Chapter 206

[English text for this chapter is available]

īśvara uvāca |
atha śrāddhavidhiṃ vakṣye pārvaṇasya vidhānataḥ |
yathākramaṃ mahādevi śṛṇuṣvaikamanāḥ priye || 1 ||
[Analyze grammar]

kṛtvāpasavyaṃ pūrvedyuḥ pitṛpūrvaṃ nimaṃtrayet |
bhavadbhiḥ pitṛkāryaṃ naḥ saṃpādyaṃ ca prasīdatha || 2 ||
[Analyze grammar]

savarṇānpreṣayedāptāndvijānāmupamantraṇe || 3 ||
[Analyze grammar]

abhojyaṃ brāhmaṇasyānnaṃ kṣatriyādyairnimantritaiḥ |
tathaiva brāhmaṇasyānnaṃ brāhmaṇena nimantritauḥ || 4 ||
[Analyze grammar]

brāhmaṇānnaṃ dadecchūdraḥ śūdrānnaṃ brāhmaṇo dadet |
ubhāvetāvabhojyānnau bhuktvā cāndrāyaṇaṃ caret || 5 ||
[Analyze grammar]

upanikṣepadharmeṇa śūdrānnaṃ yaḥ paceddvijaḥ |
abhojyaṃ tadbhavedannaṃ sa ca vipraḥ patedadhaḥ || 6 ||
[Analyze grammar]

śūdrānnaṃ śūdrasaṃparkaḥ śūdreṇa ca sahāsanam |
śūdrājjñānāgamaścaiva jvalaṃtamapi pātayet || 7 ||
[Analyze grammar]

śūdrānnopahatā viprā vihvalā ratilālasāḥ |
kupitāḥ kiṃ kariṣyaṃti nirviṣā iva pannagāḥ || 8 ||
[Analyze grammar]

nagnaḥ syānmalavadvāsā nagnaḥ kaupīnavastradhṛk |
dvikaccho'nuttarīyaśca vikaccho'vastra eva ca || 9 ||
[Analyze grammar]

nagnaḥ kāṣāyavastraḥ syānnagnaścārdhapaṭaḥ smṛtaḥ |
acchinnāgraṃ tu yadvastraṃ mṛdā prakṣālitaṃ tu yat || 10 ||
[Analyze grammar]

ahataṃ dhāturaktaṃ vā tatpavitramiti sthitam |
agrato vasate mūrkho dūre cāsya guṇānvitaḥ || 11 ||
[Analyze grammar]

guṇānvite ca dātavyaṃ nāsti mūrkhe vyatikramaḥ |
yastvāsannamatikramya brāhmaṇaṃ patitādṛte |
dūrasthaṃ pūjayenmūḍho guṇāḍhyaṃ narakaṃ vrajet || 12 ||
[Analyze grammar]

vedavidyāvratasnāte śrotriye gṛhamāgate |
krīḍantyoṣadhayaḥ sarvā yāsyāmaḥ paramāṃ gatim || 13 ||
[Analyze grammar]

saṃdhyayorubhayorjāpye bhojane daṃtadhāvane |
pitṛkārye ca daive ca tathā mūtrapurīṣayoḥ |
gurūṇāṃ saṃnidhau dāne yoge caiva viśeṣataḥ |
eteṣu maunamātiṣṭhansvargaṃ prāpnoti mānavaḥ || 15 ||
[Analyze grammar]

yadi vāgyamalopaḥ syājjapādiṣu kathaṃcana |
vyāharedvaiṣṇavaṃ maṃtraṃ smaredvā viṣṇumavyayam || 16 ||
[Analyze grammar]

dāne snāne jape home bhojane devatārcane |
devānāmṛjavo darbhāḥ pitṝṇāṃ dviguṇāstathā || 17 ||
[Analyze grammar]

udaṅmukhastu devānāṃ pitṝṇāṃ dakṣiṇāmukhaḥ |
agninā bhasmanā vāpi yavenāpyudakena vā |
dvārasaṃkramaṇenāpi paṃktidoṣo na vidyate || 18 ||
[Analyze grammar]

