Book 17 - saptadaśamāhnikam

atha śrītantrāloke saptadaśamāhnikam |
atha bhairavatādātmyadāyinīṃ prakriyāṃ bruve |
evaṃ maṇḍalakumbhāgniśiṣyasvātmasu pañcasu || 1 ||
[Analyze grammar]

gṛhītvā vyāptimaikyena nyasyādhvānaṃ ca śiṣyagam |
karmamāyāṇumalinatrayaṃ bāhau gale tathā || 2 ||
[Analyze grammar]

śikhāyāṃ ca kṣipetsūtragranthiyogena daiśikaḥ |
tasyātadrūpatābhānaṃ malo granthiḥ sa kīrtyate || 3 ||
[Analyze grammar]

itipratītidārḍhyārthaṃ bahirgranthyupakalpanam |
bāhū karmāspadaṃ viṣṇurmāyātmā galasaṃśritaḥ || 4 ||
[Analyze grammar]

adhovahā śikhāṇutvaṃ tenetthaṃ kalpanā kṛtā |
naraśaktiśivākhyasya trayasya bahubhedatām || 5 ||
[Analyze grammar]

vaktuṃ tristriguṇaṃ sūtraṃ granthaye parikalpayet |
tejojalānnatritayaṃ tredhā pratyekamapyadaḥ || 6 ||
[Analyze grammar]

śrutyante ke'pyataḥ śuklakṛṣṇaraktaṃ prapedire |
tato'gnau tarpitāśeṣamantre cidvyomamātrake || 7 ||
[Analyze grammar]

sāmānyarūpe tattvānāṃ kramācchuddhiṃ samācaret |
tatra svamantrayogena dharāmāvāhayetpurā || 8 ||
[Analyze grammar]

iṣṭvā puṣpādibhiḥ sarpistilādyairatha tarpayet |
tattattvavyāpikāṃ paścānmāyātattvādhidevatām || 9 ||
[Analyze grammar]

māyāśaktiṃ svamantreṇāvāhyābhyarcya pratarpayet |
āvāhane mātṛkārṇaṃ mālinyarṇaṃ ca pūjane || 10 ||
[Analyze grammar]

kuryāditi guruḥ prāha svarūpāpyāyanadvayāt |
tāro varṇo'tha saṃbuddhipadaṃ tvāmityataḥ param || 11 ||
[Analyze grammar]

uttamaikayutaṃ karmapadaṃ dīpakamapyataḥ |
tabhyaṃ nāma caturthyantaṃ tato'pyucitadīpakam || 12 ||
[Analyze grammar]

ityūhamantrayogena tattatkarma pravartayet |
āvāhanānantaraṃ hi karma sarvaṃ nigadyate || 13 ||
[Analyze grammar]

āvāhanaṃ ca saṃbodhaḥ svasvabhāvavyavasthiteḥ |
bhāvasyāhaṃmayasvātmatādātmyāveśyamānatā || 14 ||
[Analyze grammar]

śāktī bhūmiśca saivoktā yasyāṃ mukhyāsti pūjyatā |
abhātatvādabhedācca nahyasau nṛśivātmanoḥ || 15 ||
[Analyze grammar]

jaḍābhāseṣu tattveṣu saṃvitsthityai tato guruḥ |
āvāhanavibhaktiṃ prāk kṛtvā turyavibhaktitaḥ || 16 ||
[Analyze grammar]

namaskārāntatāyogātpūrṇāṃ sattāṃ prakalpayet |
tataḥ pūrṇasvabhāvatvaṃ tadrūpodrekayogataḥ || 17 ||
[Analyze grammar]

dhyeyodreko bhaveddhyātṛprahvībhāvavaśādyataḥ |
āvāhyeṣṭvā pratarpyeti śrīsvacchande nirūpitam || 18 ||
[Analyze grammar]

anenaiva pathāneyamityasmadguravo jaguḥ |
paratvena tu yatpūjyaṃ tatsvatantracidātmakam || 19 ||
[Analyze grammar]

anavacchitprakāśatvānna prakāśyaṃ tu kutracit |
tasya hyetatprapūjyatvadhyeyatvādi yadullaset || 20 ||
[Analyze grammar]

