Book 8 - aṣṭamamāhnikaṃ

atha śītantrāloke aṣṭamamāhnikaṃ |
deśādhvano'pyatha samāsavikāsayogātsaṃgīyate vidhirayaṃ śivaśāstradṛṣṭaḥ || 1 ||
[Analyze grammar]

vicārito'yaṃ kālādhvā kriyāśaktimayaḥ prabhoḥ |
mūrtivaicitryajastajjo deśādhvātha nirūpyate || 2 ||
[Analyze grammar]

adhvā samasta evāyaṃ cinmātre saṃpratiṣṭhitaḥ |
yattatra nahi viśrāntaṃ tannabhaḥkusumāyate || 3 ||
[Analyze grammar]

saṃviddvāreṇa tatsṛṣṭe śūnye dhiyi marutsu ca |
nāḍīcakrānucakreṣu barhirdehe'dhvasaṃsthitiḥ || 4 ||
[Analyze grammar]

tatrādhvaivaṃ nirūpyo'yaṃ yatastatprakriyākramam |
anusaṃdadhadeva drāg yogī bhairavatāṃ vrajet || 5 ||
[Analyze grammar]

didṛkṣayaiva sarvārthān yadā vyāpyāvatiṣṭhate |
tadā kiṃ bahunoktena ityuktaṃ spandaśāsane || 6 ||
[Analyze grammar]

jñātvā samastamadhvānaṃ tadīśeṣu vilāpayet |
tān dehaprāṇadhīcakre pūrvavad gālayetkramāt || 7 ||
[Analyze grammar]

tatsamastaṃ svasaṃvittau sā saṃvidbharitātmikā |
upāsyamānā saṃsārasāgarapralayānalaḥ || 8 ||
[Analyze grammar]

śrīmahīkṣottare caitānadhveśān gururabravīt |
brahmānantātpradhānāntaṃ viṣṇuḥ puṃsaḥ kalāntagam || 9 ||
[Analyze grammar]

rudro granthau ca māyāyāmīśaḥ sādākhyagocare |
anāśritaḥ śivastasmādvyāptā tadvyāpakaḥ paraḥ || 10 ||
[Analyze grammar]

evaṃ śivatvamāpannamiti matvā nyarūpyata |
na prakriyāparaṃ jñānamiti svacchandaśāsane || 11 ||
[Analyze grammar]

triśiraḥśāsane bodho mūlamadhyāgrakalpitaḥ |
ṣaṭtriṃśattattvasaṃrambhaḥ smṛtirbhedavikalpanā || 12 ||
[Analyze grammar]

avyāhatavibhāgo'smibhāvo mūlaṃ tu bodhagam |
samastatattvabhāvo'yaṃ svātmanyevāvibhāgakaḥ || 13 ||
[Analyze grammar]

bodhamadhyaṃ bhavetkiṃcidādhārādheyalakṣaṇam |
tattvabhedavibhāgena svabhāvasthitilakṣaṇam || 14 ||
[Analyze grammar]

bodhāgraṃ tattu vidbodhaṃ nistaraṅgaṃ bṛhatsukham |
saṃvidekātmatānītabhūtabhāvapurādikaḥ || 15 ||
[Analyze grammar]

avyavacchinnasaṃvittirbhairavaḥ parameśvaraḥ |
śrīdevyāyāmale coktaṃ ṣaṭtriṃśattattvasundaram || 16 ||
[Analyze grammar]

adhvānaṃ ṣaḍvidhaṃ dhyāyansadyaḥ śivamayo bhavet |
yadyapyamuṣya nāthasya saṃvittyanatirekiṇaḥ || 17 ||
[Analyze grammar]

pūrṇasyordhvādimadhyāntavyavasthā nāsti vāstavī |
tathāpi pratipattṝṇāṃ pratipādayitustathā || 18 ||
[Analyze grammar]

svasvarūpānusāreṇa madhyāditvādikalpanāḥ |
tataḥ pramātṛsaṃkalpaniyamāt pārthivaṃ viduḥ || 19 ||
[Analyze grammar]

tattvaṃ sarvāntarālasthaṃ yatsarvāvaraṇairvṛtam |
tadatra pārthive tattve kathyate bhuvanasthitiḥ || 20 ||
[Analyze grammar]

netā kaṭāharudrāṇāmanantaḥ kāmasevinām |
potārūḍho jalasyāntarmadyapānavighūrṇitaḥ || 21 ||
[Analyze grammar]

sa devaṃ bhairavaṃ dhyāyan nāgaiśca parivāritaḥ |
kālāgrerbhuvanaṃ cordhve koṭiyojanamucchritam || 22 ||
[Analyze grammar]

lokānāṃ bhasmasādbhāvabhayānnordhva sa vīkṣate |
sa ca vyāptāpi viśvasya yasmātpluṣyannimāṃ bhuvam || 23 ||
[Analyze grammar]

narakebhyaḥ purā vyaktastenāsau tadadho mataḥ |
daśa koṭyo vibhorjvālā tadardha śūnyamūrdhvataḥ || 24 ||
[Analyze grammar]

tadūrdhve narakādhīśāḥ kramādduḥkhaikavedanāḥ |
śdho madhye tadūrdhve ca sthitā bhedāntarairvṛtāḥ || 25 ||
[Analyze grammar]

avīcikumbhīpākākhyarauravāsteṣvanukramāt |
ekādaśaikādaśa ca daśetyantaḥ śarāgni tat || 26 ||
[Analyze grammar]

pratyekameṣāmekonā koṭirucchritirantaram |
lakṣamatra khavedāsyasaṃkhyānāmantarā sthitiḥ || 27 ||
[Analyze grammar]

kūṣmāṇḍa ūrdhve lakṣonakoṭisthānastadīśitā |
śāstraviruddhācaraṇāt kṛṣṇaṃ ye karma vidadhate || 28 ||
[Analyze grammar]

tatra bhīmairlokapuruṣaiḥ pīḍyante bhogaparyantam |
ye sakṛdapi parameśaṃ śivamekāgreṇa cetasā śaraṇam || 29 ||
[Analyze grammar]

yānti na te narakayujaḥ kṛṣṇaṃ teṣāṃ sukhālpatādāyi |
sahasranavakotsedhamekāntaramatha kramāt || 30 ||
[Analyze grammar]

pātālāṣṭakamekaikamaṣṭame hāṭakaḥ prabhuḥ |
pratilokaṃ niyuktātmā śrīkaṇṭho haṭhato bahūḥ || 31 ||
[Analyze grammar]

siddhīrdadātyasāvevaṃ śrīmadrauravaśāsane |
vratino ye cikarmasthā niṣiddhācārakāriṇaḥ || 32 ||
[Analyze grammar]

dīkṣitā api ye luptasamayā naca kurvate |
prāyaścittāṃstathā tatsthā vāmācārasya dūṣakāḥ || 33 ||
[Analyze grammar]

devāgnidravyavṛttyaṃśajīvinaścottamasthitāḥ |
adhaḥsthagāruḍādyanyamantrasevāparāyaṇāḥ || 34 ||
[Analyze grammar]

te hāṭakavibhoragre kiṅkarā vividhātmakāḥ |
te tu tatrāpi deveśaṃ bhaktyā cetparyupāsate || 35 ||
[Analyze grammar]

tadīśatattve līyante kramācca parame śive |
anyathā ye tu vartante tadbhoganiratātmakāḥ || 36 ||
[Analyze grammar]

te kālavahnisaṃtāpadīnākrandaparāyaṇāḥ |
guṇatattve nilīyante tataḥ sṛṣṭimukhe punaḥ || 37 ||
[Analyze grammar]

pātyante mātṛbhirghorayātanaughapurassaram |
adhamādhamadeheṣu nijakarmānurūpataḥ || 38 ||
[Analyze grammar]

mānuṣānteṣu tatrāpi kecinmantravidaḥ kramāt |
mucyante'nye tu badhyante pūrvakṛtyānusārataḥ || 39 ||
[Analyze grammar]

ityeṣa gaṇavṛttānto nāmnā hulahulādinā |
proktaṃ bhagavatā śrīmadānandādhikaśāsane || 40 ||
[Analyze grammar]

pātālordhve sahasrāṇi viṃśatirbhūkaṭāhakaḥ |
siddhātantre tu pātālapṛṣṭhe yakṣīsamāvṛtam || 41 ||
[Analyze grammar]

bhadrakālyāḥ puraṃ yatra tābhiḥ krīḍanti sādhakāḥ |
tatastamastaptabhūmistataḥśūnyaṃ tato'hayaḥ || 42 ||
[Analyze grammar]

etāni yātanāsthānaṃ gurumantrādidūṣiṇām |
tato bhūmyūrdhva to meruḥ sahasrāṇi sa ṣoḍaśa || 43 ||
[Analyze grammar]

magnastanmūlavistārastaddvayenordhvavistṛtiḥ |
sahasrābdhivasūcchrāyo haimaḥ sarvāmarālayaḥ || 44 ||
[Analyze grammar]

madhyordhvādhaḥ samudvṛttaśarāvacaturaśrakaḥ |
bhairavīyaṃ ca talliṅgaṃ dharaṇī cāsya pīṭhikā || 45 ||
[Analyze grammar]

sarve devā nilīnā hi tatra tatpūjitaṃ sadā |
madhye merusabhā dhātustadīśadiśi ketanam || 46 ||
[Analyze grammar]

jyotiṣkaśikharaṃ śaṃbhoḥ śrīkaṇṭhāṃśaśca sa prabhuḥ |
avaruhya sahasrāṇi manovatyāścaturdaśa || 47 ||
[Analyze grammar]

cakravāṭaścaturdikko meruratra tu lokapāḥ |
amarāvatikendrasya pūrvasyāṃ dakṣiṇena tām || 48 ||
[Analyze grammar]

atsaraḥsiddhasādhyāstāmuttareṇa vināyakāḥ |
tejovatī svadiśyagneḥ purī tāṃ paścimena tu || 49 ||
[Analyze grammar]

viśvedevā viśvakarmā kramāttadanugāśca ye |
yāmyāṃ saṃyamanī tāṃ tu paścimena kramāt sthitāḥ || 50 ||
[Analyze grammar]

mātṛnandā svasaṃkhyātā rudrāstatsādhakāstathā |
kṛṣṇāṅgārā nirṛtiśca tāṃ pūrveṇa piśācakāḥ || 51 ||
[Analyze grammar]

rakṣāṃsi siddhagandharvāstūttareṇottareṇa tām |
vāruṇī śuddhavatyākhyā bhūtaugho dakṣiṇena tām || 52 ||
[Analyze grammar]

uttareṇottareṇaināṃ vasuvidyādharāḥ kramāt |
vāyorgandhavatī tasyā dakṣiṇe kinnarāḥ punaḥ || 53 ||
[Analyze grammar]

vīṇāsarasvatī devī nāradastumburustathā |
mahodayendorguhyāḥ syuḥ paścime'syāḥ punaḥ punaḥ || 54 ||
[Analyze grammar]

kuberaḥ karmadevāśca tathā tatsādhakā api |
yaśasvinī maheśasya tasyāḥ paścimato hariḥ || 55 ||
[Analyze grammar]

dakṣiṇe dakṣiṇe brahmāśvinau dhanvantariḥ kramāt |
mairave cakravāṭe'sminnevaṃ mukhyāḥ puro'ṣṭadhā || 56 ||
[Analyze grammar]

antarālagatāstvanyāḥ punaḥ ṣaḍviṃśatiḥ smṛtāḥ |
iṣṭāpūrtaratāḥ puṇye varṣeye bhārate narāḥ || 57 ||
[Analyze grammar]

te merugāḥ sakṛcchambhuṃ ye vārcanti yathocitam |
meroḥ pradakṣiṇāpyodagdikṣu viṣkambhaparvatāḥ || 58 ||
[Analyze grammar]

mandaro gandhamādaśca vipulo'tha supārśvakaḥ |
sitapītanīlaraktāste kramātpādaparvatāḥ || 59 ||
[Analyze grammar]

