Book 23 - trayoviṃśatitamamāhnikam

atha śrītantrāloke trayoviṃśatitamamāhnikam |
athābhiṣekasya vidhiḥ kathyate pārameśvaraḥ || 1 ||
[Analyze grammar]

yaiṣā putrakadīkṣoktā gurusādhakayorapi |
saivādhikāriṇī bhogyatattvayuktimatī kramāt || 2 ||
[Analyze grammar]

svabhyastajñāninaṃ santaṃ bubhūṣumatha bhāvinam |
yogyaṃ jñātvā svādhikāraṃ gurustasmai samarpayet || 3 ||
[Analyze grammar]

yo naivaṃ veda naivāsāvabhiṣikto'pi daiśikaḥ |
samayyādikrameṇeti śrīmatkāmika ucyate || 4 ||
[Analyze grammar]

yo na vedādhvasandhānaṃ ṣoḍhā bāhyāntarasthitam |
sa gururmocayenneti siddhayogīśvarīmate || 5 ||
[Analyze grammar]

sarvalakṣaṇahīno'pi jñānavān gururiṣyate |
jñānaprādhānyamevoktamiti śrīkacabhārgave || 6 ||
[Analyze grammar]

padavākyapramāṇajñaḥ śivabhaktyekatatparaḥ |
samastaśivaśāstrārthaboddhā kāruṇiko guruḥ || 7 ||
[Analyze grammar]

na svayaṃbhūstasya coktaṃ lakṣaṇaṃ parameśinā |
abhakto jīvitadhiyā kurvannīśānadhiṣṭhitaḥ || 8 ||
[Analyze grammar]

paścātmanā svayaṃbhūṣṇurnādhikārī sa kutracit |
bhasmāṅkuro vratisuto duḥśīlātanayastathā || 9 ||
[Analyze grammar]

kuṇḍo golaśca te duṣṭā uktaṃ devyākhyayāmale |
punarbhūścānyaliṅgo yaḥ punaḥ śaive pratiṣṭhitaḥ || 10 ||
[Analyze grammar]

śrīpūrvaśāstre na tveṣa niyamaḥ ko'pi coditaḥ |
yathārthatattvasaṃghajñastathā śiṣye prakāśakaḥ || 11 ||
[Analyze grammar]

yaḥ punaḥ sarvatattvāni vettītyādi ca lakṣaṇam |
yogacāre ca yadyatra tantre coditamācaret || 12 ||
[Analyze grammar]

tathaiva siddhaye seyamājñeti kila varṇitam |
yastu karmitayācāryastatra kāṇādivarjanam || 13 ||
[Analyze grammar]

yataḥ kārakasāmagryātkarmaṇo nādhikaḥ kvacit |
devyā yāmalaśāstre ca kāñcyādiparivarjanam || 14 ||
[Analyze grammar]

taddṛṣṭadoṣātkrodhādeḥ samyakjñātaryasau kutaḥ |
guravastu svayaṃbhvādi varjyaṃ yadyāmalādiṣu || 15 ||
[Analyze grammar]

karmyabhiprāyataḥ sarvaṃ taditi vyācacakṣire |
ato deśakulācāradehalakṣaṇakalpanām || 16 ||
[Analyze grammar]

anādṛtyaiva saṃpūrṇajñānaṃ kuryādgururgurum |
prāgvatsaṃpūjya hutvā ca śrāvayitvā cikīrṣitam || 17 ||
[Analyze grammar]

tato'bhiṣiñcettaṃ śiṣyaṃ catuḥṣaṣṭyā tataḥ sakṛt |
tanmantrarasatoyena pūrvoktavidhinā guruḥ || 18 ||
[Analyze grammar]

vibhavena suvistīrṇaṃ tatastasmai vadetsvakam |
sarvaṃ kartavyasāraṃ yacchāstrāṇāṃ paramaṃ rahaḥ || 19 ||
[Analyze grammar]

anugrāhyāstvayā śiṣyāḥ śivaśaktipracoditāḥ |
uktaṃ jñānottare caitadbrāhmaṇāḥ kṣatriyā viśaḥ || 20 ||
[Analyze grammar]

