Chapter 119

[English text for this chapter is available]

īśvara uvāca |
tato gacchenmahādevi mahādevīṃ mahāprabhām |
balātibaladaityaghnīṃ nāmneti prathitāṃ kṣitau || 1 ||
[Analyze grammar]

anādinidhanāṃ devīṃ tatra kṣetre vyavasthitām |
koṭibhūtaparīvārāṃ sarvadaityanibarhiṇīm || 2 ||
[Analyze grammar]

devyuvāca |
balātibaladaityaghnī kathamuktā tvayā prabho |
balātibalanāmānau kathaṃ daityau nipātitau || 3 ||
[Analyze grammar]

kutra tiṣṭhati sā devī kiṃprabhāvā maheśvara |
māhātmyamakhilaṃ tasyāḥ sarvaṃ vistarato vada || 4 ||
[Analyze grammar]

īśvara uvāca |
śṛṇu devi pravakṣyāmi kathāṃ pāpapraṇāśanīm |
yāṃ śrutvā mānavo bhaktyā mucyate sarvapātakaiḥ || 5 ||
[Analyze grammar]

āsīdraktāsuronāma mahiṣasya suto balī |
mahākāyo mahābāhurhiraṇyākṣa ivāparaḥ || 6 ||
[Analyze grammar]

balātibala nāmānau tasya putrau babhūvatuḥ |
tau vijitya surānsarvāndevendrāgnipurogamān || 7 ||
[Analyze grammar]

trailokye'sminnirātaṃkau cakratū rājyamañjasā |
tayoḥ senā mukhe vīrāstrayastriṃśatprakīrtitāḥ || 8 ||
[Analyze grammar]

raudrātmāno mahāyodhāḥ sahasrākṣauhiṇīmukhāḥ |
siṃhaskandhā mahākāyā durātmāno mahābalāḥ || 9 ||
[Analyze grammar]

dhūmrākṣo bhīmadaṃṣṭraśca kālavaśyo mahāhanuḥ |
brahmaghno yajñakopaśca strīghnaḥ pāpaniketanaḥ || 10 ||
[Analyze grammar]

vidyunmālī ca bandhūkaḥ śaṃkukarṇo vibhāvasuḥ |
devāṃtako vikarmā ca durbhikṣa krūra eva ca || 11 ||
[Analyze grammar]

hayagrīvo'śvakarṇaśca ketumānvṛṣabho dvijaḥ |
śarabhaḥ śalabho vyāghro nikuṃbho maṇiko bakaḥ || 12 ||
[Analyze grammar]

śūrpako vikṣaro mālī kālo daṇḍakakeralaḥ |
ete daityā mahākāyāstayoḥ senādhikāriṇaḥ || 13 ||
[Analyze grammar]

evaṃ taiḥ pṛthivī vyāptā pañcāśatkoṭi vistarā |
evaṃ jñātvā tadā devā bhayenodvignamānasāḥ || 14 ||
[Analyze grammar]

sarvairdevarṣibhiḥ sārdhaṃ jagmuste himavadvanam |
stotreṇānena tāṃ devīṃ tuṣṭuvuḥ prayatāstadā || 15 ||
[Analyze grammar]

devā ūcuḥ |
jayākṣare jayā'naṃte jayā'vyakte nirāmaye |
jaya devi mahāmāye jaya devarṣivaṃdite || 16 ||
[Analyze grammar]

jaya viśveśvare gaṃge jaya sarvārthasiddhide |
jaya brahmāṇi kaumāri jaya nārāyaṇīśvari || 17 ||
[Analyze grammar]

jaya brahmāṇi cāmuṃḍe jayendrāṇi maheśvari |
jaya mātarmahālakṣmi jaya pārvati sarvage || 18 ||
[Analyze grammar]

jaya devi jagatsṛṣṭe jayairāvati bhārati |
jayānaṃte jaya jaye jaya devi jalāvile || 19 ||
[Analyze grammar]

jayeśāni śive śarve jaya nityaṃ jayārcite |
mokṣade jaya sarvajñe jaya dharmārthakāmade || 20 ||
[Analyze grammar]

jaya gāyatri kalyāṇi jaya sahye vibhāvari |
jaya durge mahākāli śiva dūti jayā'jaye || 21 ||
[Analyze grammar]

jaya caṇḍe mahāmuṇḍe jaya nande śivapriye |
jaya kṣemaṃkari śive jaya kalyāṇi revati || 22 ||
[Analyze grammar]

jayome siddhimāṃgalye harasiddhe namostu te |
jayāparṇe jayānande mahiṣā'suraghātini || 23 ||
[Analyze grammar]

jaya medhe viśālākṣi jayānaṃge sarasvati |
jayāśeṣaguṇāvāse jayāvarte surāntake || 24 ||
[Analyze grammar]

