Chapter 107

[English text for this chapter is available]

īśvara uvāca |
atha pūjāvidhānaṃ te kathayāmi samāsataḥ |
bhaktibhedānpṛthaktasya brahmaṇo bālarūpiṇaḥ || 1 ||
[Analyze grammar]

rathayātrāvidhānaṃ tu stotramaṃtravidhikramam |
vividhā bhaktiruddiṣṭā manovākkāyasaṃbhavā || 2 ||
[Analyze grammar]

laukikī vaidikī cāpi bhavedādhyātmikī tathā |
dhyānadhāraṇayā yā tu vedānāṃ smaraṇena ca |
brahmaprītikarī caiṣā mānasī bhaktirucyate || 3 ||
[Analyze grammar]

maṃtravedanamaskārairagniśrāddhavidhānakaiḥ |
jāpyaiścāraṇyakaiścaiva vācikī bhaktirucyate || 4 ||
[Analyze grammar]

vratopavāsaniyamaiściteṃdriyanirodhibhiḥ |
kṛcchra sāṃtapanaiścānyaistathā cāṃdrāyaṇādibhiḥ || 5 ||
[Analyze grammar]

brahmoktaiścopavāsaiśca tathānyaiśca śubhavrataiḥ |
kāyikī bhaktirākhyātā trividhā tu dvijanmanām || 6 ||
[Analyze grammar]

goghṛtakṣīradadhibhirmadhvikṣusukuśodakaiḥ |
gaṃdhamālyaiśca vividhairvastubhiścopapādibhiḥ || 7 ||
[Analyze grammar]

ghṛtagugguladhūpaiśca kṛṣṇāgurusugaṃdhibhiḥ |
bhūṣaṇai haimaratnādyaiścitrābhiḥ sragbhireva ca || 8 ||
[Analyze grammar]

nyāsaiḥ parisaraiḥ stotraiḥ patākābhistathotsavaiḥ |
nṛtyavāditragītaiśca sarvavastūpahārakaiḥ || 9 ||
[Analyze grammar]

bhakṣyabhojyānna pānaiśca yā pūjā kriyate naraiḥ |
pitāmahaṃ samuddiśya sā bhaktirlaukikī matā || 10 ||
[Analyze grammar]

vedamaṃtrahavirbhāgaiḥ kriyā yā vaidikī smṛtā || 11 ||
[Analyze grammar]

darśe ca paurṇamāsyāṃ ca karttavyaṃ cāgnihotrajam |
prāśanaṃ dakṣiṇādānaṃ puroḍāśa iti kriyā || 12 ||
[Analyze grammar]

iṣṭirdhṛtiḥ somapānaṃ yājñiyaṃ karma sarvaśaḥ |
ṛgyajuḥ sāmajāpyāni saṃhitādhyayanāni ca |
kriyate brahmāṇamuddiśya sā bhaktirvedikocyate || 13 ||
[Analyze grammar]

prāṇāyāmaparo nityaṃ dhyānavānvijiteṃdriyaḥ |
bhaikṣyabhakṣī vratī cāpi sarvapratyāhṛteṃdriyaḥ || 14 ||
[Analyze grammar]

dhāraṇaṃ hṛdaye kṛtvā dhyāyamānaḥ prajeśvaram |
hṛtpadmakarṇikāsīnaṃ raktavarṇaṃ sulocanam || 15 ||
[Analyze grammar]

paśyannuddyotitamukhaṃ brahmāṇaṃ sukaṭītaṭam |
raktavarṇaṃ caturbāhuṃ varadābhayahastakam |
evaṃ yaściṃtayeddevaṃ brahmabhaktaḥ sa ucyate || 16 ||
[Analyze grammar]

vidhiṃ ca śṛṇu me devi yaḥ smṛtaḥ kṣetravāsinām || 17 ||
[Analyze grammar]

nirmamā nirahaṃkārā niḥsaṃgā niṣparigrahāḥ |
caturvargepi niḥsnehāḥ samaloṣṭāśmakāṃcanāḥ || 18 ||
[Analyze grammar]

bhūtānāṃ karmabhirnityaṃ trividhairabhayapradāḥ |
prāṇāyāmaparā nityaṃ paradhyānaparāyaṇāḥ || 19 ||
[Analyze grammar]

