Chapter 118

[English text for this chapter is available]

īśvara uvāca |
tato gacchenmahādevi gopyādityamanuttamam |
bhūteśādvāyave bhāge dhanuṣāṃ triṃśakentare || 1 ||
[Analyze grammar]

balātibaladaityaghnyā dakṣiṇāgneyasaṃsthitam |
dhanuṣāṃ daśake devi saṃsthitaṃ pāpanāśanam || 2 ||
[Analyze grammar]

tasyotpattiṃ pravakṣyāmi mahāpāpaharāṃ śubhām |
yāṃ śrutvā mānavo bhaktyā duḥkhaśokaiḥ pramucyate || 3 ||
[Analyze grammar]

purā kṛṣṇo mahātejā yadā prabhāsamāgataḥ |
sahito yādavaiḥ sarvaiḥ ṣaṭpañcāśatikoṭibhiḥ || 4 ||
[Analyze grammar]

ṣoḍaśaiva sahasrāṇi gopyastatra samāgatāḥ |
lakṣamekaṃ tathā ṣaṣṭirete kṛṣṇasutāḥ priye || 5 ||
[Analyze grammar]

tatra prābhāsike kṣetre saṃsthitāḥ pāpanāśane |
yādavasthalamāsādya yāvadraivatako giri || 6 ||
[Analyze grammar]

tatra dvādaśavarṣāṇi saṃsthitāste mahābalāḥ |
kṣetraṃ pavitramādāya śivaliṃgāni te pṛthak |
sthāpayāñcakrire sarve hyaṃkitāni svanāmabhiḥ || 7 ||
[Analyze grammar]

evaṃ samagraṃ tatkṣetraṃ yāvaddvādaśayojanam |
dhvajaliṃgāṃkitaṃ cakruḥ sarve yādavapuṃgavāḥ || 8 ||
[Analyze grammar]

hastahastāntare devi prāsādāḥ kṣetra madhyataḥ |
suvarṇakalaśopetāḥ patākākulitāṃbarāḥ |
virājaṃte tu tatrasthāḥ kīrtistaṃbhā hareriva || 9 ||
[Analyze grammar]

tato gopyo mahādevi ādyā yāḥ ṣoḍaśa smṛtāḥ |
tāsāṃ nāmāni te vakṣye tāni hmekamanāḥ śṛṇu || 10 ||
[Analyze grammar]

laṃbinī candrikā kāntā krūrā śāntā mahodayā |
bhīṣaṇī nandinī'śokā suparṇā vimalā'kṣayā || 11 ||
[Analyze grammar]

śubhadā śobhanā puṇyā haṃsasyaitāḥ kalāḥ smṛtāḥ |
haṃsa eva mataḥ kṛṣṇaḥ paramātmā janārdanaḥ || 12 ||
[Analyze grammar]

tasyaitāḥ śaktayo devi ṣoḍaśaiva prakīrtitāḥ |
candrarūpī tataḥ kṛṣṇaḥ kalārūpāstu tāḥ smṛtāḥ || 13 ||
[Analyze grammar]

saṃpūrṇamaṇḍalā tāsāṃ mālinī ṣoḍaśī kalā |
pratipattithimārabhya vicaratyāsu candramāḥ || 14 ||
[Analyze grammar]

ṣoḍaśaiva kalā yāstā gopīrūpā varānane |
ekaikaśastāḥ saṃbhinnāḥ sahasreṇa pṛthakpṛthak || 15 ||
[Analyze grammar]

evaṃ te kathitaṃ devi rahasyaṃ jñānasaṃbhavam |
evaṃ yo veda puruṣaḥ sa jñeyo vaiṣṇavo budhaiḥ || 16 ||
[Analyze grammar]

atha tābhiḥ kṛtāñjñātvā prāsādānyādavaiḥ pṛthak |
tato gopyo'pi tāḥ sarvāḥ sahasrāṇi tu ṣoḍaśa |
kṛṣṇamājñāpya bhāvena sthāpayāṃcakrire ravim || 17 ||
[Analyze grammar]