tasyaiva tatsvatantratvaṃ yātidurghaṭakāritā |
saṃbodharūpe tattasmin kathaṃ saṃbodhanā bhavet || 21 ||
[Analyze grammar]

prakāśanāyāṃ na syātprakāśasya prakāśatā |
saṃbodhanavibhaktyaiva vinā karmādiśaktitām || 22 ||
[Analyze grammar]

svātantryāttaṃ darśayituṃ tatrohamimamācaret |
devamāvāhayāmīti tato devāya dīpakam || 23 ||
[Analyze grammar]

prāgyuktyā pūrṇatādāyi namaḥsvāhādikaṃ bhavet |
nutiḥ pūrṇatvamagnīndusaṃghaṭṭāpyāyatā param || 24 ||
[Analyze grammar]

āpyāyakaṃ ca procchālaṃ vauṣaḍādi pradīpayet |
tatra bāhye'pi tādātmyaprasiddhaṃ karma codyate || 25 ||
[Analyze grammar]

yadi karmapadaṃ tanno gururabhyūhayetkvacit |
anābhāsitatadvastubhāsanāya niyujyate || 26 ||
[Analyze grammar]

mantraḥ kiṃ tena tatra syātsphuṭaṃ yatrāvabhāsi tat |
tena prokṣaṇasaṃsekajapādividhiṣu dhruvam || 27 ||
[Analyze grammar]

tatkarmābhyūhanaṃ kuryātpratyuta vyavadhātṛtām |
bahistathātmatābhāve kāryaṃ karmapadohanam || 28 ||
[Analyze grammar]

tṛptāvāhutihutabhukpāśaploṣacchidādiṣu |
yatroddiṣṭe vidhau paścāttadanantaiḥ kriyātmakaiḥ || 29 ||
[Analyze grammar]

aṃśaiḥ sādhyaṃ na tatroho dīkṣaṇādividhiṣviva |
tataḥ śiṣyasya tattattvasthāne'streṇa pratāḍanam || 30 ||
[Analyze grammar]

kṛtvātha śivahastena hṛdayaṃ parimarśayet |
tataḥ svanāḍīmārgeṇa hṛdayaṃ prāpya vai śiśoḥ || 31 ||
[Analyze grammar]

śiṣyātmanā sahaikatvaṃ gatvādāya ca taṃ hṛdā |
puṭitaṃ haṃsarūpākhyaṃ tatra saṃhāramudrayā || 32 ||
[Analyze grammar]

kuryādātmīyahṛdayasthitamapyavabhāsakam |
śiṣyadehasya tejobhī raśmimātrāviyogataḥ || 33 ||
[Analyze grammar]

svabandhasthānacalanāt svatantrasthānalābhataḥ |
svakarmāparatantratvātsarvatrotpattimarhati || 34 ||
[Analyze grammar]

tenātmahṛdayānītaṃ prākkṛtvā pudgalaṃ tataḥ |
māyāyāṃ taddharātattvaśarīrāṇyasya saṃsṛjet || 35 ||
[Analyze grammar]

tatrāsya garbhādhānaṃ ca yuktaṃ puṃsavanādibhiḥ |
garbhaniṣkrāmaparyantairekāṃ kurvīta saṃskriyām || 36 ||
[Analyze grammar]

jananaṃ bhogabhoktṛtvaṃ militvaikātha saṃskriyā |
tato'sya teṣu bhogeṣu kuryāttanmayatāṃ layam || 37 ||
[Analyze grammar]

tatastattattvapāśānāṃ vicchedaṃ samupācaret |
saṃskārāṇāṃ catuṣke'sminnaparāṃ ca parāparām || 38 ||
[Analyze grammar]

mantrāṇāṃ pañcadaśakaṃ parāṃ vā yojayetkramāt |
pivanyādyaṣṭakaṃ śastrādikaṃ ṣaṭkaṃ parā tathā || 39 ||
[Analyze grammar]

iti pañcadaśaite syuḥ kramāllīnatvasaṃskṛtau |
aparāmantramuktvā prāgamukātmana ityatha || 40 ||
[Analyze grammar]