etairbhuvamavaṣṭabhya merustiṣṭhati niścalaḥ |
caitrarathanandanākhye vaiśrājaṃ pitṛvanaṃ vanānyāhuḥ || 60 ||
[Analyze grammar]

raktodamānasasitaṃ bhadraṃ caitaccatuṣṭayaṃ sarasām |
vṛkṣāḥ kadambajambvaśvatthanyagrodhakāḥ kramaśaḥ || 61 ||
[Analyze grammar]

eṣu ca caturṣvacaleṣu trayaṃ trayaṃ kramaśa etadāmnātam |
mervadho lavaṇābdhyantaṃ jambudvīpaḥ samantataḥ || 62 ||
[Analyze grammar]

lakṣamātraḥ sa navadhā jāto maryādaparvataiḥ |
niṣadho hemakūṭaśca himavāndakṣiṇe trayaḥ || 63 ||
[Analyze grammar]

lakṣaṃ sahasranavatistadaśītiriti kramāt |
nīlaḥ śvetastriśṛṅgaśca tāvantaḥ savyataḥ punaḥ || 64 ||
[Analyze grammar]

meroḥ ṣaḍete maryādācalāḥ pūrvāparāyatāḥ |
pūrvato mālyavānpaścādgandhamādanasaṃjñitaḥ || 65 ||
[Analyze grammar]

savyottarāyatau tau tu catustriṃśatsahasrakau |
aṣṭāvete tato'pyanyau dvau dvau pūrvādiṣu kramāt || 66 ||
[Analyze grammar]

jāṭharaḥ kūṭahimavadyātrajārudhiśṛṅgiṇaḥ |
evaṃ sthito vibhāgo'tra varṣasiddhyai nirūpyate || 67 ||
[Analyze grammar]

samantāccakravāṭādho'narkendu caturaśrakam |
sahasranavavistīrṇamilākhyaṃ trimukhāyuṣam || 68 ||
[Analyze grammar]

meroḥ paścimato gandhamādo yastasya paścime |
ketumālaṃ kulādrīṇāṃ saptakena vibhūṣitam || 69 ||
[Analyze grammar]

meroḥ pūrva mālyavānyo bhadrāśvastasya pūrvataḥ |
sahasradaśakāyustatsapañcakulaparvatam || 70 ||
[Analyze grammar]

pūrvapaścimataḥ savyottarataśca kramādime |
dvātriṃśacca catustriṃśatsahasrāṇi nirūpite || 71 ||
[Analyze grammar]

merorudak śṛṅgavānyastadbahiḥ kuruvarṣakam |
cāpavannavasāhasramāyustatra trayodaśa || 72 ||
[Analyze grammar]

kuruvarṣasyottare'tha vāyavye'bdhau kramāccharāḥ |
daśa ceti sahasrāṇi dvīpau candro'tha bhadrakaḥ || 73 ||
[Analyze grammar]

yau śvetaśṛṅgiṇau merorvāme madhye hiraṇmayam |
tayornavakavistīrṇamāyuścārdhatrayodaśa || 74 ||
[Analyze grammar]

tatra vai vāmataḥ śvetanīlayo ramyako'ntare |
sahasranavavistīrṇamāyurdvādaśa tāni ca || 75 ||
[Analyze grammar]

merordakṣiṇato hemaniṣadhau yau tadantare |
haryākhyaṃ navasāhasraṃ tatsahasrādhikāyuṣam || 76 ||
[Analyze grammar]

tatraiva dakṣiṇe hemahimavaddvitayāntare |
kainnaraṃ navasāhasraṃ tatsahasrādhikāyuṣam || 77 ||
[Analyze grammar]

tatraiva dakṣiṇe merorhimavānyasya dakṣiṇe |
bhārataṃ navasāhasraṃ cāpavatkarmabhogabhūḥ || 78 ||
[Analyze grammar]

ilāvṛtaṃ ketubhadraṃ kuruhairaṇyaramyakam |
harikinnaravarṣe ca bhogabhūrna tu karmabhūḥ || 79 ||
[Analyze grammar]

atra bāhulyataḥ karmabhūbhāvo'trāpyakarmaṇām |
paśūnāṃ karmasaṃskāraḥ syāttādṛgdṛḍhasaṃskṛteḥ || 80 ||
[Analyze grammar]

saṃbhavantyapyasaṃskārā bhārate'nyatra cāpi hi |
dṛḍhaprāktanasaṃskārādīśecchātaḥ śubhāśubham || 81 ||
[Analyze grammar]

sthānāntare'pi karmāsti dṛṣṭaṃ tacca purātane |
tatra tretā sadā kālo bhārate tu caturyugam || 82 ||
[Analyze grammar]

bhārate navakhaṇḍaṃ ca sāmudreṇāmbhasātra ca |
sthalaṃ pañcaśatī tadvajjalaṃ ceti vibhajyate || 83 ||
[Analyze grammar]

indraḥ kaśerustāmrābho nāgīyaḥ prāggabhastimān |
saumyagāndharvavārāhāḥ kanyākhyaṃ cāsamudrataḥ || 84 ||
[Analyze grammar]

kanyādvīpe ca navame dakṣiṇenābdhimadhyagāḥ |
upadvīpāḥ ṣaṭ kulādrisaptakena vibhūṣite || 85 ||
[Analyze grammar]

aṅgayavamalayaśaṅkuḥ kumudavarāhau ca malayago'gastya |
tatraiva ca trikūṭe laṅkā ṣaḍamī hyupadvīpāḥ || 86 ||
[Analyze grammar]

dvīpopadvīpagāḥ prāyo mlecchā nānāvidhā janāḥ |
muktākāñcanaratnāḍhyā iti śrīruruśāsane || 87 ||
[Analyze grammar]

bhārate yatkṛtaṃ karma kṣapitaṃ vāpyavīcitaḥ |
śivāntaṃ tena muktirvā kanyākhye tu viśeṣataḥ || 88 ||
[Analyze grammar]

mahākālādikā rudrakoṭiratraiva bhārate |
gaṅgādipañcaśatikā janma tenātra durlabham || 89 ||
[Analyze grammar]

anyavarṣeṣu paśuvad bhogātkarmātivāhanam |
prāpyaṃ manorathātītamapi bhāratajanmanām || 90 ||
[Analyze grammar]

nānāvarṇāśramācārasukhaduḥkhavicitratā |
kanyādvīpe yatastena karmabhūḥ seyamuttamā || 91 ||
[Analyze grammar]

puṃsā sitāsitānyatra kurvatāṃ kila siddhyataḥ |
parāparau svarnirayāviti rauravavārtike || 92 ||
[Analyze grammar]

evaṃ meroradho jambūrabhito yaḥ sa vistarāt |
syāt saptadaśadhā khaṇḍairnavabhistu samāsataḥ || 93 ||
[Analyze grammar]

manoḥ svāyaṃbhuvasyāsan sutā daśa tatastrayaḥ |
prāvrajannatha jambvākhye rājā yo'gnīdhranāmakaḥ || 94 ||
[Analyze grammar]

tasyābhavannava sutāstato'yaṃ navakhaṇḍakaḥ |
nābhiryo navamastasya naptā bharata ārṣabhiḥ || 95 ||
[Analyze grammar]

tasyāṣṭau tanayāḥ sākaṃ kanyayā navamoṃ'śakaḥ |
bhuktaistairnavadhā tasmāllakṣayojanamātrakāt || 96 ||
[Analyze grammar]

lakṣaikamātro lavaṇastadbāhye'sya puro'drayaḥ |
ṛṣabho dundubhirdhūmraḥ kaṅkadroṇendavo hyudak || 97 ||
[Analyze grammar]

varāhanandanāśokāḥ paścāt sahabalāhakau |
dakṣiṇa cakramainākau vāḍavo'ntastayoḥ sthitaḥ || 98 ||
[Analyze grammar]

abdherdakṣiṇataḥ khākṣisahasrātikramād giriḥ |
vidyutvāṃstrisahasrocchridāyāmo'tra phalāśinaḥ || 99 ||
[Analyze grammar]

maladigdhā dīrghakeśaśmaśravo gosadharmakāḥ |
nagnāḥ saṃvatsarāśītijīvinastṛṇabhojinaḥ || 100 ||
[Analyze grammar]

niryantrāṇi sadā tatra dvārāṇi bilasiddhaye |
ityetad gurubhirgītaṃ śrīmadrauravaśāsane || 101 ||
[Analyze grammar]

itthaṃ ya eṣa lavaṇasamudraḥ pratipāditaḥ |
tadbahiḥ ṣaḍamī dvīpāḥ pratyekaṃ svārṇavairvṛtāḥ || 102 ||
[Analyze grammar]

kramadviguṇitāḥ ṣaḍbhirmanuputrairadhiṣṭhitāḥ |
śākakuśakrauñcāḥ śalmaligomedhābjamiti ṣaḍdvīpāḥ |
kṣīradadhisarpiraikṣavamadirāmadhurāmbukāḥ ṣaḍambudhayaḥ || 103 ||
[Analyze grammar]

medhātithirvapuṣmāñjyotiṣmāndyutimatā havī rājā |
saṃvara iti śākādiṣu jambudvīpe nyarūpi cāgnīdhraḥ || 104 ||
[Analyze grammar]

girisaptakaparikalpitatāvatkhaṇḍāstu pañca śākādyāḥ |
puṣkarasaṃjño dvidalo hariyamavaruṇendavo'tra pūrvādau || 105 ||
[Analyze grammar]

tripañcāśacca lakṣāṇi dvikoṭyayutapañcakam |
svādvarṇavāntaṃ mervardhādyojananāmiyaṃ pramā || 106 ||
[Analyze grammar]

saptamajaladherbāhye haimī bhūḥ koṭidaśakamatha lakṣam |
ucchrityā vistārādayutaṃ loketarācalaḥ kathitaḥ || 107 ||
[Analyze grammar]

lokālokadigaṣṭaka saṃsthaṃ rudrāṣṭakaṃ salokeśam |
kevalamityapi kecillokālokāntare ravirna bahiḥ || 108 ||
[Analyze grammar]

pitṛdevapathāvasyodagdakṣiṇagau svajātpare vīthyau |
bhānoruttaradakṣiṇamayanadvayametadeva kathayanti || 109 ||
[Analyze grammar]

sarveṣāmuttaro merurlokālokaśca dakṣiṇaḥ |
udayāstamayāvitthaṃ sūryasya paribhāvayet || 110 ||
[Analyze grammar]

ardharātro'marāvatyāṃ yāmyāyāmastameva ca |
madhyandinaṃ tadvāruṇyāṃ saumye sūryodayaḥ smṛtaḥ || 111 ||
[Analyze grammar]

udayo yo'marāvatyāṃ so'rdharātro yamālaye |
ke'staṃ saumye ca madhyāhna itthaṃ sūryagatāgate || 112 ||
[Analyze grammar]

pañcatriṃ śatkoṭisaṃkhyā lakṣāṇyekonaviṃśatiḥ |
catvāriṃśatsahasrāṇi dhvāntaṃ lokācalādbahiḥ || 113 ||
[Analyze grammar]

saptasāgaramānastu garbhodākhyaḥ samudrarāṭ |
lokālokasya parato yadgarbhe nikhilaiva bhūḥ || 114 ||
[Analyze grammar]

siddhātantre'tra garbhābdhestīre kauśeyasaṃjñitam |
maṇḍalaṃ garuḍastatra siddhapakṣasamāvṛtaḥ || 115 ||
[Analyze grammar]

krīḍantiṃ parvatāgre te nava cātra kulādrayaḥ |
tata uṣṇodakāstriṃśannadyaḥpātālagāstataḥ || 116 ||
[Analyze grammar]

caturdiṅnaimirodyānaṃ yoginīsevitaṃ sadā |
tato merustato nāgā meghā hemāṇḍakaṃ tataḥ || 117 ||
[Analyze grammar]

brahmaṇo'ṇḍakaṭāhena merorardhena koṭayaḥ |
pañcāśadevaṃ daśasu dicu bhūrlokasaṃjñitam || 118 ||
[Analyze grammar]

paśukhagamṛgatarumānuṣasarīsṛpaiḥ ṣaḍbhireṣa bhūrlokaḥ |
vyāptaḥ piśācarakṣogandharvāṇāṃ sayakṣāṇām || 119 ||
[Analyze grammar]

vidyābhṛtāṃ ca kiṃ vā bahunā sarvasya bhūtasargasya |
abhimānato yatheṣṭaṃ bhogasthānaṃ nivāsaśca || 120 ||
[Analyze grammar]

bhuvarlokastathā tvārkāllakṣamekaṃ tadantare |
daśa vāyupathāste ca pratyekamayutāntarāḥ || 121 ||
[Analyze grammar]

