Chapter 7

[English text for this chapter is available]

śrīprahlāda uvāca |
tato gaccheddvijaśreṣṭhā rathāṃgākhyaṃ mahodadhim |
cakrāṃkā yatra pāṣāṇā dṛśyaṃte muktidāyakāḥ || 1 ||
[Analyze grammar]

yaiḥ pūjyate jagannāthaḥ pratyahaṃ bhāva saṃyutaiḥ |
sadā netrairanimiṣairvīkṣyate ca janārdanaḥ || 2 ||
[Analyze grammar]

yacca sākṣādbhagavatā dṛṣṭaṃ kṛṣṇena dṛṣṭitaḥ |
tattīrthaṃ sarvapāpaghnaṃ cakrākhyaṃ paramaṃ hareḥ || 3 ||
[Analyze grammar]

yasya prasiddhiḥ paramā trailokye sacarācare |
prayāgādadhikaṃ yacca muktidaṃ hyasti pāvanam || 4 ||
[Analyze grammar]

surairapi prapūjyaṃte yatrāṃgāni śarīriṇām |
aṃkitāni ca cakreṇa ṣaṇmāsānnātra saṃśayaḥ || 5 ||
[Analyze grammar]

yaddṛṣṭvā mucyate pāpātprasaṃgenāpi mānavaḥ |
tattīrthaṃ sarvatīrthānāṃ pāvanaṃ pravaraṃ smṛtam || 6 ||
[Analyze grammar]

tatra gatvā dvijaśreṣṭhāḥ prakṣālya caraṇau mudā |
karau cāsyaṃ caiva punaḥ praṇameddaṃḍavatpunaḥ || 7 ||
[Analyze grammar]

praṇipatya gṛhītvārghyaṃ paṃcaratnasamanvitam |
sapuṣpākṣatagaṃdhaiśca phalahemasucaṃdanaiḥ || 8 ||
[Analyze grammar]

saṃpannamarghyamādāya maṃtrametamudīrayet |
pratyaṅmukhaḥ suniyataḥ saṃmukho vā mahodadheḥ || 9 ||
[Analyze grammar]

oṃ namo viṣṇu rūpāya viṣṇucakrāya te namaḥ |
gṛhāṇārghyaṃ mayā dattaṃ sarvakāmaprado bhava || 10 ||
[Analyze grammar]

agniśca tejo mṛḍayā ca rudro retodhā viṣṇuramṛtasya nābhiḥ |
etadbruvanvāḍavāḥ satyavākyaṃ tato'vagāheta patiṃ nadīnām || 11 ||
[Analyze grammar]

mṛdamālabhya sajalāṃ viprā devakaracyutām |
dhārayitvā tu śirasā snānaṃ kuryyādyathāvidhi || 12 ||
[Analyze grammar]

tarpayecca pitṝndevānmanuṣyāṃśca yathākramam |
tarpayitvā havirdravyaṃ prokṣayitvā ca bhaktitaḥ || 13 ||
[Analyze grammar]

aśvamedhasahasreṇa samyagyaṣṭena yatphalam |
snānamātreṇa tatproktaṃ cakratīrthe dvijottamāḥ || 14 ||
[Analyze grammar]

prayāge yatphalaṃ proktaṃ māghyāṃ mādhavapūjane |
snānamātreṇa tatproktaṃ cakra tīrthe dvijottamāḥ || 15 ||
[Analyze grammar]

kārayecca tataḥ śrāddhaṃ pitṝṇāṃ śraddhayānvitaḥ |
viśvedevānsuvarṇena rājatena tathā pitṝn || 16 ||
[Analyze grammar]

saṃtarpya bhojanenaiva vastrālaṃkārabhūṣaṇaiḥ |
dīnāndhakṛpaṇebhyaśca dānaṃ deyaṃ svaśaktitaḥ || 17 ||
[Analyze grammar]

cakratīrthe tīrthavare viśeṣāddvijasattamāḥ |
ratnadānaṃ prakurvīta prīṇanārthaṃ jagatpateḥ || 18 ||
[Analyze grammar]

gantrīmanaḍuhā yuktāṃ sarvāstaraṇasaṃyutām |
sopaskarāṃ ca dadyādvai viṣṇurme prīyatāmiti || 19 ||
[Analyze grammar]

suvinītaṃ śīlayutaṃ tathā sopaskaraṃ hayam |
bhūṣayitvā ca viprāya dadyāddakṣiṇayā saha || 20 ||
[Analyze grammar]

evaṃ kṛte dvijaśreṣṭhāḥ kṛtakṛtyo bhavennaraḥ |
muktiṃ prayāṃti tasyaiva pitarastrikulodbhavāḥ || 21 ||
[Analyze grammar]

pretayoniṃ gatā ye ca ye ca kīṭatvamāgatāḥ |
pacyaṃte narake ye ca mahārauravasaṃjñake || 22 ||
[Analyze grammar]

te sarve tṛptimāyāṃti cakatīrtha prabhāvataḥ |
śrāddhe kṛte dvijaśreṣṭhā gayāśrāddhaphalaṃ labhet || 23 ||
[Analyze grammar]

yā gatirmātṛbhaktānāṃ yajvanāṃ yā gatiḥ smṛtā |
cakratīrthe dvijaśreṣṭhāḥ snātvā tāṃ labhate naraḥ || 24 ||
[Analyze grammar]

śrāddhaṃ praśastaṃ vipreṃdrāḥ saṃprāpte caṃdrasaṃkṣaye |
sūryagrahe viśeṣeṇa kurukṣetraphalaṃ smṛtam |
śrāddhe snāne tathā dāne pitṝṇāṃ tarpaṇe tathā || 25 ||
[Analyze grammar]

praśastaṃ cakratīrthaṃ ca nātra kāryyā vicāraṇā || 26 ||
[Analyze grammar]

sarvadā pāvanaṃ viprāścakratīrthaṃ na saṃśayaḥ |
yastu śrāddhaṃ prakurvīta yātrāyāmāgato naraḥ || 27 ||
[Analyze grammar]

cakratīrthe dvijaśreṣṭhāḥ saṃpūjya madhusūdanam |
pūjiteṣu dvijeṃdreṣu viṣṇusāṃnidhyamāpnuyāt || 28 ||
[Analyze grammar]

vācā kṛtaṃ karmakṛtaṃ manasāṃ samupārjitam |
snānamātreṇa tatpāpaṃ naśyate nātra saṃśayaḥ || 29 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe caturthe dvārakāmāhātmye gomatyudadhisaṃgamatīrasthacakratīrthamāhātmyavarṇanaṃnāma saptamo'dhyāyaḥ || 7 ||
[Analyze grammar]