Chapter 334

[English text for this chapter is available]

īśvara uvāca |
bhagavandevadeveśa saṃsārārṇavatāraka || pṛcchāmi tvāmahaṃ bhaktyā kiñcitkautūhalātpunaḥ || 1 ||
[Analyze grammar]

yattvayā kathitaṃ deva talasvāmimahodayam |
kiṃ tatra kāraṇaṃ deva talo yena nipātitaḥ || 2 ||
[Analyze grammar]

ko'sau talaḥ samākhyātaḥ kiṃvīryaḥ kiṃparāyaṇaḥ |
kasmātsthānātsamutpannaḥ kathaṃ jātaśca me vada || 3 ||
[Analyze grammar]

īśvara uvāca |
śṛṇu devi pravakṣyāmi rahasyaṃ pāpanāśanam |
yanna kasyacidākhyātaṃ tatte vakṣyāmya śeṣataḥ || 4 ||
[Analyze grammar]

devā api na jānaṃti talasotpattikāraṇam |
pūrvaṃ kṛtayuge devi govindeti prakīrtitaḥ || 5 ||
[Analyze grammar]

tretāyāṃ vāmanaḥ svāmī stutisvāmī tṛtīyake |
kalau yuge mahādevi talasvāmī prakīrtitaḥ || 6 ||
[Analyze grammar]

tathā taptodakasvāmī tasya nāmāṃtaraṃ priye |
adhunā saṃpravakṣyāmi talotpattiṃ tava priye || 7 ||
[Analyze grammar]

āsīnmahendranāmā ca dānavo raudrarūpadhṛk |
koṭivarṣāṇi tenaiva tapastaptaṃ purā priye || 8 ||
[Analyze grammar]

sa tapobalamāviṣṭo jigye devānsavāsavān |
jitvā devāṃstataḥ sarvāṃstataḥ kāle samāgataḥ || 9 ||
[Analyze grammar]

yuddhaṃ sa prārthayāmāsa mayā sārddhaṃ subhīṣaṇam |
tato'bhavanmahāyuddhaṃ brahmāṇḍakṣayakārakam || 10 ||
[Analyze grammar]

tataḥ kopānmahāyuddhe mama dehādvarānane |
jvālā tatra samutpannā tanmadhye sa talo'bhavat || 11 ||
[Analyze grammar]

tena dṛṣṭo mahendro'sau garjangiriguhāśrayaḥ || 12 ||
[Analyze grammar]

kathaṃ garjasi he mūḍha yuddhaṃ kuru mayā saha |
ityukte tatra deveśi tena yuddhamavartata || 13 ||
[Analyze grammar]

tatra pravarttite yuddhe talamāhendrayostayoḥ || 14 ||
[Analyze grammar]

rudravīryasya yuktena talenodārakarmaṇā |
mallayuddhena balinā mahendro vinipātitaḥ || 15 ||
[Analyze grammar]

tatastaṃ patitaṃ dṛṣṭvā vismayaṃ sa talo gataḥ |
gataprāṇaṃ tadā jñātvā harṣānnṛtyamathākarot || 16 ||
[Analyze grammar]

tasminsaṃnṛtyamāne tu sarve sthāvarajaṃgamam |
cakaṃpe tu varārohe prabhāvāttasya vīryataḥ || 17 ||
[Analyze grammar]

tato bhārabharākāntā dharaṇī talapīḍitā |
atīvabhayasaṃtrastāḥ sadevāsuramānuṣāḥ || 18 ||
[Analyze grammar]

kṣubhitā girayaḥ sarve vidrutāśca mahārṇavāḥ |
taravo nidhanaṃ jagmurnadyo vāhāṃśca tatyajuḥ || 19 ||
[Analyze grammar]

gataprabhāvāḥ sūryādyā jyotīṃṣi na virejire |
trailokyaṃ vyākulībhūtaṃ talanṛtyaprabhāvataḥ || 20 ||
[Analyze grammar]