iṣṭaśrāddhe kraturdakṣo vṛddhau satyavasū smṛtau |
naimittike kālakāmau kāmye cādhvavirocanau || 19 ||
[Analyze grammar]

purūravā ārdravaśca pārvaṇe samudāhṛtau |
puṣṭiṃ prajāṃ ca nyagrodhe buddhiṃ prajñāṃ dhṛtiṃ smṛtim || 20 ||
[Analyze grammar]

rakṣoghnaṃ ca yaśasyaṃ ca kāśmīryaṃ pātramucyate |
saubhāgyamuttamaṃ loke madhūke samudāhṛtam || 21 ||
[Analyze grammar]

phālgunapātre tu kurvāṇaḥ sarvakāmānavāpnuyāt |
parāṃ dyutimathārke tu prākāśyaṃ ca viśeṣataḥ || 22 ||
[Analyze grammar]

bilve lakṣmīṃ tapo medhāṃ nityamāyuṣyameva ca |
kṣetrārāmataḍāgeṣu sarvapātreṣu caiva hi || 23 ||
[Analyze grammar]

varṣatyajasraṃ parjanye veṇupātreṣu kurvataḥ |
eteṣāṃ labhyate puṇyaṃ suvarṇai rajataistathā || 24 ||
[Analyze grammar]

palāśaphalanyagrodhaplakṣāśvatthavikaṃkatāḥ |
audumbarastathā bilvaṃ caṃdanaṃ yajñiyāśca ye || 25 ||
[Analyze grammar]

saralo devadāruśca śālāśca khadirāstathā |
samidarthaṃ praśastāḥ syurete vṛkṣā viśeṣataḥ || 26 ||
[Analyze grammar]

śleṣmātako naktamālyaḥ kapitthaḥ śālmalī tathā |
niṃbo bibhītakaścaiva śrāddhakarmaṇi garhitāḥ || 27 ||
[Analyze grammar]

aniṣṭaśabdāṃ saṃkīrṇā rūkṣāṃ jantumatīmapi |
pratigaṃdhāṃ tu tāṃ bhūmiṃ śrāddhakarmaṇi garhayet || 28 ||
[Analyze grammar]

traiśaṃkavaṃ tyajeddeśaṃsarvadvādaśayojanam |
uttareṇa mahānadyā dakṣiṇena ca kevalam || 29 ||
[Analyze grammar]

deśastraiśaṃ kavonāma varjitaḥ śrāddhakarmaṇi |
kāraskārāḥ kaliṃgāśca siṃdhoruttarameva ca |
praṇaṣṭāśramadharmāśca varjyā deśāḥ prayatnataḥ || 30 ||
[Analyze grammar]

brāhmaṇaṃ tu kṛtaṃ proktaṃ tretā tu kṣatriyaṃ smṛtam |
vaiśyaṃ dvāparamityāhuḥ śūdraṃ kaliyugaṃ smṛtam || 31 ||
[Analyze grammar]

kṛte tu pitaraḥ pūjyāstretāyāṃ ca surāstathā |
munayo dvāpare nityaṃ pākhaṃḍāśca kalau yuge || 32 ||
[Analyze grammar]

śuklapakṣasya pūrvāhṇe śrāddhaṃ kuryādvicakṣaṇaḥ |
kṛṣṇapakṣe'parāhne tu rauhiṇaṃ na vilaṃghayet || 33 ||
[Analyze grammar]

ratnimātrapramāṇaṃ ca pitṛtīrthaṃ tu saṃskṛtam |
upamūle tathā lūnāḥ prastarārthe kuśottamāḥ || |
tathā śyāmākanīvārā dūrvāśca samudāhṛtāḥ |
sva kīrtimatāṃ śreṣṭho bahukeśaḥ prajāpatiḥ || 35 ||
[Analyze grammar]

tasya keśā nipatitā bhūmau kāśatvamāgatāḥ |
tasmānmedhyāḥ sadā kāśāḥ śrāddhakarmaṇi pūjitāḥ || 36 ||
[Analyze grammar]