ādyo vāyupathastatra vitataḥ paricarcyate |
pañcāśadyojanordhve syādṛtarddhirnāma mārutaḥ || 122 ||
[Analyze grammar]

āpyāyakaḥ sa jantūnāṃ tataḥ prācetaso bhavet |
pañcāśadyojanādūrdhva tasmādūrdhva śatena tu || 123 ||
[Analyze grammar]

senānīvāyuratraite mūkameghāstaḍinmucaḥ |
ye mahyāḥ krośamātreṇa tiṣṭhanti jalavarṣiṇaḥ || 124 ||
[Analyze grammar]

tebhya ūrdhva śatānmeghā bhekādiprāṇivarṣiṇaḥ |
pañcāśadūrdhvamogho'tra viṣavāripravarṣiṇaḥ || 125 ||
[Analyze grammar]

meghāḥ skandodbhavāścānye piśācā oghamārute |
tataḥ pañcāśadūrdhvaṃ syurmeghā mārakasaṃjñakāḥ || 126 ||
[Analyze grammar]

tatra sthāne mahādevajanmānaste vināyakāḥ |
ye haranti kṛtaṃ karma narāṇāmakṛtātmanām || 127 ||
[Analyze grammar]

pañcāśadūrdhvaṃ vajrāṅko vāyuratropalāmbudāḥ |
vidyādharādhamāścātra vajrāṅke saṃpratiṣṭhitāḥ || 128 ||
[Analyze grammar]

ye vidyāpauruṣe ye ca śmaśānādiprasādhane |
mṛtāstatsiddhisiddhāste vajrāṃke maruti sthitāḥ || 129 ||
[Analyze grammar]

pañcāśadūrdhvaṃ vajrāṃkādvaidyuto'śanivarṣiṇaḥ |
abdā apsarasaścātra ye ca puṇyakṛto narāḥ || 130 ||
[Analyze grammar]

bhṛgau vahnau jale ye ca saṃgrāme cānivartinaḥ |
gograhe vadhyamokṣe vā mṛtāste vaidyute sthitāḥ || 131 ||
[Analyze grammar]

vaidyutādraivatastāvāṃstatra puṣṭivahāmbudāḥ |
ūrdhvaṃ ca rogāmbumucaḥ saṃvartāstadanantare || 132 ||
[Analyze grammar]

rocanāñjanabhasmādisiddhāstatraiva raivate |
krodhodakamucāṃ sthānaṃ viṣāvartaḥ sa mārutaḥ || 133 ||
[Analyze grammar]

pañcāśadūrdhvaṃ tatraiva durdinābdā hutāśajāḥ |
vidyādharaviśeṣāśca tathā ye parameśvaram || 134 ||
[Analyze grammar]

gāndharveṇa sadārcanti viṣāvarte'tha te sthitāḥ |
viṣāvartācchatādūrdhva durjayaḥ śvāsasaṃbhavaḥ || 135 ||
[Analyze grammar]

brahmaṇo'tra sthitā meghāḥ pralaye vātakāriṇaḥ |
puṣkarābdā vāyugamā gandharvāśca parāvahe || 136 ||
[Analyze grammar]

jīmūtameghāstatsaṃjñāstathā vidyādharottamāḥ |
ye ca rūpavratā lokā āvahe te pratiṣṭhitāḥ || 137 ||
[Analyze grammar]

mahāvahe tvīśakṛtāḥ prajāhitakarāmbudāḥ |
mahāparivahe meghāḥ kapālotthā maheśituḥ || 138 ||
[Analyze grammar]

mahāparivahānto'yamṛtarddheḥ prāṅmarutpathaḥ |
agnikanyā mātaraśca rudraśaktyā tvadhiṣṭhitāḥ || 139 ||
[Analyze grammar]

dvitīye tatpare siddhacāraṇā nijakarmajāḥ |
turye devāyudhānyaṣṭau diggajāḥ pañcame punaḥ || 140 ||
[Analyze grammar]

ṣaṣṭhe garutmānanyasmiṅgaṅgānyatra vṛṣo vibhuḥ |
dakṣastu navame brahmaśaktyā samadhitiṣṭhitaḥ || 141 ||
[Analyze grammar]

daśame vasavo rudrā ādityāśca marutpathe |
navayojanasāhasro vigraho'rkasya maṇḍalam || 142 ||
[Analyze grammar]

triguṇaṃ jñānaśaktiḥ sā tapatyarkatayā prabhoḥ |
svarlokastu bhuvarlokāddhruvāntaṃ paribhāṣyate || 143 ||
[Analyze grammar]

sūryāllakṣeṇa śītāṃśuḥ kriyāśaktiḥ śivasya sā |
candrāllakṣeṇa nākṣatraṃ tato lakṣadvayena tu || 144 ||
[Analyze grammar]

pratyekaṃ bhaumataḥ sūryasutānte pañcakaṃ viduḥ |
saurāllakṣeṇa saptarṣivargastasmāddhruvastathā || 145 ||
[Analyze grammar]

brahmaivāpararūpeṇa brahmasthāne dhruvo'calaḥ |
medhībhūto vimānānāṃ sarveṣāmupari dhruvaḥ || 146 ||
[Analyze grammar]

atra baddhāni sarvāṇyapyūhyante'nilamaṇḍale |
svassapta mārutaskandhā āmeghādyāḥ pradhānataḥ || 147 ||
[Analyze grammar]

itaśca kratuhotrādi kṛtvā jñānavivarjitāḥ |
svaryānti tatkṣaye lokaṃ mānuṣyaṃ puṇyaśeṣataḥ || 148 ||
[Analyze grammar]

evaṃ bhūmerdhruvāntaṃ syāllakṣāṇi daśa pañca ca |
dve koṭī pañca cāśītirlakṣāṇi svargato mahān || 149 ||
[Analyze grammar]

mārkaṇḍādyā ṛṣimunisiddhāstatra pratiṣṭhitāḥ |
nivartitādhikārāśca devā mahati saṃsthitāḥ || 150 ||
[Analyze grammar]

mahāntarāle tatrānye tvadhikārabhujo janāḥ |
aṣṭau koṭyo mahallokājjano'tra kapilādayaḥ || 151 ||
[Analyze grammar]

tiṣṭhanti sādhyāstatraiva bahavaḥ sukhabhāginaḥ |
janāttaporkakoṭyo'tra sanakādyā mahādhiyaḥ || 152 ||
[Analyze grammar]

prajāpatīnāṃ tatrādhikāro brahmātmajanmanām |
brahmālayastu tapasaḥ satyaḥ ṣoḍaśa koṭayaḥ || 153 ||
[Analyze grammar]

tatra sthitaḥ sa svayambhūrviśvamāviṣkarotyadaḥ |
satye vedāstathā cānye karmadhyānena bhāvitāḥ || 154 ||
[Analyze grammar]

ānandaniṣṭhāstatrordhvekoṭirvairiñcamāsanam |
brahmāsanātkoṭiyugmaṃ puraṃ viṣṇornirūpitam || 155 ||
[Analyze grammar]

dhyānapūjājapairviṣṇorbhaktā gacchanti tatpadam |
vaiṣṇavātsaptakoṭībhirbhuvanaṃ parameśituḥ || 156 ||
[Analyze grammar]

rudrasya sṛṣṭisaṃhārakarturbrahmāṇḍavartmani |
dīkṣājñānavihīnā ye liṅgārādhanatatparāḥ || 157 ||
[Analyze grammar]

te yāntyaṇḍāntare raudraṃ puraṃ nādhaḥ kadācana |
tatsthāḥ sarve śivaṃ yānti rudrāḥ śrīkaṇṭhadīkṣitāḥ || 158 ||
[Analyze grammar]

adhikārakṣaye sākaṃ rudrakanyāgaṇena te |
puraṃ puraṃ ca rudrordhvamuttarottaravṛddhitaḥ || 159 ||
[Analyze grammar]

brahmāṇḍādhaśca rudrordhva daṇḍapāṇeḥ puraṃ sa ca |
śivecchayā dṛṇātyaṇḍaṃ mokṣamārga karoti ca || 160 ||
[Analyze grammar]

śarvarudrau bhīmabhavāvugro devo mahānatha |
īśāna iti bhūrlokāt sapta lokeśvarāḥ śivāḥ || 161 ||
[Analyze grammar]

sthūlairviśeṣairārabdhāḥ sapta lokāḥ pare punaḥ |
sūkṣmairiti guruścaiva rurau samyaṅnyarūpayat || 162 ||
[Analyze grammar]

ye brahmaṇādisarge svaśarīrānnirmitāḥ prabhūtākhyāḥ |
sthūlāḥ pañca viśeṣāḥ saptāmī tanmayā lokāḥ || 163 ||
[Analyze grammar]

parato liṅgādhāraiḥ sūkṣmaistanmātrajairmahābhūtaiḥ |
lokānāmāvaraṇairviṣṭabhya parasperaṇa gandhādyaiḥ || 164 ||
[Analyze grammar]

kālāgnerdaṇḍapāṇyantamaṣṭānavatikoṭayaḥ |
ata ūrdhvaṃ kaṭāho'ṇḍe sa ghanaḥ koṭiyojanam || 165 ||
[Analyze grammar]

pañcāśatkoṭayaścordhvaṃ bhūpṛṣṭhādadharaṃ tathā |
evaṃ koṭiśataṃ bhūḥ syāt sauvarṇastaṇḍulastataḥ || 166 ||
[Analyze grammar]

śatarudrāvadhirhuphaṭ bhedayettattu duḥśamam |
pratidikkaṃ daśa daśetyevaṃ rudraśataṃ bahiḥ || 167 ||
[Analyze grammar]

brahmāṇḍādhārakaṃ tacca svaprabhāveṇa sarvataḥ |
aṇḍasvarūpaṃ gurubhiścoktaṃ śrīrauravādiṣu || 168 ||
[Analyze grammar]

vyakterabhimukhībhūtaḥ pracyutaḥ śaktirūpataḥ |
āvāpavānanirbhakto vastupiṇḍo'ṇḍa ucyate || 169 ||
[Analyze grammar]

tamoleśānuviddhasya kapālaṃ sattvamuttaram |
rajo'nuviddhaṃ nirmṛṣṭaṃ sattvamasyādharaṃ tamaḥ || 170 ||
[Analyze grammar]

vastupiṇḍa iti proktaṃ śivaśaktisamūhabhāk |
aṇḍaḥ syāditi tadvyaktau saṃmukhībhāva ucyate || 171 ||
[Analyze grammar]

tathāpi śivamagnānāṃ śaktīnāmaṇḍatā bhavet |
tadartha vākyamaparaṃ tā hi na cyutaśaktitaḥ || 172 ||
[Analyze grammar]

tanvakṣādau mā prasāṅkṣīdaṇḍateti padāntaram |
tanvakṣādiṣu naivāste kasyāpyāvāpanaṃ yataḥ || 173 ||
[Analyze grammar]

tanvakṣasamudāyatve kathamekatvamityataḥ |
anirbhakta iti proktaṃ sājātyaparidarśakam || 174 ||
[Analyze grammar]

vināpi vastupiṇḍākhyapadenaikaikaśo bhavet |
tattveṣvaṇḍasvabhāvatvaṃ nanvevamapi kiṃ na tat || 175 ||
[Analyze grammar]

guṇatanmātrabhūtaughamaye tattve prasajyate |
ucyate vastuśabdena tanvakṣabhuvanātmakam || 176 ||
[Analyze grammar]

rūpamuktaṃ yatastena tatsamūho'ṇḍa ucyate |
bhavecca tatsamūhatvaṃ patyurviśvavapurbhṛtaḥ || 177 ||
[Analyze grammar]

tadartha bhedakānyanyānyupāttānīti darśitam |
tāvanmātrāsvavasthāsu māyādhīne'dhvamaṇḍale || 178 ||
[Analyze grammar]

mā bhūdaṇḍatvamityāhuranye bhedakayojanam |
itthamuktaviriñcāṇḍamṛto rudrāḥ śataṃ hi yat || 179 ||
[Analyze grammar]

teṣāṃ sve patayo rudrā ekādaśa mahārciṣaḥ |
ananto'tha kapālyāgniryamanairṛtakau balaḥ || 180 ||
[Analyze grammar]