jaya saṃkalpasaṃsiddhe jaya trailokyasuṃdari |
jaya śuṃbhaniśuṃbhaghne jaya padme'drisaṃbhave || 25 ||
[Analyze grammar]

jaya kauśiki kaumāri jaya vāruṇi kāmade |
namonamaste śarvāṇi bhūyobhūyo jayāmbike || 26 ||
[Analyze grammar]

trāhi nastrāhi no devi śaraṇye śaraṇāgatān || 27 ||
[Analyze grammar]

saivaṃ stutā bhagavatī devaiḥ sarvairvarānane |
ātmānaṃ darśayāmāsa bhābhāsitadigantaram || 28 ||
[Analyze grammar]

namaskṛtya tu tāmūcuḥ surāste bhayanāśanīm |
balātibalanāmānau hatvā daityau mahābalau |
teṣāṃ caiva mahatsainyaṃ pāhyato mahato bhayāt || 29 ||
[Analyze grammar]

teṣāṃ tadvacanaṃ śrutvā dattvā tebhyo'bhayaṃ tataḥ |
babhūvādbhutarūpā sā trinetrā cenduśekharā || 30 ||
[Analyze grammar]

siṃhārūḍhā mahādevi nānāśastrāstradhāriṇī |
suvaktrā viṃśatibhujā sphūrjadvidyullatopamā || 31 ||
[Analyze grammar]

tatoṃ 'bikā ninādoccaiḥ sāṭṭahāsaṃ muhurmuhuḥ || 32 ||
[Analyze grammar]

tasyā nādena ghoreṇa kṛtsnamāpūritaṃ nabhaḥ |
prakaṃpitākhilā corvī saridvāridhimekhalā || 33 ||
[Analyze grammar]

śailatuṃgastanī ramyā pramadeva bhayāturā |
te'pi tatrāsurāḥ prāptāścaturaṃgabalānvitāḥ || 34 ||
[Analyze grammar]

samyagviditavikrāntāḥ kālāntakayamopamāḥ |
rakṣo dānavadaityāśca pātāle ye'pi saṃsthitāḥ || 35 ||
[Analyze grammar]

te sarva eva daityendrāḥ koṭiśaḥ samupāgatāḥ |
tato'bhavanmahāyuddhaṃ devyāstatrāsuraiḥ saha || 36 ||
[Analyze grammar]

babhūva sarvabrahmāṇḍe hyakāṇḍakṣayakāraṇam |
akṣauhiṇīsahasrāṇi trayastriṃśatsureśvari || 37 ||
[Analyze grammar]

ekaviṃśatsahasrāṇi śatānyaṣṭau ca saptatiḥ |
sānugānāṃ sayodhānāṃ rathānāṃ vātaraṃhasām || 38 ||
[Analyze grammar]

hatvā sā līlayā devī ninye kṣayamanākulā || 39 ||
[Analyze grammar]

tato devyā hatānāṃ ca dānavānāṃ mahaujasām |
gajavājirathānāṃ ca śarīrairāvṛtā mahī || 40 ||
[Analyze grammar]

kabaṃdhanṛtyasaṃkule sravadvasāsthikarddame |
raṇājire niśācarāstato vicerurūrjitāḥ || 41 ||
[Analyze grammar]

śṛgāla gṛdhavāyasāḥ paraṃ prapātamādadhuḥ |
kvacitpare niśācarāḥ prapītaśoṇitotkaṭāḥ |
pratarpya cātmanaḥ pitṝnsamarcayaṃstathā ṛṣīn || 42 ||
[Analyze grammar]

gajānnarāṃsturaṃgamānbabhakṣire sunirghṛṇāḥ |
rathoḍupaistathā pare taraṃti śoṇitārṇavam || 43 ||
[Analyze grammar]

iti pragāḍhasaṃgare surārisaṃghasaṃkule |
virājate'mbikā dhanuḥ śarā'siśūladhāriṇī || 44 ||
[Analyze grammar]

gajendradarpamarddanī turaṃgayūthapothinī |
surārisainyanāśinī itastataḥ prapaśyatī || 45 ||
[Analyze grammar]

siṃhāṣṭakayukte mahā pretake bhūdharahaṃsaśubhrojjaladbhāsvarābhe vṛṣabhasamāne māninīmatho te daityendravīrāḥ paśyaṃtaḥ samudbhūtaroṣāstato'pi jagmurnadanto ravanto ravaṃ meghanādāḥ || 46 ||
[Analyze grammar]

hāhākāraṃ vikurvāṇā hanyamānāstato'surāḥ |
kecitsamudraṃ viviśuradrīnkecicca dānavāḥ || 47 ||
[Analyze grammar]

kecilluñcitamūrdhāno jālmā bhūtvā vane'vasan |
dayādharmaṃ bruvāṇāśca nirgraṃthavratamāsthitāḥ || 48 ||
[Analyze grammar]