piṇḍanirvapaṇaṃ teṣu kartavyaṃ bhūtimicchatā |
uṣṇamannaṃ dvijātibhyaḥ śraddhayā viniveśayet || 37 ||
[Analyze grammar]

anyatra phalapuṣpebhyaḥ pānakebhyaśca paṇḍitaḥ |
haste dattvā tu vai snehāllavaṇaṃ vyañjanāni ca |
āyasena ca pātreṇa tadvai rakṣāṃsi bhuñjate |
dvijapātreṣu dattvānnaṃ tūṣṇīṃ saṃkalpamācaret || 39 ||
[Analyze grammar]

darvyādisthena no teṣāṃ saṃbandho dṛśyate yataḥ |
yaśca śūkaravadbhuṃkte yaśca pāṇitale dvijaḥ |
na tadaśnaṃti pitaro yaḥ savācaṃ samaśnute || 40 ||
[Analyze grammar]

dvihāyanasya vatsasya viśaṃtyāsyaṃ yathā sukham |
tathā kuryātpramāṇena piṇḍānvyāsena bhāṣitam || 41 ||
[Analyze grammar]

na strī pracālayettāni jñānahīno na cāvrataḥ |
svayaṃ putro'thavā yasya vāñchedabhyudayaṃ param || 42 ||
[Analyze grammar]

bhājaneṣu ca tiṣṭhatsu svastiṃ kurvanti ye dvijāḥ |
tadannamasurairbhuktaṃ nirāśāḥ pitaro gatāḥ || 43 ||
[Analyze grammar]

apsvekaṃ plāvayetpiṇḍamekaṃ patnyai nivedayet |
ekaṃ vai juhuyādagnāveṣā tu trividhā gatiḥ || 44 ||
[Analyze grammar]

chandogaṃ bhojayecchrāddhe vaiśvadeve ca bahvṛcam |
puṣṭikarmaṇyathādhvaryuṃ śāntikarmaṇyatharvaṇam || 45 ||
[Analyze grammar]

dvau deve'tharvaṇau viprau prāṅmukhau ca niveśayet |
pitrye hyudaṅmukhānkuryādbahvṛcādhvaryusāmagān || 46 ||
[Analyze grammar]

jātyaśca sarvā dātavyā mallikā śvetayūthikā |
jalodbhavāni sarvāṇi kusumāni ca campakam || 47 ||
[Analyze grammar]

madhūkaṃ rāmaṭhaṃ caiva karpūraṃ maricaṃ guḍam |
śrāddhakarmaṇi śastāni saiṃdhavaṃ trapusaṃ tathā || 48 ||
[Analyze grammar]

brāhmaṇaḥ kambalo gāvaḥ sūryogniratithiśca vai |
tilā darbhāśca kālaśca navaite kutapāḥ smṛtāḥ || 49 ||
[Analyze grammar]

āpadyanagnau tīrthe ca caṃdrasūryagrahe tathā |
nācaretsaṃgrahe caiva tathaivāstamupāgate || 50 ||
[Analyze grammar]

saṃśuddhā syāccaturthe'hni snātā nārī rajasvalā |
daive karmaṇi pitrye ca pañcame'hani śuddhyati || 51 ||
[Analyze grammar]

dravyābhāve dvijābhāve pravāse putrajanmani |
āmaśrāddhaṃ prakurvīta yasya bhāryā rajasvalā || 52 ||
[Analyze grammar]

sarpaviprahatānāṃ ca daṃṣṭriśṛṃgisarīsṛpaiḥ |
ātmanastyāgināṃ caiva śrāddhameṣāṃ na kārayet || 53 ||
[Analyze grammar]

caṇḍālādudakātsarpādbrāhmaṇādvaidyutādapi |
daṃṣṭribhyaśca paśubhyaśca maraṇaṃ pāpakarmaṇām || 54 ||
[Analyze grammar]