śīghro nidhīśo vidyeśaḥ śambhuḥ savīrabhadrakaḥ |
madhu madhukṛtaḥ kadambaṃ kesarajālāni yadvadāvṛṇate || 181 ||
[Analyze grammar]

tadvatte śivarudrā brahmāṇḍamasaṃkhyaparivārāḥ |
śarāṣṭaniyutaṃ koṭirityeṣāṃ sanniveśanam || 182 ||
[Analyze grammar]

śrīkaṇṭhādhiṣṭhitāste ca sṛjanti saṃharanti ca |
īśvaratvaṃ diviṣadāmiti rauravavārtike || 183 ||
[Analyze grammar]

siddhātantre tu hemāṇḍācchatakoṭerbahiḥ śatam |
aṇḍānāṃ kramaśo dvidviguṇaṃ rūpyādiyojitam || 184 ||
[Analyze grammar]

teṣu krameṇa brahmāṇaḥ saṃsyurdviguṇajīvitāḥ |
kṣīyante kramaśaste ca tadante tattvamammayam || 185 ||
[Analyze grammar]

dharāto'tra jalādi syāduttarottarataḥ kramāt |
daśadhāhaṅkṛtāntaṃ dhīstasyāḥ syācchatadhā tataḥ || 186 ||
[Analyze grammar]

sahasradhā vyaktamataḥ pauṃsnaṃ daśasahasradhā |
niyatirlakṣadhā tasmāttasyāstu daśalakṣadhā || 187 ||
[Analyze grammar]

kalāntaṃ koṭidhā tasmānmāyā viddaśakoṭidhā |
īśvaraḥ śatakoṭiḥ syāttasmātkoṭisahasradhā || 188 ||
[Analyze grammar]

sādākhyaṃ vyaśnute tacca śaktirvṛndena saṃkhyayā |
vyāpinī sarvamadhvānaṃ vyāpyadevī vyavasthitā || 189 ||
[Analyze grammar]

aprameyaṃ tataḥ śuddhaṃ śivatattvaṃ paraṃ viduḥ |
jalādeḥ śivatattvāntaṃ na dṛṣṭaṃ kenacicchivāt || 190 ||
[Analyze grammar]

ṛte tataḥ śivajñānaṃ paramaṃ mokṣakāraṇam |
tathā cāha mahādevaḥ śrīmatsvacchandaśāsane || 191 ||
[Analyze grammar]

nānyathā mokṣamāyāti paśurjñānaśatairapi |
śivajñānaṃ na bhavati dīkṣāmaprāpya śāṅkarīm || 192 ||
[Analyze grammar]

prāktanī pārameśī sā pauruṣeyī ca sā punaḥ |
śatarudrordhvato bhadrakālyā nīlaprabhaṃ jayam || 193 ||
[Analyze grammar]

na yajñadānatapasā prāpyaṃ kālyāḥ puraṃ jayam |
tadbhaktāstatra gacchanti tanmaṇḍalasudīkṣitāḥ || 194 ||
[Analyze grammar]

nirbījadīkṣayā mokṣaṃ dadāti parameśvarī |
vidyeśāvaraṇe dīkṣāṃ yāvatīṃ kurute nṛṇām || 195 ||
[Analyze grammar]

tāvatīṃ gatimāyānti bhuvane'tra niveśitāḥ |
tataḥ koṭyā vīrabhadro yugāntāgnisamaprabhaḥ || 196 ||
[Analyze grammar]

vijayākhyaṃ puraṃ cāsya ye smaranto maheśvaram |
jaleṣu maruṣu cāgnau śiraśchedena vā mṛtāḥ || 197 ||
[Analyze grammar]

te yānti bodhamaiśānaṃ vīrabhadraṃ mahādyutim |
vairabhadrordhvataḥ koṭirviṣkambhādvistṛtaṃ tridhā || 198 ||
[Analyze grammar]

rudrāṇḍaṃ sālilaṃ tvaṇḍaṃ śakracāpākṛti sthitam |
ā vīrabhadrabhuvanādbhadrakālyālayāttathā || 199 ||
[Analyze grammar]

trayodaśabhiranyaiśca bhuvanairupaśobhitam |
tato bhuvaḥ sahādreḥ pūrgandhatanmātradhāraṇāt || 200 ||
[Analyze grammar]

mṛtā gacchanti tāṃ bhūmiṃ dharitryāḥ paramāṃ budhāḥ |
abdheḥ puraṃ tatastvāpyaṃ rasatanmātradhāraṇāt || 201 ||
[Analyze grammar]

tataḥ śriyaḥ puraṃ rudrakrīḍāvataraṇeṣvatha |
prayāgādau śrīgirau ca viśeṣānmaraṇena tat || 202 ||
[Analyze grammar]

sārasvataṃ puraṃ tasmācchabdabrahmavidāṃ padam |
rudrocitāstā mukhyatvādrudrebhyo'nyāstathā sthitāḥ || 203 ||
[Analyze grammar]

pureṣu bahudhā gaṅgā devādau śrīḥ sarasvatī |
lakulādyamareśāntā aṣṭāvapsu surādhipāḥ || 204 ||
[Analyze grammar]

tatastu taijasaṃ tattvaṃ śivāgneratra saṃsthitiḥ |
te cainaṃ vahnimāyānti vāhnīṃ ye dhāraṇāṃ śritāḥ || 205 ||
[Analyze grammar]

bhairavādiharīndvantaṃ taijase nāyakāṣṭakam |
prāṇasya bhuvanaṃ vāyordaśadhā daśadhā tu tat || 206 ||
[Analyze grammar]

dhyātvā tyaktvātha vā prāṇān kṛtvā tatraiva dhāraṇām |
taṃ viśanti mahātmāno vāyubhūtāḥ khamūrtayaḥ || 207 ||
[Analyze grammar]

bhīmādigayaparyantamaṣṭakaṃ vāyutattvagam |
khatattve bhuvanaṃ vyomnaḥ prāpyaṃ tadvyomadhāraṇāt || 208 ||
[Analyze grammar]

vastrāpadāntaṃ sthāṇvādi vyomatattve surāṣṭakam |
adīkṣitā ye bhūteṣu śivatattvābhimāninaḥ || 209 ||
[Analyze grammar]

jñānahīnā api prauḍhadhāraṇāste'ṇḍato bahiḥ |
dharābdhitejo'nilakhapuragā dīkṣitāśca vā || 210 ||
[Analyze grammar]

tāvatsaṃskārayogārthaṃ na paraṃ padamīhitum |
tathāvidhāvatāreṣu mṛtāścāyataneṣu ye || 211 ||
[Analyze grammar]

tatpadaṃ te samāsādya kramādyānti śivātmatām |
punaḥ punaridaṃ coktaṃ śrīmaddevyākhyayāmale || 212 ||
[Analyze grammar]

śrīkāmikāyāṃ kaśmīravarṇane coktavānvibhuḥ |
sureśvarīmahādhāmni ye mriyante ca tatpure || 213 ||
[Analyze grammar]

brāhmaṇādyāḥ saṅkarāntāḥ paśavaḥ sthāvarāntagāḥ |
rudrajātaya evaite ityāha bhagavāñchivaḥ || 214 ||
[Analyze grammar]

ākāśāvaraṇādūrdhvamahaṅkārādadhaḥ priye |
tanmātrādimano'ntānāṃ purāṇi śivaśāsane || 215 ||
[Analyze grammar]

pañcavarṇayutaṃ gandhatanmātramaṇḍalaṃ mahat |
ācchādya yojanānekakoṭibhiḥ sthitamantarā || 216 ||
[Analyze grammar]

evaṃ rasādimātrāṇāṃ maṇḍalāni svavarṇata |
śarvo bhavaḥ paśupatirīśo bhīma iti kramāt || 217 ||
[Analyze grammar]

tanmātreśā yadicchātaḥ śabdādyāḥ khādikāriṇaḥ |
tataḥ sūryenduvedānāṃ maṇḍalāni vibhurmahān || 218 ||
[Analyze grammar]

ugraścetyeṣu patayastebhyo'rkendū sayājakau |
ityaṣṭau tanavaḥ śaṃbhoryāḥ parāḥ parikīrtitāḥ || 219 ||
[Analyze grammar]

aparā brahmaṇo'ṇḍe tā vyāpya sarvaṃ vyavasthitāḥ |
kalpe kalpe prasūyante dharādyāstābhya eva tu || 220 ||
[Analyze grammar]

tato vāgādikarmākṣayuktaṃ karaṇamaṇḍalam |
agnīndraviṣṇumitrāḥ sabrahmāṇasteṣu nāyakāḥ || 221 ||
[Analyze grammar]

prakāśamaṇḍalaṃ tasmācchrutaṃ buddhyakṣapañcakam |
digvidyudarkavaruṇabhuvaḥ śrotrādidevatāḥ || 222 ||
[Analyze grammar]

prakāśamaṇḍalādūrdhvaṃ sthitaṃ pañcārthamaṇḍalam |
manomaṇḍalametasmāt somenādhiṣṭhitaṃ yataḥ || 223 ||
[Analyze grammar]

bāhyadeveṣvadhiṣṭhātā sāmyaiśvaryasukhātmakaḥ |
manodevastato divyaḥ somo vibhurudīritaḥ || 224 ||
[Analyze grammar]

tato'pi sakalākṣāṇāṃ yonerbuddhyakṣajanmanaḥ |
sthūlādicchagalāntāṣṭayuktaṃ cāhaṅkṛteḥ puram || 225 ||
[Analyze grammar]

buddhitattvaṃ tato devayonyaṣṭakapurādhipam |
paiśācaprabhṛtibrāhmaparyantaṃ tacca kīrtitam || 226 ||
[Analyze grammar]

etāni devayonīnāṃ sthānānyeva purāṇyataḥ |
avatīryātmajanmānaṃ dhyāyantaḥ saṃbhavanti te || 227 ||
[Analyze grammar]

parameśaniyogācca codyamānāśca māyayā |
niyāmitā niyatyā ca brahmaṇo'vyaktajanmanaḥ || 228 ||
[Analyze grammar]

vyajyante tena sargādau nāmarūpairanekadhā |
svāṃśanaiva mahātmāno na tyajanti svaketanam || 229 ||
[Analyze grammar]

uktaṃ ca śivatanāvidamadhikārapadasthitena guruṇā naḥ |
aṣṭānāṃ devānāṃ śaktyāvirbhāvayonayo hyetāḥ || 230 ||
[Analyze grammar]

tanubhogāḥ punareṣāmadhaḥ prabhūtātmakāḥ proktāḥ |
catvāriṃśattulyopabhogadeśādhikāni bhuvanāni || 231 ||
[Analyze grammar]

sādhanabhedātkevalamaṣṭakapañcakatayoktāni |
etāni bhaktiyogaprāṇatyāgādigamyāni || 232 ||
[Analyze grammar]

teṣūmāpatireva prabhuḥ svatantrendriyo vikaraṇātmā |
taratamayogena tato'pi devayonyaṣṭakaṃ lakṣyaṃ tu || 233 ||
[Analyze grammar]

lokānāmakṣāṇi ca viṣayaparicchittikaraṇāni |
gandhādermahadantādekādhikyena jātamaiśvaryam || 234 ||
[Analyze grammar]

aṇimādyātmakamasminpaiśācādye viriñcānte |
jñātvaivaṃ śodhayedbuddhiṃ sārdhaṃ puryaṣṭakendriyaiḥ || 235 ||
[Analyze grammar]

krodheśāṣṭakamānīlaṃ saṃvartādyaṃ tato viduḥ |
tejoṣṭakaṃ balādhyakṣaprabhṛtikrodhanāṣtakāt || 236 ||
[Analyze grammar]

akṛtādi tato buddhau yogāṣṭakamudāhṛtam |
svacchandaśāsane tattu mūle śrīpūrvaśāsane || 237 ||
[Analyze grammar]

yogāṣṭakapade yattu some śraikaṇṭhameva ca |
tato māyāpuraṃ bhūyaḥ śrīkaṇṭhasya ca kathyate || 238 ||
[Analyze grammar]

tena dvitīyaṃ bhuvanaṃ tayoḥ pratyekamucyate |
tatra māyāpuraṃ devyā yayā viśvamadhiṣṭhitam || 239 ||
[Analyze grammar]

pratikalpaṃ nāmabhedairbhaṇyate sā maheśvarī |
umāpateḥ puraṃ paścānmātṛbhiḥ parivāritam || 240 ||
[Analyze grammar]