kecitprāṇaparā bhītāḥ pākhaṇḍāśramamāsthitāḥ |
hetuvādaparā mūḍhā niḥśaucā nirapekṣakāḥ || 49 ||
[Analyze grammar]

te cādyāpīha dṛśyante loke kṣapaṇakāḥ kila |
tathaiva bhindakāścānye śivaśāstrabahiṣkṛtāḥ || 50 ||
[Analyze grammar]

kecitkaulavratā hyasmindṛśyante sakalairjanaiḥ |
surāstrīmāṃsabhūyiṣṭhā vikarmasthāśca liṅginaḥ || 51 ||
[Analyze grammar]

prāyo naiṣkṛtikāḥ pāpā jihvopasthaparāyaṇā |
evaṃ devyā hatāḥ sarve balātibalasaṃyutāḥ || 52 ||
[Analyze grammar]

prabhāsaṃ kṣetramāsādya saṃsthitā sā tadāmbikā |
yoginīnāṃ catuḥṣaṣṭyā saṃyutā pāpanāśinī |
balātibalanāśīti prabhāse prathitā kṣitau || 53 ||
[Analyze grammar]

devyuvāca |
catuḥṣaṣṭistvayā proktā yoginyo yāḥ sureśvara |
tāsāṃ nāmāni me brūhi sarvapāpaharāṇi ca || 54 ||
[Analyze grammar]

īśvara uvāca |
śṛṇu devi pravakṣyāmi yoginīnāṃ mahodayam |
sarvarakṣākaraṃ divyaṃ mahābhayavināśanam || 55 ||
[Analyze grammar]

ādau tatra mahālakṣmīrnaṃdā kṣemaṃkarī tathā |
śivadūtī mahābhadrā bhrāmarī candramaṇḍalā || 56 ||
[Analyze grammar]

revatī harasiddhiśca durgā viṣamalocanā |
sahajā kulajā kubjā māyāvī śāṃbhavī kriyā || 57 ||
[Analyze grammar]

ādyā sarvagatā śuddhā bhāvagamyā manotigā |
vidyāvidyā mahāmāyā suṣumnā sarvamaṃgalā || 58 ||
[Analyze grammar]

oṃkārātmā mahādevi vedārthajananī śivā |
purāṇānvīkṣikī dīkṣā cāmuṇḍā śaṃkarapriyā || 59 ||
[Analyze grammar]

brāhmī śāṃtikarī gaurī brahmaṇyā brāhmaṇapriyā |
bhadrā bhagavatī kṛṣṇā grahanakṣatramālinī || 60 ||
[Analyze grammar]

tripurā tvaritā nityā sāṃkhyā kuṃḍalinī dhruvā |
kalyāṇī śobhanā nirayā niṣkalā paramā kalā || 61 ||
[Analyze grammar]

yoginī yogasadbhāvā yogagamyā guhāśayā |
kātyāyanī umā śarvā hyaparṇeti prakīrtitā || 62 ||
[Analyze grammar]

catuḥṣaṣṭirmahādevi evaṃ te parikīrtitāḥ |
stotreṇānena divyena bhaktyā yaḥ stauti caṃḍikām || 63 ||
[Analyze grammar]

taṃ putramiva śarvāṇī sarvāpatsvabhirakṣati |
caturdaśyāmathāṣṭamyāṃ navamyāṃ ca viśeṣataḥ || 64 ||
[Analyze grammar]

upavāsaikabhaktena tathaivāyācitena ca |
gṛhītaniyamā devi ye japaṃti ca caṃḍikām || 65 ||
[Analyze grammar]

varṣārdhaṃ varṣamekaṃ vā siddhāste tattvacāriṇaḥ |
āśvayukchuklapakṣe ca manvādiṣvaṣṭakāsu ca || 66 ||
[Analyze grammar]

kṛtvā mahotsavaṃ devīṃ yajecchreyo'bhivṛddhaye |
pāduke dhārayeddevyā durgābhakto hiraṇmaye || 67 ||
[Analyze grammar]

pramādavighnaśāṃtyarthaṃ kṣurikāṃ ca sadā pumān |
paśumāṃsāsavaiścaivamāsuraṃ bhāvamāśritāḥ || 68 ||
[Analyze grammar]

ye yajantyambikāṃ te syurdaityā aiśvaryabhoginaḥ |
devatvaṃ sāttvikā yāṃti sāttvikīṃ bhaktimāsthitāḥ || 69 ||
[Analyze grammar]

etatte kathitaṃ devi māhātmyaṃ pāpanāśanam |
 balātibalanāśinyā devyā sarvārthasādhakam |
prabhāsakṣetrasaṃsthāyāḥ saṃkṣepātkīrtivardhanam || 70 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye balātibaladaityaghnīmāhātmyavarṇanaṃnāmaikonaviṃśatyuttaraśatatamo'dhyāyaḥ || 119 ||
[Analyze grammar]