sarvairanumataṃ kṛtvā jyeṣṭhenaiva ca yatkṛtam |
dravyeṇa ca vibhaktena sarvaireva kṛtaṃ bhavet || 55 ||
[Analyze grammar]

amāvāsyāṃ pitṛśrāddhe maṃthanaṃ yastu kārayet |
tattakraṃ madirātulyaṃ ghṛtaṃ gomāṃsavatsmṛtam || 56 ||
[Analyze grammar]

bhuṃjaṃti kramaśaḥ pūrve tathā piṃḍāśiṣo 'pi ca |
nimaṃtrito dvijaḥ śrāddhe na śayīta striyā saha || 57 ||
[Analyze grammar]

śrādabhukprātarutthāya prakuryāddantadhāvanam |
śrāddhakartā na kurvīta dantānāṃ dhāvanaṃ budhaḥ || 58 ||
[Analyze grammar]

varṣevarṣe tu yacchrāddhaṃ mātāpitrormṛte'hani |
malamāse na kartavyaṃ vyāsasya vacanaṃ yathā || 59 ||
[Analyze grammar]

garbhe vārdhuṣike prete bhṛtye māsānumāsike |
ābdike ca tathā śrāddhe nādhimāso vidhīyate || 60 ||
[Analyze grammar]

vivāhādau smṛtaḥ sauro yajñādau sāvanaḥ smṛtaḥ |
ābdike pitṛkārye tu cāndro māsaḥ praśasyate || 61 ||
[Analyze grammar]

yasminrāśau gate sūrye vipattiḥ syāddvijanmanaḥ |
tadrāśāveva kartavyaṃ pitṛkāryaṃ mṛte'hani || 62 ||
[Analyze grammar]

vaṣaṭkāraśca homaśca parva cāgrāyaṇaṃ tathā |
malamāse'pi kartavyaṃ kāmyā iṣṭīrvivarjayet || 63 ||
[Analyze grammar]

agnyādhyeyaṃ pratiṣṭhāṃ ca yajñadānavratāni ca |
vedavratavṛṣotsargacūḍākaraṇamekhalāḥ || 64 ||
[Analyze grammar]

māṃgalyamabhiṣekaṃ ca malamāse vivarjayet |
nityanaimittike kuryātprayataḥ sanmalimluce |
tīrthe snānaṃ gaja cchāyāṃ pretaśrāddhaṃ tathaiva ca || 65 ||
[Analyze grammar]

rasā yatra praśasyante bhoktāro baṃdhugotriṇaḥ |
rājavārtādi saṃkraṃdo rakṣaḥśrāddhasya lakṣaṇam || 66 ||
[Analyze grammar]

śrāddhaṃ kṛtvā paraśrāddhe yastu bhuṃkte ca vihvalaḥ |
pataṃti pitarastasya luptapiṇḍodakakriyāḥ || 67 ||
[Analyze grammar]

tailamudvartanaṃ snānaṃ dantadhāvanameva ca |
klṛptaromanakhebhyaśca dadyādgatvāpare'hani || 68 ||
[Analyze grammar]

nimantritā yathānyāyaṃ havye kavye dvijottamāḥ |
kathaṃcidapyatikrāmetpāpaḥ śūkaratāṃ vrajet || 69 ||
[Analyze grammar]

daive ca pitṛ śrāddhe cāpyāśaucaṃ jāyate yadā |
āśaucānte'thavā tatra tebhyaḥ śrāddhaṃ pradīyate || 70 ||
[Analyze grammar]

atha śrāddhāvasāne tu āśiṣastatra dāpayet |
dīrghā nāgāstathā nadyo viṣṇostrīṇi padāni ca |
evameṣāṃ pramāṇena dīrghamāyuravāpnuyām || 71 ||
[Analyze grammar]

apāṃ madhye sthitā devāḥ sarvamapsu pratiṣṭhitam |
brāhmaṇasya kare nyastāḥ śivā āpo bhavantu naḥ || 72 ||
[Analyze grammar]

