Chapter 5

[English text for this chapter is available]

ṛṣaya ūcuḥ |
arbudasya ca māhātmyaṃ vistareṇa vadasva naḥ |
kautukaṃ sūta no jātaṃ kathayasva yathā śubham || 1 ||
[Analyze grammar]

sūta uvāca |
purāsīcca ṛṣiśreṣṭhaḥ pulastyo bhagavānmuniḥ |
yayāteśca gṛhe yātastaṃ natvā cābravīnnṛpaḥ || 2 ||
[Analyze grammar]

|yayātiruvāca |
svāgataṃ te muniśreṣṭha saphalaṃ me'dyajīvitam |
kathayasva prasādena kathāmarbudasaṃbhavām || 3 ||
[Analyze grammar]

arbudākhyo nago nāma vikhyāto yo dharātale |
tasya yātrākramaṃ brūhi tatphalaṃ dvijasattama || 4 ||
[Analyze grammar]

sarvaṃ vistarato brūhi tīrthayātrāparāyaṇa |
tasmādvada muniśreṣṭha yena yātrāṃ karomyaham || 5 ||
[Analyze grammar]

pulastya uvāca |
bahudharmamayo rājannarbudaḥ parvatottamaḥ |
aśakto vistarādvaktumapi varṣaśatairapi || 6 ||
[Analyze grammar]

saṃkṣepādeva vakṣyāmi tīrthamukhyāni te tathā |
nāgatīrthaṃ tu tatrādyaṃ sarvakāmapradaṃ nṛṇām || 7 ||
[Analyze grammar]

nārīṇāṃ ca viśeṣeṇa putrasaubhāgyadāyakam |
śṛṇu rājanpurāvṛttaṃ yato'tyāścaryamuttamam || 8 ||
[Analyze grammar]

gautamī brāhmaṇī nāmnā satī sādhvī pativratā |
bālavaidhavyasaṃprāptā tīrthayātrāparāyaṇā || 9 ||
[Analyze grammar]

arbudaṃ sā ca saṃprāptā nāgatīrthaṃ viveśa ha |
tasmiñjale nimagnā sā snātumabhyāyayau purā || 10 ||
[Analyze grammar]

nāyakā putrasaṃyuktā tattīrthaṃ samupāgatā |
śuśrūṣāṃ sā tastasyāścakre nānāvidhāṃ nṛpa || 11 ||
[Analyze grammar]

sarvopakaraṇairdarbhaiḥ sumanobhiḥ pṛthagvidhaiḥ |
atha sā ciṃtayāmāsa gautamī putraduḥkhitā || 12 ||
[Analyze grammar]

dhanyo'yaṃ tanayo hyasyāḥ śuśrūṣāṃ kurute sadā |
putrayuktā tviyaṃ dhanyā dhigahaṃ putravarjitā || 13 ||
[Analyze grammar]

ahaṃ bhartrā viyuktā ca putrahīnā suduḥkhitā |
atha sā nirgatā tasmātsalilānnṛpasattama || 14 ||
[Analyze grammar]

vinā'pi bhartṛsaṃyogātsadyo garbhavatī hyabhūt |
sā garbhalakṣaṇairyuktā sujanavrīḍayā'nvitā || 15 ||
[Analyze grammar]

cakāra maraṇe buddhiṃ jvālayāmāsa pāvakam || etasminneva kāle tu vāguvācāśarīriṇī || 16 ||
[Analyze grammar]

vāguvāca |
no tvaṃ gautami cityāgnau praveśaṃ kartumarhasi |
doṣo nāsti tavātrārthe tīrthasyāsya prabhāvataḥ || 17 ||
[Analyze grammar]

yo yadvāṃchati citte ca jalamadhye sthito naraḥ |
cintitaṃ ca tadāpnoti nārī vā nātra saṃśayaḥ || 18 ||
[Analyze grammar]

tvayā tasyāḥ sutaṃ dṛṣṭvā putravāṃchā kṛtā hṛdi |
tava garbhagato nūnaṃ putraḥ putri bhaviṣyati || 19 ||
[Analyze grammar]

tasmādvirama bhadraṃ te nirdoṣāsi pativrate |
virarāma tataḥ sādhvī gautamī maraṇānnṛpa || 20 ||
[Analyze grammar]

śrutvā'kāśagatāṃ vāṇīṃ devadūtena bhāṣitām |
dṛṣṭvā patiṃ vinā garbhaṃ vākyameta duvāca ha || 21 ||
[Analyze grammar]

aho tīrthaprabhāvo'yamapūrvaḥ pratibhāti me |
yatra saṃjāyate garbhaḥ strīṇāṃ śukrarajovinā || 22 ||
[Analyze grammar]

nāhaṃ kutrāpi yāsyāmi muktvedaṃ tīrthamuttamam |
evamuktvā tataḥ sādhvī tatraiva nyavasatsadā || 23 ||
[Analyze grammar]

putraṃ vai janayāmāsa sarvalakṣaṇalakṣitam |
tatra pārthivaśārdūla kṛṣṇapakṣe 'śvinasya ca || 24 ||
[Analyze grammar]

yaḥ punaḥ kurute śrāddhaṃ tasya vaṃśo na naśyati |
na preto jāyate rājanvaṃśe tasya kadācana || 25 ||
[Analyze grammar]

yaḥ pumānkāmarahitaḥ snānaṃ tatra samācaret |
śrāddhaṃ ca pārthivaśreṣṭha tasya lokāḥ sanātanāḥ || 26 ||
[Analyze grammar]

yā strī puṣpaphalānyeva tīrthe cāsminvisarjayet |
sā syātputravatī dhanyā saubhāgyaṃ ca prapadyate || 27 ||
[Analyze grammar]

niṣkāmā svargamāpnoti duṣprāpyaṃ tridaśairapi |
tasmātsarvaprayatnena yātrāṃ tasya samācaret || 28 ||
[Analyze grammar]

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe nāgatīrthamāhātmyavarṇanaṃnāma paṃcamo'dhyāyaḥ || 5 ||
[Analyze grammar]