Chapter 6

[English text for this chapter is available]

ṛṣaya ūcuḥ |
sādhusādhu mahābhāga prahlādā surasattama |
yena naḥ kalimadhye tu darśito bhagavānhariḥ || 1 ||
[Analyze grammar]

tvanmukhakṣīrasiṃdhūtthā katheyamamṛtopamā |
karṇābhyāṃ pibatāṃ tṛptirmunīnāṃ na prajāyate |
kathayasva mahābāho tīrthayātrāṃ suvistarām || 2 ||
[Analyze grammar]

asmābhistatra gaṃtavyaṃ vahate yatra gomatī |
tiṣṭhate yatra bhagavāṃścakratīrthāvalokakaḥ || 3 ||
[Analyze grammar]

bhavābdhau patitāṃstāta uddharasva bhavārṇavāt |
tīrthayātrāvidhānaṃ ca kathayasva mahāmate || 4 ||
[Analyze grammar]

prahlāda uvāca |
gatvā tu gomatītīre praṇameddaṃḍavacca tām |
prakṣālya pāṇipādau ca kṛtvā ca karayoḥ kuśān || 5 ||
[Analyze grammar]

gṛhītvā tu phalaṃ śubhramakṣataiśca samanvitam |
prāṅmukhaḥ prayato bhūtvā dadyādarghyaṃ vidhānataḥ || 6 ||
[Analyze grammar]

brahmalokātsamāyāte vasiṣṭhatanaye śubhe |
sarvapāpaviśuddhyarthaṃ dadāmyarghyaṃ tu gomati || 7 ||
[Analyze grammar]

vasiṣṭhatanaye devi suravaṃdye yaśasvini |
trailokyavaṃdite devi pāpaṃ me hara gomati || 8 ||
[Analyze grammar]

ityuccāryya dvijaśreṣṭhā mṛdamālabhya pāṇinā |
viṣṇuṃ saṃsmṛtya manasā maṃtrametamudīrayet || 9 ||
[Analyze grammar]

aśvakrāṃte rathakrāṃte viṣṇukrāṃte vasuṃdhare |
uddhṛtā'si varāheṇa kṛṣṇena śatabāhunā || 10 ||
[Analyze grammar]

mṛttike hara me pāpaṃ yanmayā pūrvasaṃcitam |
tvayā hatena pāpena pūtaḥ saṃvatsaraṃ bhavet || 11 ||
[Analyze grammar]

ityevaṃ mṛdamālipya snānaṃ kuryyādyathāvidhi |
āpo asmāniti snātvā śṛṇudhvaṃ yatphalaṃ labhet || 12 ||
[Analyze grammar]

kurukṣetre ca yatpuṇyaṃ rāhugraste divākare |
snānamātreṇa tatpuṇyaṃ gomatyāṃ kṛṣṇasannidhau || 13 ||
[Analyze grammar]

bhaktyā snātvā tu tatraivaṃ kuryātkarma yathoditam |
devānpitṝnmanuṣyāṃśca tarpayedbhāvasaṃyutaḥ || 14 ||
[Analyze grammar]

ye ca rauravasaṃsthā hi ye ca kīṭatvamāgatāḥ |
gomatīnīradānena muktiṃ yāṃti na saṃśayaḥ || 15 ||
[Analyze grammar]

vināpyakṣatadarbhairvā vinā bhāvanayā tathā |
vārimātreṇa gomatyāṃ gayāśrāddhaphalaṃ labhet || 16 ||
[Analyze grammar]

tataśca viprānāhūya vedajñāṃstīrasaṃśrayān |
viśvedevādi saṃpūjya pitṝṇāṃ śrāddhamācaret || 17 ||
[Analyze grammar]

śraddhayā parayā yuktaḥ śrāddhaṃ kṛtvā vidhānataḥ |
dakṣiṇāṃ ca tato dadyātsuvarṇaṃ rajataṃ tathā || 18 ||
[Analyze grammar]

suvarṇaśṛṃgasahitāṃ rājatakhurabhūṣitām |
ratnapucchāṃ vastrayutāṃ tāmrapṛṣṭhāṃ savatsakām || 29 ||
[Analyze grammar]

dadyādvipraṃ samabhyarcya vastrālaṃkārabhūṣaṇaiḥ |
saptadhānyayutāṃ dadyādviṣṇurme prīyatāmiti || 20 ||
[Analyze grammar]

āsīmāṃtaṃ visṛjyaitānbrāhmaṇānniyateṃdriyaḥ |
dīnāṃdhakṛpaṇebhyaśca dānaṃ dadyātsvaśaktitaḥ || 21 ||
[Analyze grammar]

gomatī gomayasnānaṃ godānaṃ gopicandanam |
darśanaṃ gopināthasya gakārāḥ paṃca durlabhāḥ || 22 ||
[Analyze grammar]

tasmāccaiva prakartavyaṃ godānaṃ gomatītaṭe |
evaṃ kṛtvā dvijaśreṣṭhāḥ kṛtakṛtyo bhavennaraḥ || 23 ||
[Analyze grammar]

ye gatā narakaṃ ghoraṃ ye ca pretatvamāgatāḥ |
pūrvakarmavipākena sthāvaratvaṃ gatāśca ye || 24 ||
[Analyze grammar]

pitṛpakṣe ca ye kecinmātṛpakṣe kulodbhavāḥ |
sarve te muktimāyāṃti gomatyā darśanātkalau || 25 ||
[Analyze grammar]

kṛtaṃ śrāddhaṃ narairyaistu gomatyāṃ bhūsurottamāḥ |
hayamedhasya yajñasya phalamāyāṃtyasaṃśayam || 26 ||
[Analyze grammar]

gaṃgāsnānena yatpuṇyaṃ prayāge parikīrttitam |
tatpuṇyaṃ samavāpnoti gomatyāṃ śrāddhakṛnnaraḥ || 27 ||
[Analyze grammar]

viṣṇulokaṃ hi gacchaṃti pitarastatkulodbhavāḥ |
anekajanmasāhasraṃ pāpaṃ yāti na saṃśayaḥ || 28 ||
[Analyze grammar]

vācā ca yatkṛtaṃ pāpaṃ karmaṇā manasā tathā |
tatsarvaṃ vilayaṃ yāti gomatīdarśanena hi || 29 ||
[Analyze grammar]

yo naraḥ kārttike snānaṃ gomatyāṃ kurute dvijāḥ |
prasanno bhagavāṃstasya lakṣmyā saha na saṃśayaḥ || 30 ||
[Analyze grammar]

pratyahaṃ hutaṃ bhoktāraṃ tarpayetsusamāhitaḥ |
pratyahaṃ ṣaḍrasaṃ deyaṃ bhojanaṃ ca dvijātaye || 31 ||
[Analyze grammar]

pūjayetkṛṣṇadevaṃ ca pratyahaṃ bhaktitatparaḥ |
yena kenāpi viprendrāḥ sthātavyaṃ niyamena tu || 32 ||
[Analyze grammar]

brāhmaṇānujñayā tatra gṛhṇīyānniyamānnaraḥ |
saṃpūrṇe kārttike māsi saṃprāpte bodhavāsare || 33 ||
[Analyze grammar]

paṃcāmṛtena deveśaṃ snāpayettīrthavāriṇā |
śrīkhaṇḍaṃ kuṃkumonmiśraṃ mṛganābhisamanvitam |
vilepayecca deveśaṃ bhaktyā dāmodaraṃ harim || 34 ||
[Analyze grammar]

kusumairvārisaṃbhūtaistulasyā karavīrakaiḥ |
taddeśasaṃbhavaiḥ puṣpaiḥ pūjayedgaruḍadhvajam || 35 ||
[Analyze grammar]

naivedyaṃ ruciraṃ dadyādvi ṣṇurme prīyatāmiti |
gītavādyādinṛtyena tathā pustakavācanaiḥ || 36 ||
[Analyze grammar]

rātrau jāgaraṇaṃ kāryyaṃ stotrairnānāvidhairapi |
āhūya brāhmaṇānbhaktyā bhojayecca svaśaktitaḥ || 37 ||
[Analyze grammar]

tato rathasthitaṃ devaṃ pūjayedgaruḍadhvajam |
kārttikāṃte ca vipreṃdrā gomatyudadhisaṃgame || 38 ||
[Analyze grammar]

snātvā pitṝṃśca saṃtarpya pūjayecca janārddanam |
suvastrairbhūṣaṇaiścāpi samabhyarcya ramāpatim |
anujñayā tu viprāṇāṃ vrataṃ saṃpūrṇatāṃ nayet || 39 ||
[Analyze grammar]

evaṃ yaḥ snāti viprendrāḥ kārttike kṛṣṇasannidhau |
sarvapāpavinirmukto viṣṇulokaṃ sa gacchati || 40 ||
[Analyze grammar]

māghasnānaṃ naro bhaktyā gomatyāṃ kurute tu yaḥ |
vainateyodaye nityaṃ saṃtuṣṭaḥ saha bhāryayā || 41 ||
[Analyze grammar]

tilā hiraṇyasahitā deyā brāhmaṇasattame |
modakā guḍasaṃmiśrāḥ pratyahaṃ dakṣiṇānvitāḥ || 42 ||
[Analyze grammar]

tilairājyāplutairhomaḥ karttavyaḥ pratyahaṃ naraiḥ |
homārthaṃ sevayedvahniṃ na śītārthaṃ kadācana || 43 ||
[Analyze grammar]

gomatyāṃ snāti yo bhaktyā māghaṃ mādhavavallabham |
samāptau raktavastrāṇi kañcukoṣṇīṣameva ca || 44 ||
[Analyze grammar]

dadyādupānahau bhaktyā kuṃkumaṃ ca viśeṣataḥ |
kambalaṃ tailapakvaṃ ca viṣṇurme prīyatāmiti || 45 ||
[Analyze grammar]

svāmikāryyamṛtānāṃ ca saṃgrāme śastrasaṃkule |
gavārthe brāhmaṇārthe ca mṛtānāṃ yā gatiḥ smṛtā || 46 ||
[Analyze grammar]

māghasnāne ca sā proktā gomatyāṃ nātra saṃśayaḥ |
sarvadānaphalaṃ tasya sarva tīrthaphalaṃ tathā || 47 ||
[Analyze grammar]

māghasnānānnaro yāti viṣṇulokaṃ sanātanam |
sarvānkāmānavāpnoti samabhyarcya janārddanam || 48 ||
[Analyze grammar]

māghaṃ yaḥ kṣapate sarvaṃ gomatyudadhisaṃgame |
brāhmaṇānujñayā viprāḥ sarvaṃ saṃpūrṇatāṃ vrajet || 49 ||
[Analyze grammar]

pāpino'pi dvijaśreṣṭhā ye snātā gomatījale |
yajvināṃ ca gatiṃ yāṃti prasādāccakrapāṇinaḥ || 50 ||
[Analyze grammar]

brahmarudrapadādūrdhvaṃ yatpadaṃ cakrapāṇinaḥ |
snānamātreṇa gomatyāṃ tatproktaṃ kṛṣṇasaṃnidhau || 51 ||
[Analyze grammar]

mitradrohe ca yatpāpaṃ yatpāpaṃ gurughātini |
tatpāpaṃ samavāpnoti yātrābhaṃgaṃ karoti yaḥ || 52 ||
[Analyze grammar]

brahmasvahāriṇaḥ pāpāstathā devasvahāriṇaḥ |
snānamātreṇa śuddhyaṃti gomatyāṃ nātra saṃśayaḥ || 53 ||
[Analyze grammar]

bhītā'bhayapradānena yatpuṇyaṃ labhate naraḥ |
tatpuṇyaṃ samavāpnoti gomatyāṃ snānamātrataḥ || 54 ||
[Analyze grammar]

bhītābhaya pradānena putrāniṣṭānna saṃśayaḥ |
dhanakāmastu vipulaṃ labhate dhanamūrjitam || 55 ||
[Analyze grammar]

prāpnuyādīpsitānkāmāngomatīnīrasaṃgame |
kṛtakṛtyo bhavedviprā ṛṇānmucyeta paitṛkāt || 56 ||
[Analyze grammar]

manasā vacasā caiva karmaṇā yadupārjitam |
tatsarvaṃ naśyate pāpaṃ gomatīnīrasaṃgamāt || 57 ||
[Analyze grammar]

pītāṃbaradharo bhūtvā tathā garuḍavāhanaḥ |
vanamālī caturbāhurdivyagandhānulepanaḥ |
yāti viṣṇvālayaṃ viprā apunarbhavalakṣaṇam || 58 ||
[Analyze grammar]

gomatīsnānamātreṇa mānavo nātra saṃśayaḥ |
sarvapāpavinirmukto yāti viṣṇuṃ sanātanam || 59 ||
[Analyze grammar]

iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṃḍe caturthe dvārakāmāhātmye gomatyudadhisaṃgame snānadānādimāhātmyavarṇanaṃnāma ṣaṣṭho'dhyāyaḥ || 6 ||
[Analyze grammar]