Chapter 49

[English text for this chapter is available]

īśvara uvāca |
tasmācchukreśvarādgaccheddevi liṃgaṃ mahāprabham |
śanaiścaraiśvaraṃnāma mahāpātakanāśanam || 1 ||
[Analyze grammar]

budheśvarātpaścimato hyajādevyagnigocare |
tasyā dhanuḥ paṃcakena nātidūre vyavasthitam || 2 ||
[Analyze grammar]

kalpaliṃgaṃ mahādevi pūjitaṃ devadānavaiḥ |
chāyāputreṇa saṃtaptaṃ tapaḥ paramaduṣkaram || 3 ||
[Analyze grammar]

anādi nidhano devo yena liṃge'vatāritaḥ |
prāptavānyo graheśatvaṃ bhaktyā śaṃbhoḥ prasādataḥ || 4 ||
[Analyze grammar]

yasya dṛṣṭyā bibheti sma devāsuragaṇo mahān |
na sa ko'pyasti vai prāṇī brahmāṃḍe sacarācare || 5 ||
[Analyze grammar]

devo vā dānavo vāpi sauriṇā pīḍito na yaḥ |
śanivāreṇa saṃpūjya bhaktyā saurīśvaraṃ śivam || 6 ||
[Analyze grammar]

śamīpatrairmahādevi tilamāṣaguḍaudanaiḥ |
saṃtarpya tu vidhānena dadyātkṛṣṇaṃ vṛṣaṃ dvije || 7 ||
[Analyze grammar]

stutvā stotraiśca vividhaiḥ purāṇaśrutisaṃbhavaiḥ |
atha vaikena deveśaḥ stotreṇa paritoṣitaḥ || 8 ||
[Analyze grammar]

rājñā daśarathenaiva kṛtena tu balīyasā |
stutyaḥ saurīśvaro devaḥ sarvapīḍopaśāṃtaye || 9 ||
[Analyze grammar]

devyu vāca |
kathaṃ daśaratho rājā cakre śānaiścarīṃ stutim |
kathaṃ saṃtuṣṭimagamattasya devaḥ śanaiścaraḥ || 10 ||
[Analyze grammar]

īśvara uvāca |
raghuvaṃśe'ti vikhyāto rājā daśaratho balī |
cakravartī sa vijñeyaḥ saptadvīpādhipaḥ purā || 11 ||
[Analyze grammar]

kṛttikāṃte śaniṃ kṛtvā daivajñairjñāpito hi saḥ |
rohiṇīṃ bheda yitvā tu śaniryāsyati sāṃpratam || 12 ||
[Analyze grammar]

uktaṃ śakaṭabhedaṃ tu surāsurabhayaṃkaram |
dvādaśābdaṃ tu durbhikṣaṃ bhaviṣyati sudāruṇam || 13 ||
[Analyze grammar]

etacchrutvā munervākyaṃ maṃtribhiḥ sahito nṛpaḥ |
ākulaṃ tu jagaddṛṣṭvā paurajānapadādikam || 14 ||
[Analyze grammar]

vadaṃti satataṃ lokā niyamena samāgatāḥ |
deśāśca nagara grāmā bhayākrāṃtāḥ samaṃtataḥ |
munīnvasiṣṭhapramukhānpapraccha ca svayaṃ nṛpaḥ || 15 ||
[Analyze grammar]

daśaratha uvāca |
samādhānaṃ kimatrāste brūhi me dvija sattama || 16 ||
[Analyze grammar]

vasiṣṭha uvāca |
prājāpatye ca nakṣatre tasminbhinne kutaḥ prajāḥ |
ayaṃ yogo hyasādhyastu brahmādīṃdrādibhiḥ suraiḥ || 17 ||
[Analyze grammar]

tadā saṃciṃtya manasā sāhasaṃ paramaṃ mahat |
samādāya dhanurdivyaṃ divyairastraiḥ samanvitam || 18 ||
[Analyze grammar]

rathamāruhya vegena gato nakṣatramaṃḍalam || |
rathaṃ tu kāṃcanaṃ divyaṃ maṇiratnavibhūṣitam || 19 ||
[Analyze grammar]

dhvajaiśca cāmaraiśchatraiḥ kiṃkiṇairatha śobhitam |
haṃsavarṇahayairyuktaṃ mahāketusamanvitam || 20 ||
[Analyze grammar]

dīpyamāno mahāratnaiḥ kirīṭamukuṭojjvalaḥ |
babhrāja sa tadākāśe dvitīya iva bhāskaraḥ || 21 ||
[Analyze grammar]

