Chapter 34

[English text for this chapter is available]

pulastya uvāca |
kṛṣṇatīrthaṃ tato gacchetkṛṣṇasya dayitaṃ sadā |
yatra sannihito nityaṃ svayaṃ viṣṇurmahīpate |
yayātiruvāca |
kṛṣṇatīrthaṃ kathaṃ tatra jātaṃ brāhmaṇasattama |
kasminkāle mune brūhi sarvaṃ vistarato mama || 2 ||
[Analyze grammar]

pulastya uvāca |
tasminnekārṇave ghore naṣṭe sthāvarajaṃgame |
caṃdrārkapavane naṣṭe jyotiṣi pralayaṃ gate || 3 ||
[Analyze grammar]

tato yugasahasrāṃte vibuddhaḥ kamalāsanaḥ |
ekākī ciṃtayāmāsa kathaṃ sṛṣṭirbhavediti || 4 ||
[Analyze grammar]

bhramaṃścāpi caturvaktro yāvatpaśyati dūrataḥ |
caturbhujaṃ viśālākṣaṃ puruṣaṃ purataḥ sthitam || 5 ||
[Analyze grammar]

taṃ covāca caturvaktraḥ kastvaṃ kena vinirmitaḥ |
kimarthamiha saṃprāptaḥ sarvaṃ vistarato vada || 6 ||
[Analyze grammar]

tamuvācātha goviṃdaḥ prahasañchlakṣṇayā girā || 7 ||
[Analyze grammar]

ahamādyaḥ pumāneko mayā sṛṣṭo bhavānapi |
sraṣṭumicchāmi bhūyo'pi bhūtagrāmaṃ caturvidham || 8 ||
[Analyze grammar]

pulastya uvāca |
tasya tadvacanaṃ śrutvā kruddho devaḥ pitāmahaḥ |
abravītparuṣaṃ vākyaṃ bhartsayaṃśca punaḥpunaḥ || 9 ||
[Analyze grammar]

sṛṣṭastvaṃ hi mayā mūḍha prathamo'hamasaṃśayam |
tvādṛśānāṃ sahasrāṇi kariṣye'hamasaṃśayam || 10 ||
[Analyze grammar]

evaṃ vivadamānau tau mitho rājanmahādyutī |
spardhayā roṣatāmrākṣau yuyudhāte parasparam || 11 ||
[Analyze grammar]

muṣṭibhirbāhubhiścaiva nakhairdaṃtairvikarṣaṇaiḥ |
evaṃ varṣasahasraṃ tu tayoryuddhamavarttata || 12 ||
[Analyze grammar]

tato varṣasahasrāṃte tayormadhye nṛpottama |
prādurbhūtaṃ mahāliṃgaṃ divyaṃ tejomayaṃ śubham || 13 ||
[Analyze grammar]

etasminneva kāle tu vāguvācāśarīriṇī |
yuddhādbrahmannivartasva tvaṃ ca viṣṇo mamājñayā || 14 ||
[Analyze grammar]

etanmāheśvaraṃ liṃgaṃ yo'sya cāṃte gamiṣyati |
sa jyeṣṭhaḥ sa vibhuḥ karttā yuvayornātra saṃśayaḥ || 15 ||
[Analyze grammar]

adhobhāgaṃ vrajatveka ekaścorddhvaṃ mamājñayā |
tacchrutvā satvaro brahmā vyomamārgaṃ samāśritaḥ || 16 ||
[Analyze grammar]

vidārya vasudhāṃ kṛṣṇo'pyadhastātsatvaraṃ gataḥ |
sa bhittvā saptapātālānadho yāvatprayāti ca |
tāvatkālāgnirudrastu dṛṣṭastena mahātmanā || 17 ||
[Analyze grammar]

gaṃtumicchaṃstato'dhastādyāvadvegaṃ karoti saḥ |
tāvattasyārcibhirdagdhaḥ kṛṣṇatvaṃ samapadyata || 18 ||
[Analyze grammar]

tato mūrchābhisaṃtapto dahyamāno'dbhutāgninā |
nivartya sahasā viṣṇurvailakṣyaṃ paramaṃ gataḥ || 19 ||
[Analyze grammar]

tathā liṃgaṃ samāsādya bhaktyā pūjā kṛtā tataḥ |
vedoktaiḥ paramaiḥ sūkṣmaiḥ stutiṃ cakre mahīpate || 20 ||
[Analyze grammar]