lakṣmīrvasati puṣpeṣu lakṣmīrvasati puṣkare |
lakṣmīrvasatu vāse me saumanasyaṃ dadātu me || 73 ||
[Analyze grammar]

akṣataṃ cā'stu me puṇyaṃ śāṃtiḥ puṣṭirdhṛtiśca me |
yadyacchreyaskaraṃ loke tattadastu sadā mama || 74 ||
[Analyze grammar]

dakṣiṇāyāṃ tu sarvatra bahudeyaṃ tathāstu naḥ |
evamastviti tairvācyaṃ mūrdhnā grāhyaṃ ca tena tat || 75 ||
[Analyze grammar]

piṃḍamagnau sadā deyādbhogārthī satataṃ naraḥ |
prajārthaṃ patnyai vai dadyānmadhyamaṃ maṃtrapūrvakam || 76 ||
[Analyze grammar]

uttamāṃ dyutimavicchangoṣu nityaṃ pradāpayet |
ājñāmicchedyaśaḥ kīrtimapsu nityaṃ praveśayet || 77 ||
[Analyze grammar]

prārthayandīrghamāyuśca vāyasebhyaḥ pradāpayet |
kumāralokamanvicchankukkuṭebhyaḥ pradāpayet || 78 ||
[Analyze grammar]

ākāśe prakṣipedvāpi sthito vā dakṣiṇāmukhaḥ |
pitṝṇāṃ sthānamākāśaṃ dakṣiṇā caiva diktathā || 79 ||
[Analyze grammar]

naktaṃ tu varjayecchrāddhaṃ rāhoranyatra darśanāt |
sarvasvenāpi kartavyaṃ kṣipraṃ vai rāhudarśanāt || 80 ||
[Analyze grammar]

uparāge na kuryādyaḥ paṃke gauriva sīdati |
kurvāṇastu taretpāpaṃ sā ca nauriva sāgare || 81 ||
[Analyze grammar]

kṛṣṇamāṣāstilāścaiva śreṣṭhāḥ syuryavaśālayaḥ |
mahāyavā vrīhiyavāstathaiva ca masūrikāḥ || 82 ||
[Analyze grammar]

kṛṣṇāḥ śvetāśca vā grāhyāḥ śrāddhakarmaṇi sarvadā |
bilvāmalakamṛdvīkaṃ panasāmrātadāḍimam || 83 ||
[Analyze grammar]

bhavyaṃ pārāpataṃ caiva kharjūraṃ karamarddakam |
sakorakā badaryaśca tālakaṃdaṃ tathā bisam || 84 ||
[Analyze grammar]

tamālāsanakaṃdaṃ ca māvellaṃ śatakaṃdalī |
kāleyaṃ kālaśākaṃ ca mudgānnaṃ ca suvarcalam || 85 ||
[Analyze grammar]

māṃsaṃ kṣīraṃ dadhi śākaṃ vyoṣaṃ vetrāṃkurastathā |
kaṭphalaṃ vajrakaṃ drākṣāṃ lakucaṃ mocameva ca || 86 ||
[Analyze grammar]

priyāmalakadurgrīvaṃ tiṃḍukaṃ madhusāhvayam |
vaikaṃkataṃ nālikeraṃ śṛṅgāṭakaparūṣakam || 87 ||
[Analyze grammar]

pippalīmaricaṃ caiva paṭolī bṛhatīphalam |
ārāmasya tu sīmā'ntaḥ saṃbhavaṃ sarvameva tu || 88 ||
[Analyze grammar]

evamādīni cānyāni puṣpāṇi śrāddhakarmaṇi |
masūrāḥ śatapuṣpyāśca kusumaṃ śrīniketanam || 89 ||
[Analyze grammar]

varyā svātiyavā nityaṃ tathā vṛṣayavāsakau |
vaṃśā karīrā surasā mārjitā bhūtṛṇāni ca || 90 ||
[Analyze grammar]

