Chapter 255

[English text for this chapter is available]

īśvara uvāca |
tato gacchenmahādevi tīrthaṃ trailokyaviśrutam |
tasyaiva paścime bhāge ṛṣīṇāṃ puṇyakarmaṇām || 1 ||
[Analyze grammar]

tasmiṃstrinetrā matsyāśca dṛśyaṃte'dyāpi bhāmini |
aṃgirā gautamo'gastyaḥ sumatiḥ susakhistathā || 2 ||
[Analyze grammar]

viśvāmitraḥ sthūlaśirāḥ saṃvarttaḥ pratimarddanaḥ |
raibhyo bṛhaspatiścaiva cyavanaḥ kaśyapo bhṛguḥ || 3 ||
[Analyze grammar]

durvāsā jāmadagnyaśca mārkaṃḍeyo'tha gālavaḥ |
uśanā'tha bharadvājo yavakrītastritastathā || 4 ||
[Analyze grammar]

nāradaḥ parvataścaiva vasiṣṭho'ruṃdhatī tathā || 5 ||
[Analyze grammar]

kāṇvo'tha gautamo dhaumyaḥ śatānando'kṛtavraṇaḥ |
jamadagnistathā rāmo bakaścetyevamādayaḥ |
kṛṣṇadvaipāyanaścaiva putraśiṣyaiḥ samanvitaḥ || 6 ||
[Analyze grammar]

etatkṣetraṃ samā sādya prabhāsaṃ munisattamāḥ |
tapastepurmahātmāno vividhaṃ paramādbhutam || 7 ||
[Analyze grammar]

evaṃ te niyatātmāno damayuktāstapasvinaḥ |
samādhinā jigīṣante brahmalokaṃ sanātanam || 8 ||
[Analyze grammar]

athābhavadanāvṛṣṭiḥ kadācinmahatī priye |
kṛcchraṃ prāpto hyabhūttatra sarvalokaḥ kṣudhārditaḥ || 9 ||
[Analyze grammar]

tato niranne loke'sminnātmānaṃ te parīpsavaḥ |
mṛtaṃ kumāramādāya kṛcchraṃ prāptāstadā'pacan || 10 ||
[Analyze grammar]

athoparicarastatra kliśyamānānhi tānṛṣīn |
dṛṣṭvā rājā vṛṣādarbhiḥ provācedaṃ vacastadā || 11 ||
[Analyze grammar]

rājovāca |
pratigraho brāhmaṇānāṃ dṛṣṭā vṛttiraniṃditā |
tasmātpratigrahaṃ matta gṛhṇīdhvaṃ munipuṃgavāḥ || 12 ||
[Analyze grammar]

mudgānmāṣāṃśca vrīhīṃśca tathā ratnāni kāṃcanam |
yuṣmākaṃ saṃpradāsyāmi yaccānyadapi durllabham |
nivarttadhvamataḥ sarve hyetasmātpātakātparam || 13 ||
[Analyze grammar]

ṛṣaya ūcuḥ |
tajjānaṃtaḥ kathaṃ rājangṛhṇīmaste pratigraham || 14 ||
[Analyze grammar]

daśasūnāsamaścakrī daśacakrisamo dhvajī |
daśadhvaji samā veśyā daśaveśyāsamo nṛpaḥ || 15 ||
[Analyze grammar]

yo rājñāṃ pratigṛhṇāti brāhmaṇo lobhamohitaḥ |
tāmisrādiṣu ghoreṣu narakeṣu sa pacyate || 16 ||
[Analyze grammar]

tadgaccha kuśalaṃ te'stu saha dānena pārthiva |
anyeṣāṃ dīyatāmetadityuktvā te vanaṃ yayuḥ || 17 ||
[Analyze grammar]

atha rājñaḥ samādeśāttatra gatvā ca maṃtriṇaḥ |
ūdumbarāṇi vyakiranhemagarbhāṇi bhūtale || 18 ||
[Analyze grammar]

atha tāni vyacinvaṃśca ṛṣayo varavarṇini |
gurūṇīti viditvā tu na grāhyāṇyaṃgirā'bravīt || 19 ||
[Analyze grammar]

atriruvāca |
nāsmahenāsmahe mūḍha vayamajñānabuddhayaḥ |
haimānīmāni jānīmaḥ pratibuddhāḥ sma jāḍyataḥ || 20 ||
[Analyze grammar]

vasiṣṭha uvāca |
dharmārthaṃ saṃcayo yasya dravyāṇāṃ sa na śasyate |
tapaḥsaṃcayanaṃ manye vasiṣṭho dhanasaṃcayam || 21 ||
[Analyze grammar]

tyajadhvaṃ saṃcayānsarvāñjātīnāṃ samupadravān |
na hi saṃcayavānkaściddṛśyate nirupadravaḥ || 22 ||
[Analyze grammar]

yathāyathā na gṛhṇāti brāhmaṇo'satpratigraham |
tathātathā'niśaṃ cāsya brahmatejastu vardhate || 23 ||
[Analyze grammar]