ākarṇaṃ cāpamāpūrya saṃhārāstraṃ niyojya ca |
kṛttikāṃte śaniṃ jñātvā praviśya kila rohiṇīm || 22 ||
[Analyze grammar]

dṛṣṭvā daśaratho'syāgre tasthau sabhrukuṭīmukhaḥ |
saṃhārāstraṃ śanirdṛṣṭvā surāsuravimarddanam || 23 ||
[Analyze grammar]

hasitvā tadrayātsauriridaṃ vacanamabravīt |
pauruṣaṃ tava rājeṃdra paraṃ ripubhayaṃkaram || 24 ||
[Analyze grammar]

devāsuramanuṣyāśca siddhavidyādharoragāḥ |
mayā vilokitāḥ sarve bhayaṃ cāśu vrajaṃti te || 25 ||
[Analyze grammar]

tuṣṭohaṃ tava rājeṃdra tapasā pauruṣeṇa ca |
varaṃ brūhi pradāsyāmi manasā yadabhīpsitam || 26 ||
[Analyze grammar]

daśaratha uvāca |
rohiṇīṃ bhedayitvā tu na gaṃtavyaṃ tvayā śane |
saritaḥ sāgarā yāvadyāvaccadrārkamedinī || 27 ||
[Analyze grammar]

yācitaṃ te mayā saure nānya micchāmi te varam |
evamuktaḥ śaniḥ prādādvaraṃ tasmai tu śāśvatam || 28 ||
[Analyze grammar]

prāpyaivaṃ tu varaṃ rājā kṛtakṛtyo'bhavattadā |
punarevābravītsaurirvaraṃ varaya suvrata || 29 ||
[Analyze grammar]

prārthayāmāsa hṛṣṭātmā varamevaṃ śanestadā |
na bhettavyaṃ ca śakaṭaṃ tvayā bhāskaranaṃdana || 30 ||
[Analyze grammar]

dvādaśābdaṃ tu durbhikṣaṃ na kartavyaṃ kadācana |
kīrtireṣā madīyā ca trailokye vicariṣyati || 31 ||
[Analyze grammar]

īśvara uvāca |
varadvayaṃ tataḥ prāpya hṛṣṭaromā sa pārthivaḥ |
rathopari dhanurmuktvā bhūtvā caiva kṛtāṃjaliḥ || 32 ||
[Analyze grammar]

dhyātvā sarasvatīṃ devīṃ gaṇanāthaṃ vināyakam |
rājā daśarathaḥ stotraṃ saureridamathākarot || 33 ||
[Analyze grammar]

rājovāca |
namo nīlamayūkhāya nīlotpalanibhāya ca |
namo nirmāṃsadehāya dīrghaśmaśrujaṭāya ca || 34 ||
[Analyze grammar]

namo viśālanetrāya śuṣkodarabhayāna ka |
namaḥ paruṣagātrāya sthūlaromāya vai namaḥ || 35 ||
[Analyze grammar]

namo nityaṃ kṣudhārttāya nityataptāya vai namaḥ |
namaḥ kālāgnirūpāya kṛtāṃtaka namostu te || 36 ||
[Analyze grammar]

namo dīrghāya śuṣkāya kāladṛṣṭe namo'stu te |
namaste koṭarākṣāya durnirīkṣyāya vai namaḥ || 37 ||
[Analyze grammar]

namo ghorāya raudrāya bhīṣaṇāya karā line |
namaste sarvabhakṣāya valīmukha namo'stu te || 38 ||
[Analyze grammar]

sūryaputra namaste'stu bhāskare bhayadāyaka |
adhodṛṣṭe namastubhyaṃ vapuḥśyāma namo'stu te || 39 ||
[Analyze grammar]

namo mandagate tubhyaṃ nistriṃśāya namonamaḥ |
namasta ugrarūpāya caṇḍatejāya te namaḥ || 40 ||
[Analyze grammar]

tapasā dagdhadehāya nityaṃ yogaratāya ca |
namaste jñānanetrāya kaśyapātmajasūnave || 41 ||
[Analyze grammar]

