Tantraloka [sanskrit text]

by Jun Takashima | 2020 | 46,255 words

The Sanskrit text of the Tantraloka of Abhinavagupta including grammatical analysis, English glossary and comparative print editions. The Tantraloka (“light on Tantra”) was written by Abhinavagupta in the 10th century in Kashmir and represents a major Encyclopedic work in Shaivism dealing with many core aspects and terminology.

Book 11 - ekādaśamāhnikam

atha śrītantrāloke ekādaśamāhnikam |
kalādhvā vakṣyate śrīmacchāṃbhavājñānusārataḥ || 1 ||
[Analyze grammar]

yathā pūrvoktabhuvanamadhye nijanijaṃ gaṇam |
anuyatparato bhinnaṃ tattvaṃ nāmeti bhaṇyate || 2 ||
[Analyze grammar]

tathā teṣvapi tattveṣu svavarge'nugamātmakam |
vyāvṛttaṃ paravargācca kaleti śivaśāsane || 3 ||
[Analyze grammar]

kecidāhuḥ punaryāsau śaktirantaḥ susūkṣmikā |
tattvānāṃ sā kaletyuktā dharaṇyāṃ dhārikā yathā || 4 ||
[Analyze grammar]

atra pakṣadvaye vastu na bhinnaṃ bhāsate yataḥ |
anugāmi na sāmānyamiṣṭaṃ naiyāyikādivat || 5 ||
[Analyze grammar]

anye vadanti dīkṣādau sukhasaṃgrahaṇārthataḥ |
śivena kalpito vargaḥ kaleti samayāśrayaḥ || 6 ||
[Analyze grammar]

kṛtaśca devadevena samayo'paramārthatām |
na gacchatīti nāsatyo na cānyasamayodayaḥ || 7 ||
[Analyze grammar]

nivṛttiḥ pṛthivītattve pratiṣṭhāvyaktagocare |
vidyā niśānte śāntā ca śaktyante'ṇḍamidaṃ catuḥ || 8 ||
[Analyze grammar]

śāntātītā śive tattve kalātītaḥ paraḥ śivaḥ |
nahyatra vargīkaraṇaṃ samayaḥ kalanāpi vā || 9 ||
[Analyze grammar]

yujyate sarvatodikkaṃ svātantryollāsadhāmani |
svātantryāttu nijaṃ rūpaṃ boddhṛdharmādavicyutam || 10 ||
[Analyze grammar]

upadeśatadāveśaparamārthatvasiddhaye |
bodhyatāmānayandevaḥ sphuṭameva vibhāvyate || 11 ||
[Analyze grammar]

yato'taḥ śivatattve'pi kalāsaṃgatirucyate |
aṇḍaṃ ca nāma bhuvanavibhāgasthitikāraṇam || 12 ||
[Analyze grammar]

prāhurāvaraṇaṃ tacca śaktyantaṃ yāvadasti hi |
yadyapi prāk śivākhye'pi tattve bhuvanapaddhatiḥ || 13 ||
[Analyze grammar]

uktā tathāpyapratighe nāsminnāvṛtisaṃbhavaḥ |
nanvevaṃ dharaṇīṃ muktvā śaktau prakṛtimāyayoḥ || 14 ||
[Analyze grammar]

api cāpratighatve'pi kathamaṇḍasya saṃbhavaḥ |
atrāsmadguravaḥ prāhuryatpṛthivyādipañcakam || 15 ||
[Analyze grammar]

pratyakṣamidamābhāti tato'nyannāsti kiṃcana |
meyatve sthūlasūkṣmatvānmānatve karaṇatvataḥ || 16 ||
[Analyze grammar]

kartṛtollāsataḥ kartṛbhāve sphuṭatayoditam |
triṃśattattvaṃ vibhedātma tadabhedo niśā matā || 17 ||
[Analyze grammar]

kāryatvakaraṇatvādivibhāgagalane sati |
vikāsotkasvatantratve śivāntaṃ pañcakaṃ jaguḥ || 18 ||
[Analyze grammar]

śrīmatkālottarādau ca kathitaṃ bhūyasā tathā |
pañcaitāni tu tattvāni yairvyāptamakhilaṃ jagat || 19 ||
[Analyze grammar]

pañcamantratanau tena sadyojātādi bhaṇyate |
īśānāntaṃ tatra tatra dharādigaganāntakam || 20 ||
[Analyze grammar]