napuṃsakāḥ striyaḥ śūdrā ye cānye'pi tadarthinaḥ |
te dīkṣāyāṃ na mīmāṃsyā jñānakāle vicārayet || 21 ||
[Analyze grammar]

jñānamūlo guruḥ proktaḥ saptasatrīṃ pravartayet |
dīkṣā vyākhyā kṛpā maitrī śāstracintā śivaikatā || 22 ||
[Analyze grammar]

annādidānamityetatpālayetsaptasatrakam |
abhiṣekavidhau cāsmai karaṇīkhaṭikādikam || 23 ||
[Analyze grammar]

sarvopakaraṇavrātamarpaṇīyaṃ vipaścite |
so'bhiṣikto guruṃ paścāddakṣiṇābhiḥ prapūjayet || 24 ||
[Analyze grammar]

jñānahīno guruḥ karmī svādhikāraṃ samarpya no |
dīkṣādyadhikṛtiṃ kuryādvinā tasyājñayā punaḥ || 25 ||
[Analyze grammar]

ityevaṃ śrāvayetso'pi namaskṛtyābhinandayet |
tataḥ prabhṛtyasau pūrvo gurustyaktādhikārakaḥ || 26 ||
[Analyze grammar]

yathecchaṃ vicaredvyākhyādīkṣādau yantraṇojjhitaḥ |
kurvanna bādhyate yasmāddīpāddīpavadīdṛśaḥ || 27 ||
[Analyze grammar]

santāno nādhikārasya cyavo'kurvanna bādhyate |
prāk ca kurvanvihanyeta siddhātantre taducyate || 28 ||
[Analyze grammar]

yathārthamupadeśaṃ tu kurvannācārya ucyate |
na cāvajñā kriyākāle saṃsāroddharaṇaṃ prati || 29 ||
[Analyze grammar]

na dīkṣeta guruḥ śiṣyaṃ tattvayuktastu garvataḥ |
yo'sya syānnarake vāsa iha ca vyādhito bhavet || 30 ||
[Analyze grammar]

prāptābhiṣekaḥ sa guruḥ ṣaṇmāsānmantrapaddhatim |
sarvāṃ tantroditāṃ dhyāyejjapeccātanmayatvataḥ || 31 ||
[Analyze grammar]

yadaiva tanmayībhūtastadā vīryamupāgataḥ |
chindyātpāśāṃstato yatnaṃ kuryāttanmayatāsthitau || 32 ||
[Analyze grammar]

hṛccakrādutthitā sūkṣmā śaśisphaṭikasaṃnibhā |
lekhākārā nādarūpā praśāntā cakrapaṅktigā || 33 ||
[Analyze grammar]

dvādaśānte nirūḍhā sā sauṣumne tripathāntare |
tatra hṛccakramāpūrya japenmantraṃ jvalatprabham || 34 ||
[Analyze grammar]

cakṣurlomādirandhraughavahajjvālaurvasaṃnibham |
yāvacchāntaśikhākīrṇaṃ viśvājyapravilāpakam || 35 ||
[Analyze grammar]

tadājyadhārāsaṃtṛptamānābhikuharāntaram |
evaṃ mantrā mokṣadāḥ syurdīptā buddhāḥ sunirmalāḥ || 36 ||
[Analyze grammar]

mūlakandanabhonābhihṛtkaṇṭhālikatālugam |
ardhendurodhikānādatadantavyāpiśaktigam || 37 ||
[Analyze grammar]

samanonmanaśuddhātmaparacakrasamāśritam |
yatra yatra japeccakre samastavyastabhedanāt || 38 ||
[Analyze grammar]

tatra tatra mahāmantra iti devyākhyayāmale |
vidyāvratamidaṃ proktaṃ mantravīryaprasiddhaye || 39 ||
[Analyze grammar]

tacca tādātmyameveti yaduktaṃ spandaśāsane |
tadākramya balaṃ mantrāḥ sarvajñabalaśālinaḥ || 40 ||
[Analyze grammar]

pravartante'dhikārāya karaṇānīva dehinām |
kṛtavidyāvrataḥ paścāddīkṣāvyākhyādi sarvataḥ || 41 ||
[Analyze grammar]

kuryādyogyeṣu śiṣyeṣu nāyogyeṣu kadācana |
rahasye yojayedvipraṃ parīkṣya viparītataḥ || 42 ||
[Analyze grammar]