ṛṣibhirnāradādyaistāstathā kṣetranivāsibhiḥ |
taṃ pratiṣṭhāpayāmāsuḥ pratiṣṭhāvidhinā ravim || 18 ||
[Analyze grammar]

pratiṣṭhite tataḥ sūrye dadurdānāni bhūriśaḥ |
tataḥ kṣetranivāsibhyo gobhūhemāṃbarāṇi ca || 19 ||
[Analyze grammar]

tatasta ṛṣayaḥ sarve saṃtuṣṭā hṛṣṭamānasāḥ |
cakrurnāma ravestatra gopyādityeti viśrutam |
sarvapāpa haraṃ devaṃ mahāsaubhāgyadāyakam || 20 ||
[Analyze grammar]

evaṃ kṛte kṛtārthāstāḥ saṃprāpyātimahadyaśaḥ |
jagmuryathāgataṃ sarvā dvārakāṃ kṛṣṇasaṃyutāḥ || 21 ||
[Analyze grammar]

punaḥ kālāntare devi śāpāddurvāsasaḥ priye |
yādavasthalatāṃ prāptāḥ prabhāse pāpanāśane || 22 ||
[Analyze grammar]

evaṃ te kathito devi gopyādityasamudbhavaḥ |
māhātmyaṃ tasya te vacmi pūjāvandanajaṃ kramāt || 23 ||
[Analyze grammar]

asminmitravane devi yo gopībhiḥ pratiṣṭhitaḥ |
tasya darśanamātreṇa duḥkhaśokaiḥ pramucyate || 24 ||
[Analyze grammar]

sutapteneha tapasā yajñairvā bahudakṣiṇaiḥ |
tāṃ gatiṃ te narā yānti ye gopīravimāśritāḥ || 25 ||
[Analyze grammar]

yena sarvātmanā bhāvo gopyāditye niveśitaḥ |
maheśvari kṛtārthatvātsa ślāghyo dhanya eva saḥ || 26 ||
[Analyze grammar]

api naḥ sa kule dhanyo jāyate kulapāvanaḥ |
bhāgyavānbhaktibhāvena yena bhānurupāsitaḥ || 27 ||
[Analyze grammar]

saptamyāṃ pūjayedyastu māghe māsyuṣasi priye |
saptāvarānsapta pūrvānpitṝnsopyuddharennaraḥ || 28 ||
[Analyze grammar]

chinatti rogānduśceṣṭāndurjayāñjayati hyarīn || 29 ||
[Analyze grammar]

na saptamyāṃ spṛśettailaṃ nīlavastraṃ na dhārayet |
na cāpyāmalakaiḥ snānaṃ na kuryātkalahaṃ kvacit || 30 ||
[Analyze grammar]

nīlaraktena vastreṇa yatkarma kurute dvijaḥ |
snānaṃ dānaṃ japo homaḥ svādhyāyaḥ pitṛtarpaṇam |
vṛthā tasya mahāyajñā nīlasūtrasya dhāraṇāt || 31 ||
[Analyze grammar]

nīlīraktaṃ yadā vastraṃ viprastvaṃgeṣu dhārayet |
ahorātroṣito bhūtvā pañcagavyena śuddhyati || 32 ||
[Analyze grammar]

romakūpe yadā gacchedrasaṃ nīlasya kasyacit |
patitastu bhavedviprastribhiḥ kṛcchrairvyapohati || 33 ||
[Analyze grammar]

nīlamadhyaṃ yadā gacchetpramādādbrāhmaṇaḥ kvacit |
ahorātroṣito bhūtvā pañcagavyena śuddhyati || 34 ||
[Analyze grammar]

nīladāru yadā bhidyedbrāhmaṇānāṃ śarīrake |
śoṇitaṃ dṛśyate tatra dvijaścāndrāyaṇaṃ caret || 35 ||
[Analyze grammar]

kuryādajñānato yastu nīlaṃ vai dantadhāvanam |
kṛtvā kṛcchradvayaṃ tasya śuddhiruktā manīṣibhiḥ || 36 ||
[Analyze grammar]

ityetatkathitaṃ devi gopyādityamahodaya |
pāpaghnaṃ sarvajantūnāṃ śrutaṃ sarvārthasādhakam || 37 ||
[Analyze grammar]

gavāṃ śatasahasraistu dattairyatkurujāṃgale |
puṇyaṃ bhavati deveśi tadgopyādityadarśane || 38 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye gopyādityamāhātmyavarṇanaṃnāmāṣṭādaśottaraśatatamo'dhyāyaḥ || 118 ||
[Analyze grammar]