Chapter 308

[English text for this chapter is available]

īśvara uvāca |
tasmānnārāyaṇātpūrve kiṃcidīśānasaṃsthitam |
mūlacaṇḍīśanāmnā tu vikhyātaṃ bhuvanatrayaṃ || 1 ||
[Analyze grammar]

yatra liṃgaṃ purā'smākaṃ pātitaṃ tvṛṣibhiḥ priye |
krodharaktekṣaṇairdevi mūlacaṇḍīśatā gatam || 2 ||
[Analyze grammar]

ādyaṃ liṃgodbhavaṃ devi ṛṣikopānnipātitam |
ye kecidṛṣayastatra devadāruvane sthitāḥ || 3 ||
[Analyze grammar]

kālāṃtare mahādevi ahaṃ tatra samāgataḥ |
teṣāṃ jijñāsayā devi tataste roṣitā bhavan |
śaptastato'haṃ deveśi cakrurme liṃgapātanam || 4 ||
[Analyze grammar]

devyuvāca |
roṣopahatasadbhāvāḥ kathamete dvijātayaḥ |
saṃjātā etadākhyāhi paraṃ kautūhalaṃ mama || 5 ||
[Analyze grammar]

īśvara uvāca |
ḍiṃḍi rūpaḥ purā devi bhūtvā'haṃ dāruke vane |
ṛṣīṇāmāśrame puṇye nagno bhikṣācaro'bhavam |
bhikṣaṃtamāśrame dṛṣṭvā tāḥ sarvā ṛṣiyoṣitaḥ || 6 ||
[Analyze grammar]

kāmasya vaśamāpannāḥ priyamutsṛjya sarvataḥ |
tamūrdhvaliṃgamālokya jaṭāmukuṭadhāriṇam || 7 ||
[Analyze grammar]

bhikṣaṃtaṃ bhasmadigdhāṃgaṃ jhaṣaketumivāparam |
vikṣobhitāśca naḥ sarve dārā etena ḍiṃḍinā || 8 ||
[Analyze grammar]

tasmācchāpaṃ ca dāsyāma ṛṣayaste tadā'bruvan |
tataḥ śāpodakaṃ gṛhya saṃdhyātvā'tha tapodhanāḥ || 9 ||
[Analyze grammar]

asya liṃgamadho yātu dṛśyate yatsadonnatam |
ityukte patitaṃ liṃgaṃ tatra devakule mama || 10 ||
[Analyze grammar]

mūlacaṇḍīśanāmnā tu vikhyātaṃ bhuvanatraye |
talliṃgaṃ patitaṃ dṛṣṭvā kopopahatacetasaḥ |
punarhaṃtuṃ samārabdhā ḍiṃḍinaṃ te tapodhanāḥ || 11 ||
[Analyze grammar]

vṛsikāpāṇayaḥ kecitkamaṃḍaludharāḥ pare |
gṛhītvā pādukāścānye tasya dhāvaṃti pṛṣṭhataḥ || 12 ||
[Analyze grammar]

ḍiṃḍiścāṃtarhito bhūtvā tvāmuvāca sumadhyamām |
roṣopahatacetaskānpaśyaitāṃstvaṃ tapodhanān || 13 ||
[Analyze grammar]

etasmātkāraṇāddevi tava vākyānmayā'naghe |
na kṛto'nugrahasteṣāṃ saroṣāṇāṃ tapasvinām || 14 ||
[Analyze grammar]

atrāṃtare te munayo hyapaśyaṃto hi ḍiṃḍinam |
nirānaṃdaṃ gatāḥ sarve draṣṭuṃ devaṃ pitāmaham || 15 ||
[Analyze grammar]

taṃ dṛṣṭvā vibudheśānaṃ viraṃciṃ vigatajvaram |
praṇamya śirasā sarva ṛṣayaḥ prāhuraṃjasā || 16 ||
[Analyze grammar]

bhagavanḍiṃḍi rūpeṇa kaścidasti tapodhanaḥ |
vidhvaṃsanāya dārāṇāṃ praviṣṭaḥ kila bhikṣitum || 17 ||
[Analyze grammar]