ācārācchaktimapyeva nānyathetyūrmiśāsane |
nityādyalpālpakaṃ kuryādyaduktaṃ brahmayāmale || 43 ||
[Analyze grammar]

cīrṇavidyāvrataḥ sarvaṃ manasā vā smaretpriye |
dehasaṃbandhasaṃchannasārvajñyo dambhabhājanam || 44 ||
[Analyze grammar]

avidandīkṣamāṇo'pi na duṣyeddaiśikaḥ kvacit |
jñātvā tvayogyatāṃ nainaṃ dīkṣeta pratyavāyitām || 45 ||
[Analyze grammar]

buddhvā jñāne śāstrasiddhigurutvādau ca taṃ punaḥ |
bhūya eva parīkṣeta tattadaucityaśālinam || 46 ||
[Analyze grammar]

tatra tatra niyuñjīta natu jātu viparyayāt |
nanu tadvastvayogyasya tatrecchā jāyate kutaḥ || 47 ||
[Analyze grammar]

tadīśādhiṣṭhitecchaiva yogyatāmasya sūcayet |
satyaṃ kāpi prabuddhāsāvicchā rūḍhiṃ na gacchati || 48 ||
[Analyze grammar]

vidyudvatpāpaśīlasya yathā pāpāpavarjane |
rūḍhyarūḍhī tadicchāyā api śaṃbhuprasādataḥ || 49 ||
[Analyze grammar]

aprarūḍhatathecchākastata eva na bhājanam |
yaḥ samyagjñānamādāya guruviśvāsavarjitaḥ || 50 ||
[Analyze grammar]

lokaṃ viplāvayennāsmiñjñāte vijñānamarpayet |
ajñāte'pi punarjñāte vijñānaharaṇaṃ caret || 51 ||
[Analyze grammar]

punaḥpunaryadā jñāto viśvāsaparivarjitaḥ |
tadā tamagrato dhyāyetsphurantaṃ candrasūryavat || 52 ||
[Analyze grammar]

tato nijahṛdambhojabodhāmbarataloditām |
svarbhānumalināṃ dhyāyedvāmāṃ śaktiṃ vimohanīm || 53 ||
[Analyze grammar]

vāmācārakrameṇaināṃ niḥsṛtāṃ sādhyagāminīm |
cintayitvā tayā grastaprakāśaṃ taṃ vicintayet || 54 ||
[Analyze grammar]

anena kramayogena mūḍhabuddherdurātmanaḥ |
vijñānamantravidyādyāḥ prakurvantyapakāritām || 55 ||
[Analyze grammar]

nanu vijñānamātmasthaṃ kathaṃ hartuṃ kṣamaṃ bhavet |
ato vijñānaharaṇaṃ kathaṃ śrīpūrva ucyate || 56 ||
[Analyze grammar]

ucyate nāsya śiṣyasya vijñānaṃ rūḍhimāgatam |
tathātve haraṇaṃ kasmātpūrṇayogyatvaśālinaḥ || 57 ||
[Analyze grammar]

kiṃtveṣa vāmayā śaktyā mūḍho gāḍhaṃ vibhoḥ kṛtaḥ |
svabhāvādeva tenāsya vidyādyamapakārakam || 58 ||
[Analyze grammar]

guruḥ punaḥ śivābhinnaḥ sanyaḥ pañcavidhāṃ kṛtim |
kuryādyadi tataḥ pūrṇamadhikāritvamasya tat || 59 ||
[Analyze grammar]

ato yathā śuddhatattvasṛṣṭisthityormalātyaye |
yojanānugrahe kāryacatuṣke'dhikṛto guruḥ || 60 ||
[Analyze grammar]

