Chapter 17

[English text for this chapter is available]

prahlāda uvāca |
kṛtvā'bhiṣekaṃ tīrtheṣu yathāvaddatta dakṣiṇaḥ |
pūjayecca tato devaṃ kṛṣṇākhyaṃ puruṣaṃ param || 1 ||
[Analyze grammar]

ṛṣaya ūcuḥ |
pūjāvidhiṃ tu kṛṣṇasya śrotukāmāḥ samāsataḥ |
kathayā'caraṇopetaṃ yathāvaddaityasattama || 2 ||
[Analyze grammar]

dvārapālāśca ke tatra kaḥ pūrvaṃ kaśca pṛṣṭhataḥ |
purīyaṃ sarvato daitya tiṣṭhate kena pālitā || 3 ||
[Analyze grammar]

ānupūrvyātsamāsena pūjanīyā yathāvidhi |
kathayasva vidhijño'si kṛṣṇaikacaraṇapriyaḥ || 4 ||
[Analyze grammar]

śrīprahlāda uvāca |
śrūyatāṃ pūjanaṃ viprāḥ śrutapūrvaṃ vidhānataḥ |
kalau kṛṣṇasya viprendrā yathāvadanupūrvaśaḥ || 5 ||
[Analyze grammar]

pūrvadvārasthitāndevāñchuṇudhvaṃ susamāhitāḥ |
jayaṃtaḥ prathamaṃ pūjyaḥ sarvapāpaharaḥ śubhaḥ || 6 ||
[Analyze grammar]

sthāpito devarājena pūjārthaṃ keśavasya hi |
tasyaivānucarānvakṣye tānnibodhata sattamāḥ || 7 ||
[Analyze grammar]

vajranābhaḥ sunābhaśca vajrabāhurmahā hanuḥ |
vajradaṃṣṭro vajradhārī vajrahā vajralocanaḥ || 8 ||
[Analyze grammar]

śvetamūrdhā śvetamālī jayantānucarāśca te |
ete śastrodyatakarā rakṣante tamaharniśam || 9 ||
[Analyze grammar]

pūrvadvāre susaṃnaddhā jayantoddeśakāriṇaḥ |
pūrvadvāre ca rakṣārthaṃ naranātho vināyakaḥ || 10 ||
[Analyze grammar]

taruṇārkaśca vai sūryo devyo vai sahamātaraḥ |
īśvaraścāpi durvāsā nāgarājastu takṣakaḥ || 11 ||
[Analyze grammar]

senānīḥ kārtikeyaśca rākṣasaśca mahāhanuḥ |
tatra dīrghanakhonāma dānavaḥ supratiṣṭhitaḥ || 12 ||
[Analyze grammar]

viśvāvasuśca gandharvo menakā ca varāpsarāḥ |
sanatkumārasahito vasiṣṭho bhagavānṛṣiḥ || 13 ||
[Analyze grammar]

ete pūjyāḥ pūrvatastu nyagrodhaśca mahādrumaḥ |
pūrvadvārasthitā hyeta āgneyāñchṛṇutātha me || 14 ||
[Analyze grammar]

jvālāmukho'tha raktākṣaḥ smaśānanilayaḥ krathaḥ |
māṃsādo rudhirāhāraḥ kṛṣṇaḥ kṛṣṇajaṭādharaḥ || 15 ||
[Analyze grammar]

trāsano bhañjanaścaiva hyāgnyeyyāṃ diśi saṃsthitāḥ |
diśaṃ rakṣaṃti saṃnaddhā dakṣiṇāṃ śṛṇutātha me || 16 ||
[Analyze grammar]

daṇḍapāṇirmahānādaḥ pāśahastaḥ sulocanaḥ |
anivartyakramaścaiva tathā duṃdubhinisvanaḥ || 17 ||
[Analyze grammar]

kharasvano ghargharavāktathā maunapriyaḥ sadā |
mallikākṣaśca eteṣāṃ praṇato dvārapālakaḥ || 18 ||
[Analyze grammar]

dakṣiṇadvārarakṣārthaṃ dundubhiśca vināyakaḥ |
mahiṣārkaśca vai sūryo bhūṣaṇaśca tatheśvaraḥ || 19 ||
[Analyze grammar]

caṇḍikā ca tathā devī hyūrddhvabāhuśca rākṣasaḥ |
padmākṣaḥ kṣetrapālaśca nāgaścāśvatarastathā || 20 ||
[Analyze grammar]

citrāṃgadaśca gandharva urvaśī ca varāpsarāḥ |
yo rājā sarvavṛkṣāṇāṃ śālaścāpi mahādrumaḥ || 21 ||
[Analyze grammar]

sanātana ṛṣiśreṣṭho hyagastyaśca mahātapāḥ |
ete yāmyadiśi dvāraṃ rakṣanti susamāhitāḥ || 22 ||
[Analyze grammar]

gītakṛnnartako nagnaḥ kaṃbalī dahanapriyaḥ |
hasano netrabhaṃgaśca bhrūvikāro vijṛṃbhakaḥ || 23 ||
[Analyze grammar]

muśalī prabhureteṣāṃ saṃnaddho vartate dvijāḥ |
rakṣanti nairṛtīmāśāṃ paścimāṃ śṛṇutāparān || 24 ||
[Analyze grammar]

svastikaḥ śaṃkhamūrddhā ca nīlavāsāḥ śubhānanaḥ |
pāśahastaḥ śūlahasta ekapādaikalocanaḥ || 25 ||
[Analyze grammar]

paścimāyāṃ diśi tathā puṣpadanto vināyakaḥ |
uddhavārkaśca vai sūryaḥ śivaḥ satrājiteśvaraḥ || 26 ||
[Analyze grammar]

tuṃbarurnāmagandharvo ghṛtācī ca varāpsarāḥ |
mahodaraśca nāgendro rākṣasaśca ghaṭotkacaḥ || 27 ||
[Analyze grammar]

daityaḥ pañcajanonāma ṛṣiḥ kaśyapa eva ca |
devī kapālinīnāma aśvatthastu mahādrumaḥ || 28 ||
[Analyze grammar]

kapilaḥ kṣetrapālaśca pratīcīṃ pāti vai diśam |
namaskāryāstathā pūjyā vāyavyo śṛṇutāparān || 29 ||
[Analyze grammar]

bhaṃjano bhairavaścaiva kāliko'tha ghaṭodaraḥ |
jhaṃjhakāmardanaḥ piṃgo ruruḥ sarvabhujovraṇī || 30 ||
[Analyze grammar]

supārśvaḥ prabhureteṣāṃ saṃnaddhaḥ pālayandiśam |
udīcyāṃ diśi viprendrāḥ śyāmalaśca gaṇādhipaḥ || 31 ||
[Analyze grammar]

manvantako virūpākṣo golakaḥ śveta saṃplutaḥ |
unmattaḥ prabhureteṣāmudīcyāṃ pālayandiśam || 32 ||
[Analyze grammar]

mūlasthānaśca vai sūryya indreśaśca maheśvaraḥ |
devī kaṇṭheśvarīnāma kṣetrapālaśca khañjanaḥ || 33 ||
[Analyze grammar]

vāsukirnāgarājaśca kūrmapṛṣṭhaśca dānavaḥ |
sanakaśca ṛṣiśreṣṭho golako rākṣasastathā || 34 ||
[Analyze grammar]

nāradonāma gandharvo raṃbhā caiva varāpsarāḥ |
ete pūjyāḥ prayatnena plakṣonāma mahādrumaḥ || 35 ||
[Analyze grammar]

yakṣeśaḥ savitānāma śyāmaḥ pūjyaḥ prayatnataḥ |
aiśānyāṃ diśi viprendrāḥ sthitā ye tānvadāmyaham || 36 ||
[Analyze grammar]

durdharo bhairavārāvaḥ kiṃkiṇīko mahābalaḥ |
karālo vikaṭo mūlo balibhukto balipriyaḥ || 37 ||
[Analyze grammar]

eteṣāṃ kṣetrapālānāṃ sastrīṇāṃ ca dvijottamāḥ |
 netā prabhu śca svāmī ca jayantaḥ pālakastathā || 38 ||
[Analyze grammar]

nigṛhṇātyanugṛhṇāti rakṣitā puravāsinām |
jayantādeśamādāya te duṣṭānghātayanti ca || 39 ||
[Analyze grammar]

nāgasthalasthitaḥ svāmī jayantaḥ pālakaḥ sadā |
nāgarājaiḥ parivṛtaḥ pūjanīyaḥ prayatnataḥ || 40 ||
[Analyze grammar]

māṃsapriyamukhāścaita aiśānīṃ pāṃti vai diśam |
sahasraśīrṣako devaḥ śeṣo nāgasthalasthitaḥ |
ananto vāsukiścaiva takṣakaḥ padma eva ca || 41 ||
[Analyze grammar]

śaṃkhaḥ kaṃbalakaścaiva nāgaścāśvatarastathā |
muktakaḥ kāliyaścaiva janako'thāparājitaḥ || 42 ||
[Analyze grammar]

karkoṭakamukhā nāgāste ca santi sahasraśaḥ |
te pūjyā gaṃdhapuṣpaiśca balibhirdhūpadīpakaiḥ || 43 ||
[Analyze grammar]

pāyasena ca māṃsena hyannādyaiḥ surayā tathā |
tataḥ saṃpūjya devaśaṃ jayaṃtaṃ rakṣiṇāṃ varam || 44 ||
[Analyze grammar]

gaṃdha puṣpopahāraiśca dhūpavastrādibhūṣaṇaiḥ |
tato gaccheddvijaśreṣṭhāḥ kṛṣṇaṃ devakinandanam |
saṃpūjyaḥ prathamaṃ tatra gaṇeśo rukmisaṃjñakaḥ || 45 ||
[Analyze grammar]

ṛṣaya ūcuḥ |
kathaṃ sa rukmidaityendro yo duṣṭo gaṇatāṃ gataḥ |
sākṣādbhagavato dvāri pratyahaṃ pūjyate naraḥ || 46 ||
[Analyze grammar]

śrīprahlāda uvāca |
kṛṣṇāya rukmiṇīṃ dātuṃ yadā bhīṣmaka udyataḥ |
taddveṣātkrodhasaṃyukto rukmī caidyamamanyata || 47 ||
[Analyze grammar]

yadā jahāra bhagavānrukmiṇīmaṃbikālayāt |
sarvānvidrāvya vai bhūpāñjarāsandhamukhānraṇe || 48 ||
[Analyze grammar]

tadā rukmī mahābāhurbhīṣmakasya suto balī |
nāhatvā vinivartiṣye tamahaṃ yādavaṃ raṇe || 49 ||
[Analyze grammar]

pratijñāṃ sarvabhūpānāṃ śṛṇvatāṃ kṛtavāndvijāḥ |
evamuktvā sa sannaddho yuddhāya paridhāvitaḥ || 50 ||
[Analyze grammar]

akṣauhiṇyā dalenaivāyuddhyatkṛṣṇena bho dvijāḥ |
sa yudhyamānaḥ kṛṣṇena vadhyamāno hataujasaḥ || 51 ||
[Analyze grammar]

baddho bhagavatā tatra kṛtvā vairūpyameva ca |
rāmeṇa baṃdhanānmukto maraṇāya matiṃ dadhau || 52 ||
[Analyze grammar]

rukmiṇī bhrātaraṃ dṛṣṭvā maraṇe kṛtaniścayam |
uvāca kṛṣṇaṃ vaidarbhī bhrātaraṃ hyānayasva me || 53 ||
[Analyze grammar]

tatastatpriyakāmārthamanumānya janārddanaḥ |
cakāra pārṣadāṃ madhye pravaraṃ vighnanāśanam || 54 ||
[Analyze grammar]

etasmātkāraṇādviprāḥ prathamaṃ pūjyate sadā |
gaṃdhadhūpākṣatairvastrairmodakaistaṃ pratarpayet || 55 ||
[Analyze grammar]

tasmiṃstuṣṭe jagannāthastuṣṭo bhavati nānyathā || 56 ||
[Analyze grammar]