śivatattvamataḥ śūnyātiśūnyaṃ syādanāśritam |
yattu sarvāvibhāgātma svatantraṃ bodhasundaram || 21 ||
[Analyze grammar]

saptatriṃśaṃ tu tatprāhustattvaṃ paraśivābhidham |
tasyāpyuktanayādvedyabhāve'tra parikalpite || 22 ||
[Analyze grammar]

yadāste hyanavacchinnaṃ tadaṣṭātriṃśamucyate |
na cānavasthā hyevaṃ syāddṛśyatāṃ hi mahātmabhiḥ || 23 ||
[Analyze grammar]

yadvedyaṃ kiṃcidābhāti tatkṣaye yatprakāśate |
tattattvamiti nirṇītaṃ ṣaṭtriṃśaṃ hṛdi bhāsate || 24 ||
[Analyze grammar]

tatkiṃ na kiṃcidvā kiṃcidityākāṅkṣāvaśe vapuḥ |
cidānandasvatantraikarūpaṃ taditi deśane || 25 ||
[Analyze grammar]

saptatriṃśaṃ samābhāti tatrākāṅkṣā ca nāparā |
taccāpi klṛptavedyatvaṃ yatra bhāti sa cinmayaḥ || 26 ||
[Analyze grammar]

aṣṭātriṃśattamaḥ so'pi bhāvanāyopadiśyate |
yadi nāma tataḥ saptatriṃśa eva punarbhavet || 27 ||
[Analyze grammar]

avibhāgasvatantratvacinmayatvādidharmatā |
samaiva vedyīkaraṇaṃ kevalaṃ tvadhikaṃ yataḥ || 28 ||
[Analyze grammar]

dharāyāṃ guṇatattvānte māyānte kramaśaḥ sthitāḥ |
gandho raso rūpamantaḥ sūkṣmabhāvakrameṇa tu || 29 ||
[Analyze grammar]

iti sthite naye śaktitattvānte'pyasti saukṣmyabhāk |
sparśaḥ ko'pi sadā yasmai yoginaḥ spṛhayālavaḥ || 30 ||
[Analyze grammar]

tatsparśānte tu saṃvittiḥ śuddhacidvyomarūpiṇī |
yasyāṃ rūḍhaḥ samabhyeti svaprakāśātmikāṃ parām || 31 ||
[Analyze grammar]

ato vindurato nādo rūpamasmādato rasaḥ |
ityuktaṃ kṣobhakatvena spande sparśastu no tathā || 32 ||
[Analyze grammar]

mataṃ caitanmaheśasya śrīpūrve yadabhāṣata |
dhārikāpyāyinī boddhrī pavitrī cāvakāśadā || 33 ||
[Analyze grammar]

ebhiḥ śabdairvyavaharan nivṛttyādernijaṃ vapuḥ |
pañcatattvavidhiḥ proktastritattvamadhunocyate || 34 ||
[Analyze grammar]

vijñānākalaparyantamātmā vidyeśvarāntakam |
śeṣe śivastritattve syādekatattve śivaḥ param || 35 ||
[Analyze grammar]

imau bhedāvubhau tattvabhedamātrakṛtāviti |
tattvādhvaivāyamitthaṃ ca na ṣaḍadhvasthiteḥ kṣatiḥ || 36 ||
[Analyze grammar]

prakṛt pumānyatiḥ kālo māyā vidyeśasauśivau |
śivaśca navatattve'pi vidhau tattvādhvarūpatā || 37 ||
[Analyze grammar]

evamaṣṭādaśākhye'pi vidhau nyāyaṃ vadetsudhīḥ |
yatra yatra hi bhogecchā tatprādhānyopayogataḥ || 38 ||
[Analyze grammar]

anyāntarbhāvanātaśca dīkṣānantavibhedabhāk |
tena ṣaṭtriṃśato yāvadekatattvavidhirbhavet || 39 ||
[Analyze grammar]

tattvādhvaiva sa devena prokto vyāsasamāsataḥ |
ekatattvavidhiścaiṣa suprabuddhaṃ guruṃ prati || 40 ||
[Analyze grammar]

