Chapter 203

[English text for this chapter is available]

īśvara uvāca |
tato gacchenmahādevi maṃkīśvara mahālayam |
rāmeśāduttare bhāge devamātuḥ samīpagam || 1 ||
[Analyze grammar]

arkasthalāttato yāmye pūrvataśca kṛtasmarāt |
liṃgaṃ mahāprabhāvaṃ tu maṃkinā sthāpitaṃ purā || 2 ||
[Analyze grammar]

taṃ dṛṣṭvā mānavaḥ samyagaśvamedhaphalaṃ labhet || 3 ||
[Analyze grammar]

devyuvāca |
ko'sau maṃkirmahādeva kathaṃ liṃgaṃ pratiṣṭhitam |
kiṃ prabhāvaṃ ca talliṃgametanme vada vistarāt || 4 ||
[Analyze grammar]

īśvara uvāca |
maṃkirnāmābhavatpūrvaṃ kubjakāyo dvijottamaḥ |
prabhāsaṃ kṣetramāsādyatapastepe mahattamam || 5 ||
[Analyze grammar]

pratiṣṭhāpya mahādevaṃ śivabhaktiparāyaṇaḥ |
na tutoṣa harastasya vahuvarṣagaṇārcitaḥ || 6 ||
[Analyze grammar]

tasyaivaṃ tapyamānasya siddhiṃ prāptā hyanekaśaḥ |
tatrārādhya mahādevaṃ svargalokamito gatāḥ || 7 ||
[Analyze grammar]

tato duḥkhaṃ samabhavanmaṃkestatra varānane |
kasmānme bhagavāṃstuṣṭiṃ na gacchati maheśvaraḥ || 8 ||
[Analyze grammar]

tatastīvraratiṃ cakre kṛtvā tīvranivartanam |
evaṃ vṛddhatvamāpanno japadhyānaparāyaṇaḥ || 9 ||
[Analyze grammar]

tasya tuṣṭo mahādevo vayaso'nte varaṃ dadau |
parituṣṭo'smi te maṃke brūhi kiṃ karavāṇi te || 10 ||
[Analyze grammar]

maṃkiruvāca |
kiṃ vareṇa suraśreṣṭha mama vṛddhasya sāṃpratam |
kiñcinme paramaṃ duḥkhaṃ sthitasyātra paraṃ prabho || 11 ||
[Analyze grammar]

śiva uvāca |
śṛṇu yatkāraṇaṃ tatra teṣāṃ tava tapasvinām |
vratacaryāptaye viprāḥ pūjayantyadhikaṃ hi te || 12 ||
[Analyze grammar]

te puṣpāṇi samānīya nānāvarṇāni sarvaśaḥ |
vṛkṣāṇāmatigaṃdhīni na teṣāṃ harṣakāraṇam || 13 ||
[Analyze grammar]

tvaṃ punaḥ kubjarūpaśca yajñapūjāparāyaṇaḥ |
na ca prāpnoṣi vṛkṣāṇāṃ śākhāgrāṇyatiyatnavān || 14 ||
[Analyze grammar]

ekenāpi pradattena puṣpeṇa dvijasattama |
bhaktyā śirasi liṃgasya labhyate yājñikaṃ phalam || 15 ||
[Analyze grammar]

liṃgasya dakṣiṇe brahmā svayameva vyavasthitaḥ |
vāme ca bhagavānviṣṇurmadhyehaṃ vai pratiṣṭhitaḥ || 16 ||
[Analyze grammar]

trayo'pi pūjitāstena yena liṃgaṃ prapūjitam || 17 ||
[Analyze grammar]

bilvapatraṃ śamīpatraṃ karavīraṃ ca mālatīm |
unmattakaṃ campakaṃ ca sadyaḥ prītikaraṃ bhavet || 18 ||
[Analyze grammar]

caṃpakāśoka kahlāraiḥ karavīraistathā mama |
pūjeṣṭā dvijaśārdūla ye cānye vahugaṃdhinaḥ |
etairhi pūjito nityaṃ śīghraṃ tuṣṭiṃ prayāmyaham || 19 ||
[Analyze grammar]

brāhmaṇa uvāca |
yadi tuṣṭo'si me deva yadi deyo varo mama |
ihāgatya naraḥ snātvā yo jalenāpi siñcati || 20 ||
[Analyze grammar]

liṃgametaddhi sarvāsāṃ pūjānāṃ phalamāpnuyāt |
adyaprabhṛti ye vṛkṣā daivikāḥ pārthivāśca ye |
teṣāṃ sānnidhyamatrāstu prasādāttava śaṃkara || 21 ||
[Analyze grammar]

bhagavānuvāca |
salilenāpi yaḥ pūjāmasmiṃlliṃge vidhāsyati |
tasya pūjāphalaṃ sarvaṃ bhaviṣyati dvijottama || 22 ||
[Analyze grammar]

vṛkṣāṇāmatrasānnidhyaṃ sarveṣāṃ ca bhaviṣyati |
adyaprabhṛti nāmnaitannāgasthānaṃ bhaviṣyati || 23 ||
[Analyze grammar]

yatastu sarvanāgānāṃ sāṃnidhya matra saṃsthitam |
tvamapi dvijaśārdūla prayāsyasi mamāntikam || 24 ||
[Analyze grammar]

evamuktvā tu bhagavāṃstatraivāntaradhīyata |
maṃkistu dehamutsajya śivalokaṃ tato gataḥ || 25 ||
[Analyze grammar]

ityevaṃ kathitaṃ devi maṃkīśodbhavamuttamam |
śrutaṃ harati pāpāni samyakchraddhāsamanvitaiḥ || 26 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye maṃkīśvaramāhātmyavarṇanaṃnāma tryuttaradviśatatamo'dhyāyaḥ || 203 ||
[Analyze grammar]