śapto'smābhistu durvṛttastasya liṃgaṃ nipātitam |
tasminnipatite'smākaṃ tathaiva patitāni ca || 18 ||
[Analyze grammar]

gato'sau kāraṇāttasmāttalliṃge patite vayam |
nirānaṃdāḥ sthitāḥ sarva ācakṣvaitaddhi kāraṇam || 19 ||
[Analyze grammar]

brahmovāca |
aśobhanamidaṃ kāryaṃ yuṣmābhiryatkṛtaṃ mahat |
rudrasyātisurūpasya serṣyā ye hantumudyatāḥ || 20 ||
[Analyze grammar]

āsurīṃ dānavīṃ daivīṃ yakṣiṇīṃ kiṃnarīṃ tathā |
vidyādharīṃ ca gandharvīṃ nāgakanyāṃ manoramām |
etā varastriyastyaktvā yuṣmadīyāsu tāsvapi || 21 ||
[Analyze grammar]

āhlādaṃ kurute sarve naiva jānīta bho dvijāḥ |
trailokyanāyakāṃ sarvāṃ rūpātiśayasaṃyutām || 22 ||
[Analyze grammar]

tāṃ tyaktvā munipatnīnāmāhlādaṃ kurute katham |
tayā rudro hi vijñapta ṛṣīṇāṃ kurvanugraham || 23 ||
[Analyze grammar]

tena vākyena pārvatyā jijñāsārthaṃ kṛtaṃ manaḥ |
caturddaśavidhasyāpi bhūtagrāmasya yaḥ prabhuḥ || 24 ||
[Analyze grammar]

sa śapto ḍiṃḍirūpastu bhavadbhiḥ karaṇeśvaraḥ |
tacchāpācchaptamevaitatsamastaṃ tadguṇāspadam |
devatiryaṅmanuṣyāṇāṃ nirānaṃdamiti sthitam || 25 ||
[Analyze grammar]

śāpenānena bhavatāṃ mahā doṣaḥ prajāyate |
ārādhyaṃ nānyathā liṃgamunnatiṃ yātyadhogatam || 26 ||
[Analyze grammar]

evamukte'tha devena viprā ūcuḥ pitāmaham |
draṣṭavyaḥ kutra so'smābhiḥ kathayasva yathāsthitam || 27 ||
[Analyze grammar]

brahmovāca |
āste gajasvarūpeṇa kuberāśramasaṃsthitaḥ |
tatra gatvā tamāsādya toṣayadhvaṃ pinākinam || 28 ||
[Analyze grammar]

etacchrutvā vacastasya sarve te hṛṣṭamānasāḥ |
gaṃtuṃ pravṛttāḥ sahasā koṭisaṃkhyāstapodhanāḥ || 29 ||
[Analyze grammar]

ciṃtayaṃtaḥ śubhaṃ deśaṃ draṣṭuṃ taṃ gajarūpiṇam |
rudraṃ pitāmahākhyātaṃ kuberāśramavāsinam || 30 ||
[Analyze grammar]

kṣutkāmakaṃṭhāstṛṣitāngaurī matvā tapodhanān |
ādāya gorasaṃ teṣāṃ kāruṇyātsā puraḥ sthitā || 31 ||
[Analyze grammar]

asitāṃ kuṭilāṃ snigdhāmāyatāṃ bhujagīmiva |
veṇīṃ śirasi bibhrāṇā gaurī gorasasaṃyutā || 32 ||
[Analyze grammar]

sā tānāha munīnsarvānyanmayā parvatāhṛtam |
kapitthaphalasaṃgaṃdhaṃ gorasaṃ tvamṛtopamam || 33 ||
[Analyze grammar]

tayaivamuktā viprāstu āhustāṃ vipulekṣaṇām |
snātvā ca sarve pāsyāmo gorasaṃ tu tvayāhṛtam || 34 ||
[Analyze grammar]