śivābhedena tatkuryāttadvatpañcamamapyayam |
tirobhāvābhidhaṃ kṛtyaṃ tathāsau śivatātmakaḥ || 61 ||
[Analyze grammar]

ata eva śive śāstre jñāne cāśvāsabhājanam |
gurormūḍhatayā kopadhāmāpi na tirohitaḥ || 62 ||
[Analyze grammar]

gururhi kupito yasya sa tirohita ucyate |
saṃsārī satu devo hi gururna ca mṛṣāvidaḥ || 63 ||
[Analyze grammar]

tata eva ca śāstrādidūṣako yadyapi krudhā |
na dahyate'sau guruṇā tathāpyeṣa tirohitaḥ || 64 ||
[Analyze grammar]

asmadgurvāgamastveṣa tirobhūte svayaṃ śiśau |
na kupyenna śapeddhīmān sa hyanugrāhakaḥ sadā || 65 ||
[Analyze grammar]

īśecchācoditaḥ pāśaṃ yadi kaṇṭhe nipīḍayet |
kimācāryeṇa tatrāsya kāryā syātsahakāritā || 66 ||
[Analyze grammar]

śivābhinno'pi hi gururanugrahamayīṃ vibhoḥ |
mukhyāṃ śaktimupāsīno'nugṛhṇīyātsa sarvathā || 67 ||
[Analyze grammar]

svātantryamātrajñaptyai tu kathitaṃ śāstra īdṛśam |
na kāryaṃ patatāṃ hastālambaḥ sahyo na pātanam || 68 ||
[Analyze grammar]

ata eva svatantratvādicchāyāḥ punarunmukham |
prāyaścittairviśodhyainaṃ dīkṣeta kṛpayā guruḥ || 69 ||
[Analyze grammar]

ūrdhvadṛṣṭau prapannaḥ sannanāśvastastataḥ param |
adhaḥśāstraṃ prapadyāpi na śreyaḥpātratāmiyāt || 70 ||
[Analyze grammar]

adhodṛṣṭau prapannastu tadanāśvastamānasaḥ |
ūrdhvaśāsanabhāk pāpaṃ taccojjhecca śivībhavet || 71 ||
[Analyze grammar]

rājñe druhyannamātyāṅgabhūto'pi hi vihanyate |
viparyayastu netyevamūrdhvāṃ dṛṣṭiṃ samāśrayet || 72 ||
[Analyze grammar]

śrīpūrvaśāstre tenoktaṃ yāvattenaiva noddhṛtaḥ |
atra hyartho'yametāvatpūrvoktajñānavṛṃhitaḥ || 73 ||
[Analyze grammar]

gurustāvatsa evātra tacchabdenāvamṛśyate |
tādṛksvabhyastavijñānabhājordhvapadaśālinā || 74 ||
[Analyze grammar]

anuddhṛtasya na śreya etadanyagurūddhṛteḥ |
ata evāmbujanmārkadṛṣṭānto'tra nirūpitaḥ || 75 ||
[Analyze grammar]

trijagajjyotiṣo hyanyattejo'nyacca niśākṛtaḥ |
jñānamanyattrikaguroranyattvadharavartinām || 76 ||
[Analyze grammar]

ata eva purābhūtagurvabhāvo yadā tadā |
tadanyaṃ lakṣaṇopetamāśrayetpunarunmukhaḥ || 77 ||
[Analyze grammar]

sati tasmiṃstūnmukhaḥ sankasmājjahyādyadi sphuṭam |
syādanyatarago doṣo yo'dhikārāpaghātakaḥ || 78 ||
[Analyze grammar]

doṣaśceha na lokastho doṣatvena nirūpyate |
ajñānakhyāpanāyuktakhyāpanātmā tvasau mataḥ || 79 ||
[Analyze grammar]

śiṣyasyāpi tathābhūtajñānānāśvastarūpatā |
mukhyo doṣastadanye hi doṣāstatprabhavā yataḥ || 80 ||
[Analyze grammar]

na dhvastavyādhikaḥ ko hi bhiṣajaṃ bahu manyate |
asūyurnūnamadhvastavyādhiḥ svasthāyate balāt || 81 ||
[Analyze grammar]

evaṃ jñānasamāśvastaḥ kiṃ kiṃ na gurave caret |
no cennūnamaviśvasto viśvasta iva tiṣṭhati || 82 ||
[Analyze grammar]

