Chapter 13

[English text for this chapter is available]

pulastya uvāca |
tato gacchennṛpaśreṣṭha tīrthaṃ trailokyaviśrutam |
aṃbarīṣasya rājarṣeraiśānyāṃ pāpanāśanam || 1 ||
[Analyze grammar]

yatra svayaṃ hṛṣīkeśaḥ kāle ca kalisaṃjñake |
tasya vākyādṛtastīrthe svayaṃ hi paritiṣṭhati || 2 ||
[Analyze grammar]

purāsītpṛthivīpālo hyaṃbarīṣo yuge kṛte |
harimārādhayāmāsa tapastepe suduṣkaram || 3 ||
[Analyze grammar]

tasmiṃstīrthe sa rājendro mitabhakṣo jitendriyaḥ |
sahasramekaṃ varṣāṇāṃ tata āsītphalāśanaḥ || 4 ||
[Analyze grammar]

sahasre dve tato rājañchīrṇaparṇāśano'bhavat |
sahasre dve tato bhūyo jalāhāro babhūva ha || 5 ||
[Analyze grammar]

sahasratritayaṃ rājanvāyubhakṣo babhūva ha |
cintayanpuṃḍarīkākṣaṃ mānase śraddhayānvitaḥ || 6 ||
[Analyze grammar]

daśa varṣasahasrānte tataśca nṛpasattama |
tutoṣa bhagavānviṣṇustasyāsau darśanaṃ dadau || 7 ||
[Analyze grammar]

kṛtvā devapate rūpamāruhyairāvataṃ gajam |
abravīdvarado'smīti aṃbarīṣaṃ narādhipam || 8 ||
[Analyze grammar]

iṃdra uvāca |
varaṃ varaya bhadraṃ te rājanyanmanasīpsitam |
tvāṃ dṛṣṭvā bhaktisaṃyuktamāgato'hamasaṃśayam || 9 ||
[Analyze grammar]

aṃbarīṣa uvāca |
muktiṃ dātumaśaktosi tvaṃ ca vṛtraniṣūdana |
tava prasādāddeveśa trailokyaṃ mama varttate |
svāgataṃ gaccha deveśa na varo rocate mama || 10 ||
[Analyze grammar]

sarvathā dāsyate mahyaṃ varaṃ tuṣṭaścaturbhujaḥ |
tadāhaṃ pratigṛhṇāmi gaccha deva namostu te || 11 ||
[Analyze grammar]

indra uvāca |
varaṃ varaya rājarṣe yatte manasi varttate |
brahmaviṣṇutrinetrāṇāmahamīśo nṛpotama || 12 ||
[Analyze grammar]

anyeṣāṃ caiva devānāṃ trailokyasyāpyahaṃ vibhuḥ |
varaṃ varaya tasmāttvaṃ prasādānme sudurllabham || 13 ||
[Analyze grammar]

prasanne mayi rājendra prasannāḥ sarvadevatāḥ |
kuru me vacanaṃ rājangṛhyatāṃ varamuttamam || 14 ||
[Analyze grammar]

aṃbarīṣa uvāca |
rājā tvaṃ sarvadevānāṃ trailokyasya tatheśvaraḥ |
saptadvīpavatī rājā ahaṃ vṛtraniṣūdana || 15 ||
[Analyze grammar]

haṣīkeśasya sadbhaktaṃ viddhi māṃ tāta niścayam |
āgataśca hṛṣīkeśo varaṃ dāsyatyasaṃśayam || 16 ||
[Analyze grammar]

indra uvāca |
dadato mama bhūpāla na gṛhṇāsi varaṃ yadi |
vajraṃ tvāṃ prerayiṣyāmi vadhāya kṛtaniścayaḥ || 17 ||
[Analyze grammar]

evamuktvā sahasrākṣaḥ sṛkkiṇī parilelihan |
kuliśaṃ bhrāmayāmāsa gṛhītvā dakṣiṇe kare || 18 ||
[Analyze grammar]

tasyevaṃ bhrāmyamāṇasya mahotpātā babhūvire |
tataḥ parvataśṛṃgāṇi viśīrṇāni samaṃtataḥ || 19 ||
[Analyze grammar]

āvṛtaṃ gagana meghairvidhunvānairmahīṃ tadā |
na kiṃciddṛśyate tatra sarvaṃ saṃtamasāvṛtam || 20 ||
[Analyze grammar]

etasminneva kāle tu sa rājā harivatsalaḥ |
nimīlya locane svīye samādhistho babhūva ha || 21 ||
[Analyze grammar]

tatastuṣṭo jagannātha sākṣātpratyakṣatāṃ gataḥ |
airāvataḥ sa garuḍastatkṣaṇātsamajāyata || 22 ||
[Analyze grammar]

tamuvāca hṛṣīkeśo meghagaṃbhīrayā girā |
dhyānasthitaṃ nṛpaśreṣṭhaṃ śaṃkha cakragadādharaḥ || 23 ||
[Analyze grammar]

śrībhagavānuvāca |
parituṣṭo'smi te vatsānanyabhakta janeśvara |
varaṃ varaya bhadraṃ te yadyapi syātsudurlabham || 24 ||
[Analyze grammar]

aṃbarīṣa uvāca |
yadi prasanno bhagavanyadi deyo varo mama |
saṃsārābdhestāraṇāya varado bhava me hare || 25 ||
[Analyze grammar]

pulastya uvāca |
athāha bhagavānviṣṇuraṃbarīṣaṃ janādhipam |
jñānayogaṃ suvistīrṇaṃ saṃsārakṣayakāraṇam || 26 ||
[Analyze grammar]

yasmiñjāte naraḥ sadyaḥ saṃsārānmucyate nṛpa |
śrutvā sa nṛpatiḥ samyakpraṇamyovāca keśavam || 27 ||
[Analyze grammar]

aṃbarīṣa uvāca |
bhagavanyastvayā prokto yogo'yaṃ mama vistarāt |
durjñeyaḥ sa nṛṇāṃ deva viśeṣācca kalau yuge || 28 ||
[Analyze grammar]

api cetsuprasanno'si kriyāyogaṃ bravīhi me |
lokānāṃ tāraṇārthāya śaṃkhacakragadādhara || 29 ||
[Analyze grammar]

pulastya uvāca |
tatastasmai narendrāya kriyāyogaṃ janārddanaḥ |
yathāyogyaṃ nṛpaśreṣṭha kathayāmāsa keśavaḥ || 30 ||
[Analyze grammar]

taṃ śrutvā tuṣṭahṛdayoṃ'barīṣo vākyamabravīt || 31 ||
[Analyze grammar]

aṃbarīṣa uvāca |
yadi tuṣṭo'si bhagavanrūpeṇānena mādhava |
mamāśrame tvaṃ deveśa sadā sannihito bhava || 32 ||
[Analyze grammar]

yatastvatpratimāmekāmarcayāmi vidhānataḥ |
pūjayiṣyaṃti lokāstvāṃ śaṃkhacakragadādharam || 33 ||
[Analyze grammar]

pulastya uvāca |
tathokto mādhavenāsau cakāra harimaṃdiram |
pratimāṃ pūjayāmāsa gandhapuṣpānulepanaiḥ || 34 ||
[Analyze grammar]

tataḥ kālena mahatā bhagavānviṣṇumaṃdire |
tenaiva vapuṣā prāptaḥ saputraḥ sahabāṃdhavaḥ || 35 ||
[Analyze grammar]

adyāpi bhagavānviṣṇuḥ satyavākyena bhūpateḥ |
sadā saṃnihito viṣṇustasminnavasare kalau || 36 ||
[Analyze grammar]

tadārabhya mahārāja kriyāyogo dharātale |
pravṛttaḥ pratimākāraḥ kāle ca kalisaṃjñake || 37 ||
[Analyze grammar]

yastaṃ pūjayate bhaktyā hṛṣīkeśe nṛpārbude |
sa yāti viṣṇusālokyaṃ prasādācca harernṛpa || 38 ||
[Analyze grammar]

ekādaśyāṃ mahārāja jāgaraṃ yaḥ sadā nṛpa |
kariṣyati nirāhāro hṛṣīkeśāgrataḥ sthitaḥ |
sa yāsyati paraṃ sthānaṃ durllabhaṃ tridaśairapi || 39 ||
[Analyze grammar]

yatpuṇyaṃ kapilādāne kārtikyāṃ jyeṣṭhapuṣkare |
tatphalaṃ labhate marttyo hṛṣīkeśasya darśanāt || 40 ||
[Analyze grammar]

śukle vā yadi vā kṛṣṇe saṃprāpte harivāsare |
yaḥ paśyati hṛṣīkeśamaśvamedhaphalaṃ labhet || 41 ||
[Analyze grammar]

tasmātsarvaprayatnena pūjayettu vidhānataḥ |
yastatra caturo māsansamyagvrataparāyaṇaḥ |
abhyarcayeddhṛṣīkeśaṃ na sa bhūyo'bhijāyate || 42 ||
[Analyze grammar]

ekaḥ sarvāṇi tīrthāni karoti nṛpasattama |
paśyatyanyo hṛṣīkeśaṃ cāturmāsyaṃ samāhitaḥ || 43 ||
[Analyze grammar]

eko dānāni sarvāṇi brāhmaṇebhyaḥ prayacchati |
paśyatyanyo hṛṣīkeśaṃ cāturmāsyaṃ samāhitaḥ || 44 ||
[Analyze grammar]

ekaḥ kanyāsahasraṃ tu pradadyācca yathāvidhi |
paśyatyanyo hṛṣīkeśaṃ cāturmāsyaṃ samāhitaḥ || 45 ||
[Analyze grammar]

sūryagrahe kurukṣetre dadyāddānamanuttamam |
paśyatyanyo hṛṣīkeśaṃ cāturmāsyaṃ samāhitaḥ || 46 ||
[Analyze grammar]

agniṣṭomādibhiryajñairyajatyekaḥ sadakṣiṇaiḥ |
paśyatyanyo hṛṣīkeśaṃ cāturmāsyaṃ samāhitaḥ || 47 ||
[Analyze grammar]

eko himālayaṃ gatvā tyajati sva kalevaram |
paśyatyanyo haṣīkeśaṃ cāturmāsyaṃ samāhitaḥ || 48 ||
[Analyze grammar]

ekastu bhṛgupātena tyajeddehaṃ sutīrthake |
paśyatyanyo hṛṣīkeśaṃ cāturmāsyaṃ samāhitaḥ || 49 ||
[Analyze grammar]

ekaḥ prāyopaveśena prāṇāṃstyajati mānavaḥ |
paśyatyanyo hṛṣīkeśaṃ cāturmāsyaṃ samāhitaḥ || 50 ||
[Analyze grammar]

brahmajñānaṃ vadatyekaḥ śrutvā jñānavi śāradaḥ |
paśyatyanyo hṛṣīkeśaṃ cāturmāsyaṃ samāhitaḥ || 51 ||
[Analyze grammar]

gayāśrāddhaṃ karotyekaḥ pitṛpakṣe nṛpottama |
paśyatyanyo hṛṣīkeśaṃ cāturmāsyaṃ samāhitaḥ || 52 ||
[Analyze grammar]

cāṃdrāyaṇasahasraṃ ca karotyekaḥ samāhitaḥ |
paśyatyanyo hṛṣīkeśaṃ cātumāsyaṃ samāhitaḥ || 53 ||
[Analyze grammar]

vrataṃ tapaḥ sahasrābdamekaḥ samyakcarennaraḥ |
paśyatyanyo hṛṣīkeśaṃ cāturmāsyaṃ samāhitaḥ || 54 ||
[Analyze grammar]

ekastu caturo vedānsamyakpaṭhati brāhmaṇaḥ |
paśyatyanyo hṛṣīkeśaṃ cāturmāsyaṃ samāhitaḥ || 55 ||
[Analyze grammar]

bahunā kimihoktena śṛṇu saṃkṣepato nṛpa |
ekatastu bhavetsarvamekato haridarśanam || 56 ||
[Analyze grammar]

tasmātsarvaprayatnena sthātavyaṃ harisaṃnidhau |
ambarīṣasya rājarṣeḥ sthānake pāpanāśane || 57 ||
[Analyze grammar]

ekatastu hṛṣīkeśa ekataḥ karṇikeśvaraḥ |
tayormartyā mṛtā ye ca mānavā nṛpasattama || 58 ||
[Analyze grammar]

api kṛtvā mahatpāpaṃ gacchaṃti harisannidhau |
hṛṣīkeśaṃ samālokya sadyo muktimavāpnuyāt || 59 ||
[Analyze grammar]

puṣpamekaṃ hṛṣīkeśe yaścāropayate nṛpa |
sukhasaubhāgyasaṃyukta iha loke paratra ca || 60 ||
[Analyze grammar]

hṛṣīkeśasya yo bhaktyā kariṣyatyanulepanam |
sa yāsyati paraṃ sthānaṃ jarāmaraṇavarjitam || 61 ||
[Analyze grammar]

saṃmārjanaṃ ca tasyāgre yaḥ karoti samāhitaḥ |
yāvatyo reṇavastatra tāvadvarṣaśatāni saḥ |
modate viṣṇulokastho nātra kāryā vicāraṇā || 62 ||
[Analyze grammar]

kārtike śuklapakṣe ca ekādaśyāṃ nṛpottama |
dīpamāropayedyaśca hṛṣīkeśāgrato nṛpa || 63 ||
[Analyze grammar]

yathāyathā prakāśeta pāpaṃ janmāṃtarārjitam |
tathātathā vrajennāśaṃ tasya kāyādaśeṣataḥ || 64 ||
[Analyze grammar]

paṃcāmṛtena yaḥ pūjāṃ hṛṣīkeśe kariṣyati |
dadhnā kṣīreṇa vā yastu na sa bhūyo'bhijāyate || 65 ||
[Analyze grammar]

tasmātsarvaprayatnena hṛṣīkeśaṃ samarcayet |
saṃsārabaṃdhato rājanmuktimāpnoti mānavaḥ || 66 ||
[Analyze grammar]

hṛṣīkeśe viśeṣeṇa karttavyaṃ pūjanaṃ sadā || 67 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṇḍe hṛṣīkeśamāhātmya varṇanaṃnāma trayodaśo'dhyāyaḥ || 13 ||
[Analyze grammar]