jāpinaḥ śucayo nityaṃ yatidharmakriyāparāḥ |
sāṃkhyayogavidhijñā ye dharmavicchinnasaṃśayāḥ || 20 ||
[Analyze grammar]

brahmapūjāratā nityaṃ te viprāḥ kṣetravāsinaḥ |
tairyathā pūjanīyo vai bālarūpī pitāmahaḥ || 21 ||
[Analyze grammar]

tathāhaṃ kīrttayiṣyāmi śṛṇuṣvaikamanāḥ priye |
snātvā tu vimale tīrthe śuklāṃbaradharaḥ śuciḥ |
pūjopahārasaṃyuktastato brahmāṇamarcayet || 22 ||
[Analyze grammar]

pūrvaṃ saṃsnāpya vidhinā paṃcāmṛtarasodakaiḥ |
gomūtraṃ gomayaṃ kṣīraṃ dadhi sarpiḥ kuśodakam || 23 ||
[Analyze grammar]

gāyatryā gṛhya gomūtraṃ gaṃdhadvāreti gomayam |
āpyāyasveti ca kṣīraṃ dadhikrāvṇeti vai dadhi || 24 ||
[Analyze grammar]

tejo'si śukramityājyaṃ devasya tvā kuśodakam |
āpohiṣṭheti maṃtreṇa paṃcagavyena snāpayet || 25 ||
[Analyze grammar]

kapilāpaṃcagavyena kuśavāriyutena ca |
snāpayenmaṃtrapūtena brahmasnānaṃ hi tatsmṛtam || 26 ||
[Analyze grammar]

varṣakoṭisahasraistu yatpāpaṃ samupārjitam |
surajyeṣṭhaṃ tu saṃsnāpya dahetsarvaṃ na saṃśayaḥ || 27 ||
[Analyze grammar]

evaṃ saṃsnāpya vidhinā brahmāṇaṃ bālarūpiṇam |
karpūrāgarutoyena tataḥ saṃsnāpayeddvijaḥ || 28 ||
[Analyze grammar]

evaṃ kṛtvārccayeddevaṃ gāyatrīnyāsayogataḥ |
mūrdhnaḥ pādatalaṃ yāvatpraṇavaṃ vinyasedbudhaḥ || 29 ||
[Analyze grammar]

takāraṃ vinyasenmūrdhni sakāraṃ mukhamaṇḍale |
vikāraṃ kaṃṭhadeśe tu tukāraṃ cāṃgasaṃdhiṣu || 30 ||
[Analyze grammar]

vakāraṃ hṛdi madhye tu rekāraṃ pārśvayordvayoḥ |
ṇikāraṃ dakṣiṇe kukṣau yakāraṃ vāmasaṃjñite || 31 ||
[Analyze grammar]

bhakāraṃ kaṭinābhisthaṃ gokāraṃ pārśvayordvayoḥ |
dekāraṃ jānunornyasya vakāraṃ pādapadmayoḥ || 32 ||
[Analyze grammar]

syakāramaṃguṣṭhayornyasya dhīkāramurasi nyaset |
makāraṃ jānumūle tu hi kāraṃ guhyamāśritam || 33 ||
[Analyze grammar]

dhikāraṃ hṛdaye nyasya yokāraṃ cādharoṣṭhake |
yokāraṃ ca tathaivānyamuttaroṣṭhe nyasetsudhīḥ || 34 ||
[Analyze grammar]

nakāraṃ nāsikāgre tu prakāraṃ netramāśritam |
cokāraṃ ca bhruvormadhye dakāraṃ prāṇamāśritam || 35 ||
[Analyze grammar]

yātkāraṃ ca lalāṭāṃte vinyasedvai sureśvari |
nyāsaṃ kṛtvā'tmano dehe deve kuryāttathā priye || 36 ||
[Analyze grammar]

sarvopahārasaṃpannaṃ kṛtvā samyaṅnirīkṣayet |
kuṃkumāgarukarpūracaṃdanena vimiśritam || 37 ||
[Analyze grammar]

gaṃdhatoyairupaskṛtya gāyatryā praṇavena ca |
prokṣayetsarvadravyāṇi paścādarcanamārabhet || 38 ||
[Analyze grammar]

divyai puṣpaiḥ sugaṃdhaiśca mālatīkamalādibhiḥ |
aśokaiḥ śatapatraiśca bakulaiḥ pūjayetkramāt || 39 ||
[Analyze grammar]

