraṃ tu dinam || 57 ||
[Analyze grammar]

yadi labhyeta tadāsminviśeṣatamapūjanaṃ racayet |
naca kāmyameva kevalametatparivarjane yataḥ kathitaḥ || 58 ||
[Analyze grammar]

samayavilopaḥ śrīmadbhairavakula ūrmiśāstre ca |
duṣṭā hi durācārāḥ paśutulyāḥ parva ye na viduḥ || 59 ||
[Analyze grammar]

naca kāmyasyākaraṇe syājjātu pratyavāyitvam |
tatrānuyāgasiddhyarthaṃ cakrayāgo nirūpyate || 60 ||
[Analyze grammar]

mūrtiyāga iti prokto yaḥ śrīyogīśvarīmate |
nityaṃ naimittikaṃ karma yadatroktaṃ maheśinā || 61 ||
[Analyze grammar]

sarvatra cakrayāgo'tra mukhyaḥ kāmye viśeṣataḥ |
jñānī yogī ca puruṣaḥ strī vāsminmūrtisaṃjñake || 62 ||
[Analyze grammar]

yoge prayatnato yojyastaddhi pātramanuttaram |
tatsaṃparkātpūrṇatā syāditi traiśirasādiṣu || 63 ||
[Analyze grammar]

tena sarvaṃ hutaṃ ceṣṭaṃ trailokyaṃ sacarācaram |
jñānine yogine vāpi yo dadāti karoti vā || 64 ||
[Analyze grammar]

dīkṣottare'pi ca proktamannaṃ brahmā raso hariḥ |
bhoktā śiva iti jñānī śvapacānapyathoddhareat || 65 ||
[Analyze grammar]

sarvatattvamayo bhūtvā yadi bhuṅkte sa sādhakaḥ |
tena bhojitamātreṇa sakṛtkoṭistu bhojitā || 66 ||
[Analyze grammar]

atha tattvavidetasminyadi bhuñjīta tat priye |
parisaṃkhyā na vidyeta tadāha bhagavāñchivaḥ || 67 ||
[Analyze grammar]

bhojyaṃ māyātmakaṃ sarvaṃ śivo bhoktā sa cāpyaham |
evaṃ yo vai vijānāti daiśikastattvapāragaḥ || 68 ||
[Analyze grammar]

taṃ dṛṣṭvā devamāyāntaṃ krīḍantyoṣadhayo gṛhe |
nivṛttamadyaivāsmābhiḥ saṃsāragahanārṇavāt || 69 ||
[Analyze grammar]

yadasya vaktraṃ saṃprāptā yāsyāmaḥ paramaṃ padam |
anye'pānabhujo hyūrdhve prāṇo'pānastvadhomukhaḥ || 70 ||
[Analyze grammar]

tasminbhoktari deveśi dātuḥ kulaśatānyapi |
āśveva parimucyante narakādyātanārṇavāt || 71 ||
[Analyze grammar]

śrīmanniśāṭane'pyuktaṃ kathanānveṣaṇādapi |
śrotrābhyantarasaṃprāpte guruvaktrādvinirgate || 72 ||
[Analyze grammar]

muktastadaiva kāle tu yantraṃ tiṣṭhati kevalam |
surāpaḥ steyahārī ca brahmahā gurutalpagaḥ || 73 ||
[Analyze grammar]

antyajo vā dvijo vātha bālo vṛddho yuvāpi vā |
paryantavāsī yo jñānī deśasyāpi pavitrakaḥ || 74 ||
[Analyze grammar]

tatra saṃnihito devaḥ sadevīkaḥ sakiṅkaraḥ |
tasmātprādhānyataḥ kṛtvā guruṃ jñānaviśāradam || 75 ||
[Analyze grammar]

mūrtiyāgaṃ carettasya vidhiryogīśvarīmate |
pavitrārohaṇe śrāddhe tathā parvadineṣvalam || 76 ||
[Analyze grammar]

sūryacandroparāgādau laukikeṣvapi parvasu |
utsave ca vivāhādau viprāṇāṃ yajñakarmaṇi || 77 ||
[Analyze grammar]

dīkṣāyāṃ ca pratiṣṭhāyāṃ samayānāṃ viśodhane |
kāmanārthaṃ ca kartavyo mūrtiyāgaḥ sa pañcadhā || 78 ||
[Analyze grammar]

kevalo yāmalo miśraścakrayugvīrasaṅkaraḥ |
kevalaḥ kevalaireva gurubhirmiśritaḥ punaḥ || 79 ||
[Analyze grammar]

sādhakādyaiḥ sapatnīkairyāmalaḥ sa dvidhā punaḥ |
patnīyogāt krayānītaveśyāsaṃyogato'thavā || 80 ||
[Analyze grammar]

cakriṇyādyāśca vakṣyante śaktiyogādyathocitāḥ |
tatsaṃyogāccakrayukto yāgaḥ sarvaphalapradaḥ || 81 ||
[Analyze grammar]

sarvaistu sahito yāgo vīrasaṅkara ucyate |
madhye gururbhavetteṣāṃ guruvargastadāvṛtiḥ || 82 ||
[Analyze grammar]

tisra āvṛtayo bāhye samayyantā yathākramam |
paṅktikrameṇa vā sarve madhye teṣāṃ guruḥ sadā || 83 ||
[Analyze grammar]

tadā tadgandhadhūpasraksamālambhanavāsasā |
pūjyaṃ cakrānusāreṇa tattaccakramidaṃ tviti || 84 ||
[Analyze grammar]

ekārake yathā cakre ekavīravidhiṃ smaret |
dvyare yāmalamanyatra trikamevaṃ ṣaḍasrake || 85 ||
[Analyze grammar]

ṣaḍyoginīḥ saptakaṃ ca saptāre'ṣṭāṣṭake ca vā |
anyadvā tādṛśaṃ tatra cakre tādṛksvarūpiṇi || 86 ||
[Analyze grammar]

tataḥ pātre'lisaṃpūrṇe pūrvaṃ cakraṃ yajetsudhīḥ |
ādhārayukte nādhārarahitaṃ tarpaṇaṃ kvacit || 87 ||
[Analyze grammar]

ādhāreṇa vinā bhraṃśo naca tuṣyanti raśmayaḥ |
pretarūpaṃ bhavetpātraṃ śāktāmṛtamathāsavaḥ || 88 ||
[Analyze grammar]

bhoktrī tatra tu yā śaktiḥ sa śambhuḥ parameśvaraḥ |
aṇuśaktiśivātmetthaṃ dhyātvā saṃmilitaṃ trayam || 89 ||
[Analyze grammar]

tatastu tarpaṇaṃ kāryamāvṛterāvṛteḥ kramāt |
pratisaṃcarayogena punarantaḥ praveśayet || 90 ||
[Analyze grammar]

yāvadgurvantikaṃ taddhi pūrṇaṃ bhramaṇamucyate |
tatrādau devatāstarpyāstato vīrā iti kramaḥ || 91 ||
[Analyze grammar]

vīraśca vīraśaktiścetyevamasmadgurukramaḥ |
tato'vadaṃśānvividhān māṃsamatsyādisaṃyutān || 92 ||
[Analyze grammar]

agre tatra pravikiret tṛptyantaṃ sādhakottamaḥ |
pātrābhāve punarbhadraṃ vellitāśuktimeva ca || 93 ||
[Analyze grammar]

pātre kurvīta matimāniti siddhāmate kramaḥ |
dakṣahastena bhadraṃ syādvellitā śuktirucyate || 94 ||
[Analyze grammar]

dakṣahastasya kurvīta vāmopari kanīyasīm |
tarjanyaṅguṣṭhayogena dakṣādho vāmakāṅgulīḥ || 95 ||
[Analyze grammar]

niḥsandhibandhau dvāvitthaṃ vellitā śuktirucyate |
ye tatra pānakāle tu bindavo yānti medinīm || 96 ||
[Analyze grammar]

taistuṣyanti hi vetālaguhyakādyā gabhastayaḥ |
dhārayā bhairavastuṣyet karapānaṃ paraṃ tataḥ || 97 ||
[Analyze grammar]

praveśo'tra na dātavyaḥ pūrvameva hi kasyacit |
pramādāttu praviṣṭasya vicāraṃ naiva carcayet || 98 ||
[Analyze grammar]

evaṃ kṛtvā kramādyāgamante dakṣiṇayā yutam |
samālambhanatāmbūlavastrādyaṃ vitaredbudhaḥ || 99 ||
[Analyze grammar]

rūpakārdhāt paraṃ hīnāṃ na dadyāddakṣiṇāṃ sudhīḥ |
samayibhyaḥ kramāddvidviguṇā gurvantakaṃ bhavet || 100 ||
[Analyze grammar]

eṣa syānmūrtiyāgastu sarvayāgapradhānakaḥ |
kāmye tu saṃvidhau saptakṛtvaḥ kāryastathāvidhaḥ || 101 ||
[Analyze grammar]

jānanti prathamaṃ gehaṃ tatastasya samarthatām |
balābalaṃ tataḥ paścādvismayante'tra mātaraḥ || 102 ||
[Analyze grammar]

tato'pi saṃnidhīyante prīyante varadāstataḥ |
devīnāmatha nāthasya parivārayujo'pyalam || 103 ||
[Analyze grammar]

vallabho mūrtiyāgo'yamataḥ kāryo vipaścitā |
rāktau gupte gṛhe vīrāḥ śaktayo'nyonyamapyalam || 104 ||
[Analyze grammar]

asaṃketayujo yojyā devatāśabdakīrtanāt |
alābhe mūrticakrasya kumārīreva pūjayet || 105 ||
[Analyze grammar]

kāmyārthe tu na tāṃ vyaṅgāṃ stanapuṣpavatīṃ tathā |
pratipacchrutisaṃjñe ca caturthī cottarātraye || 106 ||
[Analyze grammar]

haste ca pañcamī ṣaṣṭhī pūrvāsvatha punarvasau |
saptamī tatparā pitrye rohiṇyāṃ navamī tathā || 107 ||
[Analyze grammar]

mūle tu dvādaśī brāhme bhūtāśvinyāṃ ca pūrṇimā |
dhaniṣṭhāyāmamāvasyā so'yamekādaśātmakaḥ || 108 ||
[Analyze grammar]

arkāditrayaśukrānyatamayukto'pyahargaṇaḥ |
yogaparveti vikhyāto rātrau vā dina eva vā || 109 ||
[Analyze grammar]

yogaparvaṇi kartavyo mūrtiyāgastu sarvathā |
yaḥ sarvānyogaparvākhyān vāsarān pūjayetsudhīḥ || 110 ||
[Analyze grammar]

mūrtiyāgena so'pi syāt samayī maṇḍalaṃ vinā |
ityeṣa mūrtiyāgaḥ śrīsiddhayogīśvarīmate || 111 ||
[Analyze grammar]

athocyate śivenoktaḥ pavitrakavidhiḥ sphuṭaḥ |
śrīratnamālātriśiraḥśāstrayoḥ sūcitaḥ punaḥ || 112 ||
[Analyze grammar]

