Chapter 207

[English text for this chapter is available]

īśvara uvāca |
īśvara uvāca |
ataḥ paraṃ pravakṣyāmi śrāddhadānānyanukramāt |
tāraṇāya ca bhūtānāṃ sarasvatyabdhisaṃgame || 1 ||
[Analyze grammar]

loke śreṣṭhatamaṃ sarvaṃ hyātmanaścāpi yatpriyam |
sarvaṃ pitṝṇāṃ dātavyaṃ tadevākṣayyamicchatām || 2 ||
[Analyze grammar]

jāṃbūnadamayaṃ divyaṃ vimānaṃ sūryasannibham |
divyāpsarobhiḥ saṃkīrṇamannado labhate'kṣayam || 3 ||
[Analyze grammar]

ācchādanaṃ tu yo dadyādahataṃ śrāddhakarmaṇi |
āyuḥ prakāśamaiśvaryaṃ rūpaṃ tu labhate ca saḥ || 4 ||
[Analyze grammar]

kamaṇḍaluṃ ca yo dadyādbrāhmaṇe vedapārage |
madhukṣīrasravā dhenurdātāramanugacchati || 5 ||
[Analyze grammar]

yaḥ śrāddhe abhayaṃ dadyātprāṇināṃ jīvitaiṣiṇām |
aśvadānasahasreṇa rathadānaśatena ca |
dantināṃ ca sahasreṇa abhayaṃ ca viśiṣyate || 6 ||
[Analyze grammar]

yāni ratnāni medinyāṃ vāhanāni striyastathā |
kṣipraṃ prāpnoti tatsarvaṃ pitṛbhaktastu mānavaḥ || 7 ||
[Analyze grammar]

pitaraḥ sarvalokeṣu tithikāleṣu devatāḥ |
sarve puruṣamāyāṃti nipānamiva dhenavaḥ || 8 ||
[Analyze grammar]

mā sma te pratigaccheyuḥ parvakāle hyapūjitāḥ |
moghāsteṣāṃ bhavantvāśāḥ paratreha ca mā kvacit || 9 ||
[Analyze grammar]

sarasvatyāstu sānnidhyaṃ yastvekaṃ bhojayeddvijam |
koṭibhojyaphalaṃ tasya jāyate nātra saṃśayaḥ || 10 ||
[Analyze grammar]

amāvāsyāṃ naro yastu parānnamupabhuñjate |
tasya māsakṛtaṃ puṇyamannadātuḥ prajāyate || 11 ||
[Analyze grammar]

ṣaṇmāsamayane bhuṃkte trīnmāsānviṣuve smṛtam |
varṣairdvādaśabhiścaiva yatpuṇyaṃ samupārjitam |
tatsarvaṃ vilayaṃ yāti bhuktvā sūryendusaṃplave || 12 ||
[Analyze grammar]

sāgraṃ māsaṃ raveḥ krāntāvādyaśrāddhe trivatsaram |
māsike'pyatha varṣasya ṣaṇmāse tvardhavatsaram || 13 ||
[Analyze grammar]

tathā saṃcayanaśrāddhe jātijanmakṛtaṃ nṛṇām |
mṛta śayyāpratigrāhī vedasyaiva ca vikrayī |
brahmasvahārī ca narastasya śuddhirna vidyate || 14 ||
[Analyze grammar]

taḍāgānāṃ sahasreṇa hyaśvamedhaśatena ca |
gavāṃ koṭi pradānena bhūmihartā na śuddhyati || 15 ||
[Analyze grammar]

suvarṇamāṣaṃ gāmekāṃ bhūmerapyardhamaṃgulam |
harannarakamāpnoti yāvadābhūtasaṃplavam || 16 ||
[Analyze grammar]

brahmahatyā surāpānaṃ daridrasya tu yaddhanam |
guroḥ patnī hiraṇyaṃ ca svargasthamapi pātayet || 17 ||
[Analyze grammar]

sahasrasaṃmitā dhenuranaḍvāndaśa dhenavaḥ |
daśānaḍutsamaṃ yānaṃ daśayānasamo hayaḥ || 18 ||
[Analyze grammar]

daśahayasamā kanyā bhūmidānaṃ tato'dhikam |
tasmātsarvaprayatnena vikrayaṃ naiva kārayet || 19 ||
[Analyze grammar]

viśeṣato mahākṣetre sarvapātakanāśane |
citikāṣṭhaṃ ca vai spṛṣṭvā yajñayūpāṃstathaiva ca |
vedavikrayakartāraṃ spṛṣṭvā snānaṃ vidhīyate || 20 ||
[Analyze grammar]