garbhādhānaṃ karomīti punarmantraṃ tameva ca |
svāhāntamuccarandadyādāhutitritayaṃ guruḥ || 41 ||
[Analyze grammar]

paraṃ parāparāmantramamukātmana ityatha |
jātasya bhogabhoktṛtvaṃ karomyatha parāparām || 42 ||
[Analyze grammar]

ante svāheti proccārya vitarettisra āhutīḥ |
uccārya pivanīmantramamukātmana ityatha || 43 ||
[Analyze grammar]

bhoge layaṃ karomīti punarmantraṃ tameva ca |
svāhāntamāhutīstisro dadyādājyatilādibhiḥ || 44 ||
[Analyze grammar]

eṣa eva vamanyādau vidhiḥ pañcadaśāntake |
pūrvaṃ parātmakaṃ mantramamukātmana ityatha || 45 ||
[Analyze grammar]

pāśācchedaṃ karomīti parāmantraḥ punastataḥ |
huṃ svāhā phaṭ samuccārya dadyāttisro'pyathāhutīḥ || 46 ||
[Analyze grammar]

saṃskārāṇāṃ catuṣke'sminye mantrāḥ kathitā mayā |
teṣu karmapadātpūrvaṃ dharātattvapadaṃ vadet || 47 ||
[Analyze grammar]

tato dharātattvapatimāmantryeṣṭvā pratarpya ca |
śivābhimānasaṃrabdho gururevaṃ samādiśet || 48 ||
[Analyze grammar]

tattveśvara tvayā nāsya putrakasya śivājñayā |
pratibandhaḥ prakartavyo yātuḥ padamanāmayam || 49 ||
[Analyze grammar]

tato yadi samīheta dharātattvāntarālagam |
pṛthak śodhayituṃ mantrī bhuvanādyadhvapañcakam || 50 ||
[Analyze grammar]

aparāmantrataḥ prāgvattisrastisrastadāhutīḥ |
dadyātpuraṃ śodhayāmītyūhayuktaṃ prasannadhīḥ || 51 ||
[Analyze grammar]

evaṃ kalāmantrapadavarṇeṣvapi vicakṣaṇaḥ |
tisrastisro hutīrdadyāt pṛthak sāmastyato'pivā || 52 ||
[Analyze grammar]

tataḥ pūrṇāhutiṃ dattvā parayā vauṣaḍantayā |
aparāmantrataḥ śiṣyamuddhṛtyātmahṛdaṃ nayet || 53 ||
[Analyze grammar]

yadā tvekena śuddhena tadantarbhāvacintanāt |
na pṛthak śodhayettattvanāthasaṃśravaṇātparam || 54 ||
[Analyze grammar]

tadā pūrṇāṃ vitīryāṇumutkṣipyātmani yojayet |
tātsthyātmasaṃsthyayogāya tayaivāparayāhutīḥ || 55 ||
[Analyze grammar]

sakarmapadayā dadyāditi kecittu manvate |
anye tu guravaḥ prāhurbhāvanāmayamīdṛśam || 56 ||
[Analyze grammar]

nātra bāhyāhutirdeyā daiśikasya pṛthak punaḥ |
dadyādvā yadi no doṣaḥ syādupāyaḥ sa bhāvane || 57 ||
[Analyze grammar]

evaṃ prāktanatātsthyātmasaṃsthatve yojayedguruḥ |
tataḥ śiṣyahṛdaṃ neyaḥ sa ātmā tāvato'dhvanaḥ || 58 ||
[Analyze grammar]

śuddhastaddārḍhyasiddhyai ca pūrṇā syātparayā punaḥ |
mahāpāśupataṃ pūrvaṃ vilomasya viśuddhaye || 59 ||
[Analyze grammar]

juhomi punarastreṇa vauṣaḍanta iti kṣipet |
punaḥ pūrṇāṃ tato māyāmabhyarcyātha visarjayet || 60 ||
[Analyze grammar]

dharātattvaṃ viśuddhaṃ sajjalena śuddharūpiṇā |
bhāvayenmiśritaṃ vāri śuddhiyogyaṃ tato bhavet || 61 ||
[Analyze grammar]