kṛṣṇāgarusudhūpena ghṛtadīpaistathottamaiḥ |
tataḥ pradāpayettatra naivedyaṃ vividhaṃ kramāt || 40 ||
[Analyze grammar]

khaṇḍalaḍḍukaśrīveṣṭakāṃsārāśokapallavaiḥ |
svastikollipikādugdhā tilaveṣṭakilāṭikām || 41 ||
[Analyze grammar]

phalāni caiva pakvāni mūlamaṃtreṇa dāpayet |
ṛgvedaṃ ca yajurvedaṃ sāmavedaṃ ca pūjayet || 42 ||
[Analyze grammar]

jñānaṃ vairāgyamaiśvaryaṃ dharmaṃ saṃpūjayedbudhaḥ |
īśānādikramāddevi diśāsu vidiśāsu ca || 43 ||
[Analyze grammar]

caturddaśavidyāsthānāni brahmaṇo'gre prapūjayet |
hṛdayāni tato nyasya devasya purataḥ kramāt || 44 ||
[Analyze grammar]

āpohiṣṭheti ṛgiyaṃ hṛdayaṃ parikīrttitam |
ṛtaṃ satyaṃ śikhā proktā udutyaṃ netramādiśet || 45 ||
[Analyze grammar]

citraṃ devānāmityevaṃ sarvalokeṣu viśrutam |
brahmaṃste chādayāmīti kavacaṃ samudāhṛtam || 46 ||
[Analyze grammar]

bhūrbhuvaḥ svaritīreśa pūjanaṃ parikīrtitam |
gāyatryā pūjayeddevamoṃkāreṇābhimaṃtritam || 47 ||
[Analyze grammar]

praṇavenāparānsarvānṛgvedādīnprapūjayet |
gāyatrī paramo maṃtro vedamātā vibhāvarī || 48 ||
[Analyze grammar]

gāyatryakṣaratattvaistu brahmāṇaṃ yastu pūjayet |
upoṣya paṃcadaśyāṃ tu sa yāti paramaṃ padam || 49 ||
[Analyze grammar]

saṃsārasāgaraṃ ghoramuttitīrṣurdvijo yadi |
prabhāse kārttike māsi brahmāṇaṃ pūjayetsadā || 50 ||
[Analyze grammar]

yasya darśanamātreṇa aśvamedha phalaṃ labhet |
kastaṃ na pūjayedvidvānprabhāse bālarūpiṇam || 51 ||
[Analyze grammar]

yasyaikadivasaprāṃte sadevāsuramānavāḥ |
vilayaṃ yāṃti deveśi kastaṃ na pratipūjayet || 52 ||
[Analyze grammar]

pitā yaḥ sarvadevānāṃ bhūtānāṃ ca pitāmahaḥ |
yasmādeṣa sa taiḥ pūjyo brāhmaṇaiḥ kṣetravāsibhiḥ || 53 ||
[Analyze grammar]

rudrarūpī viśvarūpī sa eva bhuvaneśvaraḥ |
paurṇamāsyāmupoṣitvā brahmāṇaṃ jagatāṃ patim |
arcayedyo vidhānena so'śvamedhaphalaṃ labhet || 54 ||
[Analyze grammar]

kārttike māsi devasya rathayātrā prakīrttitā |
yāṃ kṛtvā mānavo bhaktyā yāti brahmasalokatām || 55 ||
[Analyze grammar]

kārttike māsi deveśi paurṇamāsyāṃ caturmukham |
mārgeṇa carmaṇā sārddhaṃ sāvitryā ca paraṃtapaḥ || 56 ||
[Analyze grammar]

bhrāmayennagaraṃ sarvaṃ nānāvādyaiḥ samanvitam |
sthāpayedbhrāmayitvā tu sakalaṃ nagaraṃ nṛpaḥ || 57 ||
[Analyze grammar]

brāhmaṇānbhojayitvāgre śāṃḍileyaṃ prapūjya ca |
āropayedrathe devaṃ puṇyavāditraniḥsvanaiḥ || 58 ||
[Analyze grammar]

rathāgre śāṃḍilīputraṃ pūjayitvā vidhānataḥ |
brāhmaṇānvācayitvā ca kṛtvā puṇyāhamaṃgalam || 59 ||
[Analyze grammar]