ādeśaṃ paṭhate yastu ādeśaṃ ca dadāti yaḥ |
dvāvetau pāpakarmāṇau pātālatalavāsinau || 21 ||
[Analyze grammar]

ādeśaṃ paṭhate yastu rājadvāre tu mānavaḥ |
so'pi devi bhavedvṛkṣa ūṣare kaṃṭakāvṛtaḥ |
sthito vai nṛpatidvāri yaḥ kuryādvedavikrayam || 22 ||
[Analyze grammar]

brahmahatyāsamaṃ pāpaṃ na bhūtaṃ na bhaviṣyati |
varaṃ kurvandhruvaṃ devi na kuryādvedavikrayam || 23 ||
[Analyze grammar]

hatvā gāśca varaṃ māṃsaṃ bhakṣayīta dvijādhamaḥ |
varaṃ jīvetsamaṃ mlecchairna kuryādvedavikrayam || 24 ||
[Analyze grammar]

pratyakṣoktiḥ pratyayaśca praśnapūrvaḥ pratigrahaḥ |
yājanā'dhyāpane vādaḥ ṣaḍvidho vedavikrayaḥ || 25 ||
[Analyze grammar]

vedākṣarāṇi yāvanti niyuṃkte svārthakāraṇāt |
tāvatīrbhrūṇahatyā vai prāpnuyādvedavikrayī || 26 ||
[Analyze grammar]

vedānuyogādyo dadyādbrāhmaṇāya pratigraham |
sa pūrvaṃ narakaṃ yāti brāhmaṇastadanantaram || 27 ||
[Analyze grammar]

vaiśvadevena hīnā ye hīnāścātithyato'pi ye |
karmaṇā sarvavṛṣalā vedayuktā hyapi dvijāḥ || 28 ||
[Analyze grammar]

yeṣāmadhyayanaṃ nāsti ye ca kecidanagnayaḥ |
kulaṃ vā'śrotriyaṃ yeṣāṃ te sarve śūdrajātayaḥ || 29 ||
[Analyze grammar]

mṛte'hani pituryastu na kuryācchrāddhamādarāt |
mātuścaiva varārohe sa dvijaḥ śūdrasaṃnibhaḥ || 30 ||
[Analyze grammar]

mṛtake yastu bhuñjīta gṛhītaśaśibhāskare |
gajacchāyāsu yaḥ kaścittaṃ ca śūdravadācaret || 31 ||
[Analyze grammar]

brahmacāriṇi yajñe ca yatau śilpini dīkṣite |
yajñe vivāhe satre ca sūtakaṃ na kadācana || 32 ||
[Analyze grammar]

gorakṣakānvaṇijakāṃstathā kārukuśīlavān |
spṛśyānvārdhuṣikāṃścaiva viprānśūdravadācaret || 33 ||
[Analyze grammar]

brāhmaṇaḥ patanīyeṣu vartamāno vikarmasu |
dāmbhiko duṣkṛtaprāyaḥ sa ca śūdrasamaḥ smṛtaḥ || 34 ||
[Analyze grammar]

asnātāśī malaṃ bhuṃkte ajāpī pūyaśoṇitam |
ahutvā tu kṛmīnbhuṃkte adattvā viṣabhojanam || 35 ||
[Analyze grammar]

parānnena tu bhuktena mithunaṃ yo'dhigacchati |
yasyānnaṃ tasya te putrā annācchukraṃ pravartate || 36 ||
[Analyze grammar]

rājānnaṃ teja ādatte śūdrānnaṃ brahmavarcasam |
āyuḥ suvarṇakārānnaṃ yaśaścarmāvakartinaḥ || 37 ||
[Analyze grammar]

kārukānnaṃ prajā hanti balaṃ nirṇejakasya ca |
gaṇānnaṃ gaṇikānnaṃ ca lokebhyaḥ parikṛntati || 38 ||
[Analyze grammar]

pūyaṃ cikitsakasyānnaṃ puṃścalyāstvannamindriyam |
viṣṭhā vārdhuṣikasyānnaṃ śastravikrayiṇo malam || 39 ||
[Analyze grammar]

gāyatrīsāramātro'pi varaṃ vipraḥ suyantritaḥ |
nāyaṃtritaścaturvedī sarvāśī sarvavikrayī || 40 ||
[Analyze grammar]

sadyaḥ patati māṃsena lākṣayā lavaṇena ca |
tryaheṇa śūdro bhavati brāhmaṇaḥ kṣīravikrayāt || 41 ||
[Analyze grammar]

rasā rasairniyaṃtavyā na tveva lavaṇaṃ rasaiḥ |
kṛtānnaṃ ca kṛtānnena tilā dhānyena tatsamāḥ || 42 ||
[Analyze grammar]