tathā tattatpurātattvamiśraṇāduttarottaram |
sarvā śivībhavettattvāvalī śuddhānyathā pṛthak || 62 ||
[Analyze grammar]

pṛthaktvaṃ ca malo māyābhidhānastasya saṃbhave |
karmakṣaye'pi no muktirbhavedvidyeśvarādivat || 63 ||
[Analyze grammar]

tato'pi jalatattvasya vahnau vyomni cidātmake |
āhvānādyakhilaṃ yāvattejasyasya vimaśraṇam || 64 ||
[Analyze grammar]

evaṃ kramātkalātattve śuddhe pāśaṃ bhujāśritam |
chindyātkalā hi sā kiṃcitkartṛtvonmīlanātmikā || 65 ||
[Analyze grammar]

karmākhyamalajṛmbhātmā taṃ ca granthiṃ srugagragam |
pūrṇāhutyā samaṃ vahnimantratejasi nirdahet || 66 ||
[Analyze grammar]

mantro hi viśvarūpaḥ sannupāśrayavaśāttathā |
vyaktarūpastato vahnau pāśaploṣavidhāyakaḥ || 67 ||
[Analyze grammar]

pluṣṭo līnasvabhāvo'sau pāśastaṃ prati śambhuvat |
parameśamahātejaḥśeṣamātratvamaśnute || 68 ||
[Analyze grammar]

karmapāśe'tra hotavye pūrṇayāsya śubhāśubham |
aśubhaṃ vā bhavadbhūtaṃ bhāvi vātha samastakam || 69 ||
[Analyze grammar]

dahāmi phaṭtrayaṃ vauṣaḍiti pūrṇāṃ vinikṣipet |
evaṃ māyāntasaṃśuddhau kaṇṭhapāśaṃ ca homayet || 70 ||
[Analyze grammar]

pūrṇasya tasya māyākhyaṃ pāśabhedaprathātmakam |
dahāmi phaṭtrayaṃ vauṣaḍiti pūrṇāṃ kṣipedguruḥ || 71 ||
[Analyze grammar]

nirbījā yadi kāryā tu tadātraivāparāṃ kṣipet |
pūrṇāṃ samayapāśākhyabījadāhapadānvitām || 72 ||
[Analyze grammar]

gurau deve tathā śāstre bhaktiḥ kāryāsya nahyasau |
samayaḥ śaktipātasya svabhāvo hyeṣa no pṛthak || 73 ||
[Analyze grammar]

māyānte śuddhimāyāte vāgīśī yā purābhavat |
māyā śaktimayī saiva vidyāśaktitvamaśnute || 74 ||
[Analyze grammar]

tacchuddhavidyāmāhūya vidyāśaktiṃ niyojayet |
evaṃ krameṇa saṃśuddhe sadāśivapade'pyalam || 75 ||
[Analyze grammar]

śikhāṃ granthiyutāṃ chittvā malamāṇavakaṃ dahet |
yato'dhikārabhogākhyau dvau pāśau tu sadāśive || 76 ||
[Analyze grammar]

ityuktyāṇavapāśo'tra māyīyastu niśāvadhiḥ |
śiṣyo yathocitaṃ snāyādācāmeddaiśikaḥ svayam || 77 ||
[Analyze grammar]

āṇavākhye vinirdagdhe hyadhovāhiśikhāmale |
tataḥ prāguktasakalaprameyaṃ paricintayan || 78 ||
[Analyze grammar]

śiṣyadehādimātmīyadehaprāṇādiyojitam |
kṛtvātmadehaprāṇāderviśvamantaranusmaret || 79 ||
[Analyze grammar]

uktaprakriyayā caivaṃ dṛḍhabuddhirananyadhīḥ |
prāṇasthaṃ deśakālādhvayugaṃ prāṇaṃ ca śaktigam || 80 ||
[Analyze grammar]

tāṃ ca saṃvidgatāṃ śuddhāṃ saṃvidaṃ śivarūpiṇīm |
śiṣyasaṃvidabhinnāṃ ca mantravahnyādyabhedinīm || 81 ||
[Analyze grammar]