śrīsiddhāṭanasadbhāvamālinīsāraśāsane |
tatra prādhānyataḥ śrīmanmālokto vidhirucyate || 113 ||
[Analyze grammar]

kṣīrābdhimathanodbhūtaviṣanidrāvimūrcchitaḥ |
nāgarājaḥ svabhuvane meghakāle sma nāvasat || 114 ||
[Analyze grammar]

kevalaṃ tu pavitro'yaṃ vāyubhakṣaḥ samāḥ śatam |
divyaṃ daśaguṇaṃ nāthaṃ bhairavaṃ paryapūjayat || 115 ||
[Analyze grammar]

vyajijñapacca taṃ tuṣṭaṃ nāthaṃ varṣāsvahaṃ nije |
pātāle nāsituṃ śaktaḥ so'pyenaṃ parameśvaraḥ || 116 ||
[Analyze grammar]

nāgaṃ nijajaṭājūṭapīṭhagaṃ paryakalpayat |
tataḥ samastadevaughairdhārito'sau svamūrdhani || 117 ||
[Analyze grammar]

mahatāṃ mahitānāṃ hi nādbhuta viśvapūjyatā |
tasmānmaheśiturmūrdhni devatānāṃ ca sarvaśaḥ || 118 ||
[Analyze grammar]

ātmanaśca pavitraṃ taṃ kuryādyāgapuraḥsaram |
daśa koṭyo na pūjānāṃ pavitrārohaṇe samāḥ || 119 ||
[Analyze grammar]

vṛthā dīkṣā vṛthā jñānaṃ gurvārādhanameva ca |
vinā pavitrādyenaitaddharennāgaḥ śivājñayā || 120 ||
[Analyze grammar]

tasmātsarvaprayatnena sa kāryaḥ kulavedibhiḥ |
āṣāḍhaśuklānmithunakarkaṭasthe ravau vidhiḥ || 121 ||
[Analyze grammar]

kartavyaḥ so'nirodhena yāvatsā tulapūrṇimā |
tulopalakṣitasyāntyaṃ kārtikasya dinaṃ matam || 122 ||
[Analyze grammar]

kulaśabdaṃ paṭhanto'nye vyākhyābhedaṃ prakurvate |
nityātantravidaḥ kṛṣṇaṃ kārtikāccaramaṃ dinam || 123 ||
[Analyze grammar]

kulasya nityācakrasya pūrṇatvaṃ yatra tanmatam |
māghaśuklāntyadivasaḥ kulaparveti tanmatam || 124 ||
[Analyze grammar]

pūrṇatvaṃ tatra candrasya sā tithiḥ kulapūrṇimā |
dakṣiṇottaragaḥ kālaḥ kulākulatayoditaḥ || 125 ||
[Analyze grammar]

kulasya tasya carame dine pūrṇatvamucyate |
dakṣiṇāyanaṣaṇmāsakartavyatvamato vidhau || 126 ||
[Analyze grammar]

pavitrake prakāśatvasiddhyai kṛṣṇasya vartmanaḥ |
tadetadbahuśāstroktaṃ rūpaṃ devo nyarūpayat || 127 ||
[Analyze grammar]

ekenaiva padena śrīratnamālākulāgame |
tadatra samaye sarvavidhisaṃpūraṇātmakaḥ || 128 ||
[Analyze grammar]

pavitrakavidhiḥ kāryaḥ śuklapakṣe tu sarvathā |
pūraṇaṃ śaktiyogena śaktyātma ca sitaṃ dalam || 129 ||
[Analyze grammar]

dakṣiṇāyanasājātyāt tena tadvidhirucyate |
ekadvitricatuḥpañcaṣaḍlataikatamaṃ mahat || 130 ||
[Analyze grammar]

hemaratnāṅkitagranthi kuryānmuktāpavitrakam |
sauvarṇasūtraṃ triguṇaṃ saikagranthiśataṃ gurau || 131 ||
[Analyze grammar]

pare gurau tu tryadhikamadhyabdhi parameṣṭhini |
prāksiddhācāryayogeśa viṣaye tu rasādhikam || 132 ||
[Analyze grammar]

aṣṭādhikaṃ śivasyoktaṃ citraratnaprapūritam |
vidyāpīṭhākṣasūtrādau guruvacchivavat punaḥ || 133 ||
[Analyze grammar]

vaṭuke kanakābhāve raupyaṃ tu parikalpayet |
pāṭṭasūtramatha kṣaumaṃ kārpāsaṃ tritritānitam || 134 ||
[Analyze grammar]

tasmānnavaguṇāt sūtrāttriguṇādikramāt kuru |
caṇḍāṃśuguṇaparyantaṃ tato'pi triguṇaṃ ca vā || 135 ||
[Analyze grammar]

tenāṣṭādaśatantūtthamadhamaṃ madhyamaṃ punaḥ |
aṣṭottaraśataṃ tasmāt triguṇaṃ tūttamaṃ matam || 136 ||
[Analyze grammar]

granthayastattvasaṃkhyātāḥ ṣaḍadhvakalanāvaśāt |
yadvā vyāsasamāsābhyāṃ citrāḥ sadgandhapūritāḥ || 137 ||
[Analyze grammar]

viśeṣavidhinā pūrvaṃ pūjayitvārpayettataḥ |
pavitrakaṃ samastādhvaparipūrṇatvabhāvanāt || 138 ||
[Analyze grammar]

gurvātmanorjānunābhikaṇṭhamūrdhāntagaṃ ca vā |
tato mahotsavaḥ kāryo gurupūjāpuraḥsaraḥ || 139 ||
[Analyze grammar]

tarpyāḥ śāsanagāḥ sarve dakṣiṇāvastrabhojanaiḥ |
mahotsavaḥ prakartavyo gītanṛttātmako mahān || 140 ||
[Analyze grammar]

cāturmāsyaṃ saptadinaṃ tridinaṃ vāpyalābhataḥ |
tadante kṣamayeddevaṃ maṇḍalādi visarjayet || 141 ||
[Analyze grammar]

vahniṃ ca paścātkartavyaścakrayāgaḥ puroditaḥ |
māse māse caturmāse varṣe vāpi pavitrakam || 142 ||
[Analyze grammar]

sarvathaiva prakartavyaṃ yathāvibhavavistaram |
vittābhāve punaḥ kāryaṃ kāśairapi kuśombhitaiḥ || 143 ||
[Analyze grammar]

sati vitte punaḥ śāṭhyaṃ vyādhaye narakāya ca |
nityapūjāsu pūrṇatvaṃ parvapūjāprapūraṇāt || 144 ||
[Analyze grammar]

tatrāpi paripūrṇatvaṃ pavitrakasamarcanāt |
pavitrakavilope tu prāyaścittaṃ japetsudhīḥ || 145 ||
[Analyze grammar]

suśuddhaḥ sanpunaḥ kuryādityājñā parameśituḥ |
atha triśirasi prokto likhyate tadvidhiḥ sphuṭaḥ || 146 ||
[Analyze grammar]

triprameyasya śaivasya pañcapañcātmakasya vā |
daśāṣṭādaśabhedasya ṣaṭsrotasa ihocyate || 147 ||
[Analyze grammar]

ye narāḥ samayabhraṣṭā guruśāstrādidūṣakāḥ |
nityanaimittikādyanyaparvasandhivivarjitāḥ || 148 ||
[Analyze grammar]

akāmāt kāmato vāpi sūkṣmapāpapravartinaḥ |
teṣāṃ praśamanārthāya pavitraṃ kriyate śive || 149 ||
[Analyze grammar]