varjanīyāni vakṣyāmi śrāddhakarmaṇi nityaśaḥ |
laśunaṃ gṛṃjanaṃ caiva palāṃḍuṃ piṇḍamūlakam |
mogaraṃ cātra vaidehaṃ dīrghamūlakameva ca || 91 ||
[Analyze grammar]

divasasyāṣṭame bhāge mandībhūte divākare |
āsuraṃ tadbhavecchrāddhaṃ pitṛṇāṃ nopatiṣṭhate || 92 ||
[Analyze grammar]

caturthe prahare prāpte yaḥ śrāddhaṃ kurute naraḥ |
vṛthā śrāddhamavāpnoti dātā ca narakaṃ vrajet || 93 ||
[Analyze grammar]

lekhāprabhṛtyathāditye muhūrtāstraya eva ca |
prātastasyottaraṃ kālaṃ bhagamāhurvipaścitaḥ || 94 ||
[Analyze grammar]

saṃgavastrimuhūrto'yaṃ madhyāhnastu samantataḥ |
tataśca trimuhūrtāśca aparāhṇo vidhīyate || 95 ||
[Analyze grammar]

pañcamo'tha dināṃśo yaḥ sa sāyāhna iti smṛtaḥ || 96 ||
[Analyze grammar]

tathā ca śrutiḥ |
yadaivādityo'tha vasanto yadā saṃgaviko'tha grīṣmo yadā vā mādhyaṃdino'tha varṣā yadaparāhṇo'tha śarat |
ghadevāstametyatha hemanta iti || 97 ||
[Analyze grammar]

prārabhya kutape śrāddhe kuryādārohaṇaṃ budhaḥ |
vidhijño vidhimāsthāya rohiṇaṃ na tu laṃghayet || 98 ||
[Analyze grammar]

aṣṭamo yo muhūrtaśca kutapaḥ sa nigadyate |
navamo rauhiṇaḥ prokta iti śrāddhavido viduḥ || 99 ||
[Analyze grammar]

ekoddiṣṭaṃ tu madhyāhnaṃ prātarvai jātakarmaṇi |
pitryārthaṃ nirvapetpākaṃ vaiśvadevārthameva ca || 100 ||
[Analyze grammar]

vaiśvadeve na pitryārthaṃ na pitryaṃ vaiśvadevike |
kṛtvā śrāddhaṃ mahādevi brāhmaṇāṃśca visarjya ca || 101 ||
[Analyze grammar]

vaiśvadevādikaṃ karma tataḥ kuryādvarānane |
bahuhavyendhane cāgnau susamiddhe viśeṣataḥ || 102 ||
[Analyze grammar]

vidhūme lelihāne ca kuryātkarma prasiddhaye |
aprabuddhe sadhūme ca juhuyādyo hutāśane || 103 ||
[Analyze grammar]

yajamāno bhavedandhaḥ kuputra iti niścitam |
durgandhaścaiva kṛṣṇaśca nīlaścaiva viśeṣataḥ || 104 ||
[Analyze grammar]

bhūmiṃ vigāhate yatra tatra vidyātparābhavam |
arciṣmānpiṃgalaśikhaḥ sarpiḥkāṃcanasaprabhaḥ || 105 ||
[Analyze grammar]

snigdhaḥ pradakṣiṇaścaiva vahniḥ syātkāryasiddhaye |
aṃjanābhyaṃjanaṃ gaṃdhānmantrapraṇayanaṃ tathā || 106 ||
[Analyze grammar]

kāśaiḥ punarbhavetkāryaṃ hayamedhaphalaṃ labhet |
aṣṭajātikapuṣpaṃ ca añjanaṃ nityameva hi || 107 ||
[Analyze grammar]

kṛṣṇebhyaśca tilebhyaśca tailaṃ yatnātsurakṣitam |
candanāgaruṇī cobhe tamālośīrapadmakam || 108 ||
[Analyze grammar]

dhūpaśca gauggulaḥ śreṣṭhastauruṣko dhūpa eva ca |
śuklāḥ sumanasaḥ śreṣṭhāstathā padmotpalāni ca || 109 ||
[Analyze grammar]