śiṣyaṃ ca gatabhogāśamuditaḥ śaṃbhunā yataḥ |
bhedaṃ visphārya visphārya śaktyā svacchandarūpayā || 41 ||
[Analyze grammar]

svātmanyabhinne bhagavānnityaṃ viśramayan sthitaḥ |
itthaṃ tryātmādhvano bhedaḥ sthūlasūkṣmaparatvataḥ || 42 ||
[Analyze grammar]

meyabhāgagataḥ proktaḥ puratattvakalātmakaḥ |
adhunā mātṛbhāgasthaṃ rūpaṃ tredhā nirūpyate || 43 ||
[Analyze grammar]

yatpramāṇātmakaṃ rūpamadhvano mātṛbhāgagam |
padaṃ hyavagamātmatvasamāveśāttaducyate || 44 ||
[Analyze grammar]

tadeva ca padaṃ mantraḥ prakṣobhātpracyutaṃ yadā |
guptabhāṣī yato mātā tūṣṇīṃbhūto vyavasthitaḥ || 45 ||
[Analyze grammar]

tathāpi na vimarśātma rūpaṃ tyajati tena saḥ |
pramāṇātmavimarśātmā mānavatkṣobhabhāṅnatu || 46 ||
[Analyze grammar]

mantrāṇāṃ ca padānāṃ ca tenoktaṃ trikaśāsane |
abhinnameva svaṃ rūpaṃ niḥspandakṣobhite param || 47 ||
[Analyze grammar]

audāsīnyaparityāge prakṣobhānavarohaṇe |
varṇādhvā mātṛbhāge syāt pūrvaṃ yā kathitā pramā || 48 ||
[Analyze grammar]

sā tu pūrṇasvarūpatvādavibhāgamayī yataḥ |
tata ekaikavarṇatvaṃ tattve tattve kṣamāditaḥ || 49 ||
[Analyze grammar]

kṛtvā śaive pare proktāḥ ṣoḍaśārṇā visargataḥ |
tatra śaktiparispandastāvān prāk ca nirūpitaḥ || 50 ||
[Analyze grammar]

saṃkalayyocyate sarvamadhunā sukhasaṃvide |
padamantravarṇamekaṃ puraṣoḍaśakaṃ dhareti ca nivṛttiḥ |
tattvārṇamagninayanaṃ rasaśarapuramastramantrapadamanyā || 51 ||
[Analyze grammar]

munitattvārṇaṃ dvikapadamantraṃ vasvakṣibhuvanamaparakalā |
agnyarṇatattvamekakapadamantraṃ sainyabhuvanamiti turyā || 52 ||
[Analyze grammar]

ṣoḍaśa varṇāḥ padamantratattvamekaṃ ca śāntyatīteyam |
abhinavaguptenāryātrayamuktaṃ saṃgrahāya śiṣyebhyaḥ || 53 ||
[Analyze grammar]

so'yaṃ samasta evādhvā bhairavābhedavṛttimān |
tatsvātantryātsvatantratvamaśnuvāno'vabhāsate || 54 ||
[Analyze grammar]

tathāhi mātṛrūpastho mantrādhveti nirūpitaḥ |
tathāhi cidvimarśena grastā vācyadaśā yadā || 55 ||
[Analyze grammar]

śivajñānakriyāyattamananatrāṇatatparā |
aśeṣaśaktipaṭalīlīlālāmpaṭyapāṭavāt || 56 ||
[Analyze grammar]

cyutā mānamayādrūpāt saṃvinmantrādhvatāṃ gatā |
pramāṇarūpatāmetya prayātyadhvā padātmatām || 57 ||
[Analyze grammar]

tathā hi māturviśrāntirvarṇānsaṃghaṭya tānbahūn |
saṃghaṭṭanaṃ ca kramikaṃ saṃjalpātmakameva tat || 58 ||
[Analyze grammar]

vikalpasya svakaṃ rūpaṃ bhogāveśamayaṃ sphuṭam |
ataḥ pramāṇatārūpaṃ padamasmadgururjagau || 59 ||
[Analyze grammar]

pramāṇarūpatāveśamaparityajya meyatām || 60 ||
[Analyze grammar]

gacchankalanayā yogādadhvā proktaḥ kalātmakaḥ |
śuddhe prameyatāyoge sūkṣmasthūlatvabhāgini || 61 ||
[Analyze grammar]

tattvādhvabhuvanādhvatve krameṇānusaredguruḥ |
prameyamānamātṝṇāṃ yadrūpamupari sthitam || 62 ||
[Analyze grammar]

pramātmātra sthito'dhvāyaṃ varṇātmā dṛśyatāṃ kila |
ucchalatsaṃvidāmātraviśrāntyāsvādayoginaḥ || 63 ||
[Analyze grammar]

sarvābhidhānasāmarthyādaniyantritaśaktayaḥ |
sṛṣṭāḥ svātmasahotthe'rthe dharāparyantabhāgini || 64 ||
[Analyze grammar]