śrāvaṇādau kārtikānte śuklapakṣe śubhaprade |
natu duḥkhaprade kṛṣṇe kartṛrāṣṭranṛpādiṣu || 150 ||
[Analyze grammar]

pāṭṭasūtraṃ tu kauśeyaṃ kārpāsaṃ kṣaumameva ca |
cāturāśramikāṇāṃ tu subhruvā kartitokṣitam || 151 ||
[Analyze grammar]

tridhā tu triguṇīkṛtya mānasaṃkhyāṃ tu kārayet |
aṣṭottaraṃ tantuśataṃ tadardhaṃ vā tadardhakam || 152 ||
[Analyze grammar]

hrāsastu pūrvasaṃkhyāyā daśabhirdaśabhiḥ kramāt |
navabhiḥ pañcabhiḥ saptaviṃśatyā vā śivāditaḥ || 153 ||
[Analyze grammar]

yādṛśastantuvinyāso granthīnkuryāttu tāvataḥ |
catuḥsamaviliptāṃstānathavā kuṅkumena tu || 154 ||
[Analyze grammar]

vyakte jānutaṭāntaṃ syālliṅge pīṭhāvasānakam |
arcāsu śobhanaṃ mūrghni tritattvaparikalpanāt || 155 ||
[Analyze grammar]

dvādaśagranthiśaktīnāṃ brahmavaktrārciṣāmapi |
vidyāpīṭhe cale liṅge sthaṇḍile ca gurorgaṇe || 156 ||
[Analyze grammar]

ghaṇṭāyāṃ sruksruve śiṣyaliṅgiṣu dvāratoraṇe |
svadehe vahnipīṭhe ca yathāśobhaṃ tadiṣyate || 157 ||
[Analyze grammar]

prāsāde yāgagehe ca kārayennavaraṅgikam |
vidyāpīṭhe tu khaśarāḥ pratimāliṅgapīṭhagam || 158 ||
[Analyze grammar]

vasuvedaṃ ca ghaṇṭāyāṃ śarākṣyaṣṭādaśa sruve |
vedākṣi sruci ṣaṭtriṃśat prāsāde maṇḍape raviḥ || 159 ||
[Analyze grammar]

rasendu snānagehe'bdhinetre dhyānagṛhe gurau |
sapta sādhakagāḥ pañca putrake sapta sāmaye || 160 ||
[Analyze grammar]

catvāro'thānyaśāstrasthe śiṣye pañcakamucyate |
liṅgināṃ kevalo granthistoraṇe daśa kalpayet || 161 ||
[Analyze grammar]

dvāreṣvaṣṭau granthayaḥ syuḥ kṛtvetthaṃ tu pavitrakam |
pūjayitvā mantrajālaṃ tatsthatvātmasthate tataḥ || 162 ||
[Analyze grammar]

pavitrakāṇāṃ saṃpādya kuryātsaṃpātasaṃskriyām |
tataḥ saṃvatsaraṃ dhyāyedbhairavaṃ chidrasākṣiṇam || 163 ||
[Analyze grammar]

dattvā pūrṇāhutiṃ devi praṇamenmantrabhairavam |
oṃ samastakriyādoṣapūraṇeśa vrataṃ prati || 164 ||
[Analyze grammar]

yatkiṃcidakṛtaṃ duṣṭaṃ kṛtaṃ vā mātṛnandana |
tatsarvaṃ mama deveśa tvatprasādātpraṇaśyatu || 165 ||
[Analyze grammar]

sarvathā raśmicakreśa namastubhyaṃ prasīda me |
anena dadyāddevāya nimantraṇapavitrakam || 166 ||
[Analyze grammar]

yoginīkṣetramātṝṇāṃ baliṃ dadyāttato guruḥ |
pañcagavyaṃ caruṃ dantakāṣṭhaṃ śiṣyaiḥ samantataḥ || 167 ||
[Analyze grammar]

ācārya nidrāṃ kurvīta prātarutthāya cāhnikam |
tato vidhiṃ pūjayitvā pavitrāṇi samāharet || 168 ||
[Analyze grammar]

dantakāṣṭhaṃ mṛcca dhātrī samṛddhātrī sahāmbunā |
catuḥsamaṃ ca taiḥ sārdhaṃ bhasma pañcasu yojayet || 169 ||
[Analyze grammar]

prāgdakṣapaścimordhvasthavāmavaktreṣu vai kramāt |
pañcaitāni pavitrāṇi sthāpayecceśagocare || 170 ||
[Analyze grammar]

kuśedhma pañcagavyaṃ ca śarvāgre viniyojayet |
vāmāmṛtādisaṃyuktaṃ naivedyaṃ trividhaṃ tataḥ || 171 ||
[Analyze grammar]

dadyādasṛk tathā madyaṃ pānāni vividhāni ca |
tato homo mahākṣmājamāṃsaistilayutairatho || 172 ||
[Analyze grammar]

tilairghṛtayutairyadvā taṇḍulairatha dhānyakaiḥ |
śarkarākhaṇḍasaṃyuktapañcāmṛtapariplutaiḥ || 173 ||
[Analyze grammar]

mūlaṃ sahasraṃ sāṣṭoktaṃ triśaktau brahmavaktrakam |
arciṣāṃ tu śataṃ sāṣṭaṃ tataḥ pūrṇāhutiṃ kṣipet || 174 ||
[Analyze grammar]

tato'ñjalau pavitraṃ tu gṛhītvā prapaṭhedidam |
akāmādathavā kāmādyanmayā na kṛtaṃ vibho || 175 ||
[Analyze grammar]

tadacchidraṃ mamāstvīśa pavitreṇa tavājñayā |
mūlamantraḥ pūrayeti kriyāniyamamityatha || 176 ||
[Analyze grammar]

vauṣaḍantaṃ pavitraṃ ca dadyādbindvavasānakam |
nādāntaṃ samanāntaṃ cāpyunmanāntaṃ kramāttrayam || 177 ||
[Analyze grammar]

evaṃ catuṣṭayaṃ dadyādanulomena bhautikaḥ |
naiṣṭhikastu vilomena pavitrakacatuṣṭayam || 178 ||
[Analyze grammar]

yatkiñcidvividhaṃ vastracchatrālaṅkaraṇādikam |
tannivedyaṃ dīpamālāḥ suvarṇatilabhājanam || 179 ||
[Analyze grammar]

vastrayugmayutaṃ sarvasampūraṇanimittataḥ |
bhojanīyāḥ pūjanīyāḥ śivabhaktāstu śaktitaḥ || 180 ||
[Analyze grammar]

catustridvyekamāsādidinaikāntaṃ mahotsavam |
kuryāttato na vrajeyuranyasthānaṃ kadācana || 181 ||
[Analyze grammar]

tatastu daiśikaḥ pūjyo gāmasmai kṣīriṇīṃ navām |
dadyātsuvarṇaratnādirupyavastravibhūṣitām || 182 ||
[Analyze grammar]

vadedguruśca saṃpūrṇo vidhistava bhavatviti |
vaktavyaṃ devadevasya punarāgamanāya ca || 183 ||
[Analyze grammar]

tato visarjanaṃ kāryaṃ guptamābharaṇādikam |
naivedyaṃ gururādāya yāgārthe tanniyojayet || 184 ||
[Analyze grammar]

caturṇāmapi sāmānyaṃ pavitrakamiti smṛtam |
nāsmādvrataṃ paraṃ kiñcit kā vāsya stutirucyate || 185 ||
[Analyze grammar]

śeṣaṃ tvagādhe vāryoghe kṣipenna sthāpayetsthiram |
atha naimittikavidhiryaḥ purāsūtrito mayā || 186 ||
[Analyze grammar]

sa bhaṇyate tatra kāryā devasyārcā viśeṣataḥ |
cakrayāgaśca kartavyaḥ pūrvoktavidhinā budhaiḥ || 187 ||
[Analyze grammar]

tatra yadyannijābhīṣṭabhogamokṣopakārakam |
pāramparyeṇa sākṣādvā bhaveccidacidātmakam || 188 ||
[Analyze grammar]

tatpūjyaṃ tadupāyāśca pūjyāstanmayatāptaye |
tadupāyo'pi saṃpūjyo mūrtikālakriyādikaḥ || 189 ||
[Analyze grammar]

upeyasūtisāmarthyamupāyatvaṃ tadarcanāt |
tadrūpatanmayībhāvādupeyaṃ śīghramāpnuyāt || 190 ||
[Analyze grammar]

yathā yathā ca naikaṭyamupāyeṣu tathā tathā |
avaśyaṃbhāvi kāryatvaṃ viśeṣāccārcanādike || 191 ||
[Analyze grammar]

jñānasya kasyacitprāptirbhogamokṣopakāriṇaḥ |
yadā tanmukhyamevoktaṃ naimittikadinaṃ budhaiḥ || 192 ||
[Analyze grammar]

tadupāyaḥ śāstramatra vaktāpyaupayiko guruḥ |
tadvidyo'pi gurubhrātā saṃvādājjñānadāyakaḥ || 193 ||
[Analyze grammar]

guroḥ patnī tathā bhrātā putra ityādiko gaṇaḥ |
na yonisaṃbandhavaśādvidyāsaṃbandhajastu saḥ || 194 ||
[Analyze grammar]

vīryāruṇaparīṇāmadehāhantāpratiṣṭhitāḥ |
dehopakārasantānā jñāteye pariniṣṭhitāḥ || 195 ||
[Analyze grammar]

tathāca smṛtiśāstreṣu santaterdāyahāritā |
yuktaiva tāvānsa hyukto bhedāddūrāntikatvataḥ || 196 ||
[Analyze grammar]

ye tu tyaktaśarīrāsthā bodhāhambhāvabhāginaḥ |
bodhopakārasantānadvayātte bandhutājuṣaḥ || 197 ||
[Analyze grammar]

tatretthaṃ prāgyadā paśyecchaktyunmīlitadṛkkriyaḥ |
dehastāvadayaṃ pūrvapūrvopādānanirmitaḥ || 198 ||
[Analyze grammar]