devamāropayitvā tu rathe kuryātprajāgaram |
nānāvidhaiḥ prekṣaṇakairbrahmaśeṣaiśca puṣkalaiḥ || 60 ||
[Analyze grammar]

nāroḍhavyaṃ rathe devi śūdreṇa śubhamicchatā |
nādharmeṇa viśeṣeṇa muktvaikaṃ bhojakaṃ priye || 61 ||
[Analyze grammar]

brahmaṇo dakṣiṇe pārśve sāvitrīṃ sthāpayetpriye |
bhojakaṃ vāmapārśve tu purataḥ paṃkajaṃ nyaset || 62 ||
[Analyze grammar]

evaṃ tūryaninādaiśca śaṃkhaśabdaiśca puṣkalaiḥ |
bhrāmayitvā rathaṃ devi puraṃ sarvaṃ ca dakṣiṇam |
svasthāne sthāpayedbhūyaḥ kṛtvā nīrājanaṃ budhaḥ || 63 ||
[Analyze grammar]

ya evaṃ kurute yātrāṃ bhaktyā yaścāpi paśyati |
rathaṃ vā'karṣayedyastu sa gacchedbrahmaṇaḥ padam || 64 ||
[Analyze grammar]

yo dīpaṃ dhārayettatra brahmaṇo rathapṛṣṭhagaḥ |
padepade'śvamedhasya sa phalaṃ viṃdate mahat || 65 ||
[Analyze grammar]

yo na kārayate rājā rathayātrāṃ tu brahmaṇaḥ |
sa pacyate mahādevi raurave kālamakṣayam || 66 ||
[Analyze grammar]

tasmātsarvaprayatnena rāṣṭrasya kṣemamicchatā |
rathayātrāṃ viśeṣeṇa svayaṃ rājā pravarttayet || 67 ||
[Analyze grammar]

pratipadbrāhmaṇāṃścāpi bhojayedvi dhivatsudhīḥ |
vāsobhirahataiścāpi gandhamālyānulepanaiḥ || 68 ||
[Analyze grammar]

kārttike māsyamāvāsyāṃ yastu dīpapradīpanam |
śālāyāṃ brahmaṇaḥ kuryātsa gacchetparamaṃ padam || 69 ||
[Analyze grammar]

utsaveṣu ca sarveṣu sarvakāle viśeṣataḥ |
pūjayeyurimaṃ viprā brahmāṇaṃ jagatāṃ gurum || 70 ||
[Analyze grammar]

yathākṛtyaprayogeṇa samyakchraddhā samanvitāḥ |
pūjyo divyopacāreṇa yathāvittānusārataḥ || 71 ||
[Analyze grammar]

evaṃ te kathitaṃ devi pūjāmāhātmyamuttamam |
prabhāsakṣetramāhātmyaṃ brahmaṇaḥ bālarūpiṇaḥ || 72 ||
[Analyze grammar]

tasyāhaṃ kathayiṣyāmi nāmnāmaṣṭottaraṃ śatam |
pradattvā ca paṭhitvā ca yajñāyutaphalaṃ labhet || 73 ||
[Analyze grammar]

gāyatryā lakṣajāpyena samyagjaptena yatphalam |
tatphalaṃ samavāpnoti stotrasyāsya udīraṇāt || 74 ||
[Analyze grammar]

idaṃ stotravaraṃ divyaṃ rahasyaṃ pāpanāśanam |
na deyaṃ duṣṭabuddhīnāṃ nindakānāṃ tathaiva ca || 75 ||
[Analyze grammar]

brāhmaṇāya pradātavyaṃ śrotriyāya mahātmane |
viṣṇunā hi purā pṛṣṭaṃ brahmaṇaḥ stotramuttmam || 76 ||
[Analyze grammar]

keṣukeṣu ca sthāneṣu devadeva pitāmaha |
saṃcintyastanmamācakṣva tvaṃ hi sarvaviduttama || 77 ||
[Analyze grammar]

brahmovāca |
puṣkare'haṃ suraśreṣṭho gayāyāṃ prapitāmahaḥ |
kānyakubje vedagarbho bhṛgukṣetre caturmukhaḥ || 78 ||
[Analyze grammar]

kauberyāṃ sṛṣṭikartā ca nandipuryāṃ bṛhaspatiḥ |
prabhāse bālarūpī ca vārāṇasyāṃ surapriyaḥ || 79 ||
[Analyze grammar]

dvārāvatyāṃ cakradevo vaidiśe bhuvanādhipaḥ |
pauṃḍrake puṇḍarīkākṣaḥ pītākṣo hastināpure || 80 ||
[Analyze grammar]

jayaṃtyāṃ vijayaścāsau jayantaḥ puruṣottame |
vāḍeṣu padmahasto'haṃ tamolipte tamonudaḥ || 81 ||
[Analyze grammar]