tataḥ śrutvā tathā devyā snānārthaṃ tīrthamuttamam |
taptodakenasaṃpūrṇaṃ kṛtaṃ kuṇḍaṃ manoramam || 35 ||
[Analyze grammar]

tatra te saṃplutāḥ sarve vimuktā vipulācchramāt |
kṛtā'hnā gorasasvaiva pānārthaṃ samupasthitāḥ || 36 ||
[Analyze grammar]

patrairdivākaratarorvidhāya puṭakāñchubhān |
upaviśya kramātsarve te pibaṃti sma gorasam || 37 ||
[Analyze grammar]

gorasena tadā teṣāmamṛteneva pūritān |
bubhukṣitānāṃ puṭakānmunīnāṃ tṛptikāraṇāt || 38 ||
[Analyze grammar]

punaḥ pūrayate gaurī pītvā te tṛptimāgatāḥ |
kṣuttṛṣāśramanirmuktāḥ punarjātā iva sthitāḥ || 39 ||
[Analyze grammar]

svasthacittaistato jñātvā neyaṃ gopālisaṃjñikā |
anugrahārthamasmākaṃ gaurīyaṃ samupāgatā || 40 ||
[Analyze grammar]

praṇamya śirasā sarve tāmūcuste sumadhyamām |
ume kathaya kutrasthaṃ drakṣyāmo rudramekadā || 41 ||
[Analyze grammar]

tathoktāste mahātmānastaṃ paśyata mahāgajam |
gajatāṃ ca samāsādya saṃcaraṃtaṃ mahābalam || 42 ||
[Analyze grammar]

bhavadbhirnijabhaktyāyaṃ saṃgrāhyo hi yathāsukham |
te tadvacanamāsādya sametyaikatra ca dvijāḥ || 43 ||
[Analyze grammar]

pavitrāstaṃ gajaṃ draṣṭuṃ bhāvitenāṃtarātmanā |
yatraikatra sthitā viprāstatra tīrthaṃ mahodayam |
saṃgameśvarasaṃjñaṃ tu pūrvaṃ sarvatra viśrutam || 44 ||
[Analyze grammar]

tatastasmātpravṛttāste draṣṭukāmā mahāgajam |
kuṃḍikāḥ saṃparityajya saṃnahyātmānamātmanā || 45 ||
[Analyze grammar]

yatra tāḥ kuṃḍikāstyaktāstattīrthaṃ kuṇḍikāhvayam |
sarvapāpaharaṃ puṃsāṃ dṛṣṭā'dṛṣṭaphalapradam || 46 ||
[Analyze grammar]

kuberasyāśramaṃ prāpya tataste munisattamāḥ |
nālikeravanīsaṃsthaṃ dadṛśustaṃ dvipaṃ tadā || 47 ||
[Analyze grammar]

kare grahītumārabdhāḥ svakarairhṛṣṭamānasāḥ |
gajastānkarasaṃlagnānvicikṣepa tapodhanān || 48 ||
[Analyze grammar]

kāścidaṃgasamālagnānsamaṃtādbhayavarjitān |
evaṃ sa taiḥ punaḥ sarvairmaśakairiva ceṣṭitam || 49 ||
[Analyze grammar]

krīḍāṃ karoti vividhāṃ vanasaṃstho haradvipaḥ |
tadrūpaṃ saṃparityajya rudro raudragajātmakam || 50 ||
[Analyze grammar]

punaranyaccakārāsau ḍiṃḍirūpaṃ manoramam |
jayaśabdapraghoṣeṇa vedamaṅgalagītakaiḥ || 51 ||
[Analyze grammar]

unnāmitaṃ punastena yatra liṃgaṃ mahodayam |
tadunnatamiti proktaṃ sthānaṃ sthānavatāṃ varam || 52 ||
[Analyze grammar]

gajarūpadharastatra sthitaḥ sthāne mahābalaḥ |
gaṇanāthasvarūpeṇa hyunnato jagati sthitaḥ || 53 ||
[Analyze grammar]