ātmā vikārarahitaḥ śāśvatatvādahetukaḥ |
svātantryāt punarātmīyādayaṃ channa iva sthitaḥ || 199 ||
[Analyze grammar]

punaśca prakaṭībhūya bhairavībhāvabhājanam |
tatrāsya prakaṭībhāve bhuktimuktyātmake bhṛśam || 200 ||
[Analyze grammar]

ya upāyaḥ samucito jñānasantāna eṣa saḥ |
kramasphuṭībhavattādṛksadṛśajñānadhārayā || 201 ||
[Analyze grammar]

galadvijātīyatayā prāpyaṃ śīghraṃ hi labhyate |
evaṃ cānādisaṃsārocitavijñānasantateḥ || 202 ||
[Analyze grammar]

dhvaṃse lokottaraṃ jñānaṃ santānāntaratāṃ śrayet |
asaṃsārocitodāratathāvijñānasantateḥ || 203 ||
[Analyze grammar]

kāraṇaṃ mukhyamādyaṃ tadguruvijñānamātmagam |
atyantaṃ svaviśeṣāṇāṃ tatrārpaṇavaśāt sphuṭam || 204 ||
[Analyze grammar]

upādānaṃ hi tadyuktaṃ dehabhede hi satyapi |
dehasantatigau bhedābhedau vijñānasantateḥ || 205 ||
[Analyze grammar]

na tathātvāya yogīcchāviṣṭaśāvaśarīravat |
yoginaḥ paradehādijīvattāpādane nijam || 206 ||
[Analyze grammar]

dehamatyajato nānājñānopādānatā na kim |
tena vijñānasantānaprādhānyādyaunasantateḥ || 207 ||
[Analyze grammar]

anyonyaṃ gurusantāno yaḥ śivajñānaniṣṭhitaḥ |
itthaṃ sthite trayaṃ mukhyaṃ kāraṇaṃ sahakāri ca || 208 ||
[Analyze grammar]

ekakāraṇakāryaṃ ca vastvityeṣa gurorgaṇaḥ |
guruḥ kāraṇamatroktaṃ tatpatnī sahakāriṇī || 209 ||
[Analyze grammar]

yato niḥśaktikasyāsya na yāge'dhikṛtirbhavet |
antaḥsthodārasaṃvittiśakterbāhyāṃ vināpi tām || 210 ||
[Analyze grammar]

sāmarthyaṃ yogino yadvadvināpi sahakāriṇam |
ekajanyā bhrātaraḥ syustatsadṛgyastu ko'pi saḥ || 211 ||
[Analyze grammar]

punaḥ paramparāyogādguruvargo'pi bhaṇyate |
mukhya eṣa tu santānaḥ pūjyo mānyaśca sarvadā || 212 ||
[Analyze grammar]

gurvādīnāṃ ca sambhūtau dīkṣāyāṃ prāyaṇe'pi ca |
yadahastaddhi vijñānopāyadehādikāraṇam || 213 ||
[Analyze grammar]

evaṃ svajanmadivaso vijñānopāya ucyate |
tādṛgbhogāpavargādihetordehasya kāraṇam || 214 ||
[Analyze grammar]

dīkṣādikaśca saṃskāraḥ svātmano yatra cāhni tat |
bhavejjanmadinaṃ mukhyaṃ jñānasantānajanmataḥ || 215 ||
[Analyze grammar]

svakaṃ mṛtidinaṃ yattu tadanyeṣāṃ bhaviṣyati |
naimittikaṃ mṛto yasmācchivābhinnastadā bhavet || 216 ||
[Analyze grammar]

tatra prasaṅgānmaraṇasvarūpaṃ brūmahe sphuṭam |
vyāpako'pi śivaḥ svecchākḷptasaṅkocamudraṇāt || 217 ||
[Analyze grammar]

vicitraphalakarmaughavaśāttattaccharīrabhāk |
śarīrabhāktvaṃ caitāvadyattadgarbhasthadehagaḥ || 218 ||
[Analyze grammar]

saṃvitteḥ śūnyarūḍhāyāḥ prathamaḥ prāṇanodayaḥ |
garbhasthadehanirmāṇe tasyaiveśvaratā punaḥ || 219 ||
[Analyze grammar]

asaṅkocasya tanvādikartā teneśa ucyate |
sa vāyvātmā dṛḍhe tasmindehayantre cidātmanā || 220 ||
[Analyze grammar]

preryamāṇo vicarati bhastrāyantragavāyuvat |
ataḥ prāggāḍhasaṃsuptotthitavatsa prabuddhyate || 221 ||
[Analyze grammar]

kramāddehena sākaṃ ca prāṇanā syādbalīyasī |
tatrāpi karmaniyatibalātsā prāṇanākṣatām || 222 ||
[Analyze grammar]

gṛhṇāti śūnyasuṣirasaṃvitsparśādhikatvataḥ |
evaṃ krameṇa saṃpuṣṭadehaprāṇabalo bhṛśam || 223 ||
[Analyze grammar]

bhogānkarmakṛtānbhuṅkte yonyayonijadehagaḥ |
uktaṃ ca gahvarābhikhye śāstre śītāṃśumaulinā || 224 ||
[Analyze grammar]

yathā gṛhaṃ viniṣpādya gṛhī samadhitiṣṭhati |
tathā dehī tanuṃ kṛtvā kriyādiguṇavarjitaḥ || 225 ||
[Analyze grammar]

kiñcitsphuraṇamātraḥ prāgniṣkalaḥ so'pi śabdyate |
sphuṭendriyāditattvastu sakalātmeti bhaṇyate || 226 ||
[Analyze grammar]

ityādi śrīgahvaroktaṃ tata eva paṭhedbahu |
kṣaye tu karmaṇāṃ teṣāṃ dehayantre'nyathāgate || 227 ||
[Analyze grammar]

prāṇayantraṃ vighaṭate dehaḥ syātkuḍyavattataḥ |
nāḍīcakreṣu saṅkocavikāsau viparītataḥ || 228 ||
[Analyze grammar]

bhaṅgaḥ śoṣaḥ klidirvātaśleṣmāgnyapacayoccayaiḥ |
ityevamādi yatkiñcit prāksaṃsthānopamardakam || 229 ||
[Analyze grammar]

dehayantre vighaṭanaṃ tadevoktaṃ manīṣibhiḥ |
tasminvighaṭite yantre sā saṃvitprāṇanātmatām || 230 ||
[Analyze grammar]

gṛhṇāti yonije'nyatra vā dehe karmacitrite |
sa dehaḥ pratibudhyeta prasuptotthitavattadā || 231 ||
[Analyze grammar]

tasyāpi bhogataddhānimṛtayaḥ prāgvadeva hi |
visṛṣṭisthitisaṃhārā ete karmabalādyataḥ || 232 ||
[Analyze grammar]

ato niyatikālādivaicitryānuvidhāyinaḥ |
anugrahastu yaḥ so'yaṃ svasvarūpe vikasvare || 233 ||
[Analyze grammar]

jñaptyātmeti kathaṃ karmaniyatyādi pratīkṣate |
karmakālaniyatyādi yataḥ saṅkocajīvitam || 234 ||
[Analyze grammar]

saṅkocahānirūpe'sminkathaṃ heturanugrahe |
anugrahaśca kramikastīvraśceti vibhidyate || 235 ||
[Analyze grammar]

prāk caiṣa vistarātprokta iti kiṃ punaruktibhiḥ |
tena dīkṣāśivajñānadagdhasaṅkocabandhanaḥ || 236 ||
[Analyze grammar]

dehānte śiva eveti nāsya dehāntarasthitiḥ |
ye'pi tattvāvatīrṇānāṃ śaṃkarājñānuvartinām || 237 ||
[Analyze grammar]

svayambhūmunidevarṣimanujādibhuvāṃ gṛhe |
mṛtāste tatpuraṃ prāpya pureśairdīkṣitāḥ kramāt || 238 ||
[Analyze grammar]

martye'vatīrya vā no vā śivaṃ yāntyapunarbhavāḥ |
tatra svayambhuvo dvedhā ke'pyanugrahatatparāḥ || 239 ||
[Analyze grammar]

ke'pi svakṛtyāyātāṃśasthānamātropasevinaḥ |
ye'nugrahārthamājñaptāsteṣu yo mriyate naraḥ || 240 ||
[Analyze grammar]

so'nugrahaṃ sphuṭaṃ yāti vinā martyāvatārataḥ |
yastu svakāryaṃ kurvāṇastatsthānaṃ nāṃśatastyajet || 241 ||
[Analyze grammar]

yathā gaurī tapasyantī kaśmīreṣu guhāgatā |
tatraiva vā yathā dhyānoḍḍāre naraharirvibhuḥ || 242 ||
[Analyze grammar]

vitastāṃ nayato daityāṃstrāsayandṛpta utthitaḥ |
sāligrāme yathā viṣṇuḥ śivo vā svopabhoginaḥ || 243 ||
[Analyze grammar]

tapasyantau badaryāṃ ca naranārāyaṇau tathā |
ityevamādayo devāḥ svakṛtyāṃśasthitāstathā || 244 ||
[Analyze grammar]