āmṛśantaḥ svacidbhūmau tāvato'rthānabhedataḥ |
varṇaughāste pramārūpāṃ satyāṃ bibhrati saṃvidam || 65 ||
[Analyze grammar]

bālāstiryakpramātāro ye'pyasaṃketabhāginaḥ |
te'pyakṛtrimasaṃskārasārāmenāṃ svasaṃvidam || 66 ||
[Analyze grammar]

bhinnabhinnāmupāśritya yānti citrāṃ pramātṛtām |
asyā cākṛtrimānantavarṇasaṃvidi rūḍhatām || 67 ||
[Analyze grammar]

saṃketā yānti cette'pi yāntyasaṃketavṛttitām |
anayā tu vinā sarve saṃketā bahuśaḥ kṛtāḥ || 68 ||
[Analyze grammar]

aviśrāntatayā kuryuranavasthāṃ duruttarām |
bālo vyutpādyate yena tatra saṃketamārgaṇāt || 69 ||
[Analyze grammar]

aṅgulyādeśane'pyasya nāvikalpā tathā matiḥ |
vikalpaḥ śabdamūlaśca śabdaḥ saṃketajīvitaḥ || 70 ||
[Analyze grammar]

tenānanto hyamāyīyo yo varṇagrāma īdṛśaḥ |
saṃvidvimarśasacivaḥ sadaiva sa hi jṛmbhate || 71 ||
[Analyze grammar]

yata eva ca māyīyā varṇāḥ sūtiṃ vitenire |
ye ca māyīyavarṇeṣu vīryatvena nirūpitāḥ || 72 ||
[Analyze grammar]

saṃketanirapekṣāste prameti parigṛhyatām |
tathā hi paravākyeṣu śruteṣvāvriyate nijā || 73 ||
[Analyze grammar]

pramā yasya jaḍo'sau no tatrārthe'bhyeti mātṛtām |
śukavatsa paṭhatyeva paraṃ tatkramitaikabhāk || 74 ||
[Analyze grammar]

svātantryalābhataḥ svākyapramālābhe tu boddhṛtā |
yasya hi svapramābodho vipakṣodbhedanigrahāt || 75 ||
[Analyze grammar]

vākyādivarṇapuñje sve sa pramātā vaśībhavet |
yathā yathā cākṛtakaṃ tadrūpamatiricyate || 76 ||
[Analyze grammar]

tathā tathā camatkāratāratamyaṃ vibhāvyate |
ādyāmāyīyavarṇāntarnimagne cottarottare || 77 ||
[Analyze grammar]

sakete pūrvapūrvāṃśamajjane pratibhābhidaḥ |
ādyodrekamahattve'pi pratibhātmani niṣṭhitāḥ || 78 ||
[Analyze grammar]

dhruvaṃ kavitvavaktṛtvaśālitāṃ yānti sarvataḥ |
yāvaddhāmani saṃketanikārakalanojjhite || 79 ||
[Analyze grammar]

viśrāntaścinmaye kiṃ kiṃ na vetti kurute na vā |
ata eva hi vāksiddhau varṇānāṃ samupāsyatā || 80 ||
[Analyze grammar]

sarvajñatvādisiddhau vā kā siddhiryā na tanmayī |
taduktaṃ varadena śrīsiddhayogīśvarīmate || 81 ||
[Analyze grammar]

tena guptena guptāste śeṣā varṇāstviti sphuṭam |
evaṃ māmātṛmānatvameyatvairyo'vabhāsate || 82 ||
[Analyze grammar]