ajñānādaya evaite doṣā na laukikā guroḥ |
iti khyāpayituṃ proktaṃ mālinīvijayottare || 83 ||
[Analyze grammar]

na tasyānveṣayedvṛttaṃ śubhaṃ vā yadi vāśubham |
sa eva tadvijānāti yuktaṃ cāyuktameva vā || 84 ||
[Analyze grammar]

akāryeṣu yadā saktaḥ prāṇadravyāpahāriṣu |
tadā nivāraṇīyo'sau praṇatena vipaścitā || 85 ||
[Analyze grammar]

viśeṣaṇamakāryāṇāmuktābhiprāyameva yat |
tenātivāryamāṇo'pi yadyasau na nivartate || 86 ||
[Analyze grammar]

tadānyatra kvacidgatvā śivamevānucintayet |
na hyasya sa gurutve syāddoṣo yenoṣare kṛṣim || 87 ||
[Analyze grammar]

kuryādvrajenniśāyāṃ vā sa tvarthaprāṇahārakaḥ |
tadīyāpriyabhīrustu paraṃ tādṛśamācaret || 88 ||
[Analyze grammar]

yatastadapriyaṃ naiṣa śṛṇuyāditi bhāṣitam |
śrīmātaṅge taduktaṃ ca nādhītaṃ bhūmabhītitaḥ || 89 ||
[Analyze grammar]

yaccaitaduktametāvatkartavyamiti taddhruvam |
tīvraśaktigṛhītānāṃ svayameva hṛdi sphuret || 90 ||
[Analyze grammar]

upadeśastvayaṃ mandamadhyaśakternijāṃ kramāt |
śaktiṃ jvalayituṃ proktaḥ sā hyevaṃ jājvalītyalam || 91 ||
[Analyze grammar]

dṛḍhānurāgasubhagasaṃrambhābhogabhāginaḥ |
svollāsi smarasarvasyaṃ dārḍhyāyānyatra dṛśyate || 92 ||
[Analyze grammar]

nanveṣa kasmāddṛṣṭāntaḥ kimetenāśubhaṃ kṛtam |
citspandaḥ sarvago bhinnādupādheḥ sa tathā tathā || 93 ||
[Analyze grammar]

bhavetko'pi tirobhūtaḥ punarunmukhito'pi san |
vināpi daiśikātprāgvatsvayameva vimucyate || 94 ||
[Analyze grammar]

prakārastveṣa nātroktaḥ śaktipātabalādgataḥ |
asaṃbhāvyatayā cātra dṛḍhakopaprasādavat || 95 ||
[Analyze grammar]

ityeṣa yo guroḥ prokto vidhistaṃ pālayedguruḥ |
anyathā na śivaṃ yāyācchrīmatsāre ca varṇitam || 96 ||
[Analyze grammar]

anyāyaṃ ye prakurvanti śāstrārthaṃ varjayantyalam |
te'rdhanārīśapuragā guravaḥ samayacyutāḥ || 97 ||
[Analyze grammar]

anyatrāpyadhikāraṃ ca neyādvidyeśatāṃ vrajet |
anyatra samayatyāgātkravyādatvaṃ śataṃ samāḥ || 98 ||
[Analyze grammar]

iyattatratyatātparyaṃ siddhāntagururunnayaḥ |
bhavetpiśācavidyeśaḥ śuddha eva tu tāntrikaḥ || 99 ||
[Analyze grammar]

ṣaḍardhadaiśikaścārdhanārīśabhuvanasthitiḥ |
eṣā karmapradhānānāṃ gurūṇāṃ gatirucyate || 100 ||
[Analyze grammar]

jñānināṃ caiṣa no bandha iti sarvatra varṇitam |
sādhakasyābhiṣeke'pi sarvo'yaṃ kathyate vidhiḥ || 101 ||
[Analyze grammar]

adhikārārpaṇaṃ nātra naca vidyāvrataṃ kila |
sādhyamantrārpaṇaṃ tvatra svopayogikriyākrame || 102 ||
[Analyze grammar]

samaste'pyupadeśaḥ syānnijopakaraṇārpaṇam |
abhiṣekavidhirnirūpitaḥ parameśena yathā nirūpitaḥ || 103 ||
[Analyze grammar]