śrīkaṇṭha eva parayā mūrtyomāpatirucyate |
brāhmyaiśī skandajā hārī vārāhyaindrī saviccikā || 241 ||
[Analyze grammar]

pītā śuklā pītanīle nīlā śuklāruṇā kramāt |
agnīśasaumyayāmyāpyapūrvanairṛtagāstu tāḥ || 242 ||
[Analyze grammar]

aṃśena mānuṣe loke dhātrā tā hyavatāritāḥ |
svacchandāstāḥ parāścānyāḥ pare vyomni vyavasthitāḥ || 243 ||
[Analyze grammar]

svacchandaṃ tā niṣevante saptadheyamumā yataḥ |
umāpatipurasyordhva sthitaṃ mūrtyaṣṭakaṃ param || 244 ||
[Analyze grammar]

śarvādikaṃ yasya sṛṣṭirdharādyā yājakāntataḥ |
tābhya īśānamūrtiryā sā merau saṃpratiṣṭhitā || 245 ||
[Analyze grammar]

śrīkaṇṭhaḥ sphaṭikādrau sā vyāptā tanvaṣṭakairjagat |
ye yogaṃ saguṇaṃ śambhoḥ saṃyatāḥ paryupāsate || 246 ||
[Analyze grammar]

tanmaṇḍalaṃ vā dṛṣṭvaiva muktadvaitā hṛtatrayāḥ |
guṇānāmādharauttaryācchuddhāśuddhatvasaṃsthiteḥ || 247 ||
[Analyze grammar]

tāratamyācca yogasya bhedātphalavicitratā |
tato bhogaphalāvāptibhedādbhedo'yamucyate || 248 ||
[Analyze grammar]

mūrtyaṣṭakopariṣṭāttu suśivā dvādaśoditāḥ |
vāmādyekaśivāntāste kuṅkumābhāḥ sutejasaḥ || 249 ||
[Analyze grammar]

tadūrdhva vīrabhadrākhyo maṇḍalādhipatiḥ sthitaḥ |
yatta tsāyujyamāpannaḥ sa tena saha modate || 250 ||
[Analyze grammar]

tato'pyaṅguṣṭhamātrāntaṃ mahādevāṣṭakaṃ bhavet |
buddhitattvamidaṃ proktaṃ devayonyaṣṭakāditaḥ || 251 ||
[Analyze grammar]

mahādevāṣṭakānte tad yogāṣṭakamihoditam |
tatra śraikaṇṭhamuktaṃ yat tasyaivomāpatistathā || 252 ||
[Analyze grammar]

mūrtayaḥ suśivā vīro mahādevāṣṭakaṃ vapuḥ |
upariṣṭāddhiyo'dhaśca prakṛterguṇasaṃjñitam || 253 ||
[Analyze grammar]

tattvaṃ tatra tu saṃkṣubdhā guṇāḥ prasuvate dhiyam |
na vaiṣamyamanāpannaṃ kāraṇaṃ kāryasūtaye || 254 ||
[Analyze grammar]

guṇasāmyatmikā tena prakṛtiḥ kāraṇaṃ bhavet |
nanvevaṃ sāpi saṃkṣobhaṃ vinā tānviṣamānguṇān || 255 ||
[Analyze grammar]

kathaṃ suvīta tatrādye kṣobhe syādanavasthitiḥ |
sāṃkhyasya doṣa evāyaṃ yadi vā tena te guṇāḥ || 256 ||
[Analyze grammar]

avyaktamiṣṭāḥ sāmyaṃ tu saṅgamātraṃ na cetarat |
asmākaṃ tu svatantreśatathecchākṣobhasaṃgatam || 257 ||
[Analyze grammar]

avyaktaṃ buddhitattvasya kāraṇaṃ kṣobhitā guṇāḥ |
nanu tattveśvarecchāto yaḥ kṣobhaḥ prakṛteḥ purā || 258 ||
[Analyze grammar]

tadeva buddhitattvaṃ syāt kimanyaiḥ kalpitairguṇaiḥ |
naitatkāraṇatārūpaparāmarśāvarodhi yat || 259 ||
[Analyze grammar]

kṣobhāntaraṃ tataḥ kārya bījocchūnāṅkurādivat |
kramāttamorajaḥsattve gurūṇāṃ paṅktayaḥ sthitāḥ || 260 ||
[Analyze grammar]

tisro dvātriṃśadekātastriṃśadapyekaviṃśatiḥ |
svajñanayogabalataḥ krīḍanto daiśikottamāḥ || 261 ||
[Analyze grammar]

trinetrāḥ pāśanirmuktāste'trānugrahakāriṇaḥ |
buddheśca guṇaparyantamubhe saptādhike śate || 262 ||
[Analyze grammar]

rudrāṇāṃ bhuvanānāṃ ca mukhyato'nye tadantare |
yogāṣṭakaṃ guṇaskandhe proktaṃ śivatanau punaḥ || 263 ||
[Analyze grammar]

yonīratītya gauṇe skandhe syuryogadātāraḥ |
akṛtakṛtavibhuviriñcā harirguhaḥ kramavaśāttato devī || 264 ||
[Analyze grammar]

karaṇānyaṇimādiguṇāḥ kāryāṇi pratyayaprapañcaśca |
avyaktādutpannā guṇāśca sattvādayo'mīṣām || 265 ||
[Analyze grammar]

dharmajñānavirāgānaiśvaryaṃ tatphalāni vividhāni |
yacchanti guṇebhyo'mī puruṣebhyo yogadātāraḥ || 266 ||
[Analyze grammar]

tebhyaḥ parato bhuvanaṃ sattvādiguṇāsanasya devasya |
sakalajagadekamāturbhartuḥ śrīkaṇṭhanāthasya || 267 ||
[Analyze grammar]

yenomāguhanīlabrahmaṛbhukṣakṛtākṛtādibhuvaneṣu |
graharūpiṇyā śaktyā prābhvyādhiṣṭhāni bhūtāni || 268 ||
[Analyze grammar]

upasaṃjihīrṣuriha yaścaturānanapaṅkajaṃ samāviśya |
dagdhvā caturo lokāñjanalokānnirmiṇoti punaḥ || 269 ||
[Analyze grammar]

yasyecchātaḥ sattvādiguṇaśarīrā visṛjati rudrāṇī |
anukalpo rudrāṇyā vedī tatrejyate'nukalpena || 270 ||
[Analyze grammar]

paśupatirindropendraviriñcairatha tadupalambhato devaiḥ |
gandharvayakṣarākṣasapitṛmunibhiścitritāstathā yāgāḥ || 271 ||
[Analyze grammar]

guṇānāṃ yatparaṃ sāmyaṃ tadavyaktaṃ guṇordhvataḥ |
krodheśacaṇḍasaṃvartā jyotiḥpiṅgalasūrakau || 272 ||
[Analyze grammar]

pañcāntakaikavīrau ca śikhodaścāṣṭa tatra te |
gahanaṃ puruṣanidhānaṃ prakṛtirmūlaṃ pradhānamavyaktam || 273 ||
[Analyze grammar]

guṇakāraṇamityete māyāprabhavasya paryāyāḥ |
yāvantaḥ kṣetrajñāḥ sahajāgantukamalopadigdhacitaḥ || 274 ||
[Analyze grammar]

te sarve'tra vinihitā rudrāśca tadutthabhogabhujaḥ |
mūḍhavivṛttavilīnaiḥ karaṇaiḥ kecittu vikaraṇakāḥ || 275 ||
[Analyze grammar]

akṛtādhiṣṭhānatayā kṛtyāśaktāni mūḍhāni |
pratiniyataviṣayabhāñji sphuṭāni śāstre vivṛttāni || 276 ||
[Analyze grammar]

bhagnāni mahāpralaye sṛṣṭau notpāditāni līnāni |
icchādhīnāni punarvikaraṇasaṃjñāni kāryamapyevam || 277 ||
[Analyze grammar]

puṃstattve tuṣṭinavakaṃ siddhayo'ṣṭau ca tatpuraḥ |
tāvatya evāṇimādibhuvanāṣṭakameva ca || 278 ||
[Analyze grammar]

atattve tattvabuddhyā yaḥ santoṣastuṣṭiratra sā |
heye'pyādeyadhīḥ siddhiḥ tathā coktaṃ hi kāpilaiḥ || 279 ||
[Analyze grammar]

ādhyātmikāścatasraḥ prakṛtyupādānakālabhāgyākhyāḥ |
pañca viṣayoparamato'rjanarakṣāsaṅgasaṃkṣayavighātaiḥ || 280 ||
[Analyze grammar]

ūhaḥ śabdo'dhyayanaṃ duḥkhavighātāstrayaḥ suhṛtprāptiḥ |
dānaṃ ca siddhayo'ṣṭau siddheḥ pūrvo'ṅkuśastrividhaḥ || 281 ||
[Analyze grammar]

aṇimādyūrdhvatastisraḥ paṅktayo guruśiṣyagāḥ |
tatrāpi triguṇacchāyāyogāt tritvamudāhṛtam || 282 ||
[Analyze grammar]

nāḍīvidyāṣṭakaṃ cordhvaṃ paṅktīnāṃ syādiḍādikam |
puṃsi nādamayī śaktiḥ prasarākhyā ca yatsthitā || 283 ||
[Analyze grammar]

na hyakartā pumānkartuḥ kāraṇatvaṃ ca saṃsthitam |
akartaryapi vā puṃsi sahakāritayā sthite || 284 ||
[Analyze grammar]

śeṣakāryātmataiṣṭavyānyathā satkāryahānitaḥ |
tasmāttathāvidhe kārye yā śaktiḥ puruṣasya sā || 285 ||
[Analyze grammar]

tāvanti rūpāṇyādāya pūrṇatāmadhigacchati |
nāḍyaṣṭakordhve kathitaṃ vigrahāṣṭakamucyate || 286 ||
[Analyze grammar]

kāryaṃ heturduḥkhaṃ sukhaṃ ca vijñānasādhyakaraṇāni |
sādhanamiti vigrahatāyugaṣṭakaṃ bhavati puṃstattve || 287 ||
[Analyze grammar]

bhuvanaṃ dehadharmāṇāṃ daśānāṃ vigrahāṣṭakāt |
ahiṃsā satyamasteyaṃ brahmākalkākrudho guroḥ || 288 ||
[Analyze grammar]

śuśrūṣāśaucasantoṣā ṛjuteti daśoditāḥ |
puṃstattva eva gandhāntaṃ sthitaṃ ṣoḍaśakaṃ punaḥ || 289 ||
[Analyze grammar]

ārabhya dehapāśākhyaṃ puraṃ buddhiguṇāstataḥ |
tatraivāṣṭāvahaṃkārastridhā kāmādikāstathā || 290 ||
[Analyze grammar]

pāśā āgantukagāṇeśavaidyeśvarabheditāḥ |
trividhāste sthitāḥ puṃsi mokṣamārgoparodhakāḥ || 291 ||
[Analyze grammar]

yatkiṃcitparamādvaitasaṃvitsvātantryasundarāt |
parācchivāduktarūpādanyattatpāśa ucyate || 292 ||
[Analyze grammar]

tadevaṃ puṃstvamāpanne pūrṇe'pi parameśvare |
tatsvarūpāparijñānaṃ citraṃ hi puruṣāstataḥ || 293 ||
[Analyze grammar]

uktānuktāstu ye pāśāḥ paratantroktalakṣaṇāḥ |
te puṃsi sarve tāṃstatra śodhayanmucyate bhavāt || 294 ||
[Analyze grammar]

puṃsa ūrdhva tu niyatistatrasthāḥ śaṃkarā daśa |
hemābhāḥ susitāḥ kālatattve tu daśa te śivāḥ || 295 ||
[Analyze grammar]

koṭiḥ ṣoḍaśasāhasraṃ pratyekaṃ parivāriṇaḥ |
rāge vīreśabhuvanaṃ gurvantevāsināṃ puram || 296 ||
[Analyze grammar]

puraṃ cāśuddhavidyāyāṃ syācchaktinavakojjvalam |
manonmanyantagāstāśca vāmādyāḥ parikīrtitāḥ || 297 ||
[Analyze grammar]

kalāyāṃ syānmahādevatrayasya puramuttamam |
tato māyā tripuṭikā mukhyato'nantakoṭibhiḥ || 298 ||
[Analyze grammar]

ākrāntā sā bhagabilaiḥ proktaṃ śaivyāṃ tanau punaḥ |
aṅguṣṭhamātraparyantaṃ mahādevāṣṭakaṃ niśi || 299 ||
[Analyze grammar]

cakrāṣṭakādhipatyena tathā śrīmālinīmate |
vāmādyāḥ puruṣādau ye proktāḥ śrīpūrvaśāsane || 300 ||
[Analyze grammar]

te māyātattva evoktāstanau śaivyāmanantataḥ |
kapālavratinaḥ svāṅgahotāraḥ kaṣṭatāpasāḥ || 301 ||
[Analyze grammar]

sarvābhayāḥ khaḍgadhārāvratāstattattvavedinaḥ |
kramāttattattvamāyānti yatreśo'nanta ucyate || 302 ||
[Analyze grammar]

uktaṃ ca tasya parataḥ sthānamanantādhipasya devasya |
sthitivilayasargakarturguhābhagadvārapālasya || 303 ||
[Analyze grammar]

dharmānaṇimādiguṇāñjñānāni tapaḥsukhāni yogāṃśca |
māyābilātpradatte puṃsāṃ niṣkṛṣya niṣkṛṣya || 304 ||
[Analyze grammar]

tacchaktīddhasvabalā guhādhikārāndhakāraguṇadīpāḥ |
sarve'nantapramukhā dīpyante śatabhavapramukhāntāḥ || 305 ||
[Analyze grammar]

so'vyaktamadhiṣṭhāya prakaroti jaganniyogataḥ śambhoḥ |
śuddhāśuddhasroto'dhikārahetuḥ śivo yasmāt || 306 ||
[Analyze grammar]

śivaguṇayoge tasmin mahati pade ye pratiṣṭhitāḥ prathamam |
te'nantāderjagataḥ sargasthitivilayakartāraḥ || 307 ||
[Analyze grammar]

māyābilamidamuktaṃ paratastu guhā jagadyoniḥ |
utpattyā teṣvasyāḥ patiśaktikṣobhamanuvidhīyamāneṣu || 308 ||
[Analyze grammar]

yonivivareṣu nānākāmasamṛddheṣu bhagasaṃjñā |
kāmayate patirenāmicchānuvidhāyinīṃ yadā devīm || 309 ||
[Analyze grammar]

pratibhagamavyaktādyāḥ prajāstadāsyāḥ prajāyante |
teṣāmatisūkṣmāṇāmetāvattvaṃ na varṇyate vidhiṣu || 310 ||
[Analyze grammar]

avavarakāṇyekasminyadvatsāle bahūni baddhāni |
yonibilānyekasmiṃstadvanmāyāśiraḥsāle || 311 ||
[Analyze grammar]

māyāpaṭalaiḥ sūkṣmaiḥ kuḍyaiḥ pihitāḥ parasparamadṛśyāḥ |
nivasanti tatra rudrāḥ sukhinaḥ pratibilamasaṃkhyātāḥ || 312 ||
[Analyze grammar]

sthāne sāyujyagatāḥ sāmīpyagatāḥ pare salokasthāḥ |
pratibhuvanamevamayaṃ nivāsināṃ gurubhiruddiṣṭaḥ || 313 ||
[Analyze grammar]

api sarvasiddhavācaḥ kṣīyerandīrghakālamudgīrṇāḥ |
na punaryonyānantyāducyante srotasāṃ saṃkhyāḥ || 314 ||
[Analyze grammar]

tasmānnirayādyekaṃ yatproktaṃ dvārapālaparyantam |
srotastenānyānyapi tulyavidhānāni vedyāni || 315 ||
[Analyze grammar]

avyaktakale guhayā prakṛtikalābhyāṃ vikāra ātmīyaḥ |
otaḥ proto vyāptaḥ kalitaḥ pūrṇaḥ parikṣiptaḥ || 316 ||
[Analyze grammar]

madhye puṭatrayaṃ tasyā rudrāḥ ṣaḍadhare'ntare |
eka ūrdhve ca pañceti dvādaśaite nirūpitāḥ || 317 ||
[Analyze grammar]

gahanāsādhyau hariharadaśeśvarau trikalagopatī ṣaḍime |
madhye'nantaḥ kṣemo dvijeśavidyeśaviśvaśivāḥ || 318 ||
[Analyze grammar]

iti pañca teṣu pañcasu ṣaṭsu ca puṭageṣu tatparāvṛttyā |
parivarttate sthitiḥ kila devo'nantastu sarvathā madhye || 319 ||
[Analyze grammar]

ūrdhvādharagakapālakapuṭaṣaṭkayugena tatparāvṛttyā |
madhyato'ṣṭābhirdiksthairvyāpto granthirmataṅgaśāstroktaḥ || 320 ||
[Analyze grammar]

śrīsāraśāsane punareṣā ṣaṭpuṭatayā vinirdiṣṭā |
granthyākhyamidaṃ tattvaṃ māyākāryaṃ tato māyā || 321 ||
[Analyze grammar]

māyātattvaṃ vibhu kila gahanamarūpaṃ samastavilayapadam |
tatra na bhuvanavibhāgo yukto granthāvasau tasmāt || 322 ||
[Analyze grammar]

māyātattvādhipatiḥ so'nantaḥ samuditānvicāryāṇūn |
yugapatkṣobhayati niśāṃ sā sūte saṃpuṭairanantaiḥ svaiḥ || 323 ||
[Analyze grammar]

tena kalādidharāntaṃ yaduktamāvaraṇajālamakhilaṃ tat |
niḥsaṃkhyaṃ ca vicitraṃ māyaivaikā tvabhinneyam || 324 ||
[Analyze grammar]

uktaṃ śrīpūrvaśāstre ca dharāvyaktātmakaṃ dvayam |
asaṃkhyātaṃ niśāśaktisaṃjñaṃ tvekasvarūpakam || 325 ||
[Analyze grammar]

pāśāḥ puroktāḥ praṇavāḥ pañcamānāṣṭakaṃ muneḥ |
kulaṃ yoniśca vāgīśī yasyāṃ jāto na jāyate || 326 ||
[Analyze grammar]

dīkṣākāle'dharādhvasthaśuddhau yaccādharādhvagam |
anantasya samīpe tu tatsarvaṃ pariniṣṭhitam || 327 ||
[Analyze grammar]

sādhyo dātā damano dhyāno bhasmeti bindavaḥ pañca |
pañcārthaguhyarudrāṅkuśahṛdayalakṣaṇaṃ ca savyūham || 328 ||
[Analyze grammar]

ākarṣādarśau cetyaṣṭakametatpramāṇānām |
aluptavibhavāḥ sarve māyātattvādhikāriṇaḥ || 329 ||
[Analyze grammar]

māyāmayaśarīrāste bhogaṃ svaṃ paribhuñjate |
pralayānte hyanantena saṃhṛtāste tvaharmukhe || 330 ||
[Analyze grammar]

anyānantaprasādena vibudhā api taṃ param |
suptabuddhaṃ manyamānāḥ svatantrammanyatājaḍāḥ || 331 ||
[Analyze grammar]

svātmānameva jānanti hetuṃ māyāntarālagāḥ |
ataḥ paraṃ sthitā māyā devī jantuvimohinī || 332 ||
[Analyze grammar]

devadevasya sā śaktiratidurghaṭakāritā |
nirvairaparipanthinyā tayā bhramitabuddhayaḥ || 333 ||
[Analyze grammar]

idaṃ tattvamidaṃ neti vivadantīha vādinaḥ |
gurudevāgniśāstreṣu ye na bhaktā narādhamāḥ || 334 ||
[Analyze grammar]

satpathaṃ tānparityājya sotpathaṃ nayati dhruvam |
asadyuktivicārajñāñchuṣkatarkāvalambinaḥ || 335 ||
[Analyze grammar]

bhramayatyeva tānmāyā hyamokṣe mokṣalipsayā |
śivadīkṣāsinā cchinnā śivajñānāsinā tathā || 336 ||
[Analyze grammar]

na prarohetpunarnānyo hetustacchedanaṃ prati |
mahāmāyordhvataḥ śuddhā mahāvidyātha mātṛkā || 337 ||
[Analyze grammar]

vāgīśvarī ca tatrasthaṃ vāmādinavasatpuram |
vāmā jyeṣṭhā raudrī kālī kalavikaraṇībalavikārike tathā || 338 ||
[Analyze grammar]

mathanī damanī manonmanī ca tridṛśaḥ pītāḥ samastāstāḥ |
saptakoṭyo mukhyamantrā vidyātattve'tra saṃsthitāḥ || 339 ||
[Analyze grammar]

ekaikārbudalakṣāṃśāḥ padmākārapurā iha |
vidyārājñyastriguṇyādyāḥ sapta saptārbudeśvarāḥ || 340 ||
[Analyze grammar]

vidyātattvordhvamaiśaṃ tu tattvaṃ tatra kramordhvagam |
śikhaṇḍyādyamanantāntaṃ purāṣṭakayutaṃ puram || 341 ||
[Analyze grammar]

śikhaṇḍī śrīgalo mūrtirekanetraikarudrakau |
śivottamaḥ sūkṣmarudro'nanto vidyeśvarāṣṭakam || 342 ||
[Analyze grammar]

kramādūrdhvordhvasaṃsthānaṃ saptānāṃ nāyako vibhuḥ |
ananta eva dhyeyaśca pūjyaścāpyuttarottaraḥ || 343 ||
[Analyze grammar]

mukhyamantreśvarāṇāṃ yat sārdhaṃ koṭitrayaṃ sthitam |
tannāyakā ime tena vidyeśāścakravartinaḥ || 344 ||
[Analyze grammar]

uktaṃ ca gurubhiritthaṃ śivatanvādyeṣu śāsaneṣvetat |
bhagabilaśatakalitaguhāmūrdhāsanago'ṣṭaśaktiyugdevaḥ || 345 ||
[Analyze grammar]

gahanādyaṃ nirayāntaṃ sṛjati ca rudrāṃśca viniyuṅkte |
uddharati manonmanyā puṃsasteṣveva bhavati madhyasthaḥ || 346 ||
[Analyze grammar]

te tenodastacitaḥ paratattvālocane'bhiniviśante |
sa punaradhaḥ pathavartiṣvadhikṛta evāṇuṣu śivena || 347 ||
[Analyze grammar]

avasitapativiniyogaḥ sārdhamanekātmamantrakoṭībhiḥ |
nirvātyanantanāthastaddhāmāviśati sūkṣmarudrastu || 348 ||
[Analyze grammar]

anugṛhyāṇumapūrvaṃ sthāpayati patiḥ śikhaṇḍinaḥ sthāne |
ityaṣṭau paripāṭyā yāvaddhāmāni yāti gururekaḥ || 349 ||
[Analyze grammar]

tāvadasaṃkhyātānāṃ jantūnāṃ nirvṛtiṃ kurute |
te'ṣṭāvapi śaktyaṣṭakayogāmalajalaruhāsanāsīnāḥ || 350 ||
[Analyze grammar]

ālokayanti devaṃ hṛdayasthaṃ kāraṇaṃ paramam |
taṃ bhagavantamanantaṃ dhyāyantaḥ svahṛdi kāraṇaṃ śāntam || 351 ||
[Analyze grammar]

saptānudhyāyantyapi mantrāṇāṃ koṭayaḥ śuddhāḥ |
māyādiravīcyanto bhavastvanantādirucyate'pyabhavaḥ || 352 ||
[Analyze grammar]

śivaśuddhaguṇādhīkārāntaḥ so'pyeṣa heyaśca |
atrāpi yato dṛṣṭānugrāhyāṇāṃ niyojyatā śaivī || 353 ||
[Analyze grammar]

iṣṭā ca tannivṛttirhyabhavastvadhare na bhūyate yasmāt |
patyurapasarpati yataḥ kāraṇatā kāryatā ca siddhebhyaḥ || 354 ||
[Analyze grammar]

kañcukavacchivasiddhau tāvatibhavasaṃjñayātimadhyasthau |
dharmajñānavirāgaiśyacatuṣṭayapuraṃ tu yat || 355 ||
[Analyze grammar]

rūpāvaraṇasaṃjñaṃ tattattve'sminnaiśvare viduḥ |
vāmā jyeṣṭhā ca raudrīti bhuvanatrayaśobhitam || 356 ||
[Analyze grammar]

sūkṣmāvaraṇamākhyātamīśatattve gurūttamaiḥ |
aiśātsādāśivaṃ jñānakriyāyugalamaṇḍitam || 357 ||
[Analyze grammar]

śuddhāvaraṇamityāhuruktā śuddhāvṛteḥ param |
vidyāvṛtistato bhāvābhāvaśaktidvayojjvalā || 358 ||
[Analyze grammar]

śaktyāvṛtiḥ pramāṇākhyā tataḥ śāstre nirūpitā |
śaktyāvṛtestu tejasvidhruveśābhyāmalaṅkṛtam || 359 ||
[Analyze grammar]

tejasvyāvaraṇaṃ vedapurā mānāvṛtistataḥ |
mānāvṛteḥ suśuddhāvṛtpuratritayaśobhitā || 360 ||
[Analyze grammar]

suśuddhāvaraṇādūrdhva śaivamekapuraṃ bhavet |
śivāvṛterūrdhvamāhurmokṣāvaraṇasaṃjñitam || 361 ||
[Analyze grammar]

asyāṃ mokṣāvṛtau rudrā ekādaśa nirūpitāḥ |
mokṣāvaraṇatastvekapuramāvaraṇaṃ dhruvam || 362 ||
[Analyze grammar]

ūrdhve dhruvāvṛtericchāvaraṇaṃ tatra te śivāḥ |
īśvarecchāgṛhāntasthāstatpuraṃ caikamucyate || 363 ||
[Analyze grammar]

icchāvṛteḥ prabuddhākhyaṃ digrudrāṣṭakacarcitam |
prabuddhāvaraṇādūrdhva samayāvaraṇaṃ mahat || 364 ||
[Analyze grammar]

bhuvanaiḥ pañcabhirgarbhīkṛtānantasamāvṛti |
sāmayātsauśivaṃ tatra sādākhyaṃ bhuvanaṃ mahat || 365 ||
[Analyze grammar]

tasminsadāśivo devastasya savyāpasavyayoḥ |
jñānakriye parecchā tu śaktirutsaṅgagāminī || 366 ||
[Analyze grammar]

sṛṣṭyādipañcakṛtyāni kurute sa tayecchayā |
pañca brahmāṇyaṅgaṣaṭkaṃ sakalādyaṣṭakaṃ śivāḥ || 367 ||
[Analyze grammar]

daśāṣṭādaśa rudrāśca taireva suśivo vṛtaḥ |
sadyo vāmāghorau puruṣeśau brahmapañcakaṃ hṛdayam || 368 ||
[Analyze grammar]

mūrdhaśikhāvarmadṛgastramaṅgāni ṣaṭ prāhuḥ |
sakalākalaśūnyaiḥ saha kalāḍhyakhamalaṅkṛte kṣapaṇamantyam || 369 ||
[Analyze grammar]

kaṇṭhyauṣṭhyamaṣṭamaṃ kila sakalāṣṭakametadāmnātam |
oṃ kāraśivau dīpto hetvīśadaśeśakau suśivakālau || 370 ||
[Analyze grammar]

sūkṣmasutejaḥśarvāḥ śivāḥ daśaite'tra pūrvādeḥ |
vijayo niḥśvāsaśca svāyambhuvo vahnivīrarauravakāḥ || 371 ||
[Analyze grammar]

mukuṭavisarenduvinduprodgītā lalitasiddharudrau ca |
santānaśivau parakiraṇapārameśā iti smṛtā rudrāḥ || 372 ||
[Analyze grammar]

sarveṣāmeteṣāṃ jñānāni viduḥ svatulyanāmāni |
mantramunikoṭiparivṛta matha vibhuvāmādirudratacchaktiyutam || 373 ||
[Analyze grammar]

tārādiśaktijuṣṭaṃ suśivāsanamatisitakajamasaṃkhyadalam |
yaḥ śaktirudravargaḥ parivāre viṣṭare ca suśivasya || 374 ||
[Analyze grammar]

pratyekamasya nijanijaparivāre parārdhakoṭayo'saṃkhyāḥ |
māyāmalanirmuktāḥ kevalamadhikāramātrasaṃrūḍhāḥ || 375 ||
[Analyze grammar]

suśivāvaraṇe rudrāḥ sarvajñāḥ sarvaśaktisampūrṇāḥ |
adhikārabandhavilaye śāntāḥ śivarūpiṇo punarbhavinaḥ || 376 ||
[Analyze grammar]

ūrdhve bindvāvṛtirdīptā tatra tatra padmaṃ śaśiprabham |
śāntyatītaḥ śivastatra tacchaktyutsaṅgabhūṣitaḥ || 377 ||
[Analyze grammar]

nivṛttyādikalāvargaparivārasamāvṛtaḥ |
asaṃkhyarudratacchaktipurakoṭibhirāvṛtaḥ || 378 ||
[Analyze grammar]

śrīmanmataṅgaśāstre ca layākhyaṃ tattvamuttamam |
pāribhāṣikamityetannāmnā bindurihocyate || 379 ||
[Analyze grammar]

caturmūrtimayaṃ śubhraṃ yattatsakalaniṣkalam |
tasminbhogaḥ samuddiṣṭa ityatredaṃ ca varṇitam || 380 ||
[Analyze grammar]

nivṛttyādeḥ susūkṣmatvāddharādyārabdhadehatā |
mātuḥ sphūrjanmahājñānalīnatvānna vibhāvyate || 381 ||
[Analyze grammar]

udrikta taijasatvena hemno bhūparamāṇavaḥ |
yathā pṛthaṅna bhāntyevamūrdhvādhorudradehagāḥ || 382 ||
[Analyze grammar]

bindūrdhve'rdhenduretasya kalā jyotsnā ca tadvatī |
kāntiḥ prabhā ca vimalā pañcaitā rodhikāstataḥ || 383 ||
[Analyze grammar]

rundhanī rodhanī roddhrī jñānabodhā tamopahā |
etāḥ pañca kalāḥ prāhurnirodhinyāṃ gurūttamāh || 384 ||
[Analyze grammar]

ardhamātraḥ smṛto bindurvyomarūpī catuṣkalaḥ |
tadardhamardhacandrastadaṣṭāṃśena nirodhikā || 385 ||
[Analyze grammar]

hetūnbrahmādikān runddhe rodhikāṃ tāṃ tyajettataḥ |
nirodhikāmimāṃ bhittvā sādākhyaṃ bhuvanaṃ param || 386 ||
[Analyze grammar]

pararūpeṇa yatrāste pañcamantramahātanuḥ |
ityardhendunirodhyantabindvāvṛtyūrdhvato mahān || 387 ||
[Analyze grammar]

nādaḥ kiñjalkasadṛśo mahadbhiḥ puruṣairvṛtaḥ |
catvāri bhuvanānyatra dikṣu madhye ca pañcamam || 388 ||
[Analyze grammar]

indhikā dīpikā caiva rodhikā mocikordhvagā |
madhye'tra padmaṃ tatrordhvagāmī tacchaktibhirvṛtaḥ || 389 ||
[Analyze grammar]

nādordhvatastu sauṣumnaṃ tatra tacchaktibhṛtprabhuḥ |
tadīśaḥ piṅgalelābhyāṃ vṛtaḥ savyāpasavyayoḥ || 390 ||
[Analyze grammar]

yā prabhoraṅkagā devī suṣumnā śaśisaprabhā |
grathito'dhvā tayā sarva ūrdhvaścādhastanastathā || 391 ||
[Analyze grammar]

nādaḥsuṣumnādhārastu bhittvā viśvamidaṃ jagat |
adhaḥśaktyā vinirgacchedūrdhvaśaktyā ca mūrdhataḥ || 392 ||
[Analyze grammar]

nāḍyā brahmabile līnaḥ so'vyaktadhvanirakṣaraḥ |
nadansarveṣu bhūteṣu śivaśaktyā hyadhiṣṭhitaḥ || 393 ||
[Analyze grammar]

suṣumnordhve brahmabilasaṃjñayāvaraṇaṃ tridṛk |
tatra brahmā sitaḥ śūlī pañcāsyaḥ śaśiśekharaḥ || 394 ||
[Analyze grammar]

tasyotsaṅge parā devī brahmāṇī mokṣamārgagā |
roddhrī dātrī ca mokṣasya tāṃ bhittvā cordhvakuṇḍalī || 395 ||
[Analyze grammar]

śaktiḥ suptāhisadṛśī sā viśvādhāra ucyate |
tasyāṃ sūkṣmā susūkṣmā ca tathānye amṛtāmite || 396 ||
[Analyze grammar]

madhyato vyāpinī tasyāṃ vyāpīśo vyāpinīdharaḥ |
śaktitattvamidaṃ yasya prapañco'yaṃ dharāntakaḥ || 397 ||
[Analyze grammar]

śivatattvaṃ tatastatra caturdikkaṃ vyavasthitāḥ |
vyāpī vyomātmako'nanto'nāthastacchaktibhāginaḥ || 398 ||
[Analyze grammar]

madhye tvanāśritaṃ tatra devadevo hyanāśritaḥ |
tacchaktyutsaṅgabhṛtsūryaśatakoṭisamaprabhaḥ || 399 ||
[Analyze grammar]

śivatattvordhvataḥ śaktiḥ parā sā samanāhvayā |
sarveṣāṃ kāraṇānāṃ sā kartṛbhūtā vyavasthitā || 400 ||
[Analyze grammar]

bibhartyaṇḍānyanekāni śivena samadhiṣṭhitā |
tadārūḍhaḥ śivaḥ kṛtyapañcakaṃ kurute prabhuḥ || 401 ||
[Analyze grammar]

samanā karaṇaṃ tasya hetukarturmahośituḥ |
anāśritaṃ tu vyāpāre nimittaṃ heturucyate || 402 ||
[Analyze grammar]

tayādhitiṣṭhati vibhuḥ kāraṇānāṃ tu pañcakam |
anāśrito'nāthamayamanantaṃ khavapuḥ sadā || 403 ||
[Analyze grammar]

sa vyāpinaṃ prerayati svaśaktyā karaṇena tu |
karmarūpā sthitā māyā yadadhaḥ śaktikuṇḍalī || 404 ||
[Analyze grammar]

nādabindvādikaṃ kāryamityādijagadudbhavaḥ |
yatsadāśivaparyantaṃ pārthivādyaṃ ca śāsane || 405 ||
[Analyze grammar]

tatsarva prākṛtaṃ proktaṃ vināśotpattisaṃyutam |
atha sakalabhuvanamānaṃ yanmahyaṃ nigaditaṃ nijairgurubhiḥ || 406 ||
[Analyze grammar]

tadvakṣyate samāsādbuddhau yenāśu saṅkrāmet |
aṇḍasyāntaranantaḥ kālaḥ kūṣmāṇḍahāṭakau brahmaharī || 407 ||
[Analyze grammar]

rudrāḥ śataṃ savīraṃ bahirnivṛttistu sāṣṭaśatabhuvanā syāt |
jalatejaḥsamīranabho'haṃkṛddhīmūlasaptake pratyekam || 408 ||
[Analyze grammar]

aṣṭau ṣaṭpañcāśadbhuvanā tena pratiṣṭheti kalā kathitā |
atra prāhuḥ śodhyānaṣṭau kecinnijāṣṭakādhipatīn || 409 ||
[Analyze grammar]

anye tu samastānāṃ śodhyatvaṃ varṇayanti bhuvanānām |
śrībhūtirājamiśrā guravaḥ prāhuḥ punarbahī rudraśatam || 410 ||
[Analyze grammar]

aṣṭāvantaḥ sākaṃ śarveṇetīdṛśī nivṛttiriyaṃ syāt |
rudrāḥ kālī vīro dharābdhilakṣmyaḥ sarasvatī guhyam || 411 ||
[Analyze grammar]

ityaṣṭakaṃ jale'nau vahnyatiguhyadvayaṃ maruti vāyoḥ |
svapuraṃ gayādi khe ca vyoma pavitrāṣṭakaṃ ca bhuvanayugam || 412 ||
[Analyze grammar]

abhimāne'haṅkāracchagalādyaṣṭakamathāntarā nabho'haṃkṛt |
tanmātrārkenduśratipurāṣṭakaṃ buddhikarmadevānām || 413 ||
[Analyze grammar]

daśa tanmātrasamūhe bhuvanaṃ punarakṣavargavinipatite |
manasaścetyabhimāne dvāviṃśatireva bhuvanānām || 414 ||
[Analyze grammar]

dhiyi daivīnāmaṣṭau kruttejoyogasaṃjñakaṃ trayaṃ tadumā |
tatpatiratha mūrtyaṣṭakasuśivadvādaśakavīrabhadrāḥ syuḥ || 415 ||
[Analyze grammar]

tadatha mahādevāṣṭakamiti buddhau saptadaśa saṃkhyā |
guṇatattve paṅktitrayamiti ṣaṭpañcāśataṃ purāṇi viduḥ || 416 ||
[Analyze grammar]

yadyapi guṇasāmyātmani mūle krodheśvarāṣṭakaṃ tathāpi dhiyi |
tacchodhitamiti gaṇanāṃ na punaḥ prāptaṃ pratiṣṭhāyām || 417 ||
[Analyze grammar]

iti jalatattvānmūlaṃ tattvacaturviṃśatiḥ pratiṣṭhāyām |
ambādituṣṭivargastārādyāḥ siddhayo'ṇimādigaṇaḥ || 418 ||
[Analyze grammar]

guravo guruśiṣyā ṛṣivarga iḍādiśca vigrahāṣṭakayuk |
gandhādivikārapuraṃ buddhiguṇāṣṭakamahaṃkriyā viṣayaguṇāḥ || 419 ||
[Analyze grammar]

kāmādisaptaviṃśakamāgantu tathā gaṇeśavidyeśamayau |
iti pāśeṣu puratrayamitthaṃ puruṣe'tra bhuvanaṣoḍaśakam || 420 ||
[Analyze grammar]

niyatau śaṅkaradaśakaṃ kāle śivadaśakamiti puradvitayam |
rāge suhṛṣṭabhuvanaṃ guruśiṣyapuraṃ ca vitkalāyugale || 421 ||
[Analyze grammar]

bhuvanaṃ bhuvanaṃ niśi puṭapuratrayaṃ vākpuraṃ pramāṇapuram |
iti saptaviṃśatipurā vidyā puruṣāditattvasaptakayuk || 422 ||
[Analyze grammar]

vāmeśarūpasūkṣmaṃ śuddhaṃ vidyātha śaktitejasvimitiḥ |
suviśuddhiśivau mokṣa dhuveṣisaṃbuddhasamayasauśivasaṃjñāḥ || 423 ||
[Analyze grammar]

saptadaśapurā śāntā vidyeśasadāśivapuratritayayuktā |
bindvardhendunirodhyaḥ parasauśivamindhikādipurasauṣumne || 424 ||
[Analyze grammar]

paranādo brahmabilaṃ sūkṣmādiyutordhvakuṇḍalī śaktiḥ |
vyāpivyomānantānāthānāśritapurāṇi pañca tataḥ || 425 ||
[Analyze grammar]

ṣaṣṭhaṃ ca paramamanāśritamatha samanābhuvanaṣoḍaśī yadi vā |
bindvāvaraṇaṃ parasauśivaṃ ca pañcendhikādibhuvanāni || 426 ||
[Analyze grammar]

sauṣumnaṃ brahmabilaṃ kuṇḍalinī vyāpipañcakaṃ samanā |
iti ṣoḍaśabhuvaneyaṃ tattvayugaṃ śāntyatītā syāt || 427 ||
[Analyze grammar]

śrīmanmataṅgaśāstre ca kramo'yaṃ purapūgagaḥ |
kālāgnirnarakāḥ khābdhiyutaṃ mukhyatayā śatam || 428 ||
[Analyze grammar]

kūṣmāṇḍaḥ saptapātālī saptalokī maheśvaraḥ |
ityaṇḍamadhyaṃ tadbāhye śataṃ rudrā iti sthitāḥ || 429 ||
[Analyze grammar]

sthānānāṃ dviśatī bhūmiḥ saptapañcāśatā yutā |
pañcāṣṭakasya madhyāddvātriṃśadbhūtacatuṣṭaye || 430 ||
[Analyze grammar]

tanmātreṣu ca pañca syurviśvedevāstato'ṣṭakam |
pañcamaṃ sendriye garve buddhau devāṣṭakaṃ guṇe || 431 ||
[Analyze grammar]

yogāṣṭakaṃ krodhasaṃjñaṃ mūle kāle sanaiyate |
patadrugādyāścāṅguṣṭhamātrādyā rāgatattvagāḥ || 432 ||
[Analyze grammar]

dvādaśaikaśivādyāḥ syurvidyāyāṃ kalane daśa |
vāmādyāstriśatī seyaṃ triparvaṇyabdhirasyayuk || 433 ||
[Analyze grammar]

śaivāḥ kecidihānantāḥ śraikaṇṭhā iti saṃgrahaḥ |
yatra yadā parabhogān bubhukṣate tatra yojanaṃ kāryam || 434 ||
[Analyze grammar]

śodhanamatha taddhānau śeṣaṃ tvantargataṃ kāryam |
ityāgamaṃ prathayituṃ darśitametadvikalpitaṃ tena || 435 ||
[Analyze grammar]

anye'pi bahuvikalpāḥ svadhiyācāryaiḥ samabhyūhyāḥ |
śrīpūrvaśāsane punaraṣṭādaśādhikaṃ śataṃ kathitam || 436 ||
[Analyze grammar]

tadiha pradhānamadhikaṃ saṃkṣepeṇocyate śodhyam |
kālāgniḥ kūṣmāṇḍo narakeśo hāṭako'tha bhūtalapaḥ || 437 ||
[Analyze grammar]

brahmā munilokeśo rudrāḥ pañcāntarālasthāḥ |
adhare'nantaḥ prācyāḥ kapālivahnyantanirṛtibalākhyāḥ || 438 ||
[Analyze grammar]

laghunidhipatividyādhipaśambhūrdhvāntaṃ savīrabhadrapati |
ekādaśabhirbāhye brahmāṇḍaṃ pañcabhistathāntarikaiḥ || 439 ||
[Analyze grammar]

iti ṣoḍaśapurametannivṛttikalayeha kalanīyam |
lakulīśabhārabhūtī diṇḍyāṣāḍhī ca puṣkaranimeṣau || 440 ||
[Analyze grammar]

prabhāsasureśāviti salile pratyātmakaṃ saparivāre |
bhairavakedāramahākālā madhyāmrajalpākhyāḥ || 441 ||
[Analyze grammar]

śrīśailahariścandrāviti guhyāṣṭakamidaṃ mahasi |
bhīmendrāṭṭahāsavimalakanakhalanākhalakurusthitigayākhyāḥ || 442 ||
[Analyze grammar]

atiguhyāṣṭakametanmaruti ca satanmātrake ca sākṣe ca |
sthāṇusuvarṇākhyau kila bhadro gokarṇako mahālayakaḥ || 443 ||
[Analyze grammar]

avimuktarudrakoṭī vastrāpada ityadaḥ pavitraṃ khe |
sthūlasthūleśaśaṅkuśrutikālañjarāśca maṇḍalabhṛt || 444 ||
[Analyze grammar]

mākoṭāṇḍadvitayacchagalāṇḍā aṣṭakaṃ hyahaṅkāre |
anye'haṅkārāntastanmātrāṇīndriyāṇi cāpyāhuḥ || 445 ||
[Analyze grammar]

dhiyi yonyaṣṭakamuktaṃ prakṛtau yogāṣṭakaṃ kilākṛtaprabhṛti |
iti saptāṣṭakabhuvanā pratiṣṭhitiḥ salilato hi mūlāntā || 446 ||
[Analyze grammar]

nari vāmo bhīmograu bhaveśavīrāḥ pracaṇḍagaurīśau |
ajasānantaikaśivau vidyāyāṃ krodhacaṇḍayugmaṃ syāt || 447 ||
[Analyze grammar]

saṃvarto jyotiratho kalāniyatyāṃ ca sūrapañcāntau |
vīraśikhīśaśrīkaṇṭhasaṃjñametattrayaṃ ca kāle syāt || 448 ||
[Analyze grammar]

samahātejā vāmo bhavodbhavaścaikapiṅgaleśānau |
bhuvaneśapuraḥsarakāvaṅguṣṭha ime niśi sthitā hyaṣṭau || 449 ||
[Analyze grammar]

aṣṭāviṃśatibhuvanā vidyā puruṣānniśāntamiyam |
hālāhalarudrakrudambikāghorikāḥ savāmāḥ syuḥ || 450 ||
[Analyze grammar]

vidyāyāṃ vidyeśāstvaṣṭāvīśe sadāśive pañca |
vāmā jyeṣṭhā raudrī śaktiḥ sakalā ca śontayam || 451 ||
[Analyze grammar]

aṣṭādaśa bhuvanā syāt śāntyatītā tvabhuvanaiva |
iti deśādhvavibhāgaḥ kathitaḥ śrīśambhunā samādiṣṭaḥ || 452 ||
[Analyze grammar]