dhyāyan prāgvatprayogeṇa śivaṃ sakalaniṣkalam |
dvyātmakaṃ vā kṣipetpūrṇāṃ praśāntakaraṇena tu || 82 ||
[Analyze grammar]

uktaṃ traiśirase tantre sarvasaṃpūraṇātmakam |
mūlādudayagatyā tu śivenduparisaṃplutam || 83 ||
[Analyze grammar]

janmāntamadhyakuharamūlasrotaḥsamutthitam |
śivārkaraśmibhistīvraiḥ kṣubdhaṃ jñānāmṛtaṃ tu yat || 84 ||
[Analyze grammar]

tena saṃtarpayetsamyak praśāntakaraṇena tu |
śūnyadhāmābjamadhyasthaprabhākiraṇabhāsvaraḥ || 85 ||
[Analyze grammar]

ādheyādhāraniḥspandabodhaśāstraparigrahaḥ |
janmādheyaprapañcaikasphoṭasaṃghaṭṭaghaṭṭanaḥ || 86 ||
[Analyze grammar]

mūlasthānātsamārabhya kṛtvā someśamantagam |
khamivātiṣṭhate yāvatpraśāntaṃ tāvaducyate || 87 ||
[Analyze grammar]

uktaṃ śrīpūrvaśāstre ca srucamāpūrya sarpiṣā |
kṛtvā śiṣyaṃ tathātmasthaṃ mūlamantramanusmaran || 88 ||
[Analyze grammar]

śivaṃ śaktiṃ tathātmānaṃ śiṣyaṃ sarpistathānalam |
ekīkurvañchanairgaccheddvādaśāntamananyadhīḥ || 89 ||
[Analyze grammar]

tatra kumbhakamāsthāya dhyāyansakalaniṣkalam |
tiṣṭhettāvadanudvigno yāvadājyakṣayo bhvet || 90 ||
[Analyze grammar]

evaṃ yuktaḥ pare tattve guruṇā śivamūrtinā |
na bhūyaḥ paśutāmeti dagdhamāyānibandhanaḥ || 91 ||
[Analyze grammar]

dehapāte punaḥ prepsedyadi tattveṣu kutracit |
bhogān samastavyastatvabhedairante paraṃ padam || 92 ||
[Analyze grammar]

tadā tattattvabhūmau tu tatsaṃkhyāyāmananyadhīḥ |
punaryojanikāṃ kuryātpūrṇāhutyantareṇa tu || 93 ||
[Analyze grammar]

muktipradā bhogamokṣapradā vā yā prakīrtitā |
dīkṣā sā syātsabījatvanirbījātmatayā dvidhā || 94 ||
[Analyze grammar]

bāle nirjñātamaraṇe tvaśakte vā jarādibhiḥ |
kāryā nirbījikā dīkṣā śaktipātabalodaye || 95 ||
[Analyze grammar]

nirbījāyāṃ sāmayāṃstu pāśānapi viśodhayet |
kṛtanirbījadīkṣastu devāgnigurubhaktibhāk || 96 ||
[Analyze grammar]

iyataiva śivaṃ yāyāt sadyo bhogān vibhujya vā |
śrīmaddīkṣottare coktaṃ cāre ṣaṭtriṃśadaṅgule || 97 ||
[Analyze grammar]

tattvānyāpādamūrdhāntaṃ bhuvanāni tyajetkramāt |
tuṭimātraṃ niṣkalaṃ tadadehaṃ tadahaṃparam || 98 ||
[Analyze grammar]

śaktyā tatra kṣipāmyenamiti dhyāyaṃstu dīkṣayet |
sabījāyāṃ tu dīkṣāyāṃ samayānna viśodhayet || 99 ||
[Analyze grammar]

viśeṣastvayametasyāṃ yāvajjīvaṃ śiśorguruḥ |
śeṣavṛttyai śuddhatattvasṛṣṭiṃ kurvīta pūrṇayā || 100 ||
[Analyze grammar]

abhinnācchivasaṃbodhajaladheryugapatsphurat |
pūrṇāṃ kṣipaṃstattvajālaṃ dhyāyedbhārūpakaṃ sṛtam || 101 ||
[Analyze grammar]