āhicchatryāṃ janānaṃdaḥ kāñcīpuryāṃ janapriyaḥ |
karṇāṭasya pure brahmā ṛṣikuṇḍe munistathā || 82 ||
[Analyze grammar]

śrīkaṇṭhe śrīnivāsaśca kāmarūpe śubhaṃkaraḥ |
ucchriyāṇe devakarttā sraṣṭā jālaṃdhare tathā || 83 ||
[Analyze grammar]

mallikākhye tathā viṣṇurmahendre bhārgavastathā |
gonardaḥ sthavirākāre hyujjayinyāṃ pitāmahaḥ || 84 ||
[Analyze grammar]

kauśāṃbyāṃ tu mahādevo hyayodhyāyāṃ tu rāghavaḥ |
viraṃciścitrakūṭe tu vārāho vindhyaparvate || 85 ||
[Analyze grammar]

gaṃgādvāre suraśreṣṭho himavante tu śaṃkaraḥ |
dehikāyāṃ srucāhastaḥ padmahastastathā'rbude || 86 ||
[Analyze grammar]

vṛndāvane padmanetraḥ kuśa hastaśca naimiṣe |
gopakṣetre ca govindaḥ surendro yamunātaṭe || 87 ||
[Analyze grammar]

bhāgīrathyāṃ padmatanurjanānando janasthale |
kauṃkaṇe ca sa madhvakṣaḥ kāmpilye kanakaprabhaḥ || 88 ||
[Analyze grammar]

kheṭake cānnadātā ca śaṃbhuścaiva kratusthale |
laṃkāyāṃ caiva paulastyaḥ kāśmīre haṃsavāhanaḥ || 89 ||
[Analyze grammar]

vasiṣṭhaścārbude caiva nāradaścotpalāvane |
medhake śrutidātā ca prayāge yajuṣāṃ patiḥ || 90 ||
[Analyze grammar]

śivaliṃge sāmavedo markaṭe ca madhupriyaḥ |
nārāyaṇaśca gomante vidarbhāyāṃ dvija priyaḥ || 91 ||
[Analyze grammar]

aṃkulake brahmagarbho brahmavāhe sutapriyaḥ |
indraprasthe durādharṣaścaṃpāyāṃ suramardanaḥ || 92 ||
[Analyze grammar]

virajāyāṃ mahārūpaḥ surūpo rāṣṭravardhane |
kadaṃbake janādhyakṣo devādhyakṣaḥ samasthale || 93 ||
[Analyze grammar]

gaṃgādharo rudrapīṭhe supīṭhe jaladaḥ smṛtaḥ |
tryaṃbake tripurāriśca śrīśaile ca trilocanaḥ || 94 ||
[Analyze grammar]

mahādevaḥ plakṣapure kapāle vedhanāśanaḥ |
śṛṅgaverapure śaurirnimiṣe cakradhārakaḥ || 95 ||
[Analyze grammar]

nandipuryāṃ virūpākṣo gautamaḥ plakṣapādape |
mālyavānhastināthe tu dvijendro vācike tathā || 96 ||
[Analyze grammar]

indrapuryāṃ divānātho bhūtikāyāṃ puraṃdaraḥ |
haṃsabāhuśca candrāyāṃ caṃpāyāṃ garuḍapriyaḥ || 97 ||
[Analyze grammar]

mahodaye mahāyakṣaḥ suyajñaḥ pūtake vane |
siddheśvare śuklavarṇo vibhāyāṃ padmabodhakaḥ || 98 ||
[Analyze grammar]

devadāruvane liṃgī udaketha umāpatiḥ |
vināyako mātṛsthāne alakāyāṃ dhanādhipaḥ || 99 ||
[Analyze grammar]

trikūṭe caiva goviṃdaḥ pātāle vāsukistathā |
kovidāre yugādhyakṣaḥ strīrājye ca surapriyaḥ || 100 ||
[Analyze grammar]