tato devagaṇāḥ sarve śaraṇaṃ rudramāyayuḥ |
vṛttaṃ yathāvatkathitaṃ tato rudra uvāca tān || 21 ||
[Analyze grammar]

avadhyo me talo devāḥ putratve hi pratiṣṭhitaḥ |
evamuktvā hṛṣīkeśaṃ prabhāsakṣetravāsinam || 22 ||
[Analyze grammar]

stutisvāmītināmānaṃ sthitaṃ durvāsasaḥ puraḥ |
prabhāsakṣetrasāmīpye pūrvabhāge pratiṣṭhitam || 23 ||
[Analyze grammar]

taptodakuṃḍasāmīpye tatra gacchata bhoḥ surāḥ |
kalpekalpe tu tenaiva vidhyate'sau hi dānavaḥ || 24 ||
[Analyze grammar]

evamukte tadā devāḥ prabhāsaṃ kṣetramāgatāḥ |
tatra te vibudhā jagmuryatra taptodakādhipaḥ || 25 ||
[Analyze grammar]

dṛṣṭvā nārāyaṇaṃ tatra devāḥ śraddhāsamanvitāḥ |
tuṣṭuvuḥ parayā bhaktyā devadevaṃ janārddanam || 26 ||
[Analyze grammar]

vaikuṃṭha trāhi no devāṃstalenoccāṭitā vayam |
mahendrakrodhasaṃbhūtarudratejodbhavena vai || 27 ||
[Analyze grammar]

asmābhī rudrasāmīpye kāryaṃ sarvaṃ niveditam |
tataḥ prasthāpitāḥ sarve rudreṇa parameṣṭhinā |
tava pārśve mahādeva nastvaṃ deva gatirbhava || 28 ||
[Analyze grammar]

iti śrutvā vacasteṣāṃ devadevo janārddanaḥ |
dānavasyavadhārthāya devānāṃ rakṣaṇāya ca |
cakre yatnaṃ mahābāhuḥ prabhāsakṣetravallabhaḥ || 29 ||
[Analyze grammar]

samāhūya tadā daityaṃ prabhāsakṣetramadhyataḥ |
yuddhaṃ cakre tato devi viśvapralayakārakam || 30 ||
[Analyze grammar]

tatastu devāḥ sarve ca svasainyaparivāritāḥ |
cakruryuddhaṃ ca daityena sumahallomaharṣaṇam || 31 ||
[Analyze grammar]

tataḥ parvatasaṃkāśaṃ dṛṣṭvā daityaṃ mahābalam |
uvāca capalāpāṃgo garuḍakṛtavāhanaḥ || 32 ||
[Analyze grammar]

aho daitya mahābāho mallayuddhaṃ dadasva me |
tvadbāhuyugalaṃ dṛṣṭvā na yuddhe vāṃchitaṃ mama || 33 ||
[Analyze grammar]

nārāyaṇavacaḥ śrutvā karamudyamya dānavaḥ |
abhyadhāvattadā daityaḥ kālāntakasamaprabhaḥ || 34 ||
[Analyze grammar]

tataḥ pravartitaṃ yuddhamanyonyaṃ jayakāṃkṣiṇoḥ |
jaṃghābhyāṃ pādabandhena bāhubhyāṃ bāhubaṃdhanam || 35 ||
[Analyze grammar]

kaṃṭhena bandhayankaṃṭhamudareṇodaraṃ tathā || etasminnantare devāḥ sabhayāḥ saṃbabhūvire || 36 ||
[Analyze grammar]

tataḥ pīḍāsamākrāṃto viṣṇuḥ saṃsmarate haram |
tatkṣaṇādāgato rudraḥ kiṃ karomi mahābalaḥ || 37 ||
[Analyze grammar]

viṣṇuruvāca |
śrāṃto'haṃ devadeveśa mallayuddhena śaṃkara |
taptodakaṃ kuruṣveha śramanāśāya sāṃpratam || 38 ||
[Analyze grammar]

tatastalaṃ haniṣyāmi kṣaṇa mātreṇa bhairavam || 39 ||
[Analyze grammar]

īśvara uvāca |
ādau kṛtayuge kṛṣṇa umayā yatkṛtaṃ purā |
ṛṣīṇāṃ śramanāśārthaṃ taptodaṃ tatra nirmitam || 40 ||
[Analyze grammar]

taddaityapāpamāhātmyātpunaḥ śītalatāṃ gatam |
punastaduṣṇatāṃ nītaṃ tataḥ kalpāṃtasaṃsthitau || 41 ||
[Analyze grammar]

evamuktvā tadā devaṃ vīkṣāṃcakre maheśvaraḥ |
tṛtīya locanenaiva jvālāmālopaśobhinā || 42 ||
[Analyze grammar]

tena jvālāsamūhena vyāptaṃ kuṇḍaṃ caturdiśam |
taptodakuṇḍamabhavattena khyātaṃ dharātale || 43 ||
[Analyze grammar]

tato nārāyaṇeneha kṣālitaṃ gātrasuttamam |
kṣālanāttasya devasya śramo nāśamupāgamat || 44 ||
[Analyze grammar]

tatastuṣṭamanā devastīrthānāṃ daśakoṭikāḥ |
sa smṛtvā tatra vidhivatkṣiptvā snātvā varānane || 45 ||
[Analyze grammar]

tataścakre mahāyuddhaṃ talenātibhayaṃkaram |
jaghāna sa talaṃ daityaṃ muṣṭighātena mastake || 46 ||
[Analyze grammar]

tasminpravṛtte tumule tu yuddhe cakaṃpire bhūbhisametalokāḥ |
vitrastadevā na diśo virejurmahāṃdhakārāvṛtamūrchitaṃ jagat || 47 ||
[Analyze grammar]

naṣṭāśca siddhā jagato'sya śāṃtiṃ karotu vai pāpavināśano hariḥ |
trāhīti deveśi maharṣisaṃghā bhūtāni bhītāni tathā vadanti || 48 ||
[Analyze grammar]

tato vai mallayuddhena pātito bhuvi dānavaḥ |
kaṃṭhamākramya pādena khaṅgena paripīḍitaḥ || 49 ||
[Analyze grammar]

hāsyaṃ cakāra daityo'tha viṣṇunā'krāṃtakaṃdharaḥ |
tamāha puṇḍarīkākṣa kimetaddhāsyakāraṇam || 50 ||
[Analyze grammar]

vṛddhau harṣamavāpnoti kṣaye bhavati duḥkhitaḥ |
ityeṣā laukikī gāthā tatte daitya viparyayaḥ || 51 ||
[Analyze grammar]

ityuktastu tadā daityaḥ pratyuvāca janārddanam |
agniṣṭomādibhiryajñaivedābhyāsairanekadhā || 52 ||
[Analyze grammar]

nityopavāsaniyamaiḥ snānadānairjapādibhiḥ |
nirmalairyogayuktaiśca prāpyate yatparaṃ padam || 53 ||
[Analyze grammar]

tanmayā duṣṭabhāvena prāptaṃ viṣṇoḥ paraṃ padam |
ityukte bhagavānviṣṇurvaradānaparo'bhavat || 54 ||
[Analyze grammar]

uvāca paramaṃ vākyaṃ talaṃ daityādhināyakam |
varaṃ varaya daityeṃdra yatte manasi saṃsthitam || 55 ||
[Analyze grammar]

iti viṣṇorvacaḥ śrutvā prārthayāmāsa dānavaḥ |
mamākhyā varttate loke tathā kuru mahīdhara || 56 ||
[Analyze grammar]

mārgamāse tu śuklāyāmekādaśyāṃ samāhitaḥ |
yastvāṃ paśyati bhāvena tasya pāpaṃ vinaśyatu || 57 ||
[Analyze grammar]

evaṃ bhaviṣyatītyuktvā devo harṣamupāgataḥ |
nānāduṃdubhayo neduḥ puṣpavarṣaṃ papāta ca || 58 ||
[Analyze grammar]

viṣṇormūrdhni mahābhāge lokāḥ svasthā babhūvire |
tato devagaṇāḥ sarve nṛtyaṃti ca mudānvitāḥ |
vadaṃti harṣasaṃyuktā nārāyaṇaparāyaṇāḥ || 59 ||
[Analyze grammar]

etattīrthaṃ mahātīrthaṃ sarvapāpapraṇāśanam |
śramāpanodanaṃ viṣṇorbrahmahatyādiśodhanam || 60 ||
[Analyze grammar]

sthito nārāyaṇastatra bhairavastatra śaṃkaraḥ |
kṣetrapālasvarūpeṇa kālamegheti viśrutaḥ || 61 ||
[Analyze grammar]

tasya yātrāvidhiṃ vakṣye gatvā tatra śucirnaraḥ |
smaredviṣṇuṃ mahādevi talasvāmīti yaḥ śrutaḥ || 62 ||
[Analyze grammar]

stuyādviṣṇuṃ mahādevi idaṃ viṣṇuṛcā priye |
sahasraśīrṣāmaṃtreṇa tarpaṇādi prakārayet || 63 ||
[Analyze grammar]

evaṃ snātvā vidhānena dattvā cārghyaṃ janārddane |
saṃpūjya gaṃdhapuṣpaiśca vastraiḥ puṣpānulepanaiḥ || 64 ||
[Analyze grammar]

madhunekṣurasenaiva kuṃkumena vilepayet |
karpūrośīramiśreṇa mṛganābhiyutena ca || 65 ||
[Analyze grammar]

vastraiḥ saṃveṣṭayetpaścāddadyānnaivedyamuttamam |
dharmaśravaṇasaṃyuktaṃ kāryaṃ jāgaraṇaṃ tataḥ || 66 ||
[Analyze grammar]

vṛṣabhastatra dātavyaḥ suvarṇaṃ vastrayugmakam || |
viprāya vedayuktāya śrotriyāya pradāpayet || 67 ||
[Analyze grammar]

upavāsaṃ tataḥ kuryāttasminnahani bhāmini |
rukmiṇīṃ ca prapaśyeta namaskṛtya janārddanam || 68 ||
[Analyze grammar]

evaṃ kṛtvā naro bhaktyā labhate janmajaṃ phalam |
sarveṣāmeva yajñānāṃ dānānāṃ labhate phalam || 69 ||
[Analyze grammar]

tathā ca sarvatīrthānāṃ vratānāṃ labhate phalam |
uddharettu piturvargaṃ mātṛvargaṃ tathaiva ca || 70 ||
[Analyze grammar]

janmaprabhṛtipāpānāṃ kṛtānāṃ nāśanaṃ bhavet |
na duḥkhaṃ ca na dāridryaṃ durbhagatvaṃ na jāyate || 71 ||
[Analyze grammar]

sapta janmāṃtaraṃ yāvattalasvāmipradarśanāt |
suvarṇānāṃ sahasreṇa brāhmaṇe vedapārage |
dattena yatphalaṃ devi tatkuṇḍe snānato labhet || 72 ||
[Analyze grammar]

evaṃ talasvāmicaritramuttamaṃ śrutaṃ purā siddhamaharṣisaṃghaiḥ |
śrutvā prabhāvaṃ taladevasannidhau prāpnoti sarvaṃ manasā yadīpsitam || 73 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye talasvāmimāhātmyavarṇanaṃnāma catustriṃśaduttaratriśatatamo 'dhyāyaḥ || 334 ||
[Analyze grammar]