ārādhitāḥ svocitaṃ tacchīghraṃ vidadhate phalam |
svakṛtyāṃśasthitānāṃ ca dhāmni ye'ntaṃ vrajanti te || 245 ||
[Analyze grammar]

tatra bhogāṃstathā bhuktvā martyeṣvavatarantyapi |
martyāvatīrṇāste tattadaṃśakāstanmayāḥ punaḥ || 246 ||
[Analyze grammar]

taddīkṣājñānacaryādikramādyānti śivātmatām |
sthāvarādyāstiryagantāḥ paśavo'smindvaye mṛtāḥ || 247 ||
[Analyze grammar]

svakarmasaṃskriyāvedhāttalloke citratājuṣaḥ |
puṃsāṃ ca paśumātrāṇāṃ sālokyamavivekataḥ || 248 ||
[Analyze grammar]

avivekastadviśeṣānunmeṣānmauḍhyatastathā |
sthāvarādyāstathābhāvamuttarottaratāṃ ca vā || 249 ||
[Analyze grammar]

prapadyante na te sākṣādrudratāṃ tāṃ kramātpunaḥ |
haṃsakāraṇḍavākīrṇe nānātarukulākule || 250 ||
[Analyze grammar]

ityetadāgameṣūktaṃ tata eva pure pure |
kṣetramānaṃ bruve śrīmatsarvajñānādiṣūditam || 251 ||
[Analyze grammar]

liṅgāddhastaśataṃ kṣetramācāryasthāpite sati |
svayambhūte sahasraṃ tu tadardhamṛṣiyojite || 252 ||
[Analyze grammar]

tattvavitsthāpite liṅge svayambhūsadṛśaṃ phalam |
atattvavidyadācāryo liṅgaṃ sthāpayate tadā || 253 ||
[Analyze grammar]

punarvidhirbhaveddoṣo hyanyathobhayadūṣakaḥ |
ahamanyaḥ parātmānyaḥ śivo'nya iti cenmatiḥ || 254 ||
[Analyze grammar]

na mocayenna muktaśca sarvamātmamayaṃ yataḥ |
tasmāttattvavidā yadyatsthāpitaṃ liṅgamuttamam || 255 ||
[Analyze grammar]

tadevāyatanatvena saṃśrayedbhuktimuktaye |
uktaṃ śrīratnamālāyāṃ jñātvā kālamupasthitam || 256 ||
[Analyze grammar]

mokṣārthī na bhayaṃ gacchettyajeddehamaśaṅkitaḥ |
tīrthāyatanapuṇyeṣu kālaṃ vā vañcayetpriye || 257 ||
[Analyze grammar]

ayogināmayaṃ panthā yogī yogena vañcayet |
vañcane tvasamarthaḥ san kṣetramāyatanaṃ vrajet || 258 ||
[Analyze grammar]

tīrthe samāśrayāttasya vañcanaṃ tu vijāyate |
anena ca dharādyeṣu tattveṣvabhyāsayogataḥ || 259 ||
[Analyze grammar]

tāvatsiddhijuṣo'pyuktā muktyai kṣetropayogitā |
samyagjñānini vṛttāntaḥ purastāttūpadekṣyate || 260 ||
[Analyze grammar]

paśūnāmeṣa vṛttānto ye tu tattattvadīkṣitāḥ |
te tadīśasamīpatvaṃ yānti svaucityayogataḥ || 261 ||
[Analyze grammar]

yogyatāvaśasaṃjātā yasya yatraiva vāsanā |
sa tatraiva niyoktavyaḥ pureśāccordhvaśuddhibhāk || 262 ||
[Analyze grammar]

iti śrīpūrvakathitaṃ śrīmatsvāyambhuve'pica |
yo yatrābhilaṣedbhogānsa tatraiva niyojitaḥ || 263 ||
[Analyze grammar]

siddhibhāṅmantrasāmarthyādityādyanyatra varṇitam |
ye tu tattattvavijñānamantracaryādivartinaḥ || 264 ||
[Analyze grammar]

mṛtāste tatra tadrudrasayuktvaṃ yānti kovidāḥ |
teṣāṃ sayuktvaṃ yātānāmapi saṃskārato nijāt || 265 ||
[Analyze grammar]

tathā tathā vicitraḥ syādavatārastadaṃśataḥ |
siddhāntādau purāṇeṣu tathāca śrūyate bahu || 266 ||
[Analyze grammar]

tulye rudrāvatāratve citratvaṃ karmabhogayoḥ |
anekaśaktikhacitaṃ yato bhāvasya yadvapuḥ || 267 ||
[Analyze grammar]

śaktibhyo'rthāntaraṃ naiṣa tatsamūhādṛte bhavet |
tena śaktisamūhākhyāt tasmādrudrādyadaṃśataḥ || 268 ||
[Analyze grammar]

kṛtyaṃ taducitaṃ siddhyet soṃ'śo'vatarati sphuṭam |
ye cādharaprāptadīkṣāstadāsthānujjhitāḥ pare || 269 ||
[Analyze grammar]

tattve mṛtāḥ kāṣṭhavatte'dhare'pyutkarṣabhāginaḥ |
ye tūjjhitatadutkarṣāste taduttarabhāginaḥ || 270 ||
[Analyze grammar]

ye'pyūrdhvatattvadīkṣāste vinā tāvadvivekataḥ |
prāptādharāntā api taddīkṣāphalasubhāginaḥ || 271 ||
[Analyze grammar]

atyaktāsthā hi te tatra dīkṣāyāmapi śāstritāt |
vinā vivekādāsthāṃ te śritā lokaprasiddhitaḥ || 272 ||
[Analyze grammar]

paśumātrasya sālokyaṃ sāmīpyaṃ dīkṣitasya tu |
tatparasya tu sāyujyamityuktaṃ parameśinā || 273 ||
[Analyze grammar]

yastūrdhvaśāstragastatra tyaktāsthaḥ saṃśayena saḥ |
vrajannāyatanaṃ naiva phalaṃ kiñcitsamaśnute || 274 ||
[Analyze grammar]

uktaṃ tadviṣayaṃ caitaddevadevena yadvṛthā |
dīkṣā jñānaṃ tathā tīrthaṃ tasyetyādi savistaram || 275 ||
[Analyze grammar]

yastu tāvadayogyo'pi tathāste sa śivālaye |
paścādāsthānibandhena tāvadeva phalaṃ bhajet || 276 ||
[Analyze grammar]

nadīnagahradaprāyaṃ yacca puṇyaṃ na tanmṛtau |
utkṛṣṭaṃ tanmṛtānāṃ tu svargabhogopabhogitā || 277 ||
[Analyze grammar]

ye punaḥ prāptavijñānavivekā maraṇāntike |
adharāyataneṣvāsthāṃ śritāste'tra tirohitāḥ || 278 ||
[Analyze grammar]

tajjñānadūṣaṇoktaṃ yatteṣāṃ syātkila pātakam |
tattatpureśadīkṣādikramānnaśyediti sthitiḥ || 279 ||
[Analyze grammar]

dīkṣāyatanavijñānadūṣiṇo ye tu cetasā |
ācaranti ca tatte'tra sarve nirayagāminaḥ || 280 ||
[Analyze grammar]

jñānāyatanadīkṣādāvāsthābandhaparicyutiḥ |
vyāpāravyāhṛtairjñeyā tānyapi dvividhāni ca || 281 ||
[Analyze grammar]

yāni jātucidapyeva svāsthye nodamiṣanpunaḥ |
asvāsthye dhātudoṣotthānyeva tadbhogamātrakam || 282 ||
[Analyze grammar]

dhātudoṣācca saṃsārasaṃskārāste prabodhitāḥ |
chidragā api bhūyiṣṭhajñānadagdhā na rohiṇaḥ || 283 ||
[Analyze grammar]

ye tu kaivalyabhāgīyāḥ svāsthye'nunmiṣitāḥ sadā |
asvāsthye conmiṣantyete saṃskārāḥ śaktipātataḥ || 284 ||
[Analyze grammar]

yataḥ sāṃsārikāḥ pūrvagāḍhābhyāsopasaṃskṛtāḥ |
ityūce bhujagādhīśastacchidreṣviti sūtrataḥ || 285 ||
[Analyze grammar]

ye tu kaivalyabhāgīyāḥ pratyayāste na jātucit |
abhyastāḥ saṃsṛterbhāvāttenaite śaktipātataḥ || 286 ||
[Analyze grammar]

vyāpāravyāhṛtaistena dhātudoṣaprakopitaiḥ |
aprāptaniścayāmarśaiḥ suptamattopamānakaiḥ || 287 ||
[Analyze grammar]

viparītairapi jñānadīkṣāgurvādidūṣakaiḥ |
tirobhāvo na vijñeyo hṛdaye rūḍhyabhāvataḥ || 288 ||
[Analyze grammar]

ata eva prabuddho'pi karmotthānbhogarūpiṇaḥ |
yamakiṅkarasarpādipratyayāndehago bhajet || 289 ||
[Analyze grammar]

naitāvatā na mukto'sau mṛtirbhogo hi janmavat |
sthitivacca tato duḥkhasukhābhyāṃ maraṇaṃ dvidhā || 290 ||
[Analyze grammar]

ato yathā prabuddhasya sukhaduḥkhavicitratāḥ |
sthitau na ghnanti muktatvaṃ maraṇe'pi tathaiva tāḥ || 291 ||
[Analyze grammar]

ye punaryoginaste'pi yasmiṃstattve subhāvitāḥ |
cittaṃ niveśayantyeva tattattvaṃ yāntyaśaṅkitāḥ || 292 ||
[Analyze grammar]