akiṃcanatvaṃ rājyaṃ ca tulayā samatolayam |
akiṃcanatvamadhikaṃ rājyādapi na saṃśayaḥ || 24 ||
[Analyze grammar]

kaśyapa uvāca |
anartho brāhmaṇasyaiṣa yadarthanicayo mahān |
arthaiśvaryavimūḍho'pi śreyaso bhraśyate dvijaḥ || 25 ||
[Analyze grammar]

arthasaṃpadvimohāya bahuśokāya caiva hi |
tasmādarthamanarthākhyaṃ śreyo'rthī dūratastyajet || 26 ||
[Analyze grammar]

yasya dharmārthamapyarthāstasyāpi na hi dṛśyate |
prakṣālanāddhi paṃkasya dūrādasparśanaṃ varam || 27 ||
[Analyze grammar]

bharadvāja uvāca |
jīryaṃti jīryataḥ keśā daṃtā jīryaṃti jīryataḥ |
cakṣuḥ śrotre ca jīryete tṛṣṇaikā na tu jīryate || 28 ||
[Analyze grammar]

sūcī sūtra tathā vastre samānayati sūcikā |
tadvatsaṃsārasūtrasya tṛṣṇā sūcī vidhīyate || 29 ||
[Analyze grammar]

yathā śṛṃgaṃ ruroḥ kāye varddhamāne hi varddhate |
anaṃtapārā durvārā tṛṣṇā duḥkhapradā sadā |
adharmabahulā caiva tasmāttāṃ parivarjayet || 30 ||
[Analyze grammar]

gautama uvāca |
saṃtuṣṭaḥ ko na śaknoti phalaiścāpi hi varttitum |
sarvo'pīṃdriyalobhena saṃkaṭānyabhigāhate || 31 ||
[Analyze grammar]

sarvatra saṃpadastasya saṃtuṣṭaṃ yasya mānasam |
upānadgūḍhapādasya nanu carmāvṛteva bhūḥ || 32 ||
[Analyze grammar]

saṃtoṣāmṛtatṛptānāṃ yatsukhaṃ śāṃtacetasām |
kutastaddhanalubdhānāṃ sukhaṃ cāśāṃtacetasām || 33 ||
[Analyze grammar]

viśvāmitra uvāca |
kāmaṃ kāmayamānasya yadi kāmaḥ sa siddhyati |
tathainamaparaḥ kāmo bhūyo vidhyati bāṇavat || 34 ||
[Analyze grammar]

na jātu kāmaḥ kāmānāmupabhogena śāmyati |
haviṣā kṛṣṇavartmeva bhūya evābhivarddhate || 35 ||
[Analyze grammar]

kāmānabhilaṣanlobhānna naraḥ sukhamedhate |
samālabhya tarucchāyāṃ bhavanaṃ vāñcho naraḥ || 36 ||
[Analyze grammar]

catuḥsāgarasaṃyuktāṃ yo bhuṃkte pṛthivīmimām |
ekastu vanavāsī ca sa kṛtārtho na pārthivaḥ || 37 ||
[Analyze grammar]

jamadagniruvāca |
pratigrahasamartho yastapo varddhayate mahān |
na karoti tapastasya jāyate ca sahasradhā || 38 ||
[Analyze grammar]

pratigrahasamarthānāṃ nivṛttānāṃ pratigrahāt |
ya eva dadatāṃ lokāsta evāpratigṛhṇatām || 39 ||
[Analyze grammar]

aruṃdhatyuvāca |
bisataṃturyathā nityaṃ samaṃtānnālasaṃsthitaḥ |
tṛṣṇā caivamanādyaṃtā tathā dehāśritā sadā || 40 ||
[Analyze grammar]

yā dustyajā durmatibhiryā na jīryati jīryataḥ |
yo'sau prāṇāṃtiko rogastāṃ tṛṣṇāṃ tyajataḥ sukham || 41 ||
[Analyze grammar]

caṃḍovāca |
ugrātpratigrahādyasmādbibhyatyete maheśvarāḥ |
balīyāṃso durbalavattathā caiva bibhemyaham || 42 ||
[Analyze grammar]

paśumukha uvāca |
yadācaraṃti vidvāṃsaḥ sadā dharmaparāyaṇāḥ |
tadeva viduṣā kāryamātmano hitamicchatā || 43 ||
[Analyze grammar]

īśvara uvāca |
ityuktvā hemagarbhāṇi tyaktvā tāni phalāni ca |
ṛṣayo jagmuranyatra sarva eva dṛḍhavratāḥ || 44 ||
[Analyze grammar]

tataste vicaraṃto vai dadṛśuḥ sumahatsaraḥ |
padminībhiḥ samākīrṇaṃ sarvato varavarṇini || 45 ||
[Analyze grammar]

tasmindeśe tadā prāptaḥ parivrājaḥ śunomukhaḥ |
tenaiva sahitāstatra snātāḥ sarve maharṣayaḥ || 46 ||
[Analyze grammar]

tatrāvatāraṃ kṛtvā tairgṛhītāni bisāni tu |
nikṣipya sarasastīre cakruḥ puṇyāṃ jalakriyām || 47 ||
[Analyze grammar]

athottīrya jalāttasmātte sametya parasparam |
bisāni tānyapaśyaṃta idaṃ vacanamabruvan || 48 ||
[Analyze grammar]