ṣaḍvidhaḥ svavapuḥśuddhau śuddhiṃ so'dhvādhigacchati |
ekena vapuṣā śuddhau tatraivānyaprakāratām || 83 ||
[Analyze grammar]

antarbhāvyācarecchuddhimanusaṃdhānavān guruḥ |
anantarbhāvaśaktau tu sūkṣmaṃ sūkṣmaṃ tu śodhayet || 84 ||
[Analyze grammar]

tadviśuddhaṃ bījabhāvāt sūte nottarasaṃtatim |
śodhanaṃ bahudhā tattadbhogaprāptyekatānatā || 85 ||
[Analyze grammar]

tadādhipatyaṃ tattyāgastacchivātmatvavedanam |
tallīnatā tannirāsaḥ sarvaṃ caitatkramākramāt || 86 ||
[Analyze grammar]

ata eva ca te mantrāḥ śodhakāścitrarūpiṇaḥ |
siddhāntavāmadakṣādau citrāṃ śuddhiṃ vitanvate || 87 ||
[Analyze grammar]

anuttaratrikānāmakramamantrāstu ye kila |
te sarve sarvadāḥ kintu kasyācit kvāpi mukhyatā || 88 ||
[Analyze grammar]

ataḥ śodhakabhāvena śāstre śrīpūrvasaṃjñite |
parāparādimantrāṇāmadhvanyuktā vyavasthitiḥ || 89 ||
[Analyze grammar]

śodhakatvaṃ ca mālinyā devīnāṃ tritayasya ca |
devatrayasya vaktrāṇāmaṅgānāmaṣṭakasya ca || 90 ||
[Analyze grammar]

kiṃ vātibahunā dvāravāstvādhāragurukrame |
lokapāstravidhau mantrān muktvā sarvaṃ viśodhakam || 91 ||
[Analyze grammar]

yaccaitadadhvanaḥ proktaṃ śodhyatvaṃ śoddhṛtā ca yā |
sā svātantryācchivābhede yuktetyuktaṃ ca śāsane || 92 ||
[Analyze grammar]

sarvametadvibhātyeva parameśitari dhruve |
pratibimbasvarūpeṇa na tu bāhyatayā yataḥ || 93 ||
[Analyze grammar]

cidvyomnyeva śive tattaddehādimatirīdṛśī |
bhinnā saṃsāriṇāṃ rajjau sarpasragvīcibuddhivat || 94 ||
[Analyze grammar]

yataḥ prāgdehamaraṇasiddhāntaḥ svapnagocaraḥ |
dehāntarādirmaraṇe kīdṛgvā dehasaṃbhavaḥ || 95 ||
[Analyze grammar]

svapne'pi pratibhāmātrasāmānyaprathanābalāt |
viśeṣāḥ pratibhāsante na bhāvyante'pi te yathā || 96 ||
[Analyze grammar]

śālagrāmopalāḥ keciccitrākṛtibhṛto yathā |
tathā māyādibhūmyantalekhācitrahṛdaścitaḥ || 97 ||
[Analyze grammar]

nagarārṇavaśailādyāstadicchānuvidhāyinaḥ |
na svayaṃ sadasanto no kāraṇākāraṇātmakāḥ || 98 ||
[Analyze grammar]

niyateścirarūḍhāyāḥ samucchedātpravartanāt |
arūḍhāyāḥ svatantro'yaṃ sthitaścidvyomabhairavaḥ || 99 ||
[Analyze grammar]

ekacinmātrasaṃpūrṇabhairavābhedabhāgini |
evamasmītyanāmarśo bhedako bhāvamaṇḍale || 100 ||
[Analyze grammar]

sarvapramāṇairno siddhaṃ svapne kartrantaraṃ yathā |
svasaṃvidaḥ svasiddhāyāstathā sarvatra buddhyatām || 101 ||
[Analyze grammar]

cittacitrapurodyāne krīḍedevaṃ hi vetti yaḥ |
ahameva sthito bhūtabhāvatattvapurairiti || 102 ||
[Analyze grammar]

evaṃ jāto mṛto'smīti janmamṛtyuvicitratāḥ |
ajanmanyamṛtau bhānti cittabhittau svanirmitāḥ || 103 ||
[Analyze grammar]

parehasaṃvidāmātraṃ paralokehalokate |
vastutaḥ saṃvido deśaḥ kālo vā naiva kiṃcana || 104 ||
[Analyze grammar]