śrīsvacchande tataḥ proktaṃ gandhadhāraṇayā mṛtāḥ |
ityādi mālinīśāstre dhāraṇānāṃ tathā phalam || 293 ||
[Analyze grammar]

eteṣāṃ maraṇābhikhyo bhogo nāsti tu ye tanum |
dhāraṇābhistyajantyāśu paradehapraveśavat || 294 ||
[Analyze grammar]

etāvānmṛtibhogo hi marmacchinmūḍhatākṣagā |
dhvāntābilatvaṃ manasi taccaiteṣu na vidyate || 295 ||
[Analyze grammar]

tathāhi mānasaṃ yatnaṃ tāvatsamadhitiṣṭhati |
ahaṃrūḍhyā pare dehe yāvatsyādbuddhisaṃcaraḥ || 296 ||
[Analyze grammar]

prāṇacakraṃ tadāyattamapi saṃcarate pathā |
tenaivātaḥ prabuddhyeta paradehe'kṣacakrakam || 297 ||
[Analyze grammar]

makṣikā makṣikārājaṃ yathotthitamanūtthitāḥ |
sthitaṃ cānuviśantyevaṃ cittaṃ sarvākṣavṛttayaḥ || 298 ||
[Analyze grammar]

ato'sya paradehādisaṃcāre nāsti melanam |
akṣāṇāṃ madhyagaṃ sūkṣmaṃ syādetaddehavatpunaḥ || 299 ||
[Analyze grammar]

evaṃ paraśarīrādicāriṇāmiva yoginām |
tattattattvaśarīrāntaścāriṇāṃ nāsti mūḍhatā || 300 ||
[Analyze grammar]

te cāpi dvividhā jñeyā laukikā dīkṣitāstathā |
pūrve śivāḥ syuḥ kramaśaḥ pare tadbhogamātrataḥ || 301 ||
[Analyze grammar]

dīkṣāpyūrdhvādharānekabhedayojanikāvaśāt |
bhidyamānā yogināṃ syādvicitraphaladāyinī || 302 ||
[Analyze grammar]

ye tu vijñāninaste'tra dvedhā kampretaratvataḥ |
tatra ye kampravijñānāste dehānted śivāḥ sphuṭam || 303 ||
[Analyze grammar]

yato vijñānameteṣāmutpannaṃ naca susphuṭam |
vikalpāntarayogena nacāpyunmūlitātmakam || 304 ||
[Analyze grammar]

ato dehe pramādottho vikalpo dehapātataḥ |
naśyedavaśyaṃ taccāpi budhyate jñānamuttamam || 305 ||
[Analyze grammar]

saṃskārakalpanātiṣṭhadadhvastīkṛtamantarā |
prāptapākaṃ saṃvarīturapāye bhāsate hi tat || 306 ||
[Analyze grammar]

ye tu svabhyastavijñānamayāḥ śivamayāḥ sadā |
jīvanmuktā hi te naiṣāṃ mṛtau kāpi vicāraṇā || 307 ||
[Analyze grammar]

yathāhi jīvanmuktānāṃ sthitau nāsti vicāraṇā |
sukhiduḥkhivimūḍhatve, mṛtāvapi tathā na sā || 308 ||
[Analyze grammar]

śrīratnamālāśāstre taduvāca parameśvaraḥ |
svaśāstre cāpyahīśāno viśvādhāradhurandharaḥ || 309 ||
[Analyze grammar]

rathyāntare mūtrapurīṣamadhye caṇḍālagehe niraye śmaśāne |
sacintako vā gatacintako vā jñānī vimokṣaṃ labhate'pi cānte || 310 ||
[Analyze grammar]

apiceti dhvanirjīvanmuktatāmasya bhāṣate |
sacintācintakatvoktiretāvatsaṃbhavasthitim || 311 ||
[Analyze grammar]

tīrthe śvapacagṛhe vā naṣṭasmṛtirapi parityajeddeham |
jñānasamakālamuktaḥ kaivalyaṃ yāti hataśokaḥ || 312 ||
[Analyze grammar]

anantakārikā caiṣā prāhedaṃ bandhakaṃ kila |
sukṛtaṃ duṣkṛtaṃ cāsya śaṅkyaṃ taccāsya no bhavet || 313 ||
[Analyze grammar]

apiśabdādaluptasmṛtyā vā saṃbhāvyate kila |
mṛtirnaṣṭasmṛtereva mṛteḥ prāk sāstu kiṃ tayā || 314 ||
[Analyze grammar]

liṅca saṃbhāvanāyāṃ syādiyatsaṃbhāvyate kila |
saca kāladhvaniḥ prāha mṛtermuktāvahetutām || 315 ||
[Analyze grammar]

kaivalyamiti cāśaṅkāpadaṃ yāpyabhavattanuḥ |
bhedapradatvenaiṣāpi dhvastā tena viśokatā || 316 ||
[Analyze grammar]

paradehādisaṃbandho yathā nāsya vibhedakaḥ |
tathā svadehasaṃbandho jīvanmuktasya yadyapi || 317 ||
[Analyze grammar]

ataśca na viśeṣo'sya viśvākṛtinirākṛteḥ |
śivābhinnasya dehe vā tadabhāve'pi vā kila || 318 ||
[Analyze grammar]

tathāpi prācyatadbhedasaṃskārāśaṅkanasthiteḥ |
adhunoktaṃ kevalatvaṃ yadvā mātrantarāśrayāt || 319 ||
[Analyze grammar]

tānyenaṃ na vidurbhinnaṃ taiḥ sa mukto'bhidhīyate |
śrīmattraiśirase'pyuktaṃ sūryendupuṭavarjite || 320 ||
[Analyze grammar]

jugupsābhāvabhaṅgasthe sarvataḥ stambhavatsthite |
sarvavyāpattirahite pramāṇapratyayātige || 321 ||
[Analyze grammar]

tasminbodhāntare līnaḥ karmakartāpyanañjanaḥ |
pradhānaṃ ghaṭa ākāśa ātmā maṣṭe ghaṭe'pi kham || 322 ||
[Analyze grammar]

na naśyettadvadevāsāvātmā śivamayo bhavet |
svatantro'vasthito jñānī prasaretsarvavastuṣu || 323 ||
[Analyze grammar]

tasya bhāvo nacābhāvaḥ saṃsthānaṃ naca kalpanā |
etadevāntarāgūrya gururgītāsvabhāṣata || 324 ||
[Analyze grammar]

yaṃ yaṃ vāpi smaranbhāvaṃ tyajatyante kalevaram |
taṃ tamevaiti kaunteya sadā tadbhāvabhāvitaḥ || 325 ||
[Analyze grammar]

tasmātsarveṣu kāleṣu māmanusmara yudhya ca |
yadā sattve vivṛddhe tu pralīnastvūrdhvagastadā || 326 ||
[Analyze grammar]

kramādrajastamolīnaḥ karmayonivimūḍhagaḥ |
tatrendriyāṇāṃ saṃmohaśvāsāyāsaparītatā || 327 ||
[Analyze grammar]

ityādimṛtibhogo'yaṃ dehe na tyajanaṃ tanoḥ |
yastvasau kṣaṇa evaikaścaramaḥ prāṇanātmakaḥ || 328 ||
[Analyze grammar]

yadanantaramevaiṣa dehaḥ syātkāṣṭhakuḍyavat |
sā dehatyāgakālāṃśakalā dehaviyoginī || 329 ||
[Analyze grammar]

tata eva hi taddehasukhaduḥkhādikojjhitā |
tasyāṃ yadeva smarati prāksaṃskāraprabodhataḥ || 330 ||
[Analyze grammar]

adṛṣṭābhyāsabhūyastvaśaktipātādihetukāt |
tadeva rūpamabhyeti sukhiduḥkhivimūḍhakam || 331 ||
[Analyze grammar]

yadvā niḥsukhaduḥkhādi yadi vānandarūpakam |
kasmādeti tadevaiṣa yataḥ smarati saṃvidi || 332 ||
[Analyze grammar]

prāk prasphuredyadadhikaṃ deho'sau cidadhiṣṭhiteḥ |
yadeva prāgadhiṣṭhānaṃ citā tādātmyavṛttitaḥ || 333 ||
[Analyze grammar]

saivātra līnatā proktā sattve rajasi tāmase |
nīlapītādike jñeye yataḥ prākkalpitāṃ tanum || 334 ||
[Analyze grammar]

adhiṣṭhāyaiva saṃvittiradhiṣṭhānaṃ karotyalam |
ato'dhiṣṭheyamātrasya śarīratve'pi kuḍyataḥ || 335 ||
[Analyze grammar]

dehasyāsti viśeṣo yatsarvādhiṣṭheyapūrvatā |
tādātmyavṛttiranyeṣāṃ tanna satyapi vedyate || 336 ||
[Analyze grammar]

vedyānāṃ kintu dehasya nityāvyabhicaritvataḥ |
sā ca tasyaiva dehasya pūrvamṛtyantajanmanā || 337 ||
[Analyze grammar]

smṛtyā prācyānubhavanakṛtasaṃskāracitrayā |
yuktyānayāsmatsantānaguruṇā kallaṭena yat || 338 ||
[Analyze grammar]

dehāviśeṣe prāṇākhyadārḍhyaṃ heturudīritam |
tadyuktamanyathā prāṇadārḍhye ko heturekataḥ || 339 ||
[Analyze grammar]

dehatvasyāviśeṣe'pītyeṣa praśno na śāmyati |
smaranniti śatā hetau tadrūpaṃ pratipadyate || 340 ||
[Analyze grammar]

prāk smaryate yato dehaḥ prākcitādhiṣṭhitaḥ sphuran |
ataḥ smaraṇamantyaṃ yattadasarvajñamātṛṣu || 341 ||
[Analyze grammar]

na jātu gocaro yasmāddehāntaraviniścayaḥ |
yattu bandhupriyāputrapānādismaraṇaṃ sphuṭam || 342 ||
[Analyze grammar]

na taddehāntarāsaṅgi na tadantyaṃ yato bhavet |
kasyāpi tu śarīrānte vāsanā yā prabhotsyate || 343 ||
[Analyze grammar]

dehasattve tadaucityājjāyetānubhavaḥ sphuṭaḥ |
yathā purāṇe kathitaṃ mṛgapotakatṛṣṇayā || 344 ||
[Analyze grammar]

muniḥ ko'pi mṛgībhāvamabhyuvāhādhivāsitaḥ |
tatra so'nubhavo heturna janmāntarasūtaye || 345 ||
[Analyze grammar]

tasyaitadvāsanā hetuḥ kākatālīyavat sa tu |
nanu kasmāttadevaiṣa smarati ityāha yatsadā || 346 ||
[Analyze grammar]

tadbhāvabhāvitastena tadevaiṣa smaratyalam |
evamasmi bhaviṣyāmītyeṣa tadbhāva ucyate || 347 ||
[Analyze grammar]

bhaviṣyato hi bhavanaṃ bhāvyate na sataḥ kvacit |
kramātsphuṭatvakaraṇaṃ bhāvanaṃ parikīrtyate || 348 ||
[Analyze grammar]

sphuṭasya cānubhavanaṃ na bhāvanamidaṃ sphuṭam |
tadaharjātabālasya paśoḥ kīṭasya vā taroḥ || 349 ||
[Analyze grammar]

mūḍhatve'pi tadānīṃ prāgbhāvanā hyabhavatsphuṭā |
sā tanmūḍhaśarīrānte saṃskārapratibodhanāt || 350 ||
[Analyze grammar]

smṛtidvāreṇa taddehavaicitryaphaladāyinī |
deśādivyavadhāne'pi vāsanānāmudīritāt || 351 ||
[Analyze grammar]