ṛṣaya ūcuḥ |
kena kṣudhābhitaptānāmasmākaṃ pāpakarmaṇā |
bisāni tāni sarvāṇi hṛtāni ca munīśvarāḥ || 49 ||
[Analyze grammar]

te śaṃkamānāstvanyonyaṃ paryapṛcchandvijottamāḥ |
cakruste śapathānsarve yathānyāyaṃ ca bhāmini || 50 ||
[Analyze grammar]

kaśyapa uvāca |
sarvabhakṣaḥ sa bhavatu nyāsalopaṃ karotu saḥ |
kūṭasākṣitvamabhyetu bisastainyaṃ karoti yaḥ || 51 ||
[Analyze grammar]

vasiṣṭha uvāca |
anṛtau maithunaṃ yātu para nārīṃ viśeṣataḥ |
atithiḥ syāttathānyonyaṃ bisastainyaṃ karoti yaḥ || 52 ||
[Analyze grammar]

bharadvāja uvāca |
nṛśaṃso vai sa bhavatu samṛddhyā cāpyahaṃkṛ taḥ |
matsarī piśunaścaiva bisastainyaṃ karoti yaḥ || 53 ||
[Analyze grammar]

viśvāmitra uvāca |
nityaṃ kāmarataḥ sostu divā sevatu maithunam |
nīcakarmarataścaiva bisastainyaṃ karoti yaḥ || 54 ||
[Analyze grammar]

jamadagniruvāca |
kanyāṃ yacchatu vṛddhāya sa bhūyādvṛṣalīpatiḥ |
astu vārddhuṣiko nityaṃ bisastainyaṃ karoti yaḥ || 55 ||
[Analyze grammar]

gautama uvāca |
sa gṛhṇātvavikādānaṃ karotu hayavikrayam |
prakarotu gurorniṃdāṃ bisastainyaṃ karoti yaḥ || 56 ||
[Analyze grammar]

atriruvāca |
mātaraṃ pitaraṃ nityaṃ durmatiḥ so'vamanyatām |
śūdraṃ pṛcchatu dharmārthaṃ bisastainyaṃ karoti yaḥ || 57 ||
[Analyze grammar]

arundhatyuvāca |
karotu patyuḥ pūrvaṃ sā bhojanaṃ śayanaṃ tathā |
nārī duṣṭasamācārā bisastainyaṃ karoti yā || 58 ||
[Analyze grammar]

caṇḍovāca |
svāminaḥ pratikūlāstu dharmadveṣaṃ karotu ca |
sādhudveṣaparā caiva bisastainyaṃ karoti yā || 59 ||
[Analyze grammar]

paśumukha uvāca |
parasya preṣyatāṃ yātu sadā janmanijanmani |
sarvadharma kriyāhīno bisastainyaṃ karoti yaḥ || 60 ||
[Analyze grammar]

śunomukha uvāca |
vedānsa paṭhatu nyāyādgṛhasthaḥ syātpriyātithiḥ |
satyaṃ vadatu cājasraṃ bisastainyaṃ karoti yaḥ || 61 ||
[Analyze grammar]

ṛṣaya ūcuḥ |
iṣṭametaddvijātīnāṃ yastvayā śapathaḥ kṛtaḥ |
tvayā kṛtaṃ bisastainyaṃ sarveṣāṃ naḥ śunomukha || 62 ||
[Analyze grammar]

śunomukha uvāca |
mayā hṛtāni sarveṣāṃ bisānīmāni vai dvijāḥ |
dharmaṃ vai śrotukāmena jānīdhvaṃ māṃ puraṃdaram || 63 ||
[Analyze grammar]

alobhādakṣayā lokā jitā vai munisattamāḥ |
prārthayadhvaṃ varaṃ śubhraṃ sarvameva hyasaṃśayam || 64 ||
[Analyze grammar]

ṛṣaya ūcuḥ |
ihāgatya naro yastu trirātropoṣitaḥ śuciḥ |
kṛtvā snānaṃ pitṝṃstarpya śrāddhaṃ kuryātsamāhitaḥ || 65 ||
[Analyze grammar]

sarvatīrthodbhavaṃ tasya puṇyaṃ bhūyātpuraṃdara |
nādhogatimavāpnoti vibudhaissaha modatām |
tathetyuktvā tataḥ śakrasta traivāntarhito'bhavat || 66 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmya ṛṣitīrthamāhātmya varṇanaṃ nāma pañcapañcāśaduttaradviśatatamo'dhyāyaḥ || 255 ||
[Analyze grammar]