tuṣṭo dadāsi vai rājyaṃ ruṣṭo harasi tatkṣaṇāt |
devāsuramanuṣyāśca paśupakṣisarīsṛpāḥ || 42 ||
[Analyze grammar]

tvayā vilokitāḥ saure dainyamāśu vrajaṃti ca |
brahmā śakro yamaścaiva ṛṣayaḥ saptatārakāḥ || 43 ||
[Analyze grammar]

rājyabhraṣṭāśca te sarve tava dṛṣṭyā vilokitāḥ |
deśāśca nagaragrāmā dvīpāścaivādrayastathā || 44 ||
[Analyze grammar]

raudradṛṣṭyā tu ye dṛṣṭāḥ kṣayaṃ gacchaṃti tatkṣaṇāt || 45 ||
[Analyze grammar]

prasādaṃ kuru me saure varārthe'haṃ tavāśritaḥ |
saure kṣamasvāparādhaṃ sarvabhūtahitāya ca || 46 ||
[Analyze grammar]

īśvara uvāca |
evaṃ stutastadā saurī rājñā daśarathena ca |
maharājaḥ śanirvākyaṃ hṛṣṭaro mā'bravīdidam || 47 ||
[Analyze grammar]

śaniruvāca |
tuṣṭo'haṃ tava rājendra stavenānena suvrata |
varaṃ brūhi pradāsyāmi svecchayā raghunaṃdana || 48 ||
[Analyze grammar]

daśaratha uvāca |
adyaprabhṛti piṃgākṣa pīḍā kāryā na kasyacit |
devāsuramanuṣyāṇāṃ paśupakṣisarīsṛpām || 49 ||
[Analyze grammar]

śaniruvāca |
grahāṇāṃ durgraho jñeyo grahapīḍāṃ karomyaham |
adeyaṃ prārthitaṃ rājankiṃcidyuktaṃ dadāmyaham || 50 ||
[Analyze grammar]

tvayā proktaṃ mama stotraṃ ye paṭhi ṣyaṃti mānavāḥ |
puruṣāśca striyo vāpi madbhayenopapīḍitāḥ || 51 ||
[Analyze grammar]

devāsuramanuṣyāstu siddhavidyādharoragāḥ |
mṛtyusthāne sthito vāpi janmaprāṃtagatastathā || 52 ||
[Analyze grammar]

ekakālaṃ dvikālaṃ vā teṣāṃ śreyo dadāmyaham |
pūjayitvā japetstotraṃ bhūtvā caiva kṛtāṃjaliḥ || 53 ||
[Analyze grammar]

tasya pīḍāṃ na caivāhamiha kuryāṃ kadācana |
janmasthāne sthito vāpi mṛtyusthāne sthito'pi ca || 54 ||
[Analyze grammar]

janmaṛkṣe ca lagne ca daśāsvaṃtardaśāsu ca |
rakṣāmi satataṃ tasya pīḍāṃ cānyagrahasya ca || 55 ||
[Analyze grammar]

anenaiva prakāreṇa rpāḍāmuktastvasau bhavet |
etatproktaṃ mayā dattaṃ varaṃ ca raghunaṃdana || 56 ||
[Analyze grammar]

īśvara uvāca |
varadvayaṃ ca saṃprāpya rājā daśarathaḥ purā |
mene kṛtārthamātmānaṃ namaskṛtya śanaiścaram || 57 ||
[Analyze grammar]

śaniṃ stutvā'bhyanujñāto rathamāruhya vīryavān |
svasthānaṃ gatavānrājā pūjyamāno divaukasaiḥ || 58 ||
[Analyze grammar]

ya idaṃ prātarutthāya saurivāre paṭhennaraḥ |
sarvagrahodbhavā pīḍā na bhavedbhuvi tasya tu || 59 ||
[Analyze grammar]

śanaiścaraṃ smareddevaṃ nityaṃ bhaktisamanvitaḥ |
pūjayitvā paṭhetstotraṃ tasya tuṣyati bhāskariḥ || 60 ||
[Analyze grammar]

iti te kathitaṃ devi māhātmyaṃ śanidaivatam |
sarvapāpopaśamanaṃ sarvakāmaphalapradam || 61 ||
[Analyze grammar]