ānantaryaikarūpatvātsmṛtisaṃskārayorataḥ |
tathānubhavanārūḍhyā sphuṭasyāpi tu bhāvitā || 352 ||
[Analyze grammar]

bhāvyamānā na kiṃ sūte tatsantānasadṛgvapuḥ |
tattādṛktādṛśairbandhuputramitrādibhiḥ saha || 353 ||
[Analyze grammar]

bhāsate'pi pare loke svapnavadvāsanākramāt |
nanu mātrantarairbandhuputrādyaistattathā na kim || 354 ||
[Analyze grammar]

vedyate ka idaṃ prāha sa tāvadveda vedyatām |
vyāpāravyāhṛtivrātavedye mātrantaravraje || 355 ||
[Analyze grammar]

svapne nāsti sa ityeṣā vākpramāṇavivarjitā |
ya evaite tu dṛśyante jāgratyete mayekṣitāḥ || 356 ||
[Analyze grammar]

svapna ityastu mithyaitattatpramātṛvacobalāt |
yānapaśyamahaṃ svapne pramātṝṃste na kecana || 357 ||
[Analyze grammar]

na śocanti na cekṣante māmityatrāsti kā pramā |
yataḥ sarvānumānānāṃ svasaṃvedananiṣṭhitau || 358 ||
[Analyze grammar]

pramātrantarasadbhāvaḥ saṃvinniṣṭho na tadgataḥ |
ghaṭāderastitā saṃvinniṣṭhitā natu tadgatā || 359 ||
[Analyze grammar]

tadvanmātrantare'pyeṣā saṃvinniṣṭhā na tadgatā |
tena sthitamidaṃ yadyadbhāvyate tattadeva hi || 360 ||
[Analyze grammar]

dehānte budhyate no cet syādanyādṛkprabodhanam |
tathāhyantyakṣaṇe brahmavidyākarṇanasaṃskṛtaḥ || 361 ||
[Analyze grammar]

mucyate janturityuktaṃ prāksaṃskārabalatvataḥ |
nipātābhyāmantaśabdātsmaraṇācchaturantyataḥ || 362 ||
[Analyze grammar]

pādācca nikhilādardhaślokācca samanantarāt |
līnaśabdācca sarvaṃ taduktamarthasatattvakam || 363 ||
[Analyze grammar]

ajñātvaitattu sarve'pi kuśakāśāvalambinaḥ |
yattadorvyatyayaṃ kecitkecidanyādṛśaṃ kramam || 364 ||
[Analyze grammar]

bhinnakramau nipātau ca tyajatīti ca saptamīm |
vyācakṣate tacca sarvaṃ nopayogyuktayojane || 365 ||
[Analyze grammar]

naca taddarśitaṃ mithyā svāntasammohadāyakam |
taditthaṃprāyaṇasyaitattattvaṃ śrīśambhunāthataḥ || 366 ||
[Analyze grammar]

adhigamyoditaṃ tena mṛtyorbhītirvinaśyati |
viditamṛtisatattvāḥ saṃvidambhonidhānādacalahṛdayavīryākarṣaniṣpīḍanottham |
amṛtamiti nigīrṇe kālakūṭe'tra devā yadi pivatha tadānīṃ niścitaṃ vaḥ śivatvam || 367 ||
[Analyze grammar]

utsavo'pi hi yaḥ kaścillaukikaḥ so'pi saṃmadam |
saṃvidabdhitaraṅgābhaṃ sūte tadapi parvavat || 368 ||
[Analyze grammar]

etena ca vipaddhvaṃsapramodādiṣu parvatā |
vyākhyātā tena tatrāpi viśeṣāddevatārcanam || 369 ||
[Analyze grammar]

purakṣobhādyadbhutaṃ yattatsvātantrye svasaṃvidaḥ |
dārḍhyadāyīti tallābhadine vaiśeṣikārcanam || 370 ||
[Analyze grammar]

yoginīmelako dvedhā haṭhataḥ priyatastathā |
prācye cchidrāṇi saṃrakṣetkāmacāritvamuttare || 371 ||
[Analyze grammar]

sa ca dvayo'pi mantroddhṛtprasaṅge darśayiṣyate |
yoginīmelakāccaiṣo'vaśyaṃ jñānaṃ prapadyate || 372 ||
[Analyze grammar]

tena tatparva tadvacca svasantānādimelanam |
saṃvitsarvātmikā dehabhedādyā saṅkucettu sā || 373 ||
[Analyze grammar]

melake'nyonyasaṅghaṭṭapratibimbādvikasvarā |
ucchalannijaraśmyoghaḥ saṃvitsu pratibimbitaḥ || 374 ||
[Analyze grammar]

bahudarpaṇavaddīptaḥ sarvāyetāpyayatnataḥ |
ata eva gītagītaprabhṛtau bahuparṣadi || 375 ||
[Analyze grammar]

yaḥ sarvatanmayībhāve hlādo natvekakasya saḥ |
ānandanirbharā saṃvitpratyekaṃ sā tathaikatām || 376 ||
[Analyze grammar]

nṛttādau viṣaye prāptā pūrṇānandatvamaśnute |
īrṣyāsūyādisaṅkocakāraṇābhāvato'tra sā || 377 ||
[Analyze grammar]

vikasvarā niṣpratighaṃ saṃvidānandayoginī |
atanmaye tu kasmiṃścittatrasthe pratihanyate || 378 ||
[Analyze grammar]

sthapuṭasparśavatsaṃvidvijātīyatayā sthite |
ataścakrārcanādyeṣu vijātīyamatanmayam || 379 ||
[Analyze grammar]

naiva praveśayetsaṃvitsaṅkocananibandhanam |
yāvantyeva śarīrāṇi svāṅgavatsyuḥ sunirbharām || 380 ||
[Analyze grammar]

ekāṃ saṃvidamāviśya cakre tāvanti pūjayet |
praviṣṭaścetpramādena saṅkocaṃ na vrajettataḥ || 381 ||
[Analyze grammar]

prastutaṃ svasamācāraṃ tena sākaṃ samācaret |
sa tvanugrahaśaktyā cedviddhastattanmayībhavet || 382 ||
[Analyze grammar]

vāmāviddhastu tannindetpaścāttaṃ ghātayedapi |
śrīmatpicumate coktamādau yatnena rakṣayet || 383 ||
[Analyze grammar]

praveśaṃ saṃpaviṣṭasya na vicāraṃ tu kārayet |
lokācārasthito yastu praviṣṭe tādṛśe tu saḥ || 384 ||
[Analyze grammar]

akṛtvā taṃ samācāraṃ punaścakraṃ prapūjayet |
atha vacmi guroḥ śāstravyākhyākramamudāhṛtam || 385 ||
[Analyze grammar]

devyāyāmalaśāstrādau tuhinābhīśumaulinā |
kalpavittatsamūhajñaḥ śāstravitsaṃhitārthavit || 386 ||
[Analyze grammar]

sarvaśāstrārthavicceti gururbhinno'padiśyate |
yo yatra śāstre svabhyastajñāno vyākhyāṃ carettu saḥ || 387 ||
[Analyze grammar]

nānyathā tadabhāvaścetsarvathā so'pyathācaret |
śrībhairavakule coktaṃ kalpādijñatvamīdṛśam || 388 ||
[Analyze grammar]

gurorlakṣaṇametāvatsaṃpūrṇajñānataiva yā |
tatrāpi yāsya cidvṛttikarmibhit sāpyavāntarā || 389 ||
[Analyze grammar]

devyāyāmala uktaṃ taddvāpañcāśāhva āhnike |
deva eva gurutvena tiṣṭhāsurdaśadhā bhavet || 390 ||
[Analyze grammar]

ucchuṣmaśavaracaṇḍagumataṅgaghorāntakograhalahalakāḥ |
krodhī huluhulurete daśa guravaḥ śivamayāḥ pūrve || 391 ||
[Analyze grammar]

te svāṃśacittavṛttikrameṇa pauruṣaśarīramāsthāya |
anyonyabhinnasaṃvitkriyā api jñānaparipūrṇāḥ || 392 ||
[Analyze grammar]

sarve'limāṃsanidhuvanadīkṣārcanaśāstrasevane niratāḥ |
abhimānaśamakrodhakṣamādiravāntaro bhedaḥ || 393 ||
[Analyze grammar]

itthaṃ vijñāya sadā śiṣyaḥ sampūrṇaśāstraboddhāram |
vyākhyāyai gurumabhyarthayeta pūjāpuraḥsaraṃ matimān || 394 ||
[Analyze grammar]

so'pi svaśāsanīye paraśiṣye'pivāpi tādṛśaṃ śāstram |
śrotuṃ yogye kuryādvyākhyānaṃ vaiṣṇavādyadhare || 395 ||
[Analyze grammar]