bhojanābhyañjanāddānādyadanyatkurute tilaiḥ |
kṛmibhūtaḥ sa viṣṭhāyāṃ pitṛbhiḥ saha majjati || 43 ||
[Analyze grammar]

apūpaśca hiraṇyaṃ ca gāmaśvaṃ pṛthivīṃ tilān |
avidvānpratigṛhṇāti bhasmībhavati kāṣṭhavat || 44 ||
[Analyze grammar]

hiraṇyamāyu ratnaṃ ca bhūrgauścākarṣatastanum |
aśvaścakṣustvacaṃ vāso ghṛtaṃ tejastilāḥ prajāḥ || 45 ||
[Analyze grammar]

agnihotrī tapasvī ca kṣaṇavānkriyate yadi |
agnihotraṃ tapaścaiva sarvaṃ taddhanino dhanam || 46 ||
[Analyze grammar]

somavikrayaṇe viṣṭhā bheṣaje pūyaśoṇitam |
naṣṭaṃ devalake dānaṃ hyapratiṣṭhaṃ ca vārdhuke || 47 ||
[Analyze grammar]

devārcanaparo vipro vittārthī bhuvanatraye |
asau devalakonāma havyakavyeṣu garhitaḥ || 48 ||
[Analyze grammar]

bhrāturmṛtasyabhāyāyāṃ yo gacchetkāmapūrvakam |
dharmeṇāpi niyuktāyāṃ sa jñeyo didhiṣūpatiḥ || 49 ||
[Analyze grammar]

dārāgnihotrasaṃyogaṃ kurute yo'graje sthite |
parivettā sa vijñeyaḥ parivittistu pūrvajaḥ || 50 ||
[Analyze grammar]

yo naro'nyasya vāsāṃsi kūpodyānagṛhāṇi ca |
adattānyupayuṃjānaḥ sa tatpāpaturīyabhāk || 51 ||
[Analyze grammar]

āmantritastu yaḥ śrāddhe vṛṣalyā saha modate |
dāturyadduṣkṛtaṃ kiñcittatsarvaṃ pratipadyate || 52 ||
[Analyze grammar]

ṛtāmṛtābhyāṃ jīveta mṛtena pramṛtena vā |
satyānṛtābhyāṃ jīveta na śvavṛttyā kathaṃcana || 53 ||
[Analyze grammar]

bhakṣyaṃ nityamṛtaṃ jñeyamamṛtaṃ syādayācitam |
mṛtaṃ tu vṛddhyājīvitvaṃ pramṛtaṃ karṣaṇaṃ smṛtam || 54 ||
[Analyze grammar]

satyānṛtaṃ ca vāṇijyaṃ tena caivopajīvyate |
sevā śvavṛttirākhyātā tasmāttāṃ parivarjayeta || 55 ||
[Analyze grammar]

viprayoniṃ samāsādya saṃkaraṃ parivarjayet |
mānuṣyaṃ durlabhaṃ loke brāhmaṇyamadhikaṃ tataḥ || 56 ||
[Analyze grammar]

ekaśayyāsanaṃ paktirbhāṇḍapakvānnamiśraṇam |
yājanādhyāpanaṃ yonistathā ca saha bhojanam |
navadhā saṃkaraḥ prokto na kartavyo'dhamaiḥ saha || 57 ||
[Analyze grammar]

ajīvankarmaṇā svena vipraḥ kṣāttraṃ samāśrayet |
vaiśyakarmā'thavā kuryādvārṣalaṃ parivarjayet || 58 ||
[Analyze grammar]

kusīdaṃ kṛṣivāṇijyaṃ prakurvīta svayaṃ kṛtam |
āpatkāle svayaṃ kurvansnānena spṛśyate dvijaḥ || 59 ||
[Analyze grammar]

labdhalābhaḥ pitṝndevānbrāṃhmaṇāṃścaiva tarpayet |
te tṛptāstasya tatpāpaṃ śamayaṃti na saṃśayaḥ || 60 ||
[Analyze grammar]

jalagośakaṭārāmayāñcāvṛddhivaṇikkriyāḥ |
anūpaṃ parvato rājā durbhikṣe jīvikā smṛtāḥ || 61 ||
[Analyze grammar]

asato'pi samādāya sādhubhyo yaḥ prayacchati |
dhanaṃ svāminamātmānaṃ saṃtārayati dustarāt || 62 ||
[Analyze grammar]