pūrṇagiryāṃ subhogaśca śālmalyāṃ takṣakastathā |
amare pāpahā caiva aṃbikāyāṃ sudarśanaḥ || 101 ||
[Analyze grammar]

naravāpyāṃ mahāvīraḥ kāntāre durganāśanaḥ |
padmavatyāṃ padmagṛho gagane mṛgalāñchanaḥ || 102 ||
[Analyze grammar]

aṣṭottaraṃ nāmaśataṃ yatraitatparipaṭhyate |
tatraiva mama sāṃnidhyaṃ trisaṃdhyaṃ madhusūdana || 103 ||
[Analyze grammar]

teṣāmapi yastvekaṃ paśyedvai bālarūpiṇam |
sarveṣāṃ labhate puṇyaṃ pūrvoktānāṃ ca vedhasām || 104 ||
[Analyze grammar]

etairyo nāmabhiḥ kṛṣṇa prabhāse stauti māṃ sadā |
sthānaṃ me vijayaṃ labdhvā modate śāśvatīḥ samāḥ || 105 ||
[Analyze grammar]

mānasaṃ vācikaṃ caiva kāyikaṃ caiva duṣkṛtam |
tatsarvaṃ nāśamāyāti mama stotrā'nu kīrtanāt || 106 ||
[Analyze grammar]

puṣpopahaurardhūpaiśca brāhmaṇānāṃ ca tarpaṇaiḥ |
dhyānena ca sthireṇāśu prāpyate yatphalaṃ naraiḥ |
tatphalaṃ samavāpnoti mama stotrānu kīrtanāt || 107 ||
[Analyze grammar]

brahmahatyādipāpāni iha loke kṛtānyapi |
akāmataḥ kāmato vā tāni naśyaṃti tatkṣaṇāt || 108 ||
[Analyze grammar]

idaṃ stotraṃ mamābhīṣṭaṃ śṛṇuyādvā paṭhecca vā |
sa muktaḥ pātakaiḥ sarvaiḥ prāpnuyānmahadīpsitam || 109 ||
[Analyze grammar]

anyadrahasyaṃ te vacmi śṛṇu kṛṣṇa yathārthataḥ || 110 ||
[Analyze grammar]

āgneyaṃ tu yadā ṛkṣaṃ kārtikyāṃ bhavati kvacit |
mahatī sā tithirjñeyā prabhāse mama vallabhā || 111 ||
[Analyze grammar]

prājāpatyaṃ yadā ṛkṣaṃ tithau tasyāṃ bhavedyadi |
sā mahākārtikī puṇyā devānāmapi durlabhā || 112 ||
[Analyze grammar]

maṃde vārke gurau vā'pi kārtikī kṛttikāyutā |
tatrāśvamedhikaṃ puṇyaṃ dṛṣṭvā vai bālarūpiṇam || 113 ||
[Analyze grammar]

viśākhāsu yadā sūryaḥ kṛttikāsu ca candramāḥ |
sa yogaḥ padmako nāma prabhāse durlabho hare || 114 ||
[Analyze grammar]

tasminyoge naro dṛṣṭvā prabhāse bālarūpiṇam |
pāpakoṭiyuto vā'pi yamalokaṃ na paśyati || 115 ||
[Analyze grammar]

īśvara uvāca |
ityevaṃ kathitaṃ stotraṃ brahmaṇā haraye punaḥ |
mayā tava samākhyātaṃ māhātmyaṃ brahmadaivatam || 116 ||
[Analyze grammar]

sarvapāpaharaṃ nṛṇāṃ śrutaṃ sarvārthasādhakam |
bhūmidānaṃ ca dātavyaṃ tatra yātrāphalepsubhiḥ || 117 ||
[Analyze grammar]

kamaṃḍaluḥ śvetavastraṃ mahādānāni ṣoḍaśa |
tatraiva devi deyāni brahmaṇe bālarūpiṇe || 118 ||
[Analyze grammar]

mahāparvaṇi saṃprāpte kuryuḥ pārāyaṇaṃ dvijāḥ |
sarve te brāhmaṇā devi kṣetramadhyanivāsinaḥ || 119 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsa kṣetramāhātmye bālarūpibrahmaṇo māhātmyavarṇanaṃnāma saptottaraśatatamo'dhyāyaḥ || 107 ||
[Analyze grammar]