abhaviṣyadayaṃ sargo mūrtaścenna tu cinmayaḥ |
tadavekṣyata tanmadhyāt kenaiko'pi dharādharaḥ || 105 ||
[Analyze grammar]

bhūtatanmātravargāderādhārādheyatākrame |
ante saṃvinmayī śaktiḥ śivarūpaiva dhāriṇī || 106 ||
[Analyze grammar]

tasmātpratītirevetthaṃ kartrī dhartrī ca sā śivaḥ |
tato bhāvāstatra bhāvāḥ śaktirādhārikā tataḥ || 107 ||
[Analyze grammar]

sāṃkalpikaṃ nirādhāramapi naiva patatyadhaḥ |
svādhāraśaktau viśrāntaṃ viśvamitthaṃ vimṛśyatām || 108 ||
[Analyze grammar]

asyā ghanāhamityādirūḍhireva dharāditā |
yāvadante cidasmīti nirvṛttā bhairavātmatā || 109 ||
[Analyze grammar]

maṇāvindrāyudhe bhāsa iva nīlādayaḥ śive |
paramārthata eṣāṃ tu nodayo na vyayaḥ kvacit || 110 ||
[Analyze grammar]

deśe kāle'tra vā sṛṣṭirityetadasamañjasam |
cidātmanā hi devena sṛṣṭirdikkālayorapi || 111 ||
[Analyze grammar]

jāgarābhimate sārdhahastatritayagocare |
prahare ca pṛthak svapnāścitradikkālamāninaḥ || 112 ||
[Analyze grammar]

ata eva kṣaṇaṃ nāma na kiṃcidapi manmahe |
kriyākṣaṇe vāpyekasmin bahvyaḥ saṃsyurdrutāḥ kriyāḥ || 113 ||
[Analyze grammar]

tena ye bhāvasaṃkocaṃ kṣaṇāntaṃ pratipedire |
te nūnamenayā nāḍyā śūnyadṛṣṭyavalambinaḥ || 114 ||
[Analyze grammar]

tadya eṣa sato bhāvāñ śūnyīkartuṃ tathāsataḥ |
sphuṭīkartuṃ svatantratvādīśaḥ so'smatprabhuḥ śivaḥ || 115 ||
[Analyze grammar]

taditthaṃ parameśāno viśvarūpaḥ pragīyate |
na tu bhinnasya kasyāpi dharāderupapannatā || 116 ||
[Analyze grammar]

uktaṃ caitatpuraiveti na bhūyaḥ pravivicyate |
bhūyobhiścāpi bāhyārthadūṣaṇaiḥ pravyaramyata || 117 ||
[Analyze grammar]

taditthameṣa nirṇītaḥ kalādervistaro'dhvanaḥ || 118 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Tantraloka ekādaśamāhnikam

Cover of edition (2015)

Sri Tantraloka
by Satya Prakash Singh & Swami Maheshvarananda (2015)

The Only Complete Edition with Sanskrit Text and English Translation (Set of 9 Volumes); 9788187471868; [Standard Publishers India]

Buy now!
Cover of edition (2000)

Sri Tantraloka (Set of 8 Volumes)
by Paramahansa Mishra (2000)

[श्री तन्त्रालोकः (संस्कृत एवं हिंदी अनुवाद)] Sanskrit Text with Hindi Translation; Published by Sampurnanand Sanskrit University; With two commentaries: Viveka (विवेक) by Ācārya Śrī Jayaratha and Nīrakṣīraviveka (नीरक्षीरविवेक) by Paramhans Mishra.

Buy now!
Cover of edition (2002)

Tantraloka of Abhinavagupta (with Jnanavati Hindi commentary)
by Radheshyam Chaturvedi (2002)

[आचार्य अभिनवगुप्त द्वारा रचित तंत्रलोक: संस्कृत एवम् हिन्दी अनुवाद (पाँच खंडों में)] Sanskrit Text with Hindi Translation and Commentary; Published by Chaukhambha Vidya Bhawan.

Buy now!
Cover of edition (2018)

Sri Tantraloka of Abhinavagupta
by Giriratna Misra (2018)

With Viveka Saṃskṛta Commentary by Rājānaka Jayaratha; Sanskrit Text, Transliteration, Sarveshwari English commentary; With Glossary and Central Idea of Each Śloka; Published by Chaukhamba Surbharati Prakashan

Buy now!
Like what you read? Consider supporting this website: