Book 5 - pañcamamāhnikam

atha śrītantrāloke pañcamamāhnikam |
āṇavena vidhinā paradhāma prepsatāmatha nirūpyata etat || 1 ||
[Analyze grammar]

vikalpasyaiva saṃskāre jāte niṣpratiyogini |
abhīṣṭe vastuni prāptirniścitā bhogamokṣayoḥ || 2 ||
[Analyze grammar]

vikalpaḥ kasyacitsvātmasvātantryādeva susthiraḥ |
upāyāntarasāpekṣyaviyogenaiva jāyate || 3 ||
[Analyze grammar]

kasyacittu vikalpo'sau svātmasaṃskaraṇaṃ prati |
upāyāntarasāpekṣastatroktaḥ pūrvako vidhiḥ || 4 ||
[Analyze grammar]

vikalpo nāma cinmātrasvabhāvo yadyapi sthitaḥ |
tathāpi niścayātmāsāvaṇoḥ svātantryayojakaḥ || 5 ||
[Analyze grammar]

niścayo bahudhā caiṣa tatropāyāśca bhedinaḥ |
aṇuśabdena te coktā dūrāntikavibhedataḥ || 6 ||
[Analyze grammar]

tatra buddhau tathā prāṇe dehe cāpi pramātari |
apāramārthike'pyasmin paramārthaḥ prakāśate || 7 ||
[Analyze grammar]

yataḥ prakāśāccinmātrāt prāṇādyavyatirekavat |
tasyaiva tu svatantratvāddviguṇaṃ jaḍacidvapuḥ || 8 ||
[Analyze grammar]

uktaṃ traiśirase caitaddevyai candrārdhamaulinā |
jīvaḥ śaktiḥ śivasyaiva sarvatraiva sthitāpi sā || 9 ||
[Analyze grammar]

svarūpapratyaye rūḍhā jñānasyonmīlanātparā |
tasya cidrūpatāṃ satyāṃ svātantryollāsakalpanāt || 10 ||
[Analyze grammar]

paśyañjaḍātmatābhāgaṃ tirodhāyādvayo bhavet |
tatra svātantryadṛṣṭyā vā darpaṇe mukhabimbavat || 11 ||
[Analyze grammar]

viśuddhaṃ nijacaitanyaṃ niścinotyatadātmakam |
buddhiprāṇādito bhinnaṃ caitanyaṃ niścitaṃ balāt || 12 ||
[Analyze grammar]

satyatastadabhinnaṃ syāttasyānyonyavibhedataḥ |
viśvarūpāvibheditvaṃ śuddhatvādeva jāyate || 13 ||
[Analyze grammar]

niṣṭhitaikasphuranmūrtermūrtyantaravirodhataḥ |
antaḥ saṃvidi satsarvaṃ yadyapyaparathā dhiyi || 14 ||
[Analyze grammar]

prāṇe dehe'thavā kasmātsaṃkrāmetkena vā katham |
tathāpi nirvikalpe'sminvikalpo nāsti taṃ vinā || 15 ||
[Analyze grammar]

dṛṣṭe'pyadṛṣṭakalpatvaṃ vikalpena tu niścayaḥ |
buddhiprāṇaśarīreṣu pārameśvaryamañjasā || 16 ||
[Analyze grammar]

vikalpyaṃ śūnyarūpe na pramātari vikalpanam |
buddhirdhyānamayī tatra prāṇa uccāraṇātmakaḥ || 17 ||
[Analyze grammar]

uccāraṇaṃ ca prāṇādyā vyānāntāḥ pañca vṛttayaḥ |
ādyā tu prāṇanābhikhyāparoccārātmikā bhavet || 18 ||
[Analyze grammar]

śarīrasyākṣaviṣayaitatpiṇḍatvena saṃsthitiḥ |
tatra dhyānamayaṃ tāvadanuttaramihocyate || 19 ||
[Analyze grammar]

yaḥ prakāśaḥ svatantro'yaṃ citsvabhāvo hṛdi sthitaḥ |
sarvatattvamayaḥ proktametacca triśiromate || 20 ||
[Analyze grammar]

kadalīsaṃpuṭākāraṃ sabāhyābhyantarāntaram |
īkṣate hṛdayāntaḥsthaṃ tatpuṣpamiva tattvavit || 21 ||
[Analyze grammar]

somasūryāgnisaṃghaṭṭaṃ tatra dhyāyedananyadhīḥ |
taddhyānāraṇisaṃkṣobhānmahābhairavahavyabhuk || 22 ||
[Analyze grammar]

hṛdayākhye mahākuṇḍe jājvalan sphītatāṃ vrajet |
tasya śaktimataḥ sphītaśakterbhairavatejasaḥ || 23 ||
[Analyze grammar]

mātṛmānaprameyākhyaṃ dhāmābhedena bhāvayet |
vahnyarkasomaśaktīnāṃ tadeva tritayaṃ bhavet || 24 ||
[Analyze grammar]

parā parāparā ceyamaparā ca sadoditā |
sṛṣṭisaṃsthitisaṃhāraistāsāṃ pratyekatastridhā || 25 ||
[Analyze grammar]

caturthaṃ cānavacchinnaṃ rūpamāsāmakalpitam |
evaṃ dvādaśa tā devyaḥ sūryabimbavadāsthitāḥ || 26 ||
[Analyze grammar]

ekaikamāsāṃ vahnyarkasomatacchāntibhāsanam |
etadānuttaraṃ cakraṃ hṛdayāccakṣurādibhiḥ || 27 ||
[Analyze grammar]

vyomabhirniḥsaratyeva tattadviṣayagocare |
taccakrabhābhistatrārthe sṛṣṭisthitilayakramāt || 28 ||
[Analyze grammar]

somasūryāgnibhāsātma rūpaṃ samavatiṣṭhate |
evaṃ śabdādiviṣaye śrotrādivyomavartmanā || 29 ||
[Analyze grammar]

cakreṇānena patatā tādātmyaṃ paribhāvayet |
anena kramayogena yatra yatra patatyadaḥ || 30 ||
[Analyze grammar]

cakraṃ sarvātmakaṃ tattatsārvabhaumamahīśavat |
itthaṃ viśvādhvapaṭalamayatnenaiva līyate || 31 ||
[Analyze grammar]

bhairavīyamahācakre saṃvittiparivārite |
tataḥ saṃskāramātreṇa viśvasyāpi parikṣaye || 32 ||
[Analyze grammar]

svātmocchalattayā bhrāmyaccakraṃ saṃcintayenmahat |
tatastaddāhyavilayāt tatsaṃskāraparikṣayāt || 33 ||
[Analyze grammar]

praśāmyadbhāvayeccakraṃ tataḥ śāntaṃ tataḥ śamam |
anena dhyānayogena viśvaṃ cakre vilīyate || 34 ||
[Analyze grammar]

tatsaṃvidi tataḥ saṃvidvilīnārthaiva bhāsate |
citsvābhāvyāt tato bhūyaḥ sṛṣṭiryaccinmaheśvarī || 35 ||
[Analyze grammar]

evaṃ pratikṣaṇaṃ viśvaṃ svasaṃvidi vilāpayan |
visṛjaṃśca tato bhūyaḥ śaśvadbhairavatāṃ vrajet || 36 ||
[Analyze grammar]

evaṃ triśūlāt prabhṛti catuṣpañcārakakramāt |
pañcāśadaraparyantaṃ cakraṃ yogī vibhāvayet || 37 ||
[Analyze grammar]

catuṣṣaṣṭiśatāraṃ vā sahasrāramathāpi vā |
asaṃkhyārasahasraṃ vā cakraṃ dhyāyedananyadhīḥ || 38 ||
[Analyze grammar]

saṃvinnāthasya mahato devasyollāsisaṃvidaḥ |
naivāsti kācitkalanā viśvaśaktermaheśituḥ || 39 ||
[Analyze grammar]

śaktayo'sya jagat kṛtsnaṃ śaktimāṃstu maheśvaraḥ |
iti māṅgalaśāstre tu śrīśrīkaṇṭho nyarūpayat || 40 ||
[Analyze grammar]

ityetat prathamopāyarūpaṃ dhyānaṃ nyarūpayat |
śrīśaṃbhunātho me tuṣṭastasmai śrīsumatiprabhuḥ || 41 ||
[Analyze grammar]

anayaiva diśānyāni dhyānānyapi samāśrayet |
anuttaropāyadhurāṃ yānyāyānti kramaṃ vinā || 42 ||
[Analyze grammar]

atha prāṇasya yā vṛttiḥ prāṇanādyā nirūpitā |
tadupāyatayā brūmo'nuttarapravikāsanam || 43 ||
[Analyze grammar]

nijānande pramātraṃśamātre hṛdi purā sthitaḥ |
śūnyatāmātraviśrānternirānandaṃ vibhāvayet || 44 ||
[Analyze grammar]

prāṇodaye prameye tu parānandaṃ vibhāvayet |
tatrānantaprameyāṃśapūraṇāpānanirvṛtaḥ || 45 ||
[Analyze grammar]

parānandagatastiṣṭhedapānaśaśiśobhitaḥ |
tato'nantasphuranmeyasaṃghaṭṭaikāntanirvṛtaḥ || 46 ||
[Analyze grammar]

samānabhūmimāgatya brahmānandamayo bhavet |
tato'pi mānameyaughakalanāgrāsatatparaḥ || 47 ||
[Analyze grammar]

udānavahnau viśrānto mahānandaṃ vibhāvayat |
tatra viśrāntimabhyetya śāmyatyasminmahārciṣi || 48 ||
[Analyze grammar]

nirupādhirmahāvyāptirvyānākhyopādhivarjitā |
tadā khalu cidānando yo jaḍānupabṛṃhitaḥ || 49 ||
[Analyze grammar]

nahyatra saṃsthitiḥ kāpi vibhaktā jaḍarūpiṇaḥ |
yatra ko'pi vyavacchedo nāsti yadviśvataḥ sphurat || 50 ||
[Analyze grammar]

yadanāhatasaṃvitti paramāmṛtabṛṃhitam |
yatrāsti bhāvanādīnāṃ na mukhyā kāpi saṃgatiḥ || 51 ||
[Analyze grammar]

tadeva jagadānandamasmabhyaṃ śaṃbhurūcivān |
tatra viśrāntirādheyā hṛdayoccārayogataḥ || 52 ||
[Analyze grammar]

yā tatra samyagviśrāntiḥ sānuttaramayī sthitiḥ |
ityetaddhṛdayādyekasvabhāve'pi svadhāmani || 53 ||
[Analyze grammar]

ṣaṭprāṇoccārajaṃ rūpamatha vyāptyā taducyate |
prāṇadaṇḍaprayogena pūrvāparasamīkṛteḥ || 54 ||
[Analyze grammar]

catuṣkikāmbujālambilambikāsaudhamāśrayet |
triśūlabhūmiṃ krāntvāto nāḍitritayasaṅgatām || 55 ||
[Analyze grammar]

icchājñānakriyāśaktisamatve praviśet sudhīḥ |
ekāṃ vikāsinīṃ bhūyastvasaṃkocāṃ vikasvarām || 56 ||
[Analyze grammar]

śrayedbhrūbindunādāntaśaktisopānamālikām |
tatrordhvakuṇḍalībhūmau spandanodarasundaraḥ || 57 ||
[Analyze grammar]

visargastatra viśrāmyenmatsyodaradaśājuṣi |
rāsabhī vaḍavā yadvatsvadhāmānandamandiram || 58 ||
[Analyze grammar]

vikāsasaṃkocamayaṃ praviśya hṛdi hṛṣyati |
tadvanmuhurlīnasṛṣṭabhāvavrātasunirbharām || 59 ||
[Analyze grammar]

śrayedvikāsasaṃkocarūḍhabhairavayāmalām |
ekīkṛtamahāmūlaśūlavaisargike hṛdi || 60 ||
[Analyze grammar]

parasminneti viśrāntiṃ sarvāpūraṇayogataḥ |
atra tatpūrṇavṛttyaiva viśvāveśamayaṃ sthitam || 61 ||
[Analyze grammar]

prakāśasyātmaviśrāntāvahamityeva dṛśyatām |
anuttaravimarśe prāgvyāpārādivivarjite || 62 ||
[Analyze grammar]

cidvimarśaparāhaṃkṛt prathamollāsinī sphuret |
tata udyogasaktena sa dvādaśakalātmanā || 63 ||
[Analyze grammar]

sūryeṇābhāsayedbhāvaṃ pūrayedatha carcayet |
athenduḥ ṣoḍaśakalo visargagrāsamantharaḥ || 64 ||
[Analyze grammar]

saṃjīvanyamṛtaṃ bodhavahnau visṛjati sphuran |
icchājñānakriyāśaktisūkṣmarandhrasrugagragam || 65 ||
[Analyze grammar]

tadevamamṛtaṃ divyaṃ saṃviddevīṣu tarpakam |
visargāmṛtametāvad bodhākhye hutabhojini || 66 ||
[Analyze grammar]

visṛṣṭaṃ cedbhavetsarvaṃ hutaṃ ṣoḍhādhvamaṇḍalam |
yato'nuttaranāthasya visargaḥ kulanāyikā |
tatkṣobhaḥ kādihāntaṃ tatprasarastattvapaddhatiḥ || 67 ||
[Analyze grammar]

aṃa iti kuleśvaryā sahito hi kuleśitā |
paro visargaviśleṣastanmayaṃ viśvamucyate || 68 ||
[Analyze grammar]

vitprāṇaguṇadehāntarbahirdravyamayīmimām |
arcayejjuhuyāddhyāyeditthaṃ saṃjīvanīṃ kalām || 69 ||
[Analyze grammar]

ānandanāḍīyugalaspandanāvahitau sthitaḥ |
enāṃ visarganiḥṣyandasaudhabhūmiṃ prapadyate || 70 ||
[Analyze grammar]

śākte kṣobhe kulāveśe sarvanāḍyagragocare |
vyāptau sarvātmasaṃkoce hṛdayaṃ praviśetsudhīḥ || 71 ||
[Analyze grammar]

somasūryakalājālaparasparanigharṣataḥ |
agnīṣomātmake dhāmni visargānanda unmiṣet || 72 ||
[Analyze grammar]

alaṃ rahasyakathayā guptametatsvabhāvataḥ |
yoginīhṛdayaṃ tatra viśrāntaḥ syātkṛtī budhaḥ || 73 ||
[Analyze grammar]

hānādānatiraskāravṛttau rūḍhimupāgataḥ |
abhedavṛttitaḥ paśyedviśvaṃ citicamatkṛteḥ || 74 ||
[Analyze grammar]

arthakriyārthitādainyaṃ tyaktvā bāhyāntarātmani |
kharūpe nirvṛtiṃ prāpya phullāṃ nādadaśāṃ śrayet || 75 ||
[Analyze grammar]

vaktramantastayā samyak saṃvidaḥ pravikāsayet |
saṃvidakṣamaruccakraṃ jñeyābhinnaṃ tato bhavet || 76 ||
[Analyze grammar]

tajjñeyaṃ saṃvidākhyena vahninā pravilīyate |
vilīnaṃ tat trikoṇe'smiñśaktivahnau vilīyate || 77 ||
[Analyze grammar]

tatra saṃvedanodārabindusattāsunirvṛtaḥ |
saṃhārabījaviśrānto yogī paramayo bhavet || 78 ||
[Analyze grammar]

antarbāhye dvaye vāpi sāmānyetarasundaraḥ |
saṃvitspandastriśaktyātmā saṃkocapravikāsavān || 79 ||
[Analyze grammar]

asaṃkocavikāso'pi tadābhāsanatastathā |
antarlakṣyo bahirdṛṣṭiḥ paramaṃ padamaśnute || 80 ||
[Analyze grammar]

tataḥ svātantryanirmeye vicitrārthakriyākṛti |
vimarśanaṃ viśeṣākhyaḥ spanda aunmukhyasaṃjñitaḥ || 81 ||
[Analyze grammar]

tatra viśrāntimāgacchedyadvīryaṃ mantramaṇḍale |
śāntyādisiddhayastattadrūpatādātmyato yataḥ || 82 ||
[Analyze grammar]

divyo yaścākṣasaṃgho'yaṃ bodhasvātantryasaṃjñakaḥ |
so'nimīlita evaitat kuryātsvātmamayaṃ jagat || 83 ||
[Analyze grammar]

mahāsāhasasaṃyogavilīnākhilavṛttikaḥ |
puñjībhūte svaraśmyoghe nirbharībhūya tiṣṭhati || 84 ||
[Analyze grammar]

akiciccintakastatra spaṣṭadṛgyāti saṃvidam |
yadvisphuliṅgāḥ saṃsārabhasmadāhaikahetavaḥ || 85 ||
[Analyze grammar]

taduktaṃ parameśena triśirobhairavāgame |
śṛṇu devi pravakṣyāmi mantrabhūmyāṃ praveśanam || 86 ||
[Analyze grammar]

madhyanāḍyordhvagamanaṃ taddharmaprāptilakṣaṇam |
visargāntapadātītaṃ prāntakoṭinirūpitam || 87 ||
[Analyze grammar]

adhaḥpravāhasaṃrodhādūrdhvakṣepavivarjanāt |
mahāprakāśamudayajñānavyaktipradāyakam || 88 ||
[Analyze grammar]

anubhūya pare dhāmni mātrāvṛttyā puraṃ viśet |
nistaraṅgāvatīrṇā sā vṛttirekā śivātmikā || 89 ||
[Analyze grammar]

catuṣṣaḍdvirdviguṇitacakraṣaṭkasamujjvalā |
tatsthaṃ vicārayet khaṃ khaṃ khasthaṃ khasthena saṃviśet || 90 ||
[Analyze grammar]

khaṃ khaṃ tyaktvā khamāruhya khasthaṃ khaṃ coccarediti |
khamadhyāsyādhikāreṇa padasthāścinmarīcayaḥ || 91 ||
[Analyze grammar]

bhāvayedbhāvamantaḥsthaṃ bhāvastho bhāvaniḥspṛhaḥ |
bhāvābhāvagatī ruddhvā bhāvābhāvāvarodhadṛk || 92 ||
[Analyze grammar]

ātmāṇukulamūlāni śaktirbhūtiścitī ratiḥ |
śaktitrayaṃ draṣṭṛdṛśyoparaktaṃ tadvivarjitam || 93 ||
[Analyze grammar]

etatkhaṃ daśadhā proktamuccāroccāralakṣaṇam |
dhāmasthaṃ dhāmamadhyasthaṃ dhāmodarapuṭīkṛtam || 94 ||
[Analyze grammar]

dhāmnā tu bodhayeddhāma dhāma dhāmāntagaṃ kuru |
taddhāma dhāmagatyā tu bhedyaṃ dhāmāntamāntaram || 95 ||
[Analyze grammar]

bhedopabhedabhedena bhedaḥ kāryastu madhyataḥ |
iti praveśopāyo'yamāṇavaḥ parikīrtitaḥ || 96 ||
[Analyze grammar]

śrīmaheśvaranāthena yo hṛtsthena mamoditaḥ |
śrībrahmayāmale coktaṃ śrīmān rāvo daśātmakaḥ || 97 ||
[Analyze grammar]

sthūlaḥ sūkṣmaḥ paro hṛdyaḥ kaṇṭhyastālavya eva ca |
sarvataśca vibhuryo'sau vibhutvapadadāyakaḥ || 98 ||
[Analyze grammar]

jitarāvo mahāyogī saṃkrāmetparadehagaḥ |
parāṃ ca vindati vyāptiṃ pratyahaṃ hyabhyaseta tam || 99 ||
[Analyze grammar]

tāvadyāvadarāve sā rāvāllīyeta rāviṇī |
atra bhāvanayā dehagatopāyaiḥ pare pathi || 100 ||
[Analyze grammar]

vivikṣoḥ pūrṇatāsparśātprāgānandaḥ prajāyate |
tato'pi vidyudāpātasadṛśe dehavarjite || 101 ||
[Analyze grammar]

dhāmni kṣaṇaṃ samāveśādudbhavaḥ prasphuṭaṃ plutiḥ |
jalapāṃsuvadabhyastasaṃviddehaikyahānitaḥ || 102 ||
[Analyze grammar]

svabalākramaṇāddehaśaithilyāt kampamāpnuyāt |
galite dehatādātmyaniścaye'ntarbhukhatvataḥ || 103 ||
[Analyze grammar]

nidrāyate purā yāvanna rūḍhaḥ saṃvidātmani |
tataḥ satyapade rūḍho viśvātmatvena saṃvidam || 104 ||
[Analyze grammar]

saṃvidan ghūrṇate ghūrṇirmahāvyāptiryataḥ smṛtā |
ātmanyanātmābhimatau satyāmeva hyanātmani || 105 ||
[Analyze grammar]

ātmābhimāno dehādau bandho muktistu tallayaḥ |
ādāvanātmanyātmatve līne labdhe nijātmani || 106 ||
[Analyze grammar]

ātmanyanātmatānāśe mahāvyāptiḥ pravartate |
ānanda udbhavaḥ kampo nindrā ghūrṇiśca pañcakam || 107 ||
[Analyze grammar]

ityuktamata eva śrīmālinīvijayottare |
pradarśite'sminnānandaprabhṛtau pañcake yadā || 108 ||
[Analyze grammar]

yogī viśettadā tattaccakreśatvaṃ haṭhādvrajet |
yathā sarveśinā bodhenākrāntāpi tanuḥ kvacit || 109 ||
[Analyze grammar]

kiṃcitkartuṃ prabhavati cakṣuṣā rūpasaṃvidam |
tathaiva cakre kutrāpi praveśātko'pi saṃbhavet || 110 ||
[Analyze grammar]

ānandacakraṃ vahnyaśri kanda udbhava ucyate |
kampo hṛttālu nidrā ca ghūrṇiḥ syādūrdhvakuṇḍalī || 111 ||
[Analyze grammar]

etacca sphuṭamevoktaṃ śrīmantraiśirase mate |
evaṃ pradarśitoccāraviśrāntihṛdayaṃ param || 112 ||
[Analyze grammar]

yattadavyaktaliṅgaṃ nṛśivaśaktyavibhāgavat |
atra viśvamidaṃ līnamatrāntaḥsthaṃ ca gamyate || 113 ||
[Analyze grammar]

idaṃ tallakṣaṇaṃ pūrṇaśaktibhairavasaṃvidaḥ |
dehagādhvasamunmeṣe samāveśastu yaḥ sphuṭaḥ || 114 ||
[Analyze grammar]

ahantācchāditonmeṣibhāvedaṃbhāvayuk sa ca |
vyaktāvyaktamidaṃ liṅgaṃ mantravīryaṃ parāparam || 115 ||
[Analyze grammar]

naraśaktisamunmeṣi śivarūpādvibheditam |
yannyakkṛtaśivāhantāsamāveśaṃ vibhedavat || 116 ||
[Analyze grammar]

viśeṣaspandarūpaṃ tad vyaktaṃ liṅgaṃ cidātmakam |
vyaktātsiddhiprasavo vyaktāvyaktāddvayaṃ vimokṣaśca |
avyaktādbalamādyaṃ parasya nānuttare tviyaṃ carcā || 117 ||
[Analyze grammar]

ātmākhyaṃ yadvyaktaṃ naraliṅgaṃ tatra viśvamarpayataḥ |
vyaktāvyaktaṃ tasmādgalite tasmiṃstadavyaktam || 118 ||
[Analyze grammar]

tenātmaliṅgametat parame śivaśaktyaṇusvabhāvamaye |
avyakte viśrāmyati nānuttaradhāmagā tviyaṃ carcā || 119 ||
[Analyze grammar]

ekasya spandanasyaiṣā traidhaṃ bhedavyavasthitiḥ |
atra liṅge sadā tiṣṭhet pūjāviśrāntitatparaḥ || 120 ||
[Analyze grammar]

yoginīhṛdayaṃ liṅgamidamānandasundaram |
bījayonisamāpattyā sūte kāmapi saṃvidam || 121 ||
[Analyze grammar]

atra prayāsavirahātsarvo'sau devatāgaṇaḥ |
ānandapūrṇe dhāmnyāste nityoditacidātmakaḥ || 122 ||
[Analyze grammar]

atra bhairavanāthasya sasaṃkocavikāsikā |
bhāsate durghaṭā śaktirasaṃkocavikāsinaḥ || 123 ||
[Analyze grammar]

etalliṅgasamāpattivisargānandadhārayā |
siktaṃ tadeva sadviśvaṃ śaśvannavanavāyate || 124 ||
[Analyze grammar]

anuttare'bhyupāyo'tra tādrūpyādeva varṇitaḥ |
jvaliteṣvapi dīpeṣu gharmāṃśuḥ kiṃ na bhāsate || 125 ||
[Analyze grammar]

artheṣu tadbhogavidhau tadutthe duḥkhe sukhe vā galitābhiśaṅkam |
anāviśanto'pi nimagnacittā jānanti vṛttikṣayasaukhyamantaḥ || 126 ||
[Analyze grammar]

satyevātmani citsvabhāvamahasi svānte tathopaktiyāṃ tasmai kurvati tatpracāravivaśe satyakṣavarge'pi ca |
satsvartheṣu sukhādiṣu sphuṭataraṃ yadbhedavandhyodayaṃ yogī tiṣṭhati pūrṇaraśmivibhavastattattvamācīyatām || 127 ||
[Analyze grammar]

ityuccāravidhiḥ proktaḥ karaṇaṃ pravivicyate |
taccetthaṃ triśiraḥśāstre parameśena bhāṣitam || 128 ||
[Analyze grammar]

grāhyagrāhakacidvyāptityāgākṣepaniveśanaiḥ |
karaṇaṃ saptadhā prāhurabhyāsaṃ bodhapūrvakam || 129 ||
[Analyze grammar]

tadvyāptipūrvamākṣepe karaṇaṃ svapratiṣṭhatā |
guruvaktrācca boddhavyaṃ karaṇaṃ yadyapi sphuṭam || 130 ||
[Analyze grammar]

tathāpyāgamarakṣārthaṃ tadagre varṇayiṣyate |
ukto ya eṣa uccārastatra yo'sau sphuran sthitaḥ || 131 ||
[Analyze grammar]

avyaktānukṛtiprāyo dhvanirvarṇaḥ sa kathyate |
sṛṣṭisaṃhārabījaṃ ca tasya mukhyaṃ vapurviduḥ || 132 ||
[Analyze grammar]

tadabhyāsavaśādyāti kramādyogī cidātmatām |
tathā hyanacke sācke vā kādau sānte punaḥpunaḥ || 133 ||
[Analyze grammar]

smṛte proccārite vāpi sā sā saṃvitprasūyāte |
bāhyārthasamayāpekṣā ghaṭādyā dhvanayo'pi ye || 134 ||
[Analyze grammar]

te'pyarthabhāvanāṃ kuryurmanorājyavadātmani |
taduktaṃ parameśena bhairavo vyāpako'khile || 135 ||
[Analyze grammar]

iti bhairavaśabdasya saṃtatoccāraṇācchivaḥ |
śrīmattraiśirase'pyuktaṃ mantroddhārasya pūrvataḥ || 136 ||
[Analyze grammar]

smṛtiśca smaraṇaṃ pūrvaṃ sarvabhāveṣu vastutaḥ |
mantrasvarūpaṃ tadbhāvyasvarūpāpattiyojakam || 137 ||
[Analyze grammar]

smṛtiḥ svarūpajanikā sarvabhāveṣu rañjikā |
anekākārarūpeṇa sarvatrāvasthitena tu || 138 ||
[Analyze grammar]

svasvabhāvasya saṃprāptiḥ saṃvittiḥ paramārthataḥ |
vyaktiniṣṭhā tato viddhi sattā sā kīrtitā parā || 139 ||
[Analyze grammar]

kiṃ punaḥ samayāpekṣāṃ vinā ye bījapiṇḍakāḥ |
saṃvidaṃ spandapantyete neyuḥ saṃvidupāyatām || 140 ||
[Analyze grammar]

vācyābhāvādudāsīnasaṃvitspandātsvadhāmataḥ |
prāṇollāsanirodhābhyāṃ bījapiṇḍeṣu pūrṇatā || 141 ||
[Analyze grammar]

sukhasītkārasatsamyaksāmyaprathamasaṃvidaḥ |
saṃvedanaṃ hi prathamaṃ sparśo'nuttarasaṃvidaḥ || 142 ||
[Analyze grammar]

hṛtkaṇṭhyoṣṭhyatridhāmāntarnitarāṃ pravikāsini |
caturdaśaḥ praveśo ya ekīkṛtatadātmakaḥ || 143 ||
[Analyze grammar]

tato visargoccārāṃśe dvādaśāntapathāvubhau |
hṛdayena sahaikadhyaṃ nayate japatatparaḥ || 144 ||
[Analyze grammar]

kandahṛtkaṇṭhatālvagrakauṇḍilīprakriyāntataḥ |
ānandamadhyanāḍyantaḥ spandanaṃ bījamāvahet || 145 ||
[Analyze grammar]

saṃhārabījaṃ khaṃ hṛtsthamoṣṭhyaṃ phullaṃ svamūrdhani |
tejastryaśraṃ tālukaṇṭhe bindurūrdhvapade sthitaḥ || 146 ||
[Analyze grammar]

ityenayā budho yuktyā varṇajapyaparāyaṇaḥ |
anuttaraṃ paraṃ dhāma praviśedacirāt sudhīḥ || 147 ||
[Analyze grammar]

varṇaśabdena nīlādi yadvā dīkṣottare yathā |
saṃhāranragnimaruto rudrabinduyutānsmaret || 148 ||
[Analyze grammar]

hṛdaye tanmayo lakṣyaṃ paśyetsaptadinādatha |
visphuliṅgāgnivannīlapītaraktādicitritam || 149 ||
[Analyze grammar]

jājvalīti hṛdambhoje bījadīpaprabodhitam |
dīpavajjvalito bindurbhāsate vighanārkavat || 150 ||
[Analyze grammar]

svayaṃbhāsātmanānena tādātmyaṃ yātyananyadhīḥ |
śivena hematāṃ yadvattāmraṃ sūtena vedhitam || 151 ||
[Analyze grammar]

upalakṣaṇametacca sarvamantreṣu lakṣayet |
yadyatsaṃkalpasaṃbhūtaṃ varṇajālaṃ hi bhautikam || 152 ||
[Analyze grammar]

tat saṃvidādhikyavaśādabhautikamiva sthitam |
atastathāvidhe rūpe rūḍho rohati saṃvidi || 153 ||
[Analyze grammar]

anācchāditarūpāyāmanupādhau prasannadhīḥ |
nīle pīte sukhe duḥkhe saṃvidrūpamakhaṇḍitam || 154 ||
[Analyze grammar]

gurubhirbhāṣitaṃ tasmādupāyeṣu vicitratā |
uccārakaraṇadhyānavarṇairebhiḥ pradarśitaḥ || 155 ||
[Analyze grammar]

anuttarapadaprāptāvabhyupāyavidhikramaḥ |
akiṃciccintanaṃ vīryaṃ bhāvanāyāṃ ca sā punaḥ || 156 ||
[Analyze grammar]

dhyāne tadapi coccāre karaṇe so'pi taddhvanau |
sa sthānakalpane bāhyamiti kramamupāśrayet || 157 ||
[Analyze grammar]

laṅghanena paro yogī mandabuddhiḥ krameṇa tu |
vīryaṃ vinā yathā ṣaṇṭhastasyāpyastyatha vā balam |
mṛtadeha iveyaṃ syādbāhyāntaḥparikalpanā || 158 ||
[Analyze grammar]

ityāṇave'nuttaratābhyupāyaḥ prokto nayaḥ spaṣṭapathena bāhyaḥ || 159 ||
[Analyze grammar]