brahmā'pi vyomamārgeṇa gato haṃsavimānataḥ |
divyaṃ varṣasahasraṃ tu tasyāṃtaṃ nābhyapadyata || 21 ||
[Analyze grammar]

tato varṣasahasrāṃte ketakīṃ so'pyapaśyata |
āyāṃtīṃ vyomamārgeṇa tayā pṛṣṭaścaturmukhaḥ || 22 ||
[Analyze grammar]

kva tvayā gamyate brahmannirālaṃbe mahāpathi |
śūnye tattvaṃ samācakṣva paraṃ kautūhalaṃ hi me || 23 ||
[Analyze grammar]

brahmovāca |
mama spardhā samutpannā viṣṇunā saha śobhane |
liṃgasyāsya hi paryaṃtaṃ yo labhiṣyati cāvayoḥ || 24 ||
[Analyze grammar]

sa jyāyānitaro hīno hyetaduktaṃ pinākinā |
prasthito'haṃ tataścorddhvamadhomārgaṃ gato hariḥ || 25 ||
[Analyze grammar]

labdhvā liṃgasya paryaṃtaṃ yāsyāmi kṣitimaṃḍale |
tasya tadvacanaṃ śrutvā tatpuṣpamabhyabhāṣata || 26 ||
[Analyze grammar]

vyarthaśramo'si lokeśa nāṃto liṃgasya vidyate |
caturyugasahasrāṇāṃ koṭirekā pitāmaha || 27 ||
[Analyze grammar]

liṃgamūrdhnaḥ pataṃtyā me kālo jāto mahādyute |
tathāpi kṣiti pṛṣṭhaṃ tu na prāptāsmi kathaṃcana || 28 ||
[Analyze grammar]

yāvatkālena haṃsaste yojanaṃ saṃpragacchati |
tāvatkālena gacchāmi yojanānāmahaṃ śatam || 29 ||
[Analyze grammar]

tasmānnivartanaṃ yuktaṃ mama vākyena te vibho |
darśayitvā ca māṃ viṣṇorjyeṣṭhatvaṃ vraja sāṃpratam || 30 ||
[Analyze grammar]

tato hṛṣṭamanā bhūtvā gṛhītvā tāṃ caturmukhaḥ |
punarvarṣasahasrāṃte bhūmipṛṣṭhamupāgataḥ |
darśayāmāsa tāṃ viṣṇoreṣā liṃgasya mūrdhataḥ || 31 ||
[Analyze grammar]

mayā'nītā śubhā mālā labdhaścāṃtaṃ caturbhuja |
tvayā labdho na cāsatyaṃ vada me puruṣottama || 32 ||
[Analyze grammar]

viṣṇuruvāca |
anaṃtasyāprameyasya devadevasya śūlinaḥ |
nāhaṃ śaktaḥ paraṃ pāraṃ gaṃtuṃ brahmankathaṃcana || 33 ||
[Analyze grammar]

yadi tvayā'sya paryaṃto labdho brahmankathaṃcana |
tatte tuṣṭiṃ gato nūnaṃ devadevo maheśvaraḥ || 34 ||
[Analyze grammar]

nānyathā cāsya paryaṃto dṛśyate kena citkvacit |
tasmājjyeṣṭho bhavāñchreṣṭhaḥ kaniṣṭho'hamasaṃśayam || 35 ||
[Analyze grammar]

pulastya uvāca |
etasminneva kāle tu bhagavānvṛṣabhadhvajaḥ |
kopaṃ cakre mahārāja brahmāṇaṃ prati tatkṣaṇāt || 36 ||
[Analyze grammar]

athāha darśanaṃ gatvā dhigdhigvyarthaprajalpaka |
mithyā prajalpamānena kimidaṃ sāhasaṃ kṛtam || 37 ||
[Analyze grammar]

yasmāttvayā mṛṣā proktaṃ mama paryaṃtadarśanam |
tasmāttvaṃ sarvavarṇānāṃ pūjārho na bhaviṣyasi || 38 ||
[Analyze grammar]

ye ca tvāṃ pūjayiṣyaṃti mānavā moha saṃyutāḥ |
te kṛcchraṃ paramaṃ prāpya nāśaṃ yāsyaṃti kṛtsnaśaḥ || 39 ||
[Analyze grammar]

ketakyā ca tathā proktaṃ yasmāttasmātsuduṣṭayā |
asyā hi sparśanāllokaḥ śvapākatvaṃ prayāsyati || 40 ||
[Analyze grammar]

evaṃ śāpo tayordattvā devaḥ provāca keśavam |
prasannavadano bhūtvā tadā tuṣṭo maheśvaraḥ || 41 ||
[Analyze grammar]

bhagavānuvāca |
vāsudeva mahābāho tuṣṭaste'haṃ mahāmate |
satyasaṃbhāṣaṇādeva varaṃ varaya suvrata || 42 ||
[Analyze grammar]

śrīvāsudeva uvāca |
eṣa eva varaḥ ślāghyo yattvaṃ tuṣṭo maheśvaraḥ |
na cāpuṇyavatāṃ deva tvaṃ tuṣṭimadhigacchasi |
avaśyaṃ yadi me deyo varo deveśvara tvayā || 43 ||
[Analyze grammar]

liṃgametadanaṃtākhyaṃ laghutāṃ naya mā ciram |
yena sṛṣṭirbhavelloke vyāptaṃ viśvamanena tu || 44 ||
[Analyze grammar]

pulastya uvāca |
tataḥ saṃkṣipya talliṃgaṃ laghu kṛtvā maheśvaraḥ |
abravītkeśavaṃ bhūyaḥ śṛṇu vākyamidaṃ hare || 45 ||
[Analyze grammar]

etanmedhyatame deśe liṃgaṃ sthāpaya me hare |
pūjaya tvaṃ vidhānena paraṃ śreyaḥ prapatsyase || 46 ||
[Analyze grammar]

mama tejovinirdagdhaḥ kṛṣṇatvaṃ hi yato gataḥ |
kṛṣṇa eva tato nāma loke khyātiṃ gamiṣyati || 47 ||
[Analyze grammar]

kṛṣṇakṛṣṇeti te nāma prātarutthāya mānavaḥ |
kīrtayiṣyati yo bhaktyā sa yāti paramāṃ gatim || 48 ||
[Analyze grammar]

pulastya uvāca |
evamuktvā tamīśānastatraivāṃtaradhīyata |
vāsudevo'pi talliṃgaṃ gṛhītvā'rbudaparvate |
nirjhare sthāpayāmāsa supuṇye vimalodake || 49 ||
[Analyze grammar]

kṛṣṇatīrthaṃ tato jātaṃ nāmnā hi dharaṇītale |
śṛṇu pārthivaśārdūla tatra snātasya yatphalam || 50 ||
[Analyze grammar]

snātvā kṛṣṇahrade puṇye talliṃgaṃ paśyate tu yaḥ |
sarvatīrthodbhavaṃ śreyaḥ sa marttyo labhate'khilam || 51 ||
[Analyze grammar]

tathā ca sarvadānānāṃ niṣkāmaḥ prāpnuyātphalam |
sakāmo'pi phalaṃ ceṣṭaṃ yadyapi syātsudurllabham || 52 ||
[Analyze grammar]

tasmātsarvaprayatnena snānaṃ tatra samācaret |
ya icchecchāśvataṃ śreyo nātra kāryā vicāraṇā || 53 ||
[Analyze grammar]

ekādaśyāṃ mahārāja nirāhāro jitendriyaḥ |
yastatra jāgaraṃ kṛtvā liṃgasyāgre subhaktitaḥ || 54 ||
[Analyze grammar]

prabhāte kurute śrāddhaṃ yastu śraddhāsamanvitaḥ |
pitṛnsaṃtārayetsarvānpūrvajaiḥ saha dharmavit || 55 ||
[Analyze grammar]

tilānkṛṣṇānnarastatra brāhmaṇebhyo dadāti yaḥ |
brahmahatyādibhiḥ pāpaiḥ sa marttyo mucyate dhruvam || 56 ||
[Analyze grammar]

darśanādeva rājendra kṛṣṇatīrthasya mānavaḥ |
mucyate sarvapāpebhyo nātra kāryā vicāraṇā || 57 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe kṛṣṇatīrthamāhātmyavarṇanaṃnāma catustriṃśo'dhyāyaḥ || 34 ||
[Analyze grammar]