karuṇārasaparipūrṇo guruḥ punarmarmadhāmaparivarjam |
adhame'pi hi vyākuryātsambhāvya hi śaktipātavaicitryam || 396 ||
[Analyze grammar]

liptāyāṃ bhuvi pīṭhe caturasre paṅkajatrayaṃ kajage |
kuryādvidyāpīṭhaṃ syādrasavahnyaṅgulaṃ tvetat || 397 ||
[Analyze grammar]

madhye vāgīśānīṃ dakṣottarayorgurūngaṇeśaṃ ca |
adhare kaje ca kalpeśvaraṃ prapūjyārghapuṣpatarpaṇakaiḥ || 398 ||
[Analyze grammar]

sāmānyavidhiniyuktārghapātrayogena cakramatha samyak |
santarpya vyākhyānaṃ kuryātsambandhapūrvakaṃ matimān || 399 ||
[Analyze grammar]

sūtrapadavākyapaṭalagranthakramayojanena sambandhāt |
avyāhatapūrvāparamupavṛhya nayeta vākyāni || 400 ||
[Analyze grammar]

maṇḍūkaplavasiṃhāvalokanādyairyathāyathaṃ nyāyaiḥ |
avihatapūrvāparakaṃ śāstrārthaṃ yojayedasaṅkīrṇam || 401 ||
[Analyze grammar]

tantrāvartanabādhaprasaṅgatarkādibhiśca sannyāyaiḥ |
vastu vadedvākyajño vastvantarato viviktatāṃ vidadhat || 402 ||
[Analyze grammar]

yadyadvyāhṛtipadavīmāyāti tadeva dṛḍhatarairnyāyaiḥ |
balavatkuryāddūṣyaṃ yadyapyagre bhaviṣyatsyāt || 403 ||
[Analyze grammar]

dṛḍharacitapūrvapakṣaproddharaṇapathena vastu yadvācyam |
śiṣyamatāvārohati tadāśu saṃśayaviparyayairvikalam || 404 ||
[Analyze grammar]

bhāṣā nyāyo vādo layaḥ kramo yadyadeti śiṣyasya |
sambodhopāyatvaṃ tathaiva gururāśrayedvyākhyām || 405 ||
[Analyze grammar]

vācyaṃ vastu samāpya pratarpaṇaṃ pūjanaṃ bhaveccakre |
punaraparaṃ vastu vadetpaṭalādūrdhvaṃ tu no jalpet || 406 ||
[Analyze grammar]

vyākhyānte kṣamayitvā visṛjya sarvaṃ kṣipedagādhajale |
śāstrādimadhyanidhane viśeṣataḥ pūjanaṃ kuryāt || 407 ||
[Analyze grammar]

viśeṣapūjanaṃ kuryātsamayebhyaśca niṣkṛtau |
avikalpamaterna syuḥ prāyaścittāni yadyapi || 408 ||
[Analyze grammar]

tathāpyatattvavidvargānugrahāya tathā caret |
śrīpicau ca smṛtereva pāpaghnatve kathaṃ vibho || 409 ||
[Analyze grammar]

prāyaścittavidhiḥ prokta iti devyā pracodite |
satyaṃ smaraṇameveha sakṛjjaptaṃ vimocayet || 410 ||
[Analyze grammar]

sarvasmātkarmaṇo jālātsmṛtitattvakalāvidaḥ |
tathāpi sthitirakṣārthaṃ kartavyaścodito vidhiḥ || 411 ||
[Analyze grammar]

atattvavedino ye hi caryāmātraikaniṣṭhitāḥ |
teṣāṃ dolāyite citte jñānahāniḥ prajāyate || 412 ||
[Analyze grammar]

tasmādvikalparahitaḥ saṃvṛtyuparato yadi |
śāstracaryāsadāyattaiḥ saṅkaraṃ tadvivarjayet || 413 ||
[Analyze grammar]

saṅkaraṃ vā samanvicchetprāyaścittaṃ samācaret |
yathā teṣāṃ na śāstrārthe dolārūḍhā matirbhavet || 414 ||
[Analyze grammar]

yatsvayaṃ śivahastākhye vidhau saṃcoditaṃ purā |
śataṃ japtvāsya cāstrasya mucyate strīvadhādṛte || 415 ||
[Analyze grammar]

śaktināśānmahādoṣo narakaṃ śāśvataṃ priye |
iti śrīratnamālāyāṃ samayollaṅghane kṛte || 416 ||
[Analyze grammar]

kulajānāṃ samākhyātā niṣkṛtirduṣṭakartarī |
śrīpūrve samayānāṃ tu śodhanāyoditaṃ yathā || 417 ||
[Analyze grammar]

mālinī mātṛkā vāpi japyā lakṣatrayāntakam |
pratiṣṭhitasya pūrāderdarśane'nadhikāriṇā || 418 ||
[Analyze grammar]

prāyaścittaṃ prakartavyamiti śrībrahmayāmale |
brahmaghno gurutalpastho vīradravyaharastathā || 419 ||
[Analyze grammar]

devadravyahṛdākāraprahartā liṅgabhedakaḥ |
nityādilopakṛdbhraṣṭasvakamātrāparicchadaḥ || 420 ||
[Analyze grammar]

śaktivyaṅgatvakṛdyogijñānihantā vilopakaḥ |
naimittikānāṃ lakṣādikramāddvidviguṇaṃ japet || 421 ||
[Analyze grammar]

vratena kenacidyukto mitabhugbrahmacaryavān |
dūtīparigrahe'nyatra gataścetkāmamohitaḥ || 422 ||
[Analyze grammar]

lakṣajāpaṃ tataḥ kuryādityuktaṃ brahmayāmale |
dīkṣābhiṣekanaimittavidhyante gurupūjanam || 423 ||
[Analyze grammar]

aparedyuḥ sadā kāryaṃ siddhayogīśvarīmate |
pūrvoktalakṣaṇopetaḥ kavistrikasatattvavit || 424 ||
[Analyze grammar]

sa guruḥ sarvadā grāhyastyaktvānyaṃ tatsthitaṃ tvapi |
maṇḍale svastikaṃ kṛtvā tatra haimādikāsanam || 425 ||
[Analyze grammar]

kṛtvārcayeta tatrasthamadhvānaṃ sakalāntakam |
tato vijñapayedbhaktyā tadadhiṣṭhitaye gurum || 426 ||
[Analyze grammar]

sa tatra pūjyaḥ svairmantraiḥ puṣpadhūpārghavistaraiḥ |
samālambhanasadvastrairnaivedyaistarpaṇaiḥ kramāt || 427 ||
[Analyze grammar]

āśāntaṃ pūjayitvainaṃ dakṣiṇābhiryajecchiśuḥ |
sarvasvamasmai saṃdadyādātmānamapi bhāvitaḥ || 428 ||
[Analyze grammar]

atoṣayitvā tu guruṃ dakṣiṇābhiḥ samantataḥ |
tattvajño'pyṛṇabandhena tena yātyadhikāritām || 429 ||
[Analyze grammar]

gurupūjāmakurvāṇaḥ śataṃ janmāni jāyate |
adhikārī tato muktiṃ yātīti skandayāmale || 430 ||
[Analyze grammar]

tasmādavaśyaṃ dātavyā gurave dakṣiṇā punaḥ |
pūrvaṃ hi yāgāṅgatayā proktaṃ tattuṣṭaye tvidam || 431 ||
[Analyze grammar]

tajjuṣṭamatha tasyājñāṃ prāpyāśnīyātsvayaṃ śiśuḥ |
tataḥ prapūjayeccakraṃ yathāvibhavasambhavam || 432 ||
[Analyze grammar]

akṛtvā guruyāgaṃ tu kṛtamapyakṛtaṃ yataḥ |
tasmātprayatnataḥ kāryo guruyāgo yathābalam || 433 ||
[Analyze grammar]

atatrastho'pi hi guruḥ pūjyaḥ saṃkalpya pūrvavat |
taddravyaṃ devatākṛtye kuryādbhaktajaneṣvatha || 434 ||
[Analyze grammar]

parvapavitraprabhṛtiprabhedi naimittikaṃ tvidaṃ karma || 435 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Tantraloka aṣṭāviṃśamāhnikam

Cover of edition (2015)

Sri Tantraloka
by Satya Prakash Singh & Swami Maheshvarananda (2015)

The Only Complete Edition with Sanskrit Text and English Translation (Set of 9 Volumes); 9788187471868; [Standard Publishers India]

Buy now!
Cover of edition (2000)

Sri Tantraloka (Set of 8 Volumes)
by Paramahansa Mishra (2000)

[श्री तन्त्रालोकः (संस्कृत एवं हिंदी अनुवाद)] Sanskrit Text with Hindi Translation; Published by Sampurnanand Sanskrit University; With two commentaries: Viveka (विवेक) by Ācārya Śrī Jayaratha and Nīrakṣīraviveka (नीरक्षीरविवेक) by Paramhans Mishra.

Buy now!
Cover of edition (2002)

Tantraloka of Abhinavagupta (with Jnanavati Hindi commentary)
by Radheshyam Chaturvedi (2002)

[आचार्य अभिनवगुप्त द्वारा रचित तंत्रलोक: संस्कृत एवम् हिन्दी अनुवाद (पाँच खंडों में)] Sanskrit Text with Hindi Translation and Commentary; Published by Chaukhambha Vidya Bhawan.

Buy now!
Cover of edition (2018)

Sri Tantraloka of Abhinavagupta
by Giriratna Misra (2018)

With Viveka Saṃskṛta Commentary by Rājānaka Jayaratha; Sanskrit Text, Transliteration, Sarveshwari English commentary; With Glossary and Central Idea of Each Śloka; Published by Chaukhamba Surbharati Prakashan

Buy now!
Like what you read? Consider supporting this website: