Chapter 317

[English text for this chapter is available]

īśvara uvāca |
tato gacchenmahādevi devīṃ kaṃṭakaśoṣiṇīm |
uttareṇa devakulāddakṣiṇenonnatātsthitāt || 1 ||
[Analyze grammar]

tasyotpattiṃ pravakṣyāmi śṛṇu hyekamanāḥ priye |
unnatāddakṣiṇe bhāge yajaṃte dvijasattamāḥ || 2 ||
[Analyze grammar]

bhṛguratrirmarīciśca bharadvājo'tha kaśyapaḥ |
kaṇvo maṃkiśca sāvarṇirjātūkarṇyastathaiva ca || 3 ||
[Analyze grammar]

vatsaścaiva vasiṣṭhaśca pulastyaḥ pulahaḥ kratuḥ |
manuryamoṃ'girā viṣṇuḥ śātātapaparāśarau || 4 ||
[Analyze grammar]

śāṃḍilyaḥ kauśikaścaiva gautamo gārgya eva ca |
dālbhyaśca śaunakaścaiva śākalyo gālavastathā || 5 ||
[Analyze grammar]

jābālirmudgalaścaiva ṛṣyaśṛṃgo vibhāṃḍakaḥ |
viśvāmitraḥ śatānaṃdo jahnurviśvāvasustathā || 6 ||
[Analyze grammar]

ete cānye ca munayo yajaṃte vividhairmakhaiḥ |
yajñavāṭaṃ ca nirmāya ṛṣitoyātaṭe śubhe || 7 ||
[Analyze grammar]

devagandharvanṛtyaiśca veṇuvīṇānināditam |
vedadhvanitaghoṣeṇa yajñahomāgnihotrajaiḥ || 8 ||
[Analyze grammar]

dhūpaiḥ samāvṛtaṃ sarvamājyagaṃdhibhirarcitam |
śobhitaṃ munibhirdivyaiścāturvedyairdvijottamaiḥ || 9 ||
[Analyze grammar]

evaṃvidhaṃ pradeśaṃ tu dṛṣṭvā daityā mahābalāḥ |
samudramadhyādāyātā yajñavidhvaṃsahetave || 10 ||
[Analyze grammar]

māyāvino mahākāyāḥ śyāmavarṇā mahodarāḥ |
laṃbabhrūśmaśrunāsāgrā raktākṣā raktamūrdhajāḥ || 11 ||
[Analyze grammar]

yajñaṃ samāgatāḥ sarve daityāścaiva varānane |
tāndṛṣṭvā munayaḥ sarve raudrarūpānbhayaṃkarān || 12 ||
[Analyze grammar]

kecinnipatitā bhūmau tathānye 'gnau srucīkarāḥ |
patnīśālāṃ samāviṣṭā havirdhānaṃ tathā pare || 13 ||
[Analyze grammar]

ṛtvijastu sadomadhye sthitā vācaṃyamāstathā || 14 ||
[Analyze grammar]

evaṃ devi yadā vṛttaṃ munīnāṃ ca mahātmanām |
tadādhvaryurmahātejā dhairyamālambya sādaraḥ || 15 ||
[Analyze grammar]

agnihotraṃ haviṣyaṃ ca havirvinyasya mantravit |
susamiddhaṃ juhāvāgniṃ rakṣasāṃ nāśahetave || 16 ||
[Analyze grammar]

hute haviṣi deveśi tatkṣaṇādeva cotthitā |
śaktiḥ śaktitriśūlāḍhyā carmahastā mahojjvalā || 17 ||
[Analyze grammar]

tayā te nihatā daityā yajñavidhvaṃsakāriṇaḥ |
tatastāṃ vividhaiḥ stotrairmunayastuṣṭuvustadā || 18 ||
[Analyze grammar]

prasannā bhūyasī devī tānṛṣīnpratyuvāca ha |
varaṃ vṛṇudhvaṃ munayo dāsyāmi varamuttamam || 19 ||
[Analyze grammar]

ṛṣaya ūcuḥ |
kṛtaṃ vai sakalaṃ kāryaṃ yajñā no rakṣitāstvayā |
yadi deyo varo'smākaṃ tvayā cāsuramarddini || 20 ||
[Analyze grammar]

asminsthāne sadā tiṣṭha munīnāṃ hitakāmyayā |
kaṃṭakāḥ śoṣitā daityāstena kaṃṭakaśoṣiṇī |
adyaprabhṛti nāmāstu tena devi sadā tviha || 21 ||
[Analyze grammar]

īśvara uvāca |
evaṃ bhaviṣyatītyuktvā sā devyantarhitā tadā |
aṣṭamyāṃ vā navamyāṃ vā pūjayiṣyati mā navaḥ || 22 ||
[Analyze grammar]

rākṣasebhyaḥ piśācebhyo bhayaṃ tasya na jāyate |
prāpnuyātparamāṃ siddhiṃ mānavo nātra saṃśayaḥ || 23 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye kaṃṭakaśoṣaṇīmāhātmyavarṇanaṃnāma saptadaśottaratriśatatamo'dhyāyaḥ || 317 ||
[Analyze grammar]