gandhavantyupapannāni yāni cānyāni kṛtsnaśaḥ |
niśigaṃdhā japā bhiṇḍirūpakaḥ sakuraṃṭakaḥ || 110 ||
[Analyze grammar]

puṣpāṇi varjanīyāni śrāddhakarmaṇi nityaśaḥ |
sauvarṇaṃ rājataṃ tāmraṃ pitṝṇāṃ pātramucyate || 111 ||
[Analyze grammar]

rajatasya tathā kiñciddarśanaṃ puṇyadāyakam |
kṛṣṇājinasya sānnidhyaṃ darśanaṃ dānameva ca || 112 ||
[Analyze grammar]

rakṣoghnaṃ caiva varcasyaṃ paśūnputrāṃśca tārayet |
atha mantraṃ pravakṣyāmi amṛtaṃ brahmanirmitam || 113 ||
[Analyze grammar]

devatābhyaḥ pitṛbhyaśca mahāyogibhya eva ca |
namaḥ svāhāyai svadhāyai nityameva namonamaḥ || 114 ||
[Analyze grammar]

ādyāvasāne śrāddhasya trirāvartamimaṃ japan |
aśvamedhaphalaṃ hyetadvipraiḥ saṃjñāya pūjitam || 115 ||
[Analyze grammar]

piṇḍanirvapaṇe vāpi japedenaṃ samāhitaḥ |
pitaraḥ kṣipramāyānti rākṣasāḥ pradravanti ca || 116 ||
[Analyze grammar]

saptārciṣaṃ pravakṣyāmi sarvakāmaśubhapradam || 117 ||
[Analyze grammar]

amūrtānāṃ ca mūrtānāṃ pitṝṇāṃ dīptatejasām |
namasyāmi sadā teṣāṃ dhyāyināṃ divyacakṣuṣām || 118 ||
[Analyze grammar]

indrādīnāṃ ca netāro dakṣamārīcayastayā |
tānnamasyāmi sarvānvai pitṝṃścaivauṣadhīstathā || 119 ||
[Analyze grammar]

nakṣatrāṇāṃ grahāṇāṃ ca vāyvagnyośca pitṝnapi |
dyāvāpṛthivyośca sadā namasyāmi kṛtāñjaliḥ || 120 ||
[Analyze grammar]

namaḥ pitṛbhyaḥ saptabhyo namo lokeṣu saptasu |
svayaṃbhuve namasyāmo brahmaṇe yogacakṣuṣe || 121 ||
[Analyze grammar]

etattvaduktaṃ saptarṣibrahmarṣigaṇasevitam |
pavitraṃ paramaṃ hyetacchrīmadrakṣovināśanam || 122 ||
[Analyze grammar]

anena vidhinā yuktastrīnvārāṃstu japennaraḥ |
bhaktyā paramayā yuktaḥ śraddadhāno jitendriyaḥ || 123 ||
[Analyze grammar]

saptārciṣaṃ japedyastu nityameva samāhitaḥ |
sa tu saptasamudrāyāḥ pṛthivyā ekarāḍbhavet || 124 ||
[Analyze grammar]

śrāddhakalpaṃ paṭhedyo vai sa bhavetpaṃktipāvanaḥ |
aṣṭādaśānāṃ vidyānāṃ sa ca vai pāragaḥ smṛtaḥ || 125 ||
[Analyze grammar]

pūjāṃ puṣṭiṃ smṛtiṃ medhāṃ rājyamārogyameva ca |
prītā nityaṃ prayacchanti mānuṣāṇāṃ pitāmahāḥ || 126 ||
[Analyze grammar]

evaṃ prabhāsakṣetre sa sarasvatyabdhisaṃgame |
kuryācchrāddhaṃ vidhānena prabhāse caiva bhāmini || 127 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsa kṣetramāhātmye sarasvatyabdhisaṃgame śrāddhakalpe śrāddhavidhivarṇanaṃnāma ṣaḍuttaradviśatatamo'dhyāyaḥ || 206 ||
[Analyze grammar]