ḍiṃḍirūpa dharo bhūtvā rudraḥ prāha tapodhanān |
yanmayā bhavatāṃ kāryaṃ kartavyaṃ tadihocyatām || 54 ||
[Analyze grammar]

evamuktastu tairuktaḥ sarvajñānakriyāparaiḥ |
sānandāḥ prāṇinaḥ saṃtu tvatprasādātpurā yathā || 55 ||
[Analyze grammar]

kṣaṃtavyaṃ devadeveśa kṛtaṃ yanmūḍhamānasaiḥ |
tvatprasādātsureśāna tattvaṃ sānugraho bhava || 56 ||
[Analyze grammar]

evamastviti tenoktāste sarve vigatajvarāḥ |
talliṃgānukṛtiṃ liṃgamījire munayastathā |
cakruste munayaḥ sarve stutiṃ vigatamatsarāḥ || 57 ||
[Analyze grammar]

kṣamasva devadeveśa kurvasmākamanugraham |
asmiṃlliṃge layaṃ gaccha mūlacaṇḍīśasaṃjñake |
trikālaṃ devadeveśa grāhyā hyatra kalā tvayā || 58 ||
[Analyze grammar]

īśvara uvāca |
caṇḍī tu procyate devī tasyā īśastvahaṃ smṛtaḥ |
tasya mūlaṃ smṛtaṃ liṃgaṃ tadatra patitaṃ yataḥ || 59 ||
[Analyze grammar]

tasmāttanmūla caṇḍīśa iti khyātiṃ gamiṣyati || vā |
pīkūpataḍāgānāṃ śataistu vipulairapi || 60 ||
[Analyze grammar]

kṛtairyajjāyate puṇyaṃ tatpuṇyaṃ liṃgadarśanāt |
brahmāṇḍaṃ sakalaṃ dattvā yatpuṇyaphalamāpnuyāt || 61 ||
[Analyze grammar]

tatpuṇyaṃ labhate devi mūlacaṇḍīśadarśanāt |
tatra dānāni deyāni ṣoḍaśaiva narottamaiḥ || 62 ||
[Analyze grammar]

evaṃ tadbhavitā sarvaṃ yanmayoktaṃ dvijottamāḥ |
yāta dāruvanaṃ viprāḥ sarve yūyaṃ tapodhanāḥ |
mayā sarve samādiṣṭā yāta dāruvanaṃ dvijāḥ || 63 ||
[Analyze grammar]

tatastu saṃprāpya mahadvaco mama sarve prahṛṣṭā munayo mahodayam |
gatvā ca taddāruvanaṃ maheśvari punaśca ceruḥ sutapastapodhanāḥ || 64 ||
[Analyze grammar]

etasmātkāraṇāddevi mūlacaṇḍīśasaṃjñitam |
liṃgaṃ pāpaharaṃ nṛṇāmarddhacandreṇa bhūṣitam || 65 ||
[Analyze grammar]

dohanī dugthadānena munīnāṃ tṛṣitātmanām |
śramāpahāraṃ yaddevi tvayā kṛtamanuttamam |
tattaptodakanāmnā vā abhūtkuṇḍaṃ dharātale || 66 ||
[Analyze grammar]

ṛṣitoyājale snātvā caṇḍīśaṃ yaḥ prapūjayet |
sa pracaṇḍo bhavedbhūmau bhuvanānāmadhīśvaraḥ || 67 ||
[Analyze grammar]

etatsaṃkṣepato devi māhātmyaṃ kīrtitaṃ tava |
mūlacaṇḍīśadevasya śrutaṃ pātakanāśanam || 68 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye taptodakakuṇḍotpattau mūlacaṇḍīśotpattimāhātmyavarṇanaṃnāmāṣṭottara triśatatamo'dhyāyaḥ || 308 ||
[Analyze grammar]