viśuddhatattvasṛṣṭiṃ vā kuryātkumbhābhiṣecanāt |
tathā dhyānabalādeva yadvā pūrṇābhiṣecanaiḥ || 102 ||
[Analyze grammar]

pṛthivī sthirarūpāsya śivarūpeṇa bhāvitā |
sthirīkaroti tāmeva bhāvanāmiti śuddhyati || 103 ||
[Analyze grammar]

jalamāpyāyayatyenāṃ tejo bhāsvaratāṃ nayet |
marudānandasaṃsparśaṃ vyoma vaitatyamāvahet || 104 ||
[Analyze grammar]

evaṃ tanmātravargo'pi śivatāmaya iṣyate |
parānandamahāvyāptiraśeṣamalavicyutiḥ || 105 ||
[Analyze grammar]

śive gantṛtvamādānamupādeyaśivastutiḥ |
śivāmodabharāsvādadarśanasparśanānyalam || 106 ||
[Analyze grammar]

tadākarṇanamityevamindriyāṇāṃ viśuddhatā |
saṃkalpādhyavasāmānāḥ prakāśo raktisaṃsthitī || 107 ||
[Analyze grammar]

śivātmatvena yatseyaṃ śuddhatā mānasādike |
niyamo rañjanaṃ kartṛbhāvaḥ kalanayā saha || 108 ||
[Analyze grammar]

vedanaṃ heyavastvaṃśaviṣaye suptakalpatā |
itthaṃ śivaikyarūḍhasya ṣaṭkañcukagaṇo'pyayam || 109 ||
[Analyze grammar]

śuddha eva pumān prāptaśivabhāvo viśuddhyati |
vidyeśādiṣu tattveṣu naiva kācidaśuddhatā || 110 ||
[Analyze grammar]

ityevaṃ śuddhatattvānāṃ sṛṣṭyā śiṣyo'pi tanmayaḥ |
bhaveddhyetatsūcitaṃ śrīmālinīvijayottare || 111 ||
[Analyze grammar]

bandhamokṣāvubhāvetāvindriyāṇi jagurbudhāḥ |
nigṛhītāni bandhāya vimuktāni vimuktaye || 112 ||
[Analyze grammar]

etāni vyāpake bhāve yadā syurmanasā saha |
muktāni kvāpi viṣaye rodhādbandhāya tāni tu || 113 ||
[Analyze grammar]

ityevaṃ dvividho bhāvaḥ śuddhāśuddhaprabhedataḥ |
indriyāṇāṃ samākhyātaḥ siddhayogīśvare mate || 114 ||
[Analyze grammar]

śrīmān vidyāgurustvāha pramāṇastutidarśane |
samastamantrairdīkṣāyāṃ niyamastveṣa kathyate || 115 ||
[Analyze grammar]

māyāntaśuddhau sarvāḥ syuḥ kriyā hyaparayā sadā |
dvyātmayā sakalānte tu niṣkale parayaiva tu || 116 ||
[Analyze grammar]

īśānte ca pivanyādi sakalānte'ṅgapañcakam |
ityevaṃvidhimālocya karma kuryādgurūttamaḥ || 117 ||
[Analyze grammar]

purādhvani hutīnāṃ yā saṃkhyeyaṃ tattvavarṇayoḥ |
tāmeva dviguṇīkuryātpadādhvani caturguṇām || 118 ||
[Analyze grammar]

kramānmantrakalāmārge dviguṇā dviguṇā kramāt |
yāvattritattvasaṃśuddhau syādviṃśatiguṇā tataḥ || 119 ||
[Analyze grammar]

pratikarma bhavetṣaṣṭirāhutīnāṃ tritattvake |
ekatattve śataṃ prāhurāhutīnāṃ tu sāṣṭakam || 120 ||
[Analyze grammar]

vilomakarmaṇā sākaṃ yāḥ pūrṇāhutayaḥ smṛtāḥ |
tāsāṃ sarvādhvasaṃśuddhau saṃkhyānyatvaṃ na kiṃcana || 121 ||
[Analyze grammar]

ityeṣā kathitā dīkṣā jananādisamanvitā || 122 ||
[Analyze grammar]