śūdre samaguṇaṃ dānaṃ vaiśye taddviguṇaṃ smṛtam |
śrotriye tacca sāhasramanantaṃ cāgnihotrike || 63 ||
[Analyze grammar]

brāhmaṇātikramo nāsti nācaredyo vyavasthitim |
jvalaṃtamagnimutsṛjya na hi bhasmani hūyate || 64 ||
[Analyze grammar]

vidyātapobhyāṃ hīnena naiva grāhyaḥ pratigrahaḥ |
gṛhṇanpradātāramadho nayatyātmānameva ca || 65 ||
[Analyze grammar]

tasmācchrotriya evārho guṇavāñchīlavāñchuciḥ |
avyaṃgastatra nirdoṣaḥ pātrāṇāṃ paramaṃ smṛtam || 66 ||
[Analyze grammar]

kapālasthaṃ yathā toyaṃ śvadṛtau ca yathā payaḥ |
dūṣitaṃ sthānadoṣeṇa vṛttahīne tathā śrutam || 67 ||
[Analyze grammar]

dattaṃ pātramatikramya yadapātre pratigrahaḥ |
taddattaṃ gāmatikramya gardabhasya gavāhnikam || 68 ||
[Analyze grammar]

vṛttaṃ tasmāttu saṃrakṣedvittameti gataṃ punaḥ |
akṣīṇo vittataḥ kṣīṇo vṛttatastu hato hataḥ || 69 ||
[Analyze grammar]

prathamaṃ tu gurau dānaṃ dattvā śreṣṭhamanukramāt |
tato'nyeṣāṃ tu viprāṇāṃ dadyātpātrānurūpataḥ || 70 ||
[Analyze grammar]

gurau ca dattaṃ yaddānaṃ dattaṃ pātreṣu mānavaiḥ |
niṣphalaṃ tadbhavetpretya yātyutādhogatiṃ prati || 71 ||
[Analyze grammar]

avamānaṃ guroḥ kṛtvā kopayitvā tu durmatiḥ |
gurvamānahato mūḍho na śāṃtimadhi gacchati || 72 ||
[Analyze grammar]

gurorabhāve tatputraṃ tadbhāryāṃ tatsutaṃ vinā |
putraṃ prapautraṃ dauhitraṃ hyanyaṃ vā tatkulodbhavam || 73 ||
[Analyze grammar]

paṃcayojanamadhye tu śrūyate svagururyadā |
tadā nātikrameddānaṃ dadyātpātreṣu mānavaḥ || 74 ||
[Analyze grammar]

yatiścetprārthayellobhāddīyamānaṃ pratigraham |
na tasya deyaṃ vidvadbhirna lobhaḥ śasyate yateḥ || 75 ||
[Analyze grammar]

dhanaṃ prāpya yatirloke maunaṃ jñānaṃ ca nābhyaset |
upabhogaṃ tu dānena jīvitaṃ brahmacaryayā || 76 ||
[Analyze grammar]

kule janma ca dīkṣābhirye gatāste narottamāḥ |
saubhāgyamāpnuyālloke nūnaṃ rasavivarjanāt || 77 ||
[Analyze grammar]

āyuṣmatyaḥ prajāḥ sarvā bhavantyāmiṣavarjanāt || 78 ||
[Analyze grammar]

cīravalkaladhṛktyaktvā vastrāṇyābharaṇāni ca |
nāgādhipatyaṃ prāpnoti upavāsena mānavaḥ || 79 ||
[Analyze grammar]

krīḍate satyavākyena svarge vai devataiḥ saha |
ahiṃsayā tathā'rogyaṃ dānātkīrtimanukramāt || 80 ||
[Analyze grammar]

dvijaśuśrūṣayā rājyaṃ dvijatvaṃ cātipuṣkalam |
divyarūpamavāpnoti devaśuśrūṣayā naraḥ || 81 ||
[Analyze grammar]

annadānādbhavettṛptiḥ sarvakāmairanuttamaiḥ |
dīpasya tu pradānena cakṣuṣmāñjāyate naraḥ || 82 ||
[Analyze grammar]

tuṣṭirbhavetsarvakālaṃ pradānādgandhamālyayoḥ |
lavaṇasya tu dātārastilānāṃ sarpiṣastathā |
tejasvino'pi jāyante bhoginaścirajīvinaḥ || 83 ||
[Analyze grammar]

sucitravastrābharaṇopadhānaṃ dadyānnaro yaḥ śayanaṃ dvijāya |
rūpānvitāṃ pakṣmavatīṃ manojñāṃ bhāryāmarālopacitāṃ labhetsaḥ || 84 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śrāddhakalpe pātrāpātravicāravarṇanaṃnāma saptottaradviśatatamo'dhyāyaḥ